Wednesday, April 16, 2008

التقدم المنشود وفيفي عبدة


  • يوم الأحد الماضي احتفلت قناة النيل للدراما بفنانة مصر الأولي ووحيدة عصرها وفلتة زمانها الأستاذة القديرة اللي احنا مانقدرش نعيش من غيرها وعايشين بحسها وفي خيرها – ايه الشعر دة ؟ - فيفي عبدة بس طبعا من الاحد اللي قبلها كان في تنويهات عن الحلقة والست فيفي كل شوية تقولنا استنونني يوم الأحد هحكيلكوا قصة حياتي علي قناة النيل للديشراما- صح كدة زي ماقرأتها هي كانت بتقولها -
    طبعا الأمر غير مستغرب هو يعني احناعندنا كام فيفي عبدة في البلد
    طبعا انا ماتفرجتش علي الحلقة ولا علي القناة طول اليوم ماتفرجتش غير علي اسطورتي الأثيرة صلاح الدين الأيوبي
    لكن اثار هذا الأمر عدة تساؤلات في بداخلي هل الأحتفال بعيد ميلاد فيفي عبدة يستحق كل هذه الضجة ؟ هل اصلا يجب ان نحتفل بعيد ميلاد فيفي عبدة في التلفزيون المصري وعلي مدار ساعتين كاملتين خصوصا انها كانت في احد لقاءات القناة منذ وقت قريب وفضلت بردة ترغي ساعتين ؟ بالتأكيد القناة لم تفعل ذلك من نفسها هناك سياسة تحرك القناة يرسمها المسؤلون الكبار فكيف يفكر هؤلاء في مستقبل البلاد وما الشيء الذي يريدون ان يرسخونه في عقول الناس وإلي اي مصير يريدون دفعهم ؟ وايهما احق الأحتفاء بالراقصات ام الأحتفاء بالعلماء والأدباء لماذا لم يفكر التلفزيون في اي يوم ان يحتفل بعيد ميلاد ابراهيم اصلان او صنع الله ابراهيم وسحر الموجي او الراحلان العظيمان رجاء النقاش وعبد الوهاب مطاوع اوالأبنودي شفاه الله او الفاجومي متعه الله بالصحة او بفاروق جويدةاو فاروق شوشة او حتي الأحتفال بمخرجين كبار مثل يوسف شاهين وتوفيق صالح ومحمد خان لماذا لم يحتفل التلفزيون بشاعر عربي كبيرهو نزار قباني عيد ميلاده كان الشهر الماضي – مارس - وذكري رحيله هذا الشهر – ابريل –
    ايهما احق بالأحتفاء والتكريم الذي يثير فكرك ووجدانك ومشاعرك ام الذي يثيرغرائزك ؟ الذي يجعلك تحلق بجناحيك في السماء الواسعة ام الذي يهبط بك في نفق مظلم ضيق؟ .. الذي يمتعك - ان متعك- لحظات ام اياما طويلة ونحن عندما نفتخر ببلادنا ونقدمها للأخرين او يذكرها الأخرين هل يقال مصر بلد احمد زويل ومجدي يعقوب ونجيب محفوظ ويوسف ادريس ام يقال بلد فيفي عبدة ودينا ؟ هل مجد الأمم يبني علي اكتاف العلماء والأدباء ام علي اكتاف الراقصات ؟ وهل نتوقع من هذا الجيل الذي نغذي فيه هذه الروح ونعظم عنده هؤلاء الناس ان يكون مستعدا لأي مواجهة عسكرية يدخل فيها ؟
    هل الجيل الذي نعظم في عينيه امثال هؤلاء يمكن ان يحمل السلاح يوما ؟ هل الجيل الذي يسهر ليشاهد قصة حياة فيفي عبدة ودينا وصفوة يمكن يوما ان يحرر القدس ؟ – معلومة بسيطة التلفزيون الأسرائيلي ينهي اذاعته الساعة الثانية عشر ومعلوم ايضا انه بعد ترك صفوت الشريف للأعلام وتعين ممدوح البلتاجي جعل ارسال القنوات المحلية والمتخصصة ايضا حتي الساعة الثانية عشر إلا انه رحل بعد شهرين فقط ( بالطبع لا يحتاج الأمر لتعليق ) –
    والسؤال الذي مازال يفجر رأسي ماذا يريد منا هؤلاء الذين يحكموننا ؟ هل يريدون غرق السفينة ام النجاة بها ؟ وهل عندما تغرق ستغرق بنا نحن فقط أم سيكونو هم اول الغرقي ؟

  • 16 comments:

    خمسة فضفضة said...

    السلام عليكم ورحمة الله وبركاته

    هي دي سياسة الاعلام عندنا من ايام صفوت الشريف لحد دلوقتي مافيش حاجه اتغيرت كل همهم انهم يلهو الشعب باي حاجه وخلاص ، مش عاوزينهم يفقوا للواقع المهبب اللي عايشين فيه ، ولو تلاحظ كل فتره يطلعوا علينا باي حكايه والسلام ويفضلوا ينفخوا ويكبروا فيها لحد ما البلد كلها تبقي موراهاش شغله الا هي ، فلان اتجوز فلانه وفلان طلق فلانه وفلان اتقبض عليه مش عارفه ليه وفلان خد بعضه وهرب وفلانه بوليس الآداب مسكها ......الخ
    كل ده عشان الناس تفضل مغيبه عن الواقع وعايشه تتابع قضاياهم الوهميه

    الموضوع ده فكرني بسنة 90 لما مصر راحت كاس العالم في ايطاليا قاموا باعتين مين بقي علشان تعرف الشعب الايطالي علي امجاد المصريين (ال يعني الايطاليين \تايهيين عن مصر اللي نصهم متربي فيه )
    المهم عارف بعتوا مين



    طنط نجوي فؤاد تخيل
    حاجه تقهر مش كده


    وعموما ارجع واقولك ما تستعجبش ولا تستغربش انت اكيد اكيد في مصر


    سلام

    mostafarayan said...

    عزيزتي الغالية خمسة فضفضة انت دايما منوراني ومشرفاني ومفرحاني بزيارتك يارب الزيارات تفضل كدة متصلة بلا انقطاع
    انت جبتي المفيد في جملتك الأخيرة
    ( ما تستعجبش ولا تستغربش انت اكيد اكيد في مصر )

    FaceMoon said...

    ههههههههههه
    طيب انتم دلوقتى قلتوا كل حاجة وانا مبقاش عندى حاجة اقولها اعمل اية بقى
    انتوا جبتوا المفيد اى حاجة بيعملها الاعلام دلوقتى عبارة عن تغييب لعقول الشعب عشان يلهوهم مش اكتر دول حتى مش بيسردوا الوقائع التليفزيون زى الصحف القومية بالظبط اللى بتشوفة وبتقراة غير الحقيقة واحسن ناس تخليك تغيب عن الوعى خالص هو اللى بيتذاع دلوقتى من عرى وفيديو كليب ولقاءات مع ناس ملهومش لازمة وللأسف الناس اتعودت على التافهات يعنى لو عملوا برنامج ثقافى تانى واستضافوا حد غير فيفى عبدة حد كاتب شعر مثلا تفتكر مين اللى حيتفرج ولا اساسا حيعرف مين اللى بيتكلم
    الشعب بقى عندة لامبالاة وزهايمر مبكر
    ربنا يهدى الجميع
    تحياتى ليك ولمواضعاتك الراائعة

    تايه في وسط البلد said...

    الشاب الثائر درش،
    هذا اعلامنا ولا ازيد

    اشكر لك مرورك لدي والقضية ما زالت مطروحة للنقاش

    انت من الان صاحب مدونة

    بالتوفيق

    راجى said...

    من الاقوال المأثورة للراقصة الفاضلة
    انا لو عملت فلوسى هرم ووقفت عليه ممكن اشوف تنزانيا
    وفات على المذيعة الذكية تسألها طيب فين تنزانيا دى؟

    mostafarayan said...

    فاسمون
    اهلابيكي يا قمر ودايما منورة
    بصي اذا كانو هما عايزين يستهيفونا احنا المفروض مندلهمش فرصة لكدة نقاطع التفاهة مش بس المنتجات الغربية
    تحياتي ليكي

    تايه في وسط البلد
    اهلا بيك دايما

    راجي
    اهلا بيك دايما ومن اللحظة دي تقدر تعتبر المدونة مدونتك
    بس تفتكر المذيعة اصلا عارفة تنزانيا فين

    rovy said...

    معلهش الحمد لله انها جت على كده وسمعونا قصه حياه فيفى وبس يعنى لسه ما وصلناش نعمل مسابقه اسمها هزى يا نواعم .. شفت بقى ان احنا احسن بكثير من غيرنا .. وربنا يستر
    خالص تحياتى

    rovy

    Desert cat said...

    كل ده علشان عيد ميلاد فيفى عبده
    او عيد ميلاد منى ذكى
    الا هو عيد ميلاد احمد زويل امتا
    هو مين اصلا احمد زويل ده
    والله الناس دى ليها حق تهج وتسيب البلد اللى مش بتقدر غير فيفى عبده وامثالها
    تحياتى

    ابراهيم said...

    اعتقد انك من الممكن ان تختلف معي في اني اخواني ولكن اعتقد انة من المستحيل الا تتوافق معي ان النظام في مصر يشبه وسط فيفي عبدة ويمكن وسط فيفي عبدة فية منة فايدة لكن الحكومة مفيش منها فايدة

    دواير said...

    أخي ..لا أدري لماذا حين قرأت كلماتك اقتحمت عقلي أبيات لقباني يقول فيها..
    والعالم العربي يرهن سيفه
    فحكاية الشرف الرفيع سراب
    والعالم العربي يخزن نفطه
    في خصيتيه ... وربك الوهاب
    والناس قبل النفط أو من بعده
    مستنزفون ... فسادة ودواب
    ماتت خيول بني أمية كلها
    خجلا ... وظل الصرف والاعراب
    فكأنما كتب التراث خرافة
    كبرى ... فلا عمر ... ولا خطاب

    .............نعم ماتتت خيول بني أمية كلها....وأصبحنا نحتفل بعيد ميلاد فيفي عبده
    ......أشكرك على زيارتك لمدونتي..وتقبل زيارتي

    canary said...

    ايه دة يا درش انت شيوعى والا ايه؟؟
    ازاى متكونش عارف اهميه فيفى عبدو وتأثيرها على الثقافه المعاصرة
    ومساهماتها الخلاقه فى تنميه الوعى الحضارى العربى
    دة طبعا غير مساهمتها فى تنميه الاقتصاد القومى زمان لما كانو الاخوة المثقفين العرب بييجو مخصوص عشان يمتعو اعينهم بمحاضرات الهدوم اللى كانت بتلقيها فى ندوات شارع الهرم الثقافيه .
    انا مكنتش عارفه انك متأخر كدة
    بس اتضح انك ولا تفهم اى شئ فى كيفيه بناء حضارات جديدة تعبر عن شعوب قديمه
    اووووووووووف

    monaliza said...

    هو انت بتعتبر اننا عندنا اعلام اصلا؟بأمارة يوم الاضراب والكل طلع يقول مفيش حاجة حصلت ومصر بخير
    بجد احييك جدا على طرح هذا الموضوع وفكرنى بموضوع كان نشر لفيفى عبده من كام سنة مش عارفة كانت بتتكلم عن مين من الاجانب المشهورين وبتقول انه ميعرفش فى مصر غير ابو الهول وفيفى عبده وطبعا هى مبسوطة جدا ومش مهم بقى سمعتنا عند الناس اللى بره تكون ايه؟
    اللهم لاتؤاخذنا بما فعل السفهاء منا

    sasatifa said...

    يا سلام انت ما قرتش ان سعادتها اجلت مسرحيتها عشان الطلبة ما ينشغلوش بيها(بجد والله
    امال انت فاكر البلد ماشية هزة هزة كده ليه.استغفر الله.انت شكلك هتركبنا ذنوب
    والله العظيم هههههههههههههه هم يضحك
    سلام

    استراحة محمد said...

    للأسف زى ما انت قولت الاحتفال فى التلفزيون بالراقصات وبس
    اما من يستحقوا فالنسيان هو صفة ذكراهم
    طب على الأقل نوزن المعادلة ونسيب الناس تحدد اختيارتها نحتفل بده ونحتفل بده ، وانا راضى بكده كحل مؤقت

    صبرني يارب said...

    والله يا مصطفى انا مش عارفه انت ازاي بتسأل السؤال الاخير ده

    ما هما عاملولنا بروفه يا عمنا مش السفينه غرقت والناس ولعت وغرقت والقبطان واغلب الطاقم هوبااااااا اختفوا ؟؟؟

    هو ده الى هما عايزين يعملوه

    وبعدين مش هرب فيفى عبده من اهلها واحترافها .... الرقص ايه ؟؟؟ ده اهم من الى انت قلتهم ده كله ؟؟؟

    على فكره سياسات القنوات دي رغم انها يمكن مش تبع الحكومه احيانا لو فى فضائيات عربيه يعنى مش مصريه

    الادارات نفسها فاسده وعقولها فاسده وعندهم مبدا ان الناس بيتكيفوا من الفساد ده وان الهلس هو الى بيجيب فلوس
    وان الناس عايزه كده

    ناس مين ؟؟؟
    الناس الى هما يعرفوهم وامثالهم من الفاسدين والفاضيين من جوه .
    لسه ما فاقوش ان الناس بقى فيها شرائح تانيه غير اللمبي
    وشكرا لك اخي الفاضل

    norahaty said...

    السلام عليكم ورحمة الله وبركاته
    الاستاذ مصطفى**
    ابداعات شاب ثائر

    انت لسه بتسأل هم بيعملوا لمصلحه البلد ولا عكسه
    وهى دى محتاجه سؤال؟
    الاسمدة المسرطنة
    التقاوى المشعة
    اكياس الدم غير المطابقة للمواصفات
    ردم البحيرات وعمل مزارع سمكيه بعد كده فى حتت غيرصالحة
    تجريف الارض الزراعية واستصلاح الصحراء بعد هذا؟
    كل ده مش لمصلحة البلد؟انت حتنكر ؟والله احنا يامصريين حاجه عجيبة شايفين
    الحقيقه زى الشمس وننكرها فراعين وما يملى عينا الا ال..... اعرفها انت بقى
    اقولك كفايه كده نجحت فى نرفزتى ولك الشكر
    ان شاء الله دى اول زيارة وبرضه مش حتكون اخر زيارة باذن الله
    ووووووو
    سلامو عليكو
    norahaty