شيئ غبي وخنيق ومستفز

بجد اللي بيحصل في البلد دي بقي شيء غبي وخنيق ومستفز على كافة الأصعدة والمستويات
اخر الخنقة بيقولك الأهلي تعاقد مع احمد حسن لاعب اندرلخت البجيكي ليلعب في صفوف الفريق لمدة 3 سنوات
السؤال اللي بيفرض نفسه هل الأهلي اللي عنده ابوتريكة وبركات واحمد فتحي والمعتز بالله اينو ومحمود سمير وانيس بوجلبان وجليبرتو هل محتاج لاعب خط وسط مهاجم اخر زيادة عن كل هؤلاء واذا كان الأهلي فعلا محتاجه وله مكانه في
الفريق - اصل مش معقول هو جايب احمد حسن من اندرلخت علشان يقعده علي الدكة يعني – الن يكون ذلك علي حساب لاعب اخر موجود فعلا مع الفريق طبعا الأجابة اه – وسيبكوا بقي من حوار الملعب هو اللي بيثبت وهواللي بيختار لأن في لاعبين كتير مش لاقين نصف فرصة من اللي بتعطي لغيرهم وقد يكونوا اقل منهم – طيب هو الأهلي ليه اصلا اشتراه من الأول مادام هم عارف انه هيشتري لاعب تاني ولا هي بعزقة فلوس وخلاص
– الشيء التاني المستفزاكتر لماذا ينهي احمد حسن تجربة احتراف ناجحة ويقرر العودة إلي مصر هو مش المفروض بعد كأس الأمم يكون طموحه الأحتراف في دوري اقوي مثل الدوري الأسباني والأيطالي والألماني ولا يرجع تاني لهذا الهبل والغباء والتخلف العقلي المسمى الدوري المصري ؟هي الناس بتتقدم ولا بتتأخر ؟ولا فلوس الأهلي خليته يعمي عينه عن كل شيء ؟ هل حدوتة اولادي والأستقرار الأسري والعيال يتربوا شرقي والحاجات دي حجة اصبحت في عصرنا الحال حجة مقبولة ؟ ولا هو من الأخر المصري مالوش في الغربة والسفر ؟
الشيء اللي يغيظ فعلا ان جماهير الأهلي فرحانة قوي بالصفقة دي ونسيت ان دة هيكون علي حساب ناشئ هو في امس الحاجة لأن يأخذ فرصته في الفريق الأول هو بيلعب ويتمرن ويموت نفسه في التدريبات وبيصدق كلام مدربيه ان الفرصة موجودة وهتيجي لكن الواقع اللي شايفه بعنيه انها مش هتيجي ولو جت هتبقي
بالصدفة البحتة اللي مش بتحصل غير واحد في المليون – حدثت هذه الصدفة عندما مرض احمد بلال فلم يكن امام الأهلي سوي تصعيد لاعب ناشي اسمه عماد متعب واخذ فرصته في اللعب حتي اصبح الأن نجم الهجوم الأول يعني لو ماكانش اصابة بلال كان زمان متعب دلوقتي بيلعب في فريق تاني بعد الأهلي مايكون استغني عنه مجانا او يكون الأهلي بيتفاوض معاه وهوقاعد قدم فوق الأخري وبيفرض شروطه ولسان حاله يقول مانا كنت عندكوا وانتوا اللي سيبتوني –
احيانا كثيرة بقول لنفسي ان مافعله شريف اشرف هواحسن حاجة علي الأقل في الزمالك بيلعب وبيثبت نفسه ومش كل شوية يجيبوله واحد يهدده انه ممكن ياخد مكانه ومتهيألي ان حوار كثرة النجوم ليست مشكله لانها تدفع الجميع لبذل اقصي ماعنده دةحوار فاشل جدا واثبت فشله بالتجربة لأنه ادي للعكس ان اللاعب بيمشي وبيسيب النادي كله
بالطبع هذه السياسة تشعر اللاعب بالأحباط خصوصا انهم مش بس بقوا بيجيبوا له لعبين من الدورى المصري لاء دي الموضة دلوقتي ارجاع المحترفين مرة اخري
- السؤال الذي اريد ان اسأله للكابتن حسن حمدي ولجنة الكرة في النادي بالله عليكو هل الدوري المصري يستحق كل هذه الحرب والملاين في شراء اللاعبين وما مصير مدرسة الكرة في النادي – تصرف كل سنة 5 مليون جنيه – واكاديمية الكرة في المنصورة اين نتاج هذه المدارس واذا كان سياسة الأهلي المعلنة الأن هي الأستيراد من الخارج لماذا اذا تستمر هذه المدارس هل سبب استمرارها الوحيد الأستغناء عن اللاعبين مجانا ثم معاودة دفع الملاين فيهم مرة اخري الأولي ان يتم اغلاقها وتوفيرفلوسها لشراء اللاعبين الأخرين
- سؤال اخر يطرح نفسه في ظل وجود كل هؤلاء النجوم في الفريق ما فائدة وجود مانويل جوزيه لماذا لا يتم الأستغناء عنه والأستعانة بمدرب مصري او اجنبي علي قد حاله وتوفير اللأ لف التي يأخذها كل شهر – 54ألاف دولار غير المكافأت والهبات والهدايا - في شراء لاعبين علي اساس ان فريق فيه كل هؤلاء النجوم لا يحتاج مدرب كبير كدة كدة هيفوز هيفوز
- سؤال اخر لوائل رياض هل بعد ذلك مازال لديك طموح في العودة للأهلي والجلوس علي دكة البدلاء مرة اخرى ولا الأحسن تركز مع الفريق اللي بيديلك الفرصة علشان تلعب وتثبت نفسك في الملعب متهيألي لازم تفكر كويس
- سؤال آخر لمصلحة الضرائب اين كشف حساب النادي الأهلي لماذا لا توجهون اعلاناتكم التي اصدعت ادمغتنا له – ملحوظة: تكاليف اعلانات الضرائب بلغت 68 مليون جنيه فى السنة الأولى ، و30 مليون جنيه فى السنة الثانية ... فقط لنعرف اين تذهب اموالنا – لماذا لا يمثل محمد شومان اعلان داخل النادي يطلب من الأدارة واللاعبين تقديم الأقرار الضريبي قبل 31 مارس حتي لا يتعرض للمسائلة القانونية ام ان اعلاناتكم موجهة فقط لنا نحن المواطننين البسطاء
- سؤال اخر لأتحاد الكرة اذا كان الحال هكذا فريق يفوز دائما لأن عنده كل اللاعبين الجيدين لماذا لا نوقف هذه المسرحية الهزليه المسماة الدوري المصري ونعلن فوز الأهلي بالدوري والكأس كل سنة ونحول الأندية الرياضية لي اندية اجتماعية او رياضة فقط من اجل الممارسة
- وكلمة بجد اذا كنتم انتم المسؤلين امام الناس و الرأي العام عن نهضة الكرة في مصر فلماذا لا تصدرون قرار اوقانونا تمنعون فيه هذا العبث وتجبرون الأندية علي ضم ناشئيها واشراكهم والأستفادة منهم
- سؤال اخر واخير لأبي - رحمه الله وادخله فسيح جناته - ليه ماخلتنيش لاعب كرة بدل التعليم والجامعة ووجع القلب اللي مش جايب همه دة