Friday, January 18, 2008

عن بطولة كأس الأمم ... يا خوفي يابدران



لاصوت يعلو الأن علي صوت المعركة .. اقصد عن سفر فريقنا لبطولة افريقيا في غانا
وبصراحة يا جماعة انا عايز اقول اننا مش هنفوز بالبطولة دي ودة في رأيي لعدة اسباب
اولا: لأن التاريخ بيقول كدة احنا عمرنا مافوزنا ببطولتين وراء بعض بالعكس بعد كل بطولة بناخدها البطولة التانية بنخرج من الأدوار الأولي لعلكم تذكرون بعد بطولة 98 في بوركينا فاسوا والهزيمة الشهيرة من السعودية في بطولة كأس القارات احنا خسرنا بعدها في بطولات 2000و2002و 2004
يعني احنا مافوزناش غيربعدها ب8سنين
ممكن دلوقتي حد يقول بس ياعم الحاج ايه اللي يمنع ان اللي ماحصلش قبل كدة يحصل السنة دي ومصر تفوز .. في رأي ان اكتر من سبب يمنع ودة ينقلنا لثانيا
ثانيا : ان احنا عندنا المنظومة الكروية كلها تدار بطريقة غلط احنا لما فوزنا 2006 ماكانش لأن عندنا خطة واضحة او منظمة لاء كان في اسباب تانية البطولة في ملعبنا وكان في شحن جماهيري ومعنوي جامد جدا كمان الحظ لعب معانا دور كبير لكن في بطولة غانا احنا هنكون محرومين من الأوبشن دة يعني هنلعب بأمكانيتنا لوحدها وانا متهيألي ان امكانيتنا متأهلناش للفوز لأنها بصراحة ضعيفة قوي لأن المنظومة كلها خطأ علي سبيل المثال موضوع الأحتراف اللي بنتكلم فيه من سنين السنين في كل دول افريقيا اللاعب بيحترف من سن صغير جدا بيروح اوربا وينتقل من نادي صغير لنادي اكبر ليزداد خبرة مع السنين وتقدم الوقت والأندية لا تمانع في احتراف لا عبيها بأسعار قليلة علشان كدة نسبة اللاعبين الأفارقة المحترفين كبيرة جدا اما عندنا فمصر فالاعب اللي بيسافر بنفضل وراه لحد مايرجع فبتكون النتيجة اننا لا نستفيد من عملية الأحتراف بالعكس بتيجي علينا بخسارة لأن اللي بيمشي بعشرة من مصر بيرجع ب15 يعني احنا اللي بندفع للأحتراف مش العكس ولعل امثلة مثل احمد بلال واحمد فتحي وعمرو زكي وحسني عبدربه ومحمد عبد الله وغيرهم كتير من اللي راحوا ورجعوا اكبر دليل علي كلامي
المشكلة بقي في اللاعب نفسه يفضل يتكلم عن رغبته في الأحتراف واول مايحترف يقولك عايز ارجع وطبعا دة احد اسبابه الرئيسية تنشأة الاعب المصري نفسه وعدم غرز طبيعة الأحتراف في داخله منذ ان يكون صغيرا
ثالثا : طريقة اللعب نفسها يعني مثلا احنا بنلاقي الاعبين الأفارقةلما بيلعبومع فرقهم بيلعبوا بنفس طريقة اللعب اللي بيلعبوا بيها مع فرقهم الأوربية ألا في مصر تلاقي الأعبين المحترفين اول مابيلعبوا مع المنتخب يقلبوا مصري علي طول وينسوا كل اللعب الأوربي اللي بيلعبوه مع فرقهم ولما تيجي تسأل طيب ليه يا جماعة كدة يقولك طريقة لعب المنتخب نفسها بتجبرنا علي كدة رغم انهم من المفروض يعني يعلوا بمستوي المنتخب مش ينزلوا لمستواه لكن دي بتكون عوامل وراثية في السلوك نفسه زي المصرين اللي لما يسافروا برة تلاقيهم بيحافظواعلي نظافة الشوارع وقوانين المرور واول لما يجوا مصر تلاقي العكس تماما لا محافظة على نظافة شوراع ولا اهتمام ولا احترام لقواعد المرور
ومتهيألي دي بردة اسباب تضعف من فرص فوزنا بالبطولة
رابعا : طريقة تعاملنا مع البطولة نفسها بنتعامل معها بطريقة يلا الهمة ياولاد انتوا ابطال افريقا ومصر كلها مستنياكوا ترجعوا بالكاس وإذا كنتوا بذلتوا قيراط مجهود في 2006 لازم تبذلوا مليون قيراط في غانا
وطبعا دي طريقة يعني صباح الغباء في التعامل لأنها مش بس بتزود الضغط العصبي والنفسي علي اللاعبين لاء دي بتتعامل مع البطولة وكأنها معركة حربية وطبعا احنا مش بنحارب احنا بنلعب كورة والكورة فيها فائز وخاسر والفائز نهنيه والخاسر نقوله هارد لك ونبحث عن اساب هزيمته لكن طريقتنا دي زي ماقولتلكوا يعني اغبي طريقة في التعامل مع البطولة بالظبط زي ماتعملنا مع النادي الأهلي في كأس العالم اول مرة فضلنا بقي يلا يارجالة والناس مستنياكوا ترجعوا بالكاس وانتوا ابطال افريقيا ولازم تكونوا ابطال العالم فكانت النتيجة ان الأهلي خسر كل مبارياته وادا اداء سيء جدا ورجع بخفي حنين زي المثل العربي مابيقول ودة نفسه اللي ممكن يحصل مع منتخبنا في ظل الطريقة الغبية اللي بيتم التعامل بيها مع البطولة احنا ممكن نقولهم بكل سهولة ألعبوا واعملوا اللي عليكوا وادرسوا منافسينكوا كويس وربنا يوافقكوا
قصدي اقول يعني نتعامل بحكمة من غير مانزود الطغط علي اللاعبين لأنه اصلا زايد
يعني عايز اقول المفروض نصلح المنظومة كلها خصوصا ان عندنا خبراء كرويين كتير جدا وكمان المسؤلين عن الكورة عارفين العيوب ايه بالظبط وعارفين ازي نعالجها
اخر حاجة عايز اقولها ربنا يوفق المنتخب مش حبا في الكورة ولا المنتخب لكن لأننا للأسف بقينا عايشين في زمان الكورة فيه بقت هي الشيئ الوحيد اللي بيفرح الناس ويرسم علي وجوههم البسمة حتي لو كانت ابتسامة
وقتية او خادعة

3 comments:

(( قيثارة الأحلام )) said...

انت عندك حق بس احنا المصريين دايما طيبين اوى واى حاجه بتفرحنا من كتر ما الحزن مالى قلوبنا
كنت سعيده جدا بزيارة مدونتك واتمنى انك تزورنى فى مدونتى

حياتي قنبلة ذرية said...

الحمد لله بدران طلع راجل جامد اوي

و الحمد لله قضي علي الخوف للي جواك و فرح 85 مليون مصر

ده غير العرب اللي فرحولنا و الحمد لله


علي فكرة خوفك كان شيء طبيعي

لكن الحمد لله ان بقية المصريين كان عندهم امل كبير في الله
و ربنا قال( انا عند ظن عبدي بي)

و تفاءلوا خيرا تجدوه

mostafarayan said...

hشكرا يا جماعة على مروروكوا الجميل