ابداعات شاب ثائر: الجزء الخامس من الرباعيات

Sunday, January 13, 2008

الجزء الخامس من الرباعيات

(40 )
مش مهم تكوني انت شايفاني ايه
المهم اكون انا شايف نفسي ايه
وانا شايف نفسي حاجة كبيرة في المستقبل
فبلاش تقولي كلام عمر ماهسمع ليه
(41)
لوكنت يوم تاخديني يا حبيبتي جوة حضنك
وتحسيسيني بشوقك وبحنية قلبك
وتبوسيني في خدي وانا بكتب قصيدة شعر
دة انا قلبي يكون اسيرك واعيش العمر جنبك
(42)
انا مش زي نزار ولا زي فارق جويدة ولا زي اي حد
ولا زي صلاح جاهين وعمنا الأبنودي انا زي نفسي بجد
شعري ختم صباعي نفسي علي الأوراق
وانا شايف نفسي فريد ماشبهش لأي حد
(43)
ساعات بحس اني مخنوق وعايز ابكي
وبحسه عليا غريب وبعيد حضن امي
وماينفعش ابكي قدام صحابي كمان
عزيز دمع الرجال وانا رجولتي بتمنعني
(44)
انا مش بس ليك
حبيب قلبك وعنيك
انا صاحبك ومرايتك
اللي ماتكدبش عليك
(45)
خدودك الرمان وشفايفك العنابي
بيقوللي كلام انك اعز احبابي
وسامع صح انا ولا دة بس بيتهيألي
انت صحيح عشقاني ولا اعلن انسحابي
(46)
في يوم الحكومة كبست ولمت الملتحين
وكان الواد ابن اخويا بادئ بقاله يومين
الواد بجد اتخض ..سكت ماحطش رد
وتاني يوم حالقها وبقي بيسهر علي القهوة باليلة والأتنين
(47)
بقالي اكتر من ربع قرن عايش لوحدي
ومافيش اي حتة طرية موجودة جنبي
اتخنقت من العزوبية ومن كوك دور وكنتاكي
نفسي ارجع بيتي ألاقي لقمة حلوة ترم عضمي
(48)
الصياعة ادب مش هز كتاف
لا تعاكس بنت جارك ولا تبصلها ولو لبست الشفاف
ولا تيجي يوم علي المظلوم وتدي للمحتاج
ولو مش معاك غير لقمة حاف
(49)
اللي بني مصر كان في الأصل من امبابة
كان راجل جامد طحن يفوت وسط الديابة
وزي التاريخ ماكان بيقول
علي كل المدن ابواب وعلي امبابة دبابة