Sunday, December 13, 2009

الرئيس السابق يوقع على اعترافاته فى مكتبه البلد



ازيكو يا احلى اصحاب فى الدنيا يارب تكونو بخير وفى احسن صحه وحال
انا غايب بقالى كتير اناعارف بس عذرى انى راجع بخبر حلو
ان شاء الله يوم الخميس بعد القادم
24-12 سوف يتم حفله توقيع مجموعتى القصصيه
اعترافات رئيس سابق فى مكتبه البلد الساعه السابعه مساء
الناس اللي كانت بتسالنى دايما على حفله التوقيع واللي كانو بيقولو دايما يا مصطفى عايزين نتقابل الحفله اهه مالكوش بقى حجه لازم تيجو كلكم علشان اشوفكم واسمع ارائكم حول الكتاب
ومعرفه تفاصيل اكثر عن سر الرئيس السابق وسر اعترافاته وحكايه الزوجه بنت الاصول وتفاصيل الحياه السريه لنجلاء السيد والقرار الذي اتخدته هدير والمفاجأه التى حدثت اثناء اجازة الزواج وحكايه البنت ساره الخنيقه وقرأه سيناريو فيلم الموسم وسر جلسات المزاج واغنيه الورده البيضاء والمزيد والمزيد عن تفاصيل ال 19 قصه التى يتضمنهم الكتاب
ولمعرفه المزيد عن من التفاصيل يمكنكم الرجوع لايفينت الحفل
http://www.facebook.com/event.php?eid=195861336657

و جروب الكتاب على الفيس بوك
http://www.facebook.com/inbox/?drop&ref=mb#/group.php?gid=49930751780
ادعوكم ايضا لمشاهده تسجيل حلقتى فى قناه النيل الثقافيه برنامج ثقافيه كافيه فى البوست السابق
واخيرا : هنتظركم جميعا ولكم كل محبتى وتقديرى
تحديث مهم جدا
اصدقائى احتفاء بحفل توقيع الرئيس السابق
نشرت اذاعه حريتنا على موقعها الالكترونى خبرا مطولا عن الحفل على هذا اللينك
ادعوكم لقرائته
شكرا لاذاعه حريتنا
ولصديقى محمود ابو بكر موصول المحبه

Monday, November 16, 2009

فيديو حلقه قناه النيل الثقافيه للكاتب مصطفى ريان

video

"الحمد لله الذي بنعمته الصالحات"

اصدقائي على هذا الفديو حلقتى فى برنامج ثقافيه كافيه على قناه النيل الثقافيه

هو التصوير من كاميرا موبايل لأنه للأسف دى النسخه الوحيده اللي معايا دلوقتى من الحلقه .. وبالمناسبه دي اشكر صديقى محمد عادل الذي قام بتصوير

الحلقه

وفى انتظار رأيكم عنها ولكم منى كل الحب والموده

تحديث مهم جدا

اصدقائي ادعوكم جميعا لقرأه هذا العرض المشوق عن الكتاب على مدونه صديقتى الجميله منى سليم ( مدونه عالم مولان )

على هذا اللينك

http://mulan22.blogspot.com/2009/11/blog-post_17.html

Thursday, November 5, 2009

اعترافات رئيس سابق على النيل الثقافيه والأهرام المسائي .. الكبير بيتكلم

"الحمد لله الذي بنعمته تتم الصالحات "

ازيكو يا احلى اصحاب فى الدنيا يارب تكونو بخير وفى احسن صحه وحال
فى الحقيقه يا جماعه لو حبينا نضع عنوان للبوست ده فيكون بوست المفاجأت ذات العيار الثقيل لأنه حافل بمفاجأتين انا متأكد انكم هتقرحو بيهم زي مانا فرحان
الاولى : ان شاء الله هيتم استضافتى يوم الجمعه القادم 6-11-2009على قناه النيل الثقافيه فى برنامج ( ثقافيه كافيه ) الساعه الخامسه فى حديث مشوق وممتع عن مجموعتى القصصيه ( اعترافات رئيس سابق ) طبعا يا جماعه ان شاء الله انتو لازم تشوفو الحلقه وكمان هستنى مشاركتم ومداخلاتكم على تليفون البرنامج 25079758ومتهيألى ماحدش له حجه البرنامج يوم الاجازه وبعد الغداء يعنى ان شاء الله لازم تتفرجو وتشاركو معانا
وان شاء الله الحلقه تطلع حلوه وفى احسن صوره وتعجبكم .. بس يا جماعه لوحد قدر يصور الفقره اكون شاكر له قوي لأنه غالبا مش هعرف اخد منهم تسجيل لها وطبعا انا هحتاج التسجيل ده قوى

اما بقى المفاجأه التانيه : فهى نزول خبر عن الكتاب فى جرنال
( الأهرام المسائي) يوم الأثنين الماضي .. مش هقدر اوصفلكم ازاي انا فرحان بالتحقيق ده رغم إنه مش اول مره يتكتب عني فى الجرايد .. لكن المره دي لها طعم مختلف .. طعم كده برائحه الكبار لأنه جي من اكبر مؤسسه صحفيه واعلاميه فى مصر والشرق الأوسط ومن جريده الجميع يكن لها كل احترام وتقدير وبالمناسبه دي عايز اشكر الصحفيه الجميله هبه اسماعيل لأهتمامها بالكتاب وبنشر تحقيق موسع عنه فى صفحه الثقافه
واخيرا اصدقائي لكم منى كل محبه وتقدير

Saturday, October 31, 2009

تصورى .. قصيده شعر جديده


تصورى
كنت عايز اكتب قصيده عن حكايتنا
لكن لاقتها احقر من انى اتكلم عليها
هويتك لكن لاقيتك غبيه وعقيمه
مع السلامه
ماليش معاكى حتى ذكريات ممكن ابكى عليها
ماتستهاليش حتى حبر القلم والاوراق
والدقيتين اللي هقعد اكتبك فيهم
ماتستاهليش اشغل دماغى علشانك
ماتتستاهليش حتى الكلمتين اللي هشتمك بيهم
يادوبك كليك يمين دليت وانساكى طول عمري
ضغطه واحده ونعشك يخرج
من حياتى ومن قلبي
وماتفتكريش انى ممكن ابكى عليكى
ولا اشكى بسببك للناس همي
انتِ مش اكترمن سيجاره شربتها
ودوست عليها برجليا ونسيتها خلاص
ومستحيل أرجع ابص عليها
وإلا هبقى مسخه قدام الناس
وماتفتكريش انى هقولك فى الوادع
هتندمي بكره عليا والكلمتين دول
تصورى .. ماتستاهليش حتى انى اقولهملك
ماتستاهليش غير انى اقفل بابى فى وشك
واقولك روحى الله يساهلك
لكن بجد انا لو ندمان
ندمان على الوقت اللى راح معاكى
لكن بردومارحش هدر
اتعلمت ماضيعش وقتى
مع قلب قاسي زي الحجر
انا كنت بالنسبه لك شمس وربيع
انا كنت مطر
يدفى روحك ويروي ارضك الصحرا
ينبت شجر
انا كنت حياه
وانت خفتِ من الحياه
فموتى لوحدك ماتستاهليش
حتى من بعد موتك
اقول عليكى كلمه اه

Wednesday, October 28, 2009

يا أًُمه ضحكت من جهلها الأمم

لا حديث الان يعلو فى مصرنا الحبيبه على حديث مباره الجزائر وكأننا سنحرر القدس
او نستعيد الاقصى او نخرج امريكا من العراق عندما نفوز بهذه المباره . قد يقول قائل
لا بأس فالكره تفرج عن الشعوب ولكن عندما تتحول الكره إلى افيون يخدر الناس فهذه جريمه بحق شعب كامل .. عندما نرى اقزام الكره تفتح لهم كل الابواب ويحتفى بهم اكثر من علماء الامه ومبدعوها ومخترعوها فهذه كارثه يجب ان يحاسب فاعلها وبعنفhttp://www.moheet.com/show_news.aspx?nid=312336&pg=4
على هذ اللينك تصريح لحازم الهوارى عضو مجلس اداره اتحاد الكره بأنه سوف يطلب من الرئيس مبارك اقامه تمثال للحضري فى ميدان التحرير ( اهم ميادين مصر واحد اهم ميادين العالم اجمع ) فى حاله تأهلنا لكاس العالم ... هل رأيتم سطحيه واستفزاز وغياء اكثر من ذلك! تمثال من اجل الحضرى .. من اجل مباره كره وافاضل مثل يوسف ادريس ومجدي يعقوب واحمد وزيل والعقاد وعبد الحميد جوده السحار وغيرهم وغيرهم لم يفكر احد فيهم ولا في تكريمهم ثم يسأل البعض لماذا نحن من دول العالم الثالث ولماذا لا نتقدم رغم ان الاجابه واضحه للعيان ولا تحتاج للشرح ولاتعليق هذا التصربح يدمى القلب يجعلك تبكى دما بدل الدموع فأن تشعر انه لا امل وان من يقود الشعب هذا هو مستوى تفكيرهم تجعلك تتاكد ان النهايه السوداء قريبه .. قريبه جدا بالامس القريب فاز خمسه من مبدعينا بجائزه من اهم جوائز الادب العربى جائزه ابو ظبى الثقافيه ولم يهتم احد . لم تقم الدنيا ولم تقعد لم يظهروا فى البرامج التلفزيونيه ولم تتسابق الجرائد لأجراء لقاءات معهم رغم ان هذا الحدث لو وقع فى بلاد اخرى لأقيم لهؤلاء المبدعين اكبر الحفلات ولكرمو اكبر التكريم ولطالب الكثير بأقامه التماثيل لهم فالأدب هو الذي يبقى فى ذاكره الأمه .. ونحن الان نتفاخر بيوسف ادريس ونجيب محفوظ وعلاء الاسوانى وغيرهم فعندما تذكر مصر تذكر هؤلاء ولا نقول فاروق جعفر او غيره
واخيرا اصدقائى الكًُتاب إذا كان هذا حال بلادنا فإما ان تهاجرو لبلاد تحترمكم وتقدركم او تغيرو نشاطكم لكره القدم
آهٍ يا امه ضحكت من جهلها الأمم

Monday, October 5, 2009

المدون احمد بلال يكتب عن اعترافت الرئيس السابق

اصدقائي الاعزاء فى فى اول المقالات النقديه عن مجموعتى القصصيه
(اعترافات رئيس سابق ) كتب المدون الشاب الجميل
احمد بلال على مدونته هذا المقال الذي اعتز به كثيرا
وهذا نص البوست
***********************

اعترافات رئيس سابق
Confessions of a former president
كتاب جديد أنتهى من قرائته
بمعنى أكثر دقة أنتهيت من قراءة النسخة الالكترونية منه على جهازى الخاص
نسخة أهداء من المؤلف شخصياً
شاكراً له الهدية
الكتاب من شاب يعيش فى زمننا هذا
وهو مصطفى ريان
و الذى يحكى من خلال حياتنا المعاصرة عن مشاكل و مواقف أجتماعية
بشكل بسيط لا يحمل الكثير من التعقيد
هى مجموعة قصصية
قصص قصيرة لا يربطها أى رابط ما بين شخصياتها أو أحداثها
غير أنها جميعاً تحمل فكرة واحدة
الثورة
الثورة على اوضاعك الحالية الاوضاع التى تقمعك و تمنعك من التقدم و التغيير و التطور
يناقش العديد من المواقف الحياتية للشباب بشكل ساخر شيئاً ما
لا يمنعك من الابتسام و الضحك فى بعض الاحيان
بلغة و لهجة عامية فى بعض الاحيان
سهلة و قريبة من لغة الشباب التقليدية مع العديد من المصطلحات ذات الطابع الغربى
والذى تفرضه أحداث القصة على المؤلف
أحداث الكتاب تدور كلها فى القاهرة العاصمة بالرغم من المؤلف لم يشر الى ذلك ماعدا قصة واحدة تدور فى قلب الاسكندرية
أغنية وردة بيضاء
طبعاً مع التنويه الذى لم يحتج إليه الكاتب عن أن أحداث قصته الرئيسية
أعترافات رئيس سابق
من خياله الشخصى و هذا لا يحتاج لبرهان لأن مصر لم و لن يكون لها رئيس أسبق على قيد الحياة أبداً
هذا إذا كانت الدولة المشار اليها هى مصر نفسها
بعض القصص أنتبهت لها أكثر من الآخرين و حملت لى بعض الافكار
منها

بث مباشر من حياة شاب معاصر
جلسات المزاج
حدث فى أجازة زواج
زوجة بنت أصول
مظاهر خداعة
حدث فى سيتى ستارز
قرار هدير
طلاق شهادة الدكتوراه
الحياة السرية لنجلاء السيد

************************
كتاب: أعترافات رئيس سابق "مجموعة قصص قصيرة"
مؤلف: مصطفى ريان
دار نشر: دار أكتب للنشر
سنة النشر:2009
لقراءه المقال على مدونه احمد بلال هذا اللينك
واخيرا شكرا صديقى احمد على مقالك الذي اسعدنى كما لا تتخيل

Wednesday, September 30, 2009

رأي وليد وسؤال من عندي

يقول لى دائما صديقى العزيز وليد الزهيري
انى هبقى كاتب كبير قوي وهيجي يوم يفرج اولاده على اهداء كتبى له ويقولهم الكاتب الكبيرده صاحبى
سؤال لوليد ولأي حد شايف كده هو اليوم ده هيجى امتى ؟

Thursday, September 24, 2009

لما ألتقى الاحباب

ازيكو يا احلى اصحاب فى الدنيا
عيد سعيد عليكم كلكم ويارب يتقبل منا صالح العمل فى رمضان
عايز اكلمكم عن لقاء المدونين فى رمضان يوم الخير فى مستشفى ابوالريش ولقائنا فى نادي القوات الجويه مش هحكي عن تفاصيل يوم المستشفى علشان فى ناس كتير حكت عن لكن هحكيلكو عن الناس اللي قبلتهم هناك
اول حد كان خالد (همس الاحباب) وداليا (قوس قزح) اللي بذلو مجهود كبير فى تجميع الناس ونشر الموضوع خاصه يوم المستشفى
كمان شوفت حبيب قلبى وليد الزهيري ( مدونه عارفه مش عارف ليه ) وليد صاحبى من زمان ومن اول الناس اللي عرفتهم فى التدوين وكان نفسي اشوفه قوي وبجد هوحد جميل وشبه كتاباته اللي بيخرج منها عطر الطيبه وبرأه المشاعر وشوفت كمان ابنه مهند وهو ولد زي العسل ( طبعا طالع لأبوه ولصاحب ابوه .. ايه حد عنده مانع؟)
شوفت كمان صديقتى واختى الغاليه والعزيزه واللي كان نفسي اشوفها من زمان
صفاء جلال وطبعا انا مهما قلت عليها مش هوفى حقها انسانه جميله وجدعه وصاحبه صاحبها وتخدمه بعينها وتدافع عنه لأخر لحظه وبنت بلد ودمها زي العسل حد يدخل قلبك ( ويستربع ) فيه من غير اذن
وشوفت كمان بنت منطقتى كيارا ( مدونه عالم مولان ) وهى فى الحقيقه بنت زي العسل
طفله عندها 23سنه متهيألى دي لما تخلف مش هيكون فى اي فرق بينها وبين اولادها طفله كبيره ام لاطفال صغيرين - والله يكون فى عونه بقى يا مولان - وسمعنى احلى سلام اول وتانى وتالت لحدائق حلوان واللي منها
شوفت كمان نور الدين .. وهوفى الحقيقه انسان جميل وروش وابن نكته مش زي ما ممكن تعتقد من كتابته انه حد جامد.. وصلينا العصر مع بعض وفضلنا نتكلم فى حاجات كتير وبالنسبه للموضوع اياه ده فخلاص مالوش دلوقتى اي وجود عندي ولا عنده
وانا مبسوط النى عرفت شخصيته على الطبيعه ويارب يقدر مابينا كل الخير
شوفت كمان ميرا ( مدونه امرأه بعقل رجل ) بنت زي العسل وفضلنا نتكلم فى حاجات كتير قوي قصدي فضلت هي تتكلم - ميرا يا جماعه واخده توكيل الكلام - ومابتحبش حد يعتدي على التوكيل بتاعها
شوفت كمان دعاء مواجهات الصحفيه الجميله المجتهده ومش بعيد بكره تبقى رئيس تحرير الجمهوريه .. بس ساعتها بقى يا دعاء لوحبيتو تعملو معايا حوار ماتبعتليش
صحفى صغير من عندك لازم انت بنفسك اللي تعمليه معايا .. أه احنا بدأين المشوار مع بعض
شوفت كمان فاطيما .. ايه ده حد طيب قوي وقلب يساع كل البشر.. الست دي
ام بالفطره .. احساس الامومه عندها عالى قوي حتى لما بتهزر مع حد بتهزر بالروح دي .. حد يدخل قلبك من غير اذن ورغم انى ماتكلمتش معاها كتير ( ميرا كانت لوكلوك معايا وقتها ) إلا اني بجد فرحان قوي انى شوفتها وحاسس انى عارفها من زمان
شوفت كمان أ-احمد القاضي وهو شخصيه محترمه واراه بجد قيمه وباين انه مثقف وقارئ نهم وخبرته فى الحياه كبيره ( السفر بيضيف على عمر الانسان عمر جديد)
شوفت كمان احمد سو وكيكى عو وسامح ( مدونه خواطرخاطر ) وطبعا الاستاذ شريف الكردي الرجل المحترم الهادئ المثقف وكمان بنت خيخه واي كلام ورحاب ( مدونه كوكب ابي ) وكمان ممدوح الدوح وصيدلانيه طالعه نازله وزوجها واولادها واحمد الصباغ وسومه ( مجنونه فى بلد عاقل ) واستاذ احمد ( رحايا العمر) وصاحب مدونه
مسدس صغير ورانا ( مدونه رنرون ) وكمان ايناس (مدونه نهر الحب ) وكمان صاحبه مدونه ( ساجي) حد محترم قوي وبجد انا احترمتها جدا لأنها ماسبتش حقها فى المطعم بجد كانت اشجعنا واسامه عبد العال
طبعا كان فى ناس تانين بس دول اللي فاكرهم دولقتى او اللي حصل مابينا كلام
طبعا اللقاءات دي مهمه جدا وده انا قلته وهفضل اقوله لازم نكسر حاجز الشاشه اللي بينا ومادام فى مجموعه من البشر على قدر ثقافى متقارب ويجمعهم شئ واحد لازم يتقابلو ويحصل بينهم التقارب الوجدانى والانسانى زي ماحصل التقارب الفكري ده
وحاليا فى فكره اننا نتقابل بشكل دورى بس بندور على مكان يحصل فيه اللقاء ده ويكون مناسب للجميع من حيث مكانه واسعاره لوكان كافيه او نادي او ما شابه وعلشان كده لوحد عنده مكان مقترح ياريت لو يقولنا عليه
واخيرا اصدقائى الاعزاء لكم منى كل المحبه والود
ملحوظه اهلاويه بعد القراه
بعد هزيمه الزمالك كالعاده - ربنا مايقطع له عاده - وفوز الاهلى على البترول ادعو اصدقائى لمشاهده البوست السابق ( هتلر والزمالك ) والتعليق عليه
وكل سنه وانتو طيبين يا كل الاهلويه

Tuesday, September 1, 2009

هتلر والزمالك

ازيكو يا احلى صحاب في الدنيا

فى الفديو ده يا جماعه هتلر بيحكى حكايته مع الزمان قصدى مع الزمالك

وتحيه كبييييييييييييررررررررررررره قووووووووووووويييييييييي

لكل الاهلوييييييييييييييييييييييييييييييييييييييييييييييييه

video

Thursday, August 27, 2009

رساله إلى يوسف ادريس

ازيك يا عم يوسف يا ادريس .. كل سنه وانت طيب .. رمضان كريم
ايه اخبارك .. واخبار الحياه معاك ..
انا عارف انك دلوقتى فى مكان جميل قوي قاعد بتابع بكل فرحه حركه الكتابه الجديده وانك واقف مع العيال الجديده اللي بتحفر فى الصخر علشان تكون لها اسم فى مجال الكتابه .. انت عارف كل ظروفهم وانهم لوحدهم وان كل الكبار راحوا وماحدش واقف جنبهم .. هما بس اللي واقفين جنب بعض بياخدو بإيد بعض ..
انا عارف انك بتشجعهم وبتتدعيلهم .. ولأنى كاتب جديد زي مانت عارف فانت كان لك عندي كلمتين احب تقرأهم .. قايلهملك فى القصيده دي انت عارف بقى محسوبك شاعر كمان .. ياريت تقرأهم كويس لأنهم مهمين قوي

يا ايها الرجل الساكن بداخلى
والمسمى يوسف ادريس : من فضلك اخرج
ماينفعش كل ماجي اكتب قصه ألاقيك طالعلى
ماينفعش كل ما اجي امسك فكره ألاقيك فى وشي
انا عايز اكتب قصصى بنفسي
عايز افرض اسلوبي على شغلي
عايز ابقى انا
واظن ده من حقي
وانت من قلب الورق بلاقيك بتخرجلي
واكم من فكره عبقريه سيبتها
لأنى لاقيتك انت اللى كتبتها
صحيح انا ماعرفكش من زمان
وانشغلت قبلك بالسحار وبطه
واحمد عبد الحليم عبد الله وبمحفوظ وباحسان
لكن انت اول ماشوفتك جننتنى
سكنت قلبى وخطفت عقلى
وعلشان كده بطلب منك انك تسيبنى
خلتنى حتى مش عارف اقرأ لولاد جيلى
وادفع دم قلبى فى كتب وتتركن على الرف
وانت وحدك اللي تبات فى حضن سريري
وانشغل بيك فى النهار
واسهر معاك طول ليلي
ومش سر اقولك ان انا مبهور
ببيت من لحم وبقصه لي لي
وان كنت سيبتك تترك بصمتك
على مجموعتى الاولى
فانا مش هسيبك طول الوقت
انا عايز اكتب روايه يا عم الحاج
وعايز احس ن انا اللى كاتبها مش انت
فبعد اذنك ابعد شويه
خلى الغرام مابينا دلوقتي من بعيد لبعيد
اعمل نفسك مش عارفنى وانا كمان هعمل عبيط
واوعدك اني اول ماخلص هبعتهالك على البيت ..
هبعتهالك على الميل ...
هجيلك الاهرام واشرب معاك الشاي
وهنقعد نتناقش فيها وقت طويل
بس سيبنى انتهي منها
سيبنى احس ان انا اللي كاتبها
ابسط حقوقي اني احس انها بطريقتي
وان انا اللي كاتبها
عاجبك كده ؟ خلتنى اقول نفس الكلام مرتين
وانت عارف ياعم الحاج إنه خطأ شعري كبير
واه من عنيك اللي بتقول كلام كبير
اللي فيها شقاوة الاطفال
وحكمه السنين
اه من نظرتك اللي بتوحي بألف فكره
وبتنور مليون قنديل
وشعرك المسبسب كما الواد حسين فهمي
وزوزو بتغني له يا واد يا تقيل
واه يا كبير
بعترفلك انك شاعر القصه القصيره
واني طفل صغير
بس من حق الصغير يكبر
من حقه يطير بعيد ويفرد الجناحين
وانا نفسي اطير
من غير مساعده منك ولا ملاحيظ
نفسي اغلط واتعلم من اخطائي
وان شالله حتى اقع على جدور رقبتي
وتتكسر الجناحين
بس يبقي اسمي حاولت
ومره وراء التانيه هعرف الغلط
واعرف طريق الصح منين
طولت عليك انا عارف .. بس ايه يعني
مانت ياما اخدت كتير من وقتي
فايه يعنى لما اقولك على طلبي
في صفحتين تلاته ولا حتى كانو عشرين
دي نقطه مبدأ
مسأله حياه او موت
ده الامر بجد خطير
بس تعرف .. انا مش عارف
انا ايه اللي خلانى احبك انت من دون التانين
وتبقى عندي حاجه كبيره
وابنيلك جوايا تمثال عظيم
لو كنت تعرف لو سمحت تقولي
وتبقى عملت فيا جميله .. وريحتلي قلبي
لا لا ماتقولش دلوقتي
خلى الرد ده لبعدين
ومن النهارده لو لاقتنى سيبنى
لو لاقيت ايدي بتتمدلك
وشوفتك فى المكتبه وضحكتلك وبميل عليك
اصرخ في وشي : لاء ماتشترنيش
اقرأ لولاد جيلك وماتقرأنيش
لو كنت بتحبنى اعمل حاجه لاجل تخرج منى
ضحي شويه علشان خاطري
شوفت بقى ؟ بقالى ساعتين بكتبلك لاجل بس تخرج مني
علشان تعرف قرايتك بتاخد قد ايه من وقتى
ابعد عنى بليز
ولو انى عارف ان ده كله كلام فى كلام
وانى متيم بيك
وانك لو على البعد هتقدر
فانا مش هقدر على بعدك عنى

Wednesday, August 19, 2009

عدنا

يا ..بقالى كتير ماكتبتش هنا .. تلاقيكو نسيتونى ونسيتو المدونه
لكن صحيح هو ايه اللي خلانى ابعد طول الفتره دي؟ . مش عارف يمكن بعد مانزلت الكتاب حسيت انى ماعدش عندي جديد اقوله السبب اللي عملت المدونه علشانه خلاص اتحقق .. يمكن بدات اهتم اكتر بالفيس بوك لأنه كان جديد عليا فى استخدامه وكمان علشان اخبار الكتاب توصل لعدد اكبرمن الناس .. اويمكن لأنى فى الفتره الاخيره
جالى حاله ضيق وغضب من المدونات والتدوين كله لأنى لاقيت ان فى ناس كتيره بتألف وبتفتى وبتقول حاجات اقل مايقال عنها انها مصيبه سودا
اويمكن انا عندي شويه مشاكل شخصيه مأثره عليا والحياه مش وردي وردي معايا زي ماناس كتيرللاسف فاكره او يمكن كل الاسباب دي او يمكن حاجات تانيه .. مش عارف
بس كل اللي عايز اقوله كل سنه وانتو طيبين بمناسبه رمضان وبمناسبه العوده للتدوين

Saturday, July 25, 2009

الرئيس السابق يزور مقهى الثقافيه ... هتنور الكافيه يا كبير

" الحمد لله الذي تتم بنعمته الصالحات "
يظهر يا جماعه هيكون فيه استلطاف كبير بينى وبين قناه النيل الثقافيه فبعد ان تمت استضافتى فى برنامج الاجنده سوف يتم استضافتى يوم الاثنين القادم ان شاء الله فى برنامج ( ثقافيه كافيه ) الساعه السادسه مساءا - فى معاد كويس اهو مش بدرى
ولا الناس فى اشغالها - ولكن هذه المره لها طعم مختلف حيث
سيكون معى اصدقائي سحر غريب واحمد الصباغ فى حديث عن مجله ميكانو التى نشترك فيها واتولى انا مسئوليه القسم الادبى وبالطبع سوف يتم الحديث عن مجموعتى (اعترافات رئيس سابق)
منتظر رأيكم ويارب الحلقه تعجبكم

Tuesday, July 14, 2009

اعترافات رئيس سابق فى جريده الدستور.... نورت جرايد المعارضه يا كبير


"الحمد لله الذي بنعمته تتم الصالحات"

فى اطار الاحتفاء الاعلامى الكبير بمجموعتى القصصيه ( اعترافات رئيس سابق)
نشرت جريده الدستور فى عددها الصادر الجمعه 10 -7 تحقيقا اعلاميا موسعا عن المجموعه قامت به الجميله رحاب السيد وصفتها بأنها مجموعه قصصيه بها كل ما يخطر على بال القارئ ويمكنكم ايضا مطالعه الخبر من على موقع الجريده من خلال هذا الرابط
وعلى هذا الرابط ايضا تسيجيلا لحلقتى فى راديو حريتنا لكل اصدقائي اللى سألوعنها
http://rapidshare.com/files/252791446/__1581___1604___1602___1577____1585___1575___1583___1610___1608____1581___1585___1578___1606___1575_.html
فى انتظار ارائكم ولكم كل الحب والود

Thursday, July 9, 2009

حلقه راديو حريتنا مع الكبير


http://rapidshare.com/files/252791446/__1581___1604___1602___1577____1585___1575___1583___1610___1608____1581___1585___1578___1606___1575_.html
ازيكم يا احلى صحاب فى الدنيا
على الرابط دة يا جماعة تسجيل لحوارى فى اذاعه حريتنا
منتظر رأيكم فى الحلقه ولكم كل الحب والود

Sunday, July 5, 2009

الرئيس السابق على قناة نايل لايف ...هتنور قنوات النيل يا كبير

" الحمد لله الذي بنعمته تتم الصالحات"
بشري سارة لكل اصدقائى اللي فاتهم حلقة الانسانيه والثقافيه واذاعة حريتنا
وكمان اصدقائى اللي بيصحو بدرى
ان شاء الله يا جماعة سوف يتم استضافتى غدا الاثنين على قناة نايل لايف في برنامج نهارك سعيد الساعة 9ونص صباحا
فى حديث مشوق عن مجموعتى القصصية اعترفات رئيس سابق
منتظر مشاركتم وتليفوناتكم ويارب الحلقة تعجبكم

Monday, June 29, 2009

الرئيس السابق يزور راديو حريتنا ... هتنور الاذاعة يا كبير

"الحمد لله الذي بنعمته تتم الصالحات "
ازيكم يا احلى اصحاب فى الدنيا
يظهر يا جماعه هيكون بينى وبين اذاعة حريتنا حب واستلطاف كبير فبعد مشاركتى فى برنامج عريس تفصيل
غدا ان شاء الله الثلاثاء 30-6 سيتم استضافتى في برنامج ( يومك حريه )
الساعة الواحدة ظهرا على الهواء وعلى مدى ساعة كامله فى حديث مشوق عن المجموعة وشخصياتها وافكارها وكل ما يخصها
البرنامج اعداد محمود ابو بكر وتقديم ريهام عبد المنعم
فى انتظار مشاركتكم وتليفوناتكم على تليفون رقم 27950706
ولمزيد من المعلومات حول الحلقة زياره هذا الرابط
فى انتظاركم واتمنى الحلقة تعجبكم

Monday, June 22, 2009

درشاوى فى حريتنا..حلقة هتعجبكم قوىىىىىىىىىىىىىىى

"الحمد لله الذي بنعمته تتم الصالحات"
بشرى سارة لكل اصدقائي اللى حابين يتعرفو عليا بصورة اكبر وماقدروش يتفرجو على حلقة النيل الثقافية ولا حلقة قناة الانسانية
ممكن دلوقتى تسمعنى اوديو من خلال حلقة بالقلب ولا العقل على راديو حريتنا
فى برنامج ( عريس تفصيل ) مع نشوى العدوى
دة لينك الحلقة
حملوها ومستنى رأيكم

Thursday, June 18, 2009

الرئيس السابق فى الراية القطرى وموقع كويتيون ومنتدى شريهان... نورت المواقع العربية يا كبير

"الحمد لله الذي بنعمته تتم الصالحات "
السلام عليكم
ازيكم يا احلى صحاب في الدنيا
في الحقيقة اخبار النهاردةانا ماكنتش مخطط لها ولكنى وجدتها مشورة على الانترنت اثناء عملية البحث عن اخبار المجموعة
فقد نشر موقع الراية القطرى- وكما تعرفون هو احد اهم المواقع الاخبارية
على النت - خبرا عن المجموعة على هذا اللينك
ايضا نشر موقع كويتيون خبرا عن المجموعة على هذا اللينك
ايضا نشر منتدى شريهان خبرا عن المجموعة
على هذا اللينك
وبهذه المناسبة اريد ان اشكر توتى فروتى وميمو ( اقرؤ الخبر وانتو تعرفوهم )
تحياتى ومحبتى لكم دوما

Thursday, June 11, 2009

الرئيس السابق في النيل الثقافية .. اول الغيث ثقافية يا كبير

" الحمد لله الذي بنعمته تتم الصالحات "
ان شاء الله يا جماعة انتظرونى يوم السبت القادم 13/6الساعة الواحدة ظهرا
على قناة النيل الثقافية في برنامج الاجندة وذلك لمناقشة مجموعتى القصصية
( اعترافات رئيس سابق ) وايضا للحديث عن تجربتى مع التدوين
في الحقيقة يا جماعة انا فرحان قوى بالقاء دة .. مش بس لأنه اول لقاء تلفزيونى بعد صدور المجموعة ولا لأنه بعد صدورها بوقت قليل ولكن كمان لأني بعتبره مش مجرد لقاء تلفزيونى ولكن اعتراف من المؤسسة الثقافية الرسمية بينا ككتاب جداد بيحفرو فى الصخر علشان يثبتو نفسهم
وطبعا من الجدير بالذكر كما هومعروف ان الرئيس السابق سبق له الظهور في قناة الانسانية ولكن كان ذلك قبل ان يرى النور
واخيرا بشكر المسؤلين عن البرنامج
واتمنى انكم تشوفو اللقاء ومنتظر رأيكم عنه
دمتم بكل الود والحب0

Sunday, June 7, 2009

نشاط اعلامى مكثف للرئيس السابق .. اهلا بيك يا كبير

" الحمد لله الذي بنعمته تتم الصالحات "



ازيكم يا احلى اصدقاء في الدنيا يارب تكونو في احسن صحة وحال



في الحقيقة يا جماعة الفترة اللي فاتت ماكانتش فترة راحة بالنسبة للرئيس السابق هو والمتحدث الرسمي والقائم بجميع اعماله السيد مصطفى ريان كاتب هذه السطور
حيث كانت مليئة بالشحن والظهور الاعلامى




"استمد قصصي من الواقع المعاصر للشباب "


دة كان عنوان الحوار اللي اجرته معايا الصحفية الجميلة اسماء رمضان في جريدة العالم اليوم وفي الحقيقة يا جماعة انا فرحان قوي بالحوار دة لأن اول ظهور اعلامى للرئيس السابق قبل النشر كانبردو مع اسماء رمضان وفي العالمك اليوم ودلوقتي بعد ما صدر الحمد لله اول ظهور اعلامي بردو معاها


وفي الحققية انا عايز احيي اسماء اللي اتحمست قوي للحوار واول ماعرفت ان الكتاب نزل طلبت مني اننا نعمله وقالتلى ان شاء الله هينزل الاسبوع دة وفعلا اجلت كل اللي كانت بتعمله علشان تعمل معايا الحوار وانا في الحقيقة بشكرها جدا


كمان اللي مفرحنى في الحوار دة انى اكتشفت ان جرنال العالم اليوم مطلوب جدا وبيتباع قوام لدرجة انى شخصيا تعبت جدا على بال مالاقيت نسخة وسالت في حدائق حلوان


- حيث اسكن - وفى حلوان وفي المعادي وكله كان بيقولى خلص ومالقتهوش غير في وسط البلد قدام فراشة الجرايد الكبير اللي قدام الامريكين والراجل فعلا قالي الجرنل دة بيخلص بسرعة ودة معناه ان في قراء اكتر هيطلعو علي الرئيس السابق ويعروفو اخباره
الظهور الاعلامى التانى كان في جريدة اليوم السابع
http://www.youm7.com/News.asp?NewsID=104606&SecID=94&IssueID=0
حيث كتب الروائي الكبير وجدى الكومى خبرا مطولا عن الكتاب كان عنوانه
( مصطفى ريان يدون اعترافات رئيس سابق )
تحدث فيه عن قصة اعترافات رئيس سابق وتناول قصص المجموعة بشكل عام
اما الظهور الاعلامي الثالث فقد كان في موقع جود نيوز
حيث نشرت صديقتى العزيزة علا الشربينيى خبر مطولا عن الكتاب ذكرت فيه مجموعة كبيرة من قصص المجموعة ومن موضوعاتها وذكرت ايضا ان القارئ ولابد سيجد نفسه في احدى قصص المجموعة
وانا من هنا اود ان اشكرها واحيها
وان شاء الله انتظرو اخبارا اخرى عن الرئيس السابق
لكن قبل ما انهي عايز اشكر صديقتى الغالية والعزيزة جدا بنت منطقتى منى الشهيرة بكيارا اللي نزلت بوست مخصوص عن الكتاب في مدونتها
http://mulan22.blogspot.com/2009/05/blog-post_26.html
وكانت تقريبا الوحيدة اللي عملت كدة وكتبت عنوان حلو قوي
( اخيرا حلم ابن منطقتى اتحقق )
واستفاد الرئيس السابق من قراء مدونة مشهورة قوي زيها
طبعا لازم اشكرها مرة تانيه وعاشرة ومليون
كمان بشكر كل اصدقائي اللي نشرو غلاف الكتاب عندهم في المدونة .. ربنا يخليكو ليا ولا يحرمنى ابدا منكم
واخيرا مازال الرئيس السابق ينتظر منكم الكثير
ومازلت اتمنى ان ينال اعجابكم وف يانتظار رأيكم عنه
تحياتى لكم جميعا ودمتم بكل الخير

Monday, May 25, 2009

اعترافات رئيس سابق ... نورت الدنيا يا كبير







الحمد لله الذي بنعمته تتم الصالحات





اخيرا وبعد طول صبر وانتظار صدرت مجموعتى القصصية


( اعترافات رئيس سابق ) بالتعاون مع دار اكتب

الحلم يا جماعة اخيرا اتحقق وبقي مسموح للجمهور انه يتعرف على الرئيس السابق ويقرأ اعترفاته


اخيرا يا جماعة تعديت مرحلة الكتابة على الانترنت وبقيت كاتب معترف به في دنيا الادب الرسمية ليا كتاب في السوق والناس بتقراءه حتى لو اصلا ماكانوش بيدخلو على النت


المجموعة تضم 19 قصة قصيرة ينتمى معظمها للادب الساخر والفانتزيا وهي قصص :

هناك فرق – ناسيا العالم من حولي – الحل الامثل – فيلم الموسم – جلسات


المزاج - بث مباشر من حياة شاب معاصر - الذي حدث في مساء ذلك اليوم –


زوجة بنت اصول - سارة الخنيقة – مظاهر خداعة – صديقة من لبنان – حدث في سيتى ستارز - قرار هدير –


اعلان في اهرام الجمعة – طلاق شهادة دكتوراة – الحياة السرية لنجلاءالسيد – اغنية وردة بيضاء


ومسك الختام اعترافت رئيس سابق


تتميز المجموعة بعصرية الموضوعات حيث تناقش اهم القضايا والمشكلات التى نعشيها في حياتنا اليومية مثل البطالة ورتفاع سن الزواج ومواقع الانترنت والمدونات وتأثيرها على حياتنا قصة ( قرار هدير )

انا اول واحد يكتب قصة في الموضوع دة وبقول الكلام دة بس للتاريخ

والمناغشات الزوجية التى تحدث في كل يوم ، والمولات التى اصبحت واقعا ملموسا في حياتنا وتأثيرها على ثقافتنا ، ايضا محاولة استخدام الحيوانات فى الحكي والسرد ( الذي حدث في مساء ذلك اليوم ) حيث البطلة قطة


وظاهرة الدروس الحصوصية ومحاولة التجديد في شكل السرد والحكي القصصي وذلك من خلاله مزجه بالسيناريو السينمائى قصة ( فيلم الموسم )


وايضا القصة الرومانسية التي طلبتم منى كثيرا ان اكتبها وكل ذلك من خلال اسلوب شيق بسيط يدخل القلب من اول وهلة وبلا حدود او حواجز


وطبعا ياجماعة انتو لكم دور كبير في الكتاب دة و انا قلته قبل كدة ومافيش مانع اقوله تانى


- طبعا تقرؤ الكتاب وتقولو رأيكم عنه


- حضور حفلة التوقيع لان انا اخوكم ولأنها هتكون حفلتكم قبل ماتكون حفلتى


- الدعاية المكثفة للكتاب من خلال وضع البانر في مدوناتكم والحديث عنه في بوست منفصل من خلال المدونات وجروبات الفيس بوك


- ارسال رسالة لأصدقاكم من خلال الماسنجر والفيس بوك



- الاشتراك في جروب المجموعة على الفيس بوك وارسال دعوة للاصدقائكم للاشتراك



- الدعاية الفردية ودي اهم نقطة عايزكم يا جماعة تتكلمو عن الكتاب مع اهلكم واصدقائكم وفي كل مكان تكون وموجودين فيه

- كمان لو حد بيشتغل معد برامج او صحفي في جرنال او موقع الكترونى او عارف
واحد معد برامج او بيكتب في موقع او جرنال يكلمه او يبعتلى ايميله وتليفونه وانا اكلمه لأن الاعلام دلوقت بقي مهم جدا في الدعاية للكتب وياما طتب كتير ضعيفة المستوى نجحت لأن اتعملها دعاية مكثفة والعكس ياما كتب جميلة وممتعة ماحدش سمع عنها لأن ماحدش اتكلم عنها ولا عرف الناس بيها


- ولو اي حد عنده اي اقتراح تانى يقولى عليه انا عايزكم يا جدماعة تفننو ازاي نعمل احلى دعاية للمجموعة


حاجة اخيرة عايز اقولها ان انتو احد اسباب ظهور الكتاب لأن تشجعكو ليا خلانى اتحمس للكتاب واصبر على العذاب والشقى اللي شوفته علشان الكتاب يطلع


وبهذه المناسبة عايز اشكر كل من ساهم وساعد في ظهور الكتاب


- والله سبحانه وتعالى اللي اعطانى الموهبة وكان كريما معي في رزقي منها


واللي اعطانى الصبر والتحمل على دور النشر والناشرين وتحمل الصدمات الكثيرة التى جائت منهم ( والصبر اكثر على الذين لا يفهمون )


- ابي رحمه الله اللي توفى من 9 سنين لكنه ساعد بشكل مباشر في ظهووره


- امى اللي حببتنى في القراءة من ايام ماكنت طفل صغير بقرأ قصص الاطفال اللي بتجبهالى وبعدها اقعد اعيد صياغتها بطريقتى انا


- اصدقائي الكتاب اللي تمتلىء بهم حجرتي والتى لن يتسع المقال هنا لذكرهم


- حجرتى العزيزة اللي شهدت جلسات الكتابة


- مكتبي والكمبيوتر والكي بورد اللي طلع عينها معايا صراحة


- نظارتي العزيزة اللي ساعدتني كتير وعملت معايا الواجب واكتر


- الماج الاصفر اللي مرسوم عليه الفراشة اللي شهد كميات كبيرة جدا من الشاي


والنساكفيه والكابتشينو وغيرها اثناء الكتابة على الورق والكمبيوتر والتعديل

والاسال لدور النشر المختلفة والذي رحل منذ ايام قليلة بعد ان شعر ان مهمته قد انتهت معى – بهذه المناسبة ادعوكم للوقوف 5 ساعات حدادا على روح

الفقيد الغالى -


واخيرا اماكن توزيعه الكتاب
عمر بوك ستورز - 15 ش طلعت حرب – أعلى مطعم فلفله – 0103361217

مكتبة البلد - 31 ش محمد محمود . التحرير . أمام الجامعة الأمريكية - 27922768

نون للنشر والتوزيع – 12117 ش السد العالي . ميدان فيني . الدقي - 37601041

مكتبه ليلى – 17 شارع جواد حسنى من شارع قصر النيل – 23934402

مكتبة آفاق – 75شارع القصر . أمام دار الحكمة -279538


وقريبا بمكتبة ديوان ومدبولى والشروق في القاهرةوالمحافظ


وفروع دار اكتب في المحافظات :


1- الاسكندرية
سان ستيفانو مول

تليفون: 4690370/03- 1633685/010

معرض الكتاب السكندري
:
شارع صفية زغلول – امام ماكدونالدز – محطة الرمل
( 2 )
مكتبة سونة بمحطة الرمل :
أ. سونة
العنوان : صينية محطة الرمل بجوار فيشار جوجو0124609082ت

( 3 )
مكتبة روايات الشباب
أ.محمد قطب

رقم 67 ش مسلم بن الوليد - الموازى لمصطفى كامل – محطة قطار السوق

ت: 0121731008 ، 5759865


( 5 )
مكتبة أمير
:
خلف سينما أمير – محطة الرمل

- 3
المنصورة

بوكس اند بينز – المنصورة : ش جزيرة الورد أمام نادى الجزيرة – 2242285/050

4
- بورسعيد
مكتبة درغام - ش صفية زغلول - بجوار فندق انتركونتننتال - 0113699903


5-
طنطا

المكتبة القومية

مكتبة العز خلف سينما مصر

مكتبة الصحافة بشارع أبو فريخة


والان يمكنكم ان تقرؤ فصة حدث في سيتى ستارز على هذا اللينك


http://www.facebook.com/inbox/?ref=mb#/inbox/readmessage.php?t=1185615119646&mbox_pos=


واخيرا اتمنى ان يعجبكم الكتاب وفى انتظار رأيكم عنه

Sunday, May 17, 2009

فؤاد قاعود ... صرخة الاحتجاج التى حوصرت بالتعتيم


عزاء واجب :
رحم الله الفقيد محمد علاء حسنى مبارك وادخله فسيح الجنة وألهم اهله الصبر والسلوان
______________________
تحديث مهم :
تعميما للفائدة تم نشر صورة للشاعر فؤاد قاعود ليتعرف القراء اكثر عليه

المجمتع زي الرصيف وسخ وعايز يتكنس

فى ناس بتعرق على الرغيف وناس بتعرق من التنس

هكذا صرخ الشاعر العظيم فؤاد قاعود فى وجه العالم

هذا الرجل الفذ الذي رغم عبقريته الشعرية الكبيرة لم ياخذ حقه فى الشهرة والنقد الادبي ويكفى ان نسمع كلام صلاح جاهين
عنه ( التقيت بفؤاد قاعود فوجدته شابا صغيرا جدا ولكن في عينيه كان عجوزا جدا واشعاره حين سمعتها وجدتها تنبض بنبض عحيب فهو حين يسخر يصبح كالسياط وحين يبث مكنونات قبله تنفجر من داخله الينابيع والعواصف الثلجيه وتمطر كلماته فى النفس مطرا مر المذاق ومسكرا في آن فقلت له هذا هو الشعر )
ولد فؤاد قاعود فى الاسكندرية فى 5 ابريل 1936 لم يتلق تعليما الزاميا بل كان يعمل فى ورش ومطابع الاسكندرية وعمل فترة في محل ترزي للشاعر عبد العليم القبانى وكان ملتقى لشعراء وزجالى الاسكندرية ثم بعد ذلك استقربه الحال كعامل سويتش فى اذاعة الاسكندرية وكان قد اشتهر ببراعته فى فن الشعر والزجل وعندما ايقن ان طريقه هو الشعر والادب بدأ يهتم بقرأة وتثقيف نفسه فتأثر ببيرم التونسي والمتنبى وتأثر كثيرا بكتاب ( المنتخب من اداب العرب ) إلى ان ألتقى بالشاعر الكبير صلاح جاهين الذي طلب منه ان يذهب للقاهرة ليجد فرصة اكبر وبالفعل ذهب إلى هناك بعد انقضاء فترة تجنيده عام 1963وقابله باحسان عبد القدوس وكان وقتها رئيسا لتحرير روز اليوسف وعينه فى وظيفة شاعر فى مجلة صباح الخير واستمر يعمل بها حتى بداية الثمانينات عندما

تولى رئاسة تحرير ملحق ( صباح الفل ) وكان يقدم فيه ازجال شعرية تحت عناوين
( نكد الدولة سخطان)و ( جوعان بن هفتان) و( فرقعلوز ) واعتبارا من الربع الاخير من
1986عام بدأ يقدم باب الفرازة الذي يقدم فيه الاشعار المتميزة التى تصل إليه من القراء ويعلق عليهم ومن هؤلاء الذين قدمهم فؤاد قاعود الشاعر جمال بخيت

ايضا شارك فؤاد قاعود الشيخ امام فى تقديم بعض الاغنيات مثل (العزيق وبائع متجول واحزان القرد ومرمر زمانى ) ولكنه رفض ان يستمر فى هذا المجال لأنه كان يرى انه برغم اهمية الاغنية وقوة تأثيرها إلا ان عالمها عالم قبيح وهو ينأى بنفسه ان يوجد فيه

ومن يقرأ شعر فؤاد قاعود سوف يجد نفسه امام نفسا صافيه حاولت ان تستخدم الشعر لاصلاح ما حولها ومناقشته ستجده ايضا شديد الانتماء للبسطاء شديد الحساسية فى التعبير عنهم ومن مقطوعاته الزجلية فى ذلك

( اطفالنا طلعت من الاعياد ... ملابسها جداد

وكل واحد من الاولاد هانى وفرحان

لكن تلاقي ابوه وامه حاملين همه

وحوشو وشالو ولمو استلفو كمان

حازم يعوز جينز قطيفة واخته لطيفة

يلزم لها جزمة ظريفة لون الفستان

وماعدش عند سمير بيجامات ولا جلابيات

ودابو كل البنطلونات ومافيش قمصان

وليلة الوقفة علام .. ماقبلش ينام

غير لما امه جابلته حزام .. بتلات الوان

والبنت نادية مقموصة علشان نوسة

جبينا لها في العيد دة عروسة ونبيل زعلان

والبيت يصير يوم الوقفة هيصة وزفة

وينامو حاضنين اللفة بامان وحنان

ورغم كل ماجابو الاهل بتمن مش سهل

وكانو جامعينه على مهل واهو طار في ثوان

لما يشوفو صباح العيد الكل سعيد

فرحان ولبسه جديد فى جديد ينسو الاحزان )

ايضا كان فؤاد قاعود شديد الاعتداد بنفسه وبموهبته وشعره فهو يقول :

( الخلق على الاموال فى صراع .. وتعب وصداع

وانا بعدت عن الاوجاع وعن الصراعات

يهمنى قولى المعروف يظهر مكشوف

واظل على رأيي الموصوف كل السنوات

مش كل عصر البس له قناع واتشري واتباع

وفي يوم اقب ويوم ف القاع زى العملات

انا ليا سعر لكنه وحيد ... سعر الاجاويد

مهما السلع تنقص وتزيد هو فى ثبات

وشرفى ومقامى الشخصي شئ مستعصي

على الغريم لكن نقصي حسن النيات

مشيت بقلب سليم مفتوح وصادفت جروح

لكن محيت بأصالة الروح كل العقبات

واللى في نفسه اصيل وكبير لو وحده يسير

يرهب كانه فى حشد غفير ويثير رجفات )

ايضا من يقرأ فؤاد قاعود يجد نفسه امام شاعر شديد خفة الظل تكاد ان

تستلقى على ظهرك من الضحك وانت تقراءه وهذا من سر عبقريته ولعل هذا

يظهر بصورة اكبر في اشعار ( جوعان بن هفتان ) ولنستمع لهذه المقطوعة

( داهمت ساعة الغدا منزل صديق ميسور

ولما طليت على السفرة بقيت مبهور

قالتلى مراته بتهجم دون ميعاد وتزور

قلت لها بردون يا هانم انتى غلطانة

لأنى ارسلت برقيه في ست سطور

******

وقعدنا ناكل ونشتم في البريد ونقول

لازم تقول الجرايد هذا غير مقبول

قالت مراته حقيقى امر مش معقول

هو انت باعتها امتى ؟ قلت مش فاكر

لأنى لما مليت بطنى بقيت مسطول

********

ضحك صديقى ونظر لى نظرة مفهومة

وقال لها اعملى لنا الشاي يا سومة

دة شخص دايما ايديه من المادة معدومة

ومنين يجيب حق برقية في ست سطور

المرة ديا اكيد البوسطة مظلومة )


لم يكن فؤاد فؤاد قاعود منتميا لأي حزب كان هو حزبا بذاته لنفسه وبنفسه

انظررو لهذه المقطوعة الزجلية التى يصف فيها حاله ويتهكم على

من ينتمى للاحزاب من اجل المصلحة فقط وليس لأيمانه بمبادئها

( وحيد ومعدم وغير مدعوم ومش محسوب

وفى كشوف البطايق اسمى مش مكتوب

ولما يحصو الشلل ماجيش في اي جروب

وحيد ومفرد لوحدي واخر استقلال

واللي ماهوش منتمي لحاجة ح ياكل طوب

********

وناس علاقتها حلوة بكافة الاحزاب

يفطر في ساحة التجمع فول مع الاصحاب

والشاي في الوفد ويا اكبر الالقاب

والضهر ياكل فى مسمط يملكه الاخوان

والليل يكون العشا في الوطنى طير وكباب )

لم يسعى فؤاد قاعود للشهرة ولا المجد الاعلامى بل عاش شاعرا نزيها بقلمه

وشعره

وسخر من هؤلاء الذين يتهافتون على الشهرة وليس لديهم مايقدموه

( لو غيتك شهرتك اعمل لها طبال
صوت الكفوف ع الدفوف يدوش لكين قتال

والشهره مهره حويطة تقلب المختال

تجمح وترمح وتقزح باللي راكبها

يا يطب للديل يا يطلع فوق مناكبها

تعاند اللي ركبها والغرور ساقه

وتصاحب اللي يلجمها بأخلاقه

والحر لجل الحقيقة يركب الأهوال


***جسدت قرع الطبول من همسة الاسياد ونفدت للودن عنوة واقتحام وعناد وانت برغم اللجاجة خلقة الحداديسير خلالك جميع ما يصدره مولاكلا الكهربا تنكسف ولا تستحى الاسلاك تجئر وتنهر وتجويفك فراغ وهلاكولما زادت بفضلك قوة الضوضاء
تم اعتمادك لاعصاب البشر جلاد )

ومن اعماله المنشورة

- الاعتراض – دار العالم الجديد - 1977
-
المواويل – كراسات الفكر المعاصر 1978

-
الخروج من الظل. مكتبة مدبولي 1997

-
الصدمة – مدبولي 1977

-
ضمبر المتكلمدارالأحمدي

والاعمال الكاملة عن دار الاحمدى

ونلاحظ هنا انه نشر بعيدا عن المؤسسة الحكومية لانه كان حريصا على ألا يتكالب

على الحكومة ولا يتذلل لها

ولكن مؤخرا قامت وزارة الثقافة بنشر اعماله الكاملة

بقى ان نقول ان فؤاد قاعود تزوج من د . الطبيبة ( سهام هندى )


انجبت له ابنه الوحيد ( على ) الذي اشتغل بالطب ايضا وان هذه المراة كانت حجر الزاوية في حياته عندما اقتنعت به وبموهبته الفذة وعزة نفسه وعدم تكالبه على خيلاء الحياه

وقد توفى فؤاد قاعود فى 18 يناير 2006 عن عمر يناهز السبعين وحضر جنازته في عمر مكرم الكثير من الشعراء الشباب الذين تأثرو به وبشعره

فؤاد قاعود شاعر ظلمه النقد حيا ولكن بالتأكيد سوف ياتى من يعيد اكتشاف لالأئه وتقديمها للقراء مثلما قال عنه الراحل الكبير رجاء النقاش :

( فؤاد قاعود سوف يولد بعد وفاته من جديد )

رحم الله شاعرنا الفذ وادخله فسيح جناته

ملحوظة بعد القراءة:

هذا المقال ان شاء الله سوف ينشر في مجلة ميكانو الالكترونية التى سوف اتولى مسئولية القسم الادبي فيها وبهذه المناسبة ادعوكم لأرسال اعمالكم ( من شعر وقصة وزجل واغنيات ) على الايميل لنشرها معنا فى المجلة
تحديث اهلاوي
مبروك لرجالة الاهلى اللى فضلو يلعبو بروح الفانلة الحمراء لحد اخر ثانية وسكتو الكل واثبتو ان الاهلى حديد جامد قوي وان شاء الله نبارك يوم الاحد واحنا بنحتفل بالدرع