الجزء الرابع من الرباعيات

(31)
زي ما انا حبيني بزاوبعي وانفعالاتي
لو كنتي صحيح عشقاني اقبلي كل صفاتي
ليه عايزاني اتغير
وانا لو في يوم هتغير هفقد اهم ميزاتي
(32)
في زمن عقيم مالوش ملامح او أي شكل
بنقابل ناس كتير منهم وفي واكترهم ندل
ناس يستحقوا نعلق فوق صدورهم طوق من زهور
وناس تانين اقل شيء يستحقوه القتل
(33)
عيني علي بنت اسمها مرمر
الشكل زي القمر والدم شهد مكرر
وسألتها يوم مالك الحزن ساكن ملامحك ليه
قالت وصلت لتلاتين وفارس الأحلام لسة ماجاش وتقدم

(34)
حلمت ياما زمان اطول النجم العالي
واعمل حاجات مهمة تتحاكي في الليالي
ولما كبرت ضحكت وبعد شوية بكيت
دة انا كنت بجد ساذج طيب مش واخد بالي
(35)
هو دة حلم بجد بعيد
ما اعيش العمر بحاله وحيد
وألاقي حد يشاركني عمري
ويمد لقلبي العاشق ايد
36
لو كنت يوم ألاقي مصباح علاء الدين
والخادم يسألني تطلب ايه يا جميل
اطلب ايه من الدنيا .. الستر والصحة
ودي مش بإيد الخادم دي بإيد رب كريم

(37)
فلافل من عند جاد
وكشري من ابوعماد
والحلو عند المالكي
دي حياة عازب يا ولاد
(38)
ايه خبار الدنيا معاكي طمنيي
لو قاسية شوية ماتزعليش بكرة تضحك يانور عيني
بتقبي هموم ومشاكل ياما وبتتحل
مش دايم حزن الدنيا اكيد صدقيني
(39)
نفضت للمدرسة والأبلة المتنرفزة
لاجل اني اشوف عنيكي وجمالك المعجزة
لكن لاقيتك واقفة بتضحكي مع غيري
لملمت في صمت جراحي ورجعت للمدرسة
(40 )
مش مهم تكوني انت شايفاني ايه
المهم اكون انا شايف نفسي ايه
وانا شايف نفسي حاجة كبيرة في المستقبل
فبلاش تقولي كلام عمرى ماهسمع ليه