ازيكوا يا جدعان عاملين ايه يارب تكون بخير وصحة وسعادة
بصوابقي انا عايزاتكلم معاكون عم لعض الأشياء اللي مش بتعجبني في المدونات
مش عيب اننا نسمع بعض وكل واحد يقول رأيه والأخرين يناقشوه فيه لأن دي هي الطريقة الوحيدة للتقدم فى اي مجال من مجالات الحياة
انا ابتديت موضوع التدوين دة من اربع شهور لكن كنت قبلها بدخل علي مدونات وبشوف الحياة ماشية ازاي لكن لما ابتديت ادون وادخل علي مدونات اكتر واترك تعليق هنا وتعليق هناك ابتدى الموضوع يتفتح قدامي اكتر واشوف الحياة بصورة اكتر عمقا
- اولا : تدخل علي مدونة تلاقي فيها شعارات اغلبها لجماعة الأخوان وتلاقي عبارات من نوعية الحرية لفلان واتركوا فلان ومش عارف ايه وكأن يعني الكلام دة هو اللي هيجيبله الحرية المدونات يا جماعة مش معمولة لكدة معمولة علشان تتكلم وتقول رأيك لكن مش علشان ترفع شعارت لحد
- الحاجة التانية : انك تدخل علي التعليقات تلاقي واحد بيعمل اعلان لحاجة في مدونة غيره رغم ان التعليقات دي علشان تعلق علي الموضوع اللي صاحب المدونة كاتبه مش علشان تعمل اعلان لأي حاجة او اي شيء .. تدخل تلاقي واحد كاتب ألحقوا مش عارف ايه والتفاصيل في مدونتي ويروح كاتب عنوان مدونته وسايب الموضوع الرئيسي اللي المفروض يتكلم فيه
وطبعا دة منتهي قلة الذوق لأنه ماحترمش صاحب المدونة ولا احترم القراء الأخرين ولا الموضوع ولا احترم أي حد دة واحد داخل يعمل اعلان لموضوع معين وعايز يلم اكبر عدد من القراء لموضوعه دة والصح بقي ان صاحب المدونة المفروض يلغي التعليق دة
- تالثا : ودي لاحظتها اكتر في مدونات الأخوان وهي حفظ التعليقات ودي من اكتر الحاجات اللي بتضايقني
تدخل علي المدونة وتترك تعليقا وتتعب نفسك في كتابته وتنتظر نشره ثم تفاجئ بعبارة تم حفظ التعليق لحين اضطلاع مالك المدون عليه ودة طبعا علشان ينشراللي علي مزاجه واللي مش عاجبه لاء
وكأن احنا هنا في جرنال ومستنين موافقة رئيس التحرير علي النشر او كأننا بنعمل فيلم ومستنين موافقة رئيس الرقابة علشان نعرضه
المفروض ان صاحب المدونة يقول اللي عايزه في البوست والقراء يقولوا اللي عايزينه في التعليقات مش من حقه ابدا يعين نفسه رقيب علي اراء حد ويوافق علي الرأي دة ومايوافقش علي دة مش من حق اي حد يتحكم في اي حد ويفرض سيطرته عليه
وماحدش يقول ماهي دي مدونته ..مدونته يقول فيها ارائه والموضوعات اللي عايز يتكلم فيها لكن مايفرضش سيطرته علي حد وإلا بقي طالما انه لايتقبل الأراء المختلفة معه يقفل التعليقات احسن ماهو مش عامل المدونة علشان بس الناس تقوله برافوا عليك يانجم يا جامد يافنان لازم يتقبل الرأي والرأي الأخر
لأنه كدة ماينفعش بجد ياجماعة دة كبت للحرية وعدم احترام لحرية الأخر ماينفعش نبقي طول الوقت مضايقين إن الحكومة لا تسمع ارأنا واحنا بنعمل نفس الشيء في بعض
المفروض يعني إن الناس اللي عاملين المدونات دول ناس متعلمين وعلي قدر من الثقافة طيب لما دة يكون حالهم يبقي حال الأخرين الأقل تعليما وثقافة ازاي ؟
وازاي نتوقع تقدم لبلد يرفض اصحابها مجرد سماع الرأي الأخر ؟
وماحدش برضة يقول ماهو عاملهاعلشان ماحدش يشتم لأن دة بردضة صباح الكذب لأن اي رأي هيكون مخالف لرأيه هيكون شايف انه شتيمة وحتي كمان لوكان فعلا شتيمة
المفروض يسيبه علشان الناس تعرف قد ايه الشخص دة قليل الذوق وبيشتم فماحدش يدخل
عنده لكن زي ماقولتلوكوا دي كلها تلاكيك فاضية علشان ماينشروش غير فقط الأراء المتوافقة معاهم ويكبتوا انتشار اي رأي مخالف ليهم لكن طبعا دة تفكير مش بس بيدل علي منتهي التسلط والقهر الفكري لكن كمان منتهى السذاجة لأن الرأي اللي انت مانعته هنا هتلاقيه موجود هناك هي هي انت كل اللي عملته في نفسك إنك خسرت احترام الأخرين ليك
وزي ما يوسف شاهين قال في اخرافلامه العظيمة فيلم المصير ...
( الأفكار لها اجنحة تحلق بها وماحدش يقدر يمنعها )
بس كانت بعض الحاجات اللي مش عاجباني واوعدكوا لولاحظت حاجات تانية هكتب وهقول عليها ان شاء الله
No comments:
Post a Comment