الموضوع كبر قوي يا جدعان .....عن عصام الحضري نتحدث

الموضوع كبر قوي يا جدعان وصل لدرجة ان الريس بذات نفسيته بيدخل في الأمر وبيطلب من رئيس اتحاد الكرة حل الأزمة وتحقيق رغبة اللاعب في الأحتراف فهذا حقة ولكن ليتم هذا بشكل قانوي بالتأكيد عرفتم الأن عن اي شي اتحدث عن الموضوع الذي اصبح مثار حديث الدنيا كلها عصام الحضري ومشكلته واعتقد ان هذه هي السابقة الأولي التي يتدخل فيها رئيس جمهورية لحل ازمة احتراف لاعب كرة وبذلك يضيف عصام الحضري انجاز جديد للأنجازاته .. الريس بنفسه بيدخل علشانه وطبعا اكيد اتحاد الكرة والنادي الأهلي هيلموا الحورات بعد ماكانوا سانوا السكاكين وهيكون اخره ان النادي السويسري هيجي ويتفاوض ويمشي عصام مصحوبا بأكاليل الزهور ودعوات الجميع بالتوفيق وطبعا من الجميع دول الناس اللي بتشتم عصام دلوقتي لكن الموضوع دلوقتي بقي جي من فوق ياجدعان ... آه الله يرحمك يابا ليه ماطلعتنيش لاعب كرة ليه ماكنتش بتخليني ألعب كرة في الشارع مع العيال ليه كنت بتفهمني دايما ان اللي بيعمل كدة هما العيال الصيع اللي مش متربية شوفت العيال الصيع وصلت لأيه بقو اصحاب ملاين

ليه خلتني اذاكر وادخل الجامعة واعمل الحاجات دي اخدت ايه يعني شهادة ملاين معاهم زيها عذرك الوحيد انك اتربيت في عهد كان بينمي اهمية التعليم وانك ما اتخيلتش ابدا ان الحياة ممكن تمشي عكس كدة

علي فكرة انا كنت عايز اكتب في موضوع الحضري دة من فترة لكن كل ما انوي اكتب تحصل تطورات تخليني آجل لحد التطور الكبير دة ماحصل والريس شخصيا اتدخل قولت لاء لازم يا واد تكتب

عارفين انا اصلا لما جيت اعمل المدونة كنت اساسا عايز انشر فيها ابداعاتي الفنية ماكنتش عايزاتحول لصحفي يحلل الأشياء من حوله لكن في حاجات بتحصل بتخليك تغير افكارك زي قبل كأس الأمم ماكانش في حديث إلا عن البطولة وهتاخدها ولا لاء وحسن شحاته يمشي ولا يستمر فكتبت بوست عن الموضوع وبعدين لما اخدنها ماكانش في حديث إلا عن الفوز وان حسن شحاته اخرس كل اللألسنة فكتبت بوست عن الموضع دة وإذ فجأة ونحن في قمة الفرح والدوري عاد يشتغل وبنتكلم عن الدروس المستفادة من كأس الأمم وكدة نستيقظ فجأة لنجد عصام الحضري يرحل ولا حديث إلا عنه حتي قناة النيل الثقافية اللي المفروض يعني تتكلم عن الكتب والأدباء والشعراء بتتكلم في الموضوع د ة

الموضوع كبر قوي لدرجة ان احد الوزراء صرح ان لو الوزارة بتاعته اخدت نصف الأهتمام الأعلامي اللي اخده موضوع الحضري كانت حاجات كتير قوي هتتغير

لكن قبل مانتكلم في موضوع سفر عصام في حاجات صاحبت سفره لازم الأول نقف عندها

اولا : الأهتمام الأعلامي المبالغ فيه

مما لاشك فيه ان الأعلام كان له دور كبيرقوي في الموضوع دة وفي تحريك القضية وتكبيرها لكن هل الموضوع يستحق كل دة ؟.. دي قضية غزة بذات نفسها ما اخدتش حتي ربع الأهتمام دة ودة بيخلينا نتسأل من الذي يحرك هذا الأعلام وماهي توجهاته وإلي اي شي يريد ان يجرنا ويسحبنا والسؤال الأهم لماذا نرضي ان نسير ورائه هكذا مثل العمي اين عقولنا ولماذا لا نشغلها في كثيرمن الأحيان بل قل معظم الأحيان

ثانيا : اننا شعوبا ناعقة

الملاحظ ان نفس الجماهيرالتي هتفت لعصام الحضري هي نفسها التي هتفت ضده هي نفسها التي سامحته عندما جاء فهل نحن اصبحنا شعوبا ناعقة كلمة تودينا وكلمة تجيبنا ولماذا لا نرسو علي رأي لقد ذكرني هذا الأمر بالأثر الوارد عن سيدنا عمرو بن العاص عندما فتح مصر فسأله سيدنا عمر بن الخطاب ماذا وجدت في مصر قال اربع جمل تحلل مصر بالظبط كأنه كان مولود وعايش فيها طول عمره ودة دليل انه كان راجل دماغه جامدة بجد قال ( أرضها ذهب ، ونساؤها لعب - بضم اللام- ، وشعبها تبعا لمن غلب ، يجمعهم المزمار ويفرقهم العصا ) لو فكرنا في كلامه رضي الله عنه هنلاقي ان احنا كدة فعلا

- بس ياتري لو كان عايش معانا وشاف نساء لبنان ولا تونس كان رأيه هيكون ايه بس طبعا مش كل الستات -

ثالثا : استخدام عواطفنا وعدم الأحتكام للعقل

ودة شيء باين قوي في الموضوع كله

رابعا : اننا اصبحنا شعب تافه

فعندما تأخذ مشكلة لاعب كرة هذا الوقت من تفكيرناوجهدنا اكبر دليل علي اننا شعب تافه

خامسا : كثرة كذابين الزفة والمتاجرين بالقضايا

مثل المحامي الذي رفع قضية ضد عصام الحضري واتهمه بالخيانه وطلب سحب الجنسية منه وهذا دليل علي ان في ناس مستعدة تقتلك علشان بس يتكتب عنها سطرين في الجرايد اوتطلع دقيقة في التلفزيون فهذا المحامي اتهم عصام بأبشع جريمة يمكن ان توجه لشخص وهي خيانه وطنه وكأن عصام تعامل مع اسرائيل دة حتي اللي بيتعامل مع اسرائيل رغم كل اللي بتعمله في العرب ماحدش بيتهمه بالخيانة لكن هذا المحامي - الذي لن اذكراسمه لأنه لا يستحق - لم يتورع ان يتهم عصام بهذه الجريمة من اجل ان يكون له نصيب في الشو الأعلامي الحادث رغم ان الموضوع اصلا لا يخصه ولو ان عصام كان احد معارفه لكان له راي اخر ولو اتهمه احد بنفس التهمة لقال فيه مثل ما قال مالك في الخمر

- نيجي بقي للموضوع رحيل عصام اولا ليه عصام مشي

عصام مشي مش بس لأنه وصل سنه 35وعايز يحترف زي اي لاعب في الدنيا عصام مشي لأنه اتخنق لأن النادي بيتعامل معاه وكأنه عبد عنده ، عصام ماغلطش لما طلب الفرصة وهوقاللهم قبل كدة ياجماعة سيبوني امشي وهما قالوا لاء ولاء بكل اصرار

طيب لاء لحد امتي ماحدش رد عليه عصام اتخنق فمشي زي اي حد بيتخنق من حد بيسيبه ويمشي لكل انسان قدرة علي التحمل وقدرة عصام خلاص جابت اخرها مع المسؤلين في الأهلي وهنا كنت عايز اسأل سؤال مهم ليه الناس زعلت قوي من عصام وقالوا مادورش غير علي مصلحته رغم ان الأهلي بردة برفضه سفره مادورش غير على مصلحته يعني هو حلال للأهلي حرام علي الحضري الحضري منذ سنتين في كاس الأمم جاله عقد احتراف في تركيا وقبلها بردة جاله عقود احتراف اخري والأهلي رفض قالوا له استني لما تيجي فرصة افضل رغم ان الأفضل كان ممكن يجي من تركيا زي مالاعبين كتير راحوا وانتقلو لأندية كبيرة وكانت بدايتهم مع تركيا لكن الأهلي رفض لأنه مابيدورش غير علي مصلحته هو بس ومش صح ان الأهلي مش معترض بدليل سفر لاعبين اخرين زي محمد شوقي ووائل جمعة دول سافروا لأن الأهلي مش محتاج لهم في الدفاع في احمد السيد وشادي والنحاس وغيرهم وكمان في المنتصف في كتير اينو وابوتريكة وبركات واحمد فتحي وغيرهم فمش مشكلة لما حسن مصطفي يمشي ولا محمد شوقي يمشي

اما في حراسة المرمي لاء مافيش غيرالحضري ونسيوا ان في حارس اخر لا يقل كفاءة اسمه امير عبد الحميد نفسه ياخد فرصة نسيوا ان ماينفعش ان نادي بحجم الأهلي يكون الأعتماد في علي حارس واحد فقط خصوصا ان في خمسة مليون جنية بتتصرف سنويا علي مدرسة الناشئين في النادي غير اكاديمية الكرة في المنصورة طيب فين ياجماعة الناس دي وفين نتاج المصاريف دي ماتلاقيش رد

فالحضري لما اتخنق وعرف ان تحقيق الطلب صعب قرر يمشي الحضري من سنتين كان عمرة 33 ودلوقتي 35وهو عارف ان الفرصة قدامه لتحقيق حلمه بقت قليلة طيب يفضل مستني لحد امتي خصوصا ان مسؤلي الأهلي متعنتين علشان كدة الراجل قالك بيدي لا بيد عمرو واخد بعضه وسافر وقال للأمير في التدريب الأخير انا عندي خبر حلو ليا وليك لكن ماكانش حد ابدا يتصور ان الخبر هو رحيله عن مصر بالكلية

طيب نيجي بقي لسؤال ان سويسرا مش البلد اللي تستحق السفر ليها والتضحية بالأهلي علشانها عصام اكيد كان له تصور تاني ان سويسرا مش هي المستقر لاء انا بس هبدأ من هناك وبعدين اشوف بلد تانية واكيد كان في ذهنه قصة هاني رمزي لما بدأ في نيوشاتيل السويسري وبعدين راح المانيا

وبالمناسبة دي عايزاقول حاجةمهمة قوي مش عيب ان الحضري يدور علي مصلحته ويفضلها علي كل الأخرين لأن الأهلي نفسه بيعمل كدة فاكرين في بداية التسعينات كان الأهلي منحدر لدرجة انه اخد المركز الرابع اوالسادس لا اذكر

وقتها كان الثلاثي حسام وابراهيم وهاني رمزي يحترفون في سويسرا طلب منهم صالح سليم في اتصال تليفوني العودة لأن الاهلي يحتاج لهم تعامل هاني رمزي مع الأمر باحترافية ورفض العودة قال انها كبوة وسيخرج النادي منها ولكنه يريد ان يكمل مسيرة احترافه وتعامل حسام وابراهيم مع الأمر بالعواطف وانهوا احترافهم فماذا كانت النتيجة جاء اليوم الذي استغني فيه الأهلي عن حسام وابراهيم ضحي بهم ولم يذكر لهم انه ضحوا باحترافهم من اجله فكانت النتيجة انهم اصبحوا يتنقلون من نادي لآخر بينما هانى رمزي انتقل لألمانيا ومن نادي لنادي اكبر حتي اصبح احد اكبرالمحترفين في تاريخ الكرة المصرية وعندما جاء إلي مصر وطلب ان ينهي حياته في الأهلي وكان يمكنه العطاء موسم او اتنين وضحي بالبقاء في المانيا من اجل الأهلي نظر الأهلي للأمر من وجهة نظره هو وقال لا احتاجك الأن

ترى ماذا لو كان هاني عاد مع حسام وابراهيم اكيد كان مصيره ان يلعب لبلدية المحلة ولا اسمنت اسيوط بعد ان يمتصه الأهلي لأخر درجة

انا لا اعادي الأهلي ولكن اطلب فقط من الناس ان تنظر للأمر بموضوعية

الخطأ الوحيد الذي وقع فيه عصام الحضري انه عاد ثانية كان يجب إلا يهتم بكل مايقال ويرمي كل الناعقين وراء ظهره ولكن اغلب الظن انه عاد لكي ينهي مصالحه في مصر ويطمئن علي مصير امواله في البنوك بدل ماحد غبي يطلب الحجر عليها وتبقي مشكلة وكمان يظبط وضع اولاده اي ان عصام جاء ليسافر لا ليستقر لأنه نفسيا الأن غير مستعد للعودة للأهلي والاهلي وجماهيره غير مستعدين لقبول عودته ولذلك فيجب عليه الأ يجعل في ذهنه ويفكرفي مصلحته فقط

وانا هنا اقول له - ولا اعرف هل يمكن ان يقرأ هذه السطور ام لا - سافر وشوف مصلحتك وماتفكرش في اي شي تاني

وربنا يوفقك يا حضريييييييييييييييييييييييييييييييي