الجزء التاسع من الرباعيات

(81)
دخلت مراتي عليا وانابتفرج علي الدش
كانت قناة اوربية عليها نسوان اش اش
غضبت قوي الولية وطلبت الطلاق
وبعد محايلة طويلة وافقت ترجع تاني
علي شرط ما اصعبه لازم اشيل الدش
(82)
انا اتخلقت ليكي وانت اتخلقتى ليا
ومهما يحصل بينا هنمشي الطريق في الدنيا
ومهما قالوا عنا كلام وحاجات كتير
مش بيقل شوقنا بيزيد في كل ثانية
(83)
انت اجمل انسانة شوفتها في الدنيا
وحاسس اني عارفك قبل ماشوفك بعنيا
وحاسس بحنين ليكي اكبر من اي كلام
وعايزك صديقة وحبيبة وعشيقة وكل شئ ليا
(84)
ياللي تقول الموت حقيقة الحياة
الموت هوالنهاية لطريق طويل مشيناه
والناس لازم تعيش وتحب وتعمر
والموت مش بعبع لينا يخوفنا من الحياة

(85)
ساعات كتير بحاول اكتب قصيدة شعر توصف حبي ليكي
واقول اهي تبقي هدية بسيطة اقدمها ليكي
واكتب كلمتين واسيب القلم تاني
كل الكلام عاجز يوصف حبي ليكي
(86)
قررت ابعت ايميل واقولك فيه كرهتك
وزهقت انا من غيابك وترددك وعندك
ولكن ياللعجب انا لما جيت اكتب
كتبت كلمة تانية كتبت اني بحبك
(87)
انا مش تيار اسلامي ولا سلفي ولا تبليغ
مجرد شاب عادي لساني بس بليغ
وعايز اشوف الدين والدنيا بمنظاري
من غير وصاية حد ولا استاذ ولا شيخ
(88)
باين قوي علي وشي حزين قوي وزعلان
طبيعي لما تسيبيني لازم عليا يبان
وبيسألوني الناس مالك جرى لك ايه
ردت دموع عينا ومانطقش اللسان
(89)
لو كنت لاعيب كورة مش شاعر اواديب
مش كان اتغيرحالي وبقي مني القرش قريب
وبقيت حديث الناس ووسائل الإعلام
ايه يعني كاتب عظيم لكني خالي الجيب

(90)
لما يبقي هم الناس كورة في رجلها
يبقي شيئ طبيعي تتسرق ارضها
وتقف في طابور طويل في اخر الأمم
وتاخد فوق دماغها وينتهك عرضها