Sunday, April 20, 2008

نتائج التاج الواصل من منحنيات


مرر لي صديقي احمد صاحب المدونة الجميلة منحنيات هذا التاج ولأن احمد صاحبي ولأني ماقدرش ابدا ازعله فانا هستعين بالله واحاول الأجابة علي اسئلة التاج رغم انه اصعب شيء عليا اني اتكلم عن نفسي ودي الأسئلة اللي المفروض دلوقتي اجاوب عليها ربنا يستر بقي
1: اذكر 10 اشياء عن نفسك
2: اختر 5 اشخاص تهدى لهم التاج
3: لاتهدى التاج لمن اهداك
4: ابقى عرف الى بعتلك التاج ان التاج نزل وتعالى شوفه
انا دلوقتي هجاوب ركزو بقي وادعولي
1- طبعا بحب الله سبحانه والملائكة والانبياء الكرام وبحب مصروبحب اسرتي وطبعا انا عارف ان دة طبيعي و المفروض اننا كلنا بنحبهم ولكن فقط اردت ان يكونوا من ضمن الأشياء العشر
2- بحب القرأة قوي شايف ان القرأة احلي متعة في الحياة احلي من متعة المرأة بقول دة رغم اني لسة شاب في العشرينات ولسة مش متجوز لكن شايف كدة ..
الكتاب هو الصاحب الوحيد اللي ممكن تروح له في اي وقت وتسيبه في اي وقت من غير مايزعل منك هو الصاحب الوحيد اللي لما تغيب عنه مايعاتبكش بالعكس بيكون فرحان قوي بزيارتك الكتاب هو الصاحب الوحيد اللي بيديلك عصاره افكاره راضيا وسعيدا ولو هنتكلم عن القرأة والكتب بالنسبة ليا هنتكلم كتيرقوي
3- بحب الشعر والقصص والأدب بشكل عام وبحب جدا قصص زكريا تامر كاتب سوريا العظيم وشاعر القصة القصيرة الأول وشايف انه مش بس من اعظم كتاب القصص في الوطن العربي لاء في العالم كله بحس انه له طريقة متفردة في الكتابة ماحدش يقدر يجي جنبها وبحب كمان يوسف ادريس في القصص القصيرة اكثر من الروايات .. يوسف ادريس من الكتاب القلائل اللي بيقدر يغوص جوة النفس البشرية وبيتكلم بمنتهي السهولة والرقة عن تعقد المشاعر وانا متأكد انه هو وزكريا تامر لو كانو في دول اخري تحترم القرأة و الكتاب بالتأكيد كانوا حصلوا علي جائزة نوبل وبحب طبعا ابراهيم اصلان وناس تانين
كتير - وكمان بحبني كقارئ وبجد ساعات بستغرب انا بجيب الأفكار دي منين -
4- انا شايف نفسي مشروع اديب جامد شايف كمان اني بكتب قصص احلي من كتابتي للشعر وللأغنية
- اه بكتب اغاني كمان ممكن تقرؤا واحدة هنا بعنوان بشتاق لعنيكي اغنية لمصر
بس بشكل جديد -
ولو كانت الموهبة الأدبية رزق من الله - وهي كذلك بالفعل - فأنا اعترف ان الله سبحانه كان كريما معي إلي اقصى حد عندما اعطاني نصيبي من هذه الموهبة
- فاللهم لك الحمد الشكر واعني على حسن استخدامها-
.. شايف كمان ان ليا اسلوبي الخاص في الكتابة مش بقلد حد وبكتب بطريقة عفوية ويمكن دي تكون احلي حاجة في كتابتي .. شايف كمان انه لوكان ليا مستقبل كويس هيكون عن طريق الكتابة - مش عارف دة احساسي يمكن يكون صح ويمكن يكون غلط - وربنا يقدم اللي فيه الخير اين ماكان فسبحانه هوالعليم الخبير
5- انا انسان ملول بطبعي بتخنق بسرعة مش بحب الأنتظار ممكن لو جيت اشترى حاجة ولاقيت المحل زحمة او البائع مش مهتم بيا كما ينبغي - أه طبعا لازم يهتم بيا ويشعرني بكل التقديروالأحترام دة حقي ودي ابجديات البيع - بمشي رغم احتياجي للشيء دة
- طبعا حوار مترو وزهران واخوانهم دة مش تبعي خالص -
6- بحب الصراحة والمواجهة ومش بحب الكذب ولا اللف والدوران لكن للأسف كتير من اللي حواليا بارعين في الأحتيال
7- ساعات بيبقي نفسي احلق واطير في السما زي الفراشة اوالطائر الحر يفرد جناحه وقت مايحب يروح المكان اللي يحبه وقت مايحب ويمشي من المكان اللي مايعجبهوش وقت مايحب .. اكيد وهو فارد جناحه وطايرفي السما بيكون حاضن الدنيا بين جناحه شايف بعنيه من فوق ان الدنيا صغيرة قوي وعلشان كدة بيضحك علي البشر اللي بيتقاتلوا عليها رغم انها في اساسها حقيرة ولا تستحق
8- عنيد ودماغي ناشفة وساعات بكبر الحاجات الصغيرة رغم انها ماتستاهلش وبكون عامل زي الأطفال بالظبط وساعات تانية بقابل الموضوعات الكبيرة بهدوء وحكمة - لاتناسب اندفاع الشباب- وكأني شخص غيري ممكن اكون متناقض بس انا كدة ومتهيألي في ناس كتير كدة
9- بحب صحابي ولو اني انجرحت منهم ساعات لكن الجرح علمني - تنفع اسم اغنية تكسر الدنيا دي - احاذر ومافتحش قلبي علي طول واخلي بيني وبين الناس مسافة علشان لو حصل جرح ماتعبش قوي
10 - نفسي قوي اروح احج واعمل عمرة واصلي عند الكعبة وفي المسجد النبوي الشريف واشرب من ماء زمزم الرحلة دي بتغسل الروح وانا محتاجها قوي نفسي كمان ربنا يكرمني بزوجة صالحة تعني علي امرديني ودنيايا انجب منها اولاد صالحين يكونو عمل صالح لي الدنيا وفي ميزان حسناتي يوم القيامة .. نفسي كمان لما اموت الناس تفتكرني بالخير وتترحم عليا وتدعيلي دعوة صالحة ... نفسي كمان اكون حاجة كويسة في دنيتي دي مابقاش واحدعدى وخلاص وآثر في غيري - بالأيجاب طبعا - زي ما غيري اثرفيا .. نفسي كمان ارضنا تتحرر من الظلم اللي كابس عليها سواء بإيد اولادها اواعدائها .. ونفسي كمان ربنا يرزقني الشهادة وقت الموت نفسي كمان ودي اخر واهم حاجة لما اموت ادخل الجنة واكون في الفردوس الأعلى منها واكون جار للنبي محمد صلي الله عليه وسلم واورد حوضه واشرب من يده الكريمة شربة هنيئة مريئة لا اظمأ بعدها ابدا
واحوز على شفاعته .. وان ربنا يضحك لي يوم القيامة ويعطيني كتابي بيميني
- انا وكل المسلمين طبعا - معلش طولت في دي بس كانت اهم حاجة واخرحاجة كمان
ثانيا : اختر خمس اشخاص اهدي لهم التاج
اعتقد ان كل اللي عارفهم التاج وصل لهم
ثالثا : ياعم احمد تعالى اقرأ نتائج التاج اللي بعتهولي
وسلام بقي علشان انا كدة طولت عليكوا
تحديث مهم
بصوا يا جماعة انا عايز اقول حاجة مهمة قوي علشان ماحدش يفهني غلط بخصوص موضوع الكتاب والمرأة فأنا زي كل الرجالة بحب الستات قوي
وشايف ان الست اجمل شيء في الدنيا مش بس نصف المجتمع لاء دي المجتمع كله وشايف ان المرأة الصالحة كنز من كنوز الدنيا لكن بردة شايف ان متعة القرأة والكتاب دي متعة لاتضاهيها اي متعة لكن بردة الأتنين ليهم وقتهم ووظائفهم التي تختلف عن اللأخر انا بس حبيت اوضح علشان ماحدش يفهم كلامي غلط اوبمعني غير اللي عايزاقوله

18 comments:

FaceMoon said...

هييييييييييية اول تعليق
ماشاء الله
انا خايفة الناس تحسدك
صفات جميلة وبتشارك معاك فى بعض الحاجات وتلقائيتك وطيبتك باين فى كلامك ربنا يحققلك كل اللى تتمنااااة لان انت تستحق
تحياتى

nonoymm said...

هههههههههههههههههه
طب يا عم الثائر
مين قالك ان متعة القراءة احلى من متعة المراءة ما تحمكمش على حاجة قبل ما تعرفها الاول
ربنا يرزقك كدة بزوجة تسرك اذا نظرت اليها وتعينك على طاعة الله وصدقني مش هتقدر حتى تنام وهي جنبك
تحياتي لاجاباتك الجميلة
ولحضرتك

عمو احمد said...

والله مفيش احلى من كده تاج
ربنا يكرمك يابنى
انتا من كلامك انسان متدين وعارف ربنا
وعايش الدنيا لهدف نبيل اوى
بالنسبه لموهبتك فى الكتابه فان شاء الله حيكون ليك مستقبل باهر وان شاء الله لما تنزل كتبك حابقى اقولهم الكاتب العظيم ده صاحبى
روحك صافيه اوى ونقيه
انا سعيد انى اتعرفت عليك يامصطفى

mostafarayan said...

فاسمون
لوقلتلك منورةياقمر مش هبقي بجاملك بس انا شايفك احلي من القمر ربنا يخلكي علي كلامك الحلو عني
بصي لوهيحسدوني علي موهبةالكتابة يكونوا اغبياء زي ماقولتلك انها رزق من الله
بس انت ماقولتليش ايه الصفات اللي بنتشارك فيها؟ مستني ردك
ومرة تانية منورة يا قمر

- الأخت الفاضلة : عاشقةالنقاب
منوراني دايما وكلامك بيدل علي انك انسانة جميلة قوي ادام الله سعادته عليك انت وزوجك واولادك
وطبعا انتي دلوقتي خلاص بقيتي من اصحاب البيت
بصي اناعايز اقول حاجةمهمة قوي ونحط تحتها عشر خطوط علشان ماحدش يفهم غلط طبعا انا زي اي راجل طبيعي في الدنيا بحب الستات قوي وسني دة يخليني احبهم اكتر واكون مشتاق لوجودهم في حياتي اكتر ودايما بشوف ان المرأة الصالحة كنز من كنوز الدنيا
- ربنا يرزقني وشباب المسلمين -
لكن ارجع واقولك اني شايف ان متعة القرأة اجمل متع الحياة متعة لاتضاهيها متعة و اقولك على واقع ملموس في واقع حياتنااليومي الست ممكن تتطلق من جوزها لو لاقدر الله اصابه مرض ولم يعد قادر علي اللقاء معها
ولها بالطبع العذر والحق في ذلك وماحدش يقدر يقولها حاجة لكن الكتاب مش ممكن يسيبك ابدا مهما يجرى لك بالعكس دة وانت عيان بيكون قريب منك اكتر كمان الست بسبب ظروف الحمل والرضاعة والحيض قد لا يستطيع زوجهاان يقربها عكس الكتاب في اي وقت بيكون معاك
لكن طبعا الستات دول احلي حاجة في حياتنا مانقدرش نعيش من غيرهم اصلا

- عمو احمد
لولاك لما كان هذا البوست فاسمح لي يا اخي انا اهديه لك
اشكرك علي كلامك الحلو عني وانك شايفني كاتب عظيم وانت ايضا صاحب مش بس عظيم انت جميل قوي

walaa said...

حلوه اجابتك
وربنا يديك طولت العمر ويرزقنا جميعا الشهاده عند الموت
واحلى صديق الكتاب ونادر قوى لما تلاقى حد بيقرأ بجد فى هذا الجيل وفعلا كتابت قصصك جميله انا كنت بحسبها واقعيه
تحياتى ولاء
على فكره بارك الله فيييك فى بوست فيفى عبده اصل البلد خلت من كل حاجه من المشاكل علشان كده فيضينا لفيفى عبده

mostafarayan said...

ولاء
ازيك يا قمر منورة ومشرفة دايما يارب العلاقات دايما تفضل كدة متصلة وانا بشكرك قوي علي كلامك عني
بالنسبة للقرأة اسمحيلي اختلف معاكي في شباب كتير قوي دلوقتي بيهتموا بالقرأة تقدري تقولي في جيل من الكتاب الشباب طلع و طلع معاه جمهوره بدليل نجاح كتب عمر طاهر واحمد العايدي وال3 مدونات غادة وغادة ورحاب ودلوقتي في كتب بتنشر للكتاب كلهم من سننا زي طارق امام ومحمد فتحي ومحمد هشام عيبه واللي استفاد من دة جيل الكبار كمان بدليل نجاح عمارة يعقوبيان وشيكاجو لعلاء ألأسواني ونجاح رواية بهاء طاهر واللي نجح دول جمهورالشباب مش الكبار علي فكرة
المدونات عملت جيل من الكتاب وجيل من القراء بقينا بنقرأ لبعض ولما كتب بتنزل بنشتريها لأننا شباب زي بعض حاسين ببعض وعايزين ننجح بعض
وغير الكتب كمان في ناس كتير بتقرأ علي النت وفي المدونات
عايز اقولك رغم صعوبة الحياة وغلاء اسعار بعض الكتب لأرتفاع تكاليف الأوراق واللأحبار والطباعة إلا ان لسة في شباب كتير بتقرأ بالعكس اتجاهم للكتاب والقرأة زاد
انا متفائل خير في المجال دة وربنا يكرمنا جميعا

سارورة said...

مصطفى بجد بجد احلى حاجة فيك الصراحة ، وانك بتقدر تقول اللى انت عايز تقول من غير ما تخاف حد يفهمك غلط .. تقبل خالص تقديرى واحترامى ليك وبجد مدونتك جميلة جدا

canary said...

كل كلامك حلوووو وجمييييل وراااائع لكن تيجى عند نقطه واحد وهى بتاعه الكتاب
انا معاك فى ان الكتاب هو اروع شئ فى الدنيا
لكن برضه يا درش ميمنعش ست جميله رقيقه تعرف ربنا وتجيب طراوة فى الحر دة
غير كدة بقى الكتاب مبيخلفش عيال
سلامى ليك

صبرني يارب said...

تمام يا اخي الفاضل تاج جميل ولايق عليك وانت باين عليك شخص راق
ويارب ينولك الى في نفسك يارب
وصدقنى لو قلبك نضيف ونيتك صافيه فى الامنتين بتوع الجواز والحج والعمره استناهم قريب ان شاء الله

وربنا معاك ويوفقك يارب

mostafarayan said...

سارورة
اهلا بيكي يا قمر دايما منورة مشرفة

كناري
طبعا يا جميلةانتمش محتاجة ترحيب انت دلوقتي صاحبة بيت
بالنسبة للحديث عن الكتاب ارجو منك ان تنظري علي تعليقي على عاشقةالنقاب وستفهمين وجهة نظري
الستات اجمل شيء في الدنيا
ولكل من الست والكتاب متعته الخاصة
تحياتي لك ولمرورك الكريم

- الأخت الكريمة صبرني يارب
اشكرك علي مرورك وحديثك الطيب عني
حقق الله لكي ولي وللمسلمين كل امانيهم الطيبة

Gannah said...

اخى الكريم مصطفى
سعدت بزيارتك لمدونتى .انا كنت فاكرة ان القراءة بقت موضة قديمة و ان الشباب خلاص معدش فيه حد فيهم بيقرا و انا سعيدة جدا لاكتشافى ان لسه فيه ناس بتحب الكتاب و ايه رأيك ربنا يرزقك بزوجة صالحة محبة للقراءة حتى تجرب متعة اخرى و هى مشاركتها لك فيما تحب. اتمنى ان يحقق لك كل امنياتك و يارب نشوفك قريب عندنا فى المدينة المنورة و كمان تروح مكة و ترى الكعبة لترى جزء اخر من الجنة.
تحياتى

WhItE HeArT said...

بجد سعيد باكتشافي لمدونة حضرتك لإنها تدل على عقلية جميله جدا

ردودك عجبتني ومش هقول لك القراءة جميله وماما سوزي بتحث على القراءة والكتاب لكل مواطن ومش عارف ايه لكن مادام ده شي ء انته بتحبه يبأه عظيم انا بحب قراءة حاجات معينه مش كل حاجة بصراحه

تحياتي

مرجانة said...

حلوة فكرة المنحنيات دي يا ثائر
تفتكر المنحنيات دي بتتغير مع الزمن ؟ يعتي هتستقيم مثلا ؟ متبقاش منحنيات ؟
ولا تفضل منحنيات ثابتة ؟
حد فاهم حاجة؟
تحياتي اليك و الى مدونتك

mostafarayan said...

Ganna
انا شاكر جدا لمرورك ولكلامك الحلو عني
وربنا يتقبل منك الدعاء دة

قلب ابيض
وانا اشكرك علي كلماتك الرقيقة هذه
واتمني ان تصير صديقا دائما للمدونة

مرجانة
اهلا بيكي دايما بيكي
بصي منحنيات اللي قصدي عليها هي مدونة عمو احمد اللي هتلاقيها ثالت تعليق هنا
اما المنحنيات اللي قصدك عليها دي فحسب انتي قصدك علي اي منحني وفي اي موضوع
ارجو انك في المرات القادمة تفصحي وتتكلمي كدة بالمفتشر من غير لوغاريتمات
مرةاخري سعدت بك وانا في انتظار زياراتك الأخري

canary said...

ايوة يا سيدى
ما هو مينفعش مثلا اقول اكل الكشرى احلى من ركوب الطيارة
او الصيف افضل من كفر الشيخ
دة شئ ودة شئ مختلف
دى متعه ودى متعه مختلفه لا وجود للمقارنه بينهم
وكويس اوى انك نزلت تحديث عشان دة خلاص جيوش الستات كانت بتتاهب للأنقضاض على المدونه بتاعتك وتنفيضها واحالتها الى كوم تراب وكنت هتبقى انت عدو المراءة رقم واحد ومتلقيش بقى واحدة ترضى تتجوزك وكل اللى تروح تخطبها تقولك اتجوز كتاب او تقولك كتاب ومثنى و ثلاث ورباع ومجلد كمان وكدة بقى واحنا مش عاوزينك تواجه المصير الاسود دة
تحياتى و سلامى

شهرزاد said...

انا انسان ملول بطبعي بتخنق بسرعة مش بحب الأنتظار .....
............
ايوه الآن أنا فهمت سبب عدم صبرك على تأكيد الكلمة
وعلى كل حال أنا أزلتها من عندي
وتقدر تعلق بكل سهولة ومن دون ملل الانتظار!!!!
ما شاء الله شخصية عفوية وصادقة
واسلوب شيق وجميل في الكتابة
إلى الأمام وإن شاء نشوفك كاتب كبير جدا وفي بلاد تقدر العلم والأدب والفن وأعجبني في شخصيتك أن أحلامك لا تتوقف عند حدود الدنيا الفانية ولكن تتجاوزها إلى حدود الآخرة الباقية
قليل جدا هم الناس الذين يفكرون بآخرتهم ويعملون لها بصدق لينالوا أعلى الدرجات في الجنة..
فقد أصبح معظم الناس يتكالبون على دنياهم وكأنهم مخلدون فيها للأسف..
ويا رب يحققلك كل أحلامك
والله وانا زيك نفسي أزور بيت الله الحرام.. وأعمل حج أو عمرة.. ربنا كريم.. تحياتي لك ولقلمك الجميل الصادق
ومن إبداع إلى إبداع

تحياتي وسلامي

شهرزاد..

Darsh said...

مصطفى بسم الله ما شاء الله عليك

حماك الله و رعاك

بجد أنا سعيد أني عرفتك و دخلت مدونتك

الحمد لله فيه نقاط تشابه كتير

بكتب شعر و قصص زيك بس بكتب زجل و ما بعرفش أكتب أغاني

بتحب القراية و يوسف ادريس كمان في القصة .... بس على فكرة على قد روعة يوسف أدريس في القصة القصيرة نجيب محفوظ ما ظلمهوش لما خد نوبل في الأدب ... لأنه أكثر من رائع في الرواية

لا و الله فينا حاجات كتير مشتركة

ياللا أبسط يا عم

هنبقى أول أخين اسمهم مصطفى :)

من هنا يأتي التميز

ساره البحر said...

بجد ربنا يحميك يا مصطفى انت انسان محترم ونقي جدا من جواك
وشخصيتك جميله وحتى التناقضات اللي بتقول عليها جميله موجوده في الناس انا عن نفسي شخصيه متناقضه جدا في بعض الحاجات
ربنا يوفقك ويحميك وانا سعيده جدا وليا الشرف اني اعرف انسان زيك