Saturday, March 29, 2008

الجزء الثامن من الرباعيات

(71)
عم عشم يا حبيبتي مات
والمعاملة خد وهات
عايزة قلبي يحب اوك حبيني بردة
يا اما قلبي يفكوا منك وينسي كل الماضي اللي فات

(72)
قبل ما اشوفك يا حبيبتي ما كنتش مقتنع بالحب
كنت بقول دة كلام فاضي وإنه وهو وكذب
وبعد ما شوفتك اتأكدت من صدق كلامي
من إنه اشتغالة كبيرة وإنه زفت الزفت
(73)
وبلاش يا بني تنسي انك نطفة مني
وياما سهرت عليك وياما نمت في حضني
واتحملت يا ما علشانك حاجات كتير
فبلاش تقسي عليا لما يكبر سني

(74)
انا والعذاب وهواك عايشين لبعضينا
قولي اعمل ايه وياك في قصة هوانا الحزينة
بتحبني ولا دي اشتغالة ووهم
واركز معاك ولا انسي ليالينا
(75)
ماتقولش ان الماضي ممكن يعود الأن
مش هينفع مهما تعمل ترجع سنين الزمان
دة الشوق خلاص انتهي ووصلنا للمنتهي
وحتي الذكريات مالهاش في قلبي مكان

(76)
مش عارف ليه يا حبيبتي بحس إنك نحس
وكأنك جاية وجايبة في ايديكي سوء الحظ
بقول ابعد وانساك واغير عتبة هواك
يمكن لما ابعد عنك يتفك عني النحس

(77)
ليه مكتوب علي بابك ممنوع الدخول
ولحد امتي هيفضل في وشي الباب مقفول
انا قلبي دايب فيكي عاشق بكل ما فيا
ونفسي العمر يحلي واعيش معاك علي طول
(78)
انتي ايه يعني اللي فاضي بيركب
ولا عمرك قولتي لاء ولا عمر جسمك بيتعب
وماتعمليش فيها الست خضرا الشريفة
مافيش شريفة تبيع علشان تأكل وتشرب
(79)
لما تيجي تحب حد ماتحبهوش قوي
ولما تيجي تكره حد ماتكرهوش قوي
خلي بينك وبين الناس مسافة دايما
علشان لو في يوم انجرحت ماتتعبش قوي
(80)
حتة بتلو جامدة من المترو كانت نازلة
وعين الرجالة طبيعي علي الرفارف باصة
ايه اللي بيحصل دة يا جدعان ..صرخت انا
هي الناس دي ليه بمشاعرنا مش حاسة

4 comments:

حسن ارابيسك said...

حلوة قوي الرباعيات دي
خففت عني شويه بعد كل البوستات الجامده اللي فاتت دي وقلبت عليا المواجع
ياريت المزيد

mostafa rayan said...

انا سعيد قوي ان الرباعيات عجبتك
دةالجزء الثامن وكان قبل كدة سبع اجزاء اخرين
وان شاء الله هناك المزيد ينتظر دوره في الدخول ..سعيد انك قولت قلبت عليا المواجع لأن معني كدةانها لمست حاجة فيك ودةبالطبع شيء يفرحني

النورس البورسعيدي said...

enta gamed awe ya man rabena yewf2ak

Unknown said...

رباعياتك حلوة
ومميزة
وفى كتير من الصدق والكلام اللى بنقوله لنفسنا

بس انت خرجته بطريقة حلوة وصادقة


احترامى