Monday, May 31, 2010

في حضن الاسكندرية أتلاقو كل الاحبة







قبل القراءة
البوست ده يا جدعان فاتيماوي فلو لاقيتو فيه حاجة من روحها ماتستغربوش

**********
- احنا على الهوا يا بنى
- طب انزل بالتيترات
- إيه التيترات خلصت ..طب ادينى هوا
اصدقائي الغالين كنت دوما اسمع عن شغف الكتاب والشعراء بالاسكندرية كنت اعرف ان هذه البلد تملك سرا ما يجعلك تقع في هواها منذ اول لحظة ربما في خلال زياراتى السابقة لم اكن قد عرفته ولكن في هذه المرة بدأت اقترب من معرفته ..فالتاريخ الضارب في جذور اعماق الزمن والبحر واليود والهواء النقى والشمس الدافئة تجعل الذهن صافيا متقدا تتيح مساحة اكبر من التفكير والرؤية تجعل عدسة النظر عندك تتسع تعطيك مساحة لا محدوده من الهدوء والاتزان والراحة ولذلك ليس غريبا ابدا ان ينطبع كل ذلك على اهلها فتشعر بينهم انك تعرفهم منذ زمان بعيد ولذلك ليس غريبا ان تعرف ان كتابا كبارا مثل اسامة انور عكاشة -عليه رحمات الله -ووحيد حامد كانو يكتبون اعمالهم هنا في الاسكندرية وان الشيخ الجليل الشعراوي كان لديه شقه في الاسكندرية يذهب إليها بعد تصويرعدة حلقات من التفسير ليستعيد ذهنه ونشاطه ووليس غريبا ايضا ان تسمع من عالم جليل هو الدكتورسيد حسين العفانى: قوله انا سكندري الهوى.. فهذه البلد آثرة لكل المبدعين من كافة الاتجاهات والاطياف .
- ايه بتقول ايه بسط الكلام وخليها احمدي ..ماشي يابرنس نبسط
بصو يا جدعان اللي فات دة كله كان مقدمة للكلام عن رحلة اسكندرية اللي هي كانت بجد من اجمل ايام عمري انا وكل اللي شاركو فيها خصوصا من اهل القاهرة احنا في اليوم دة ادلعنا جامد قوي من اخوتنا الاسكندرانية لكن لو كان حد السبب الرئيسي في الدلع ده هو فاتيما اللي الكل كان رايح علشان يقابلها واللي هي لها مكانة كبيرة في قلوب المدونين كلهم وبصراحة احنا كلنا ادلعنا على حسها فلازم نوجه لها شكر مضاعف لانها بصراحة لو ماكنتش معانا ماكناش هندلع ولا هننبسط كده ..بدأ اليوم لما روحت قابلت خالد وفاتيما وشريف(هجايص) وضياء(بيوتفل مايند)في رمسيس واستقلينا الميكروباص للاسكندرية وهناك قابلنا انجي(هات من الاخر)واحمد علىAccording To Ali قدام مكتبة الاسكندرية وروحنا على قلعة قايتباي وهناك قابلنا مارو(قلب القطه )وكان معاها جوزها الاستاذ محمد وابنها وبنتها وبعض المدونين الاخرين وبعد جولة في قلعة قايتباي روحنا نستريح شوية في مطعم الزعيم لكن قبل مااسيب المشهد ده عايز احكيلكو عن لقطة مهمة حصلت لها علاقة بالكلام اللي قلناه في الاول واحنا بنستعد علشان نطلع الدور الاول من القلعة كان في مجموعة من الاجانب نازلين انا وضياء تلقائيا وسعنا لهم السكه لكنهم فاجأونا ونزلو من السلم ناحية اليمين .انا وضياء ماخدناش بالنا ان السلم ناحيتين.. زحمة القاهرة ودوشتها وخنقتها بتأثر على تفكيرك عكس البراح والهدوء اللي هناك اللي بيخلى ذهنك اكثر هدوءا وبيخلى الافق عندك يتسع والاحتمالات تكتروتزيد
بعده قابلنا دودو عاشقة الرومانسية وحنين القلب وحنان الشافعى واحمد (طعم البيوت) واستاذة نانو (القدر وانا) وكان معاها ابنها وبنتها
وخرجنا التربيزات برة وقعدنا نحتفل بعيد ميلاد فاتيما ..دودو كانت محضرة تورتين فواكه وشيكولاته وفضلنا نغنى ونهيص في الشارع واعتقد بردو ان ماحدش هينسى اللقطة دى ..كان في ست طيبة قوي عمالة تبص علينا من الشباك وكان معاها احفادها ولد وبنت صغيرين الست زي مايكون استغربت من الناس اللي بتغنى وتهيص في الشارع دي
-هو في حاجة يا اخوانا
- لا يا حاجة دة احنا بنحتفل بعيد ميلاد صاحبتنا دي
-طب كل سنة وهي طيبة
انا قلت لحنين ايه رايك لو نديها حتة من التورته وفعلا ادينها حته وقلنالها تبعت الولد الصغير ياخدها الست زي مايكون استغربت او حصلها بعض الاحراج لكن لما لاقتنا بنتحايل عليها اخدت الموضوع عادي وبدا الاحراج يروح من عندها
- انتو طابخين إيه ياحاجة النهاردة
- محشي
-محشي ايه يا حاجة
فضلة خيركو ورق عنب وكرنب
- طب غدانا عندك النهاردة يا حاجة
- انتو تأمرو يا ولادي يلا اطلعو
-لا يا حاجة مش هينفع دلوقتى علشان لسه واكلين تورته بس هنروح ونرجعلك
- وانا هستناكو
ايه يا جماعة دة هو لسة في حد كده الست دي فكرتني بمصرالجميلة مصر النقية يمكن هي لما فضلت تسمعنا ماكانش بدافع التصنت علينا ولكن بدافع الفضول الستاتي بتاع ناس زمان الجميلة دي غير كمان اننا اغراب وعاملين تحت بيتها مركز احتفالات فكان طبيعي يكون عندها فضول ايه الناس دي ..كمان في اكترمن لقطة شوفتها فكرتنى بمصر الجميلة اللي كانت من عشرين سنه قبل ما تتزحم قوي كده وتتفرنج ويطلعلنا محلات وشوارع واكلات مش عارفينلها اصل ولا فصل منظر العربية اللي الحصان بيجرها ومنظر العربية اللي الراجل بيجرها فكرونى بذكريات قديمة جميلة كنت بشوفها قي بيت جدتى في الدرب الاحمر قبل ما يتهد في الزلازل
بعدها جه صديقنا وليد الدوغري ولالولا فاطمة الزهراء
بعدها روحنا اخدنا مركب علي البحر وبجد كانت ساعة من اجمل ساعات حياتى.. انك تحس انك طايرفي الفضاء الواسع مافيش بيوت ولا حواجز ولامناظر وحشة بتضايقك او تعصبك كل حاجة حواليك تدعو للفرح والانطلاق زي ما الولد سواق المركب قال: هنا مافيش احزان ..وفعلا مافيش احزان طالما انك موجود بين حبايبك اللي شايلينك على كفوف كفوف الراحة ..بعدها روحنا اتغدينا وطلعنا بعدها عند سيدي المرسي ابو العباس وركبنا مراجيح ..ايه مستغربين ليه؟ ايوة ركبنا مراجيح رجعنا اطقال تانى او صحينا الطفل اللي جوانا ..الطفل النقي اللي ماتلوثش لسة بالحياه ومشاكلها والمقالب والخداع اللي بتحصل بين البشر ..كان احساس جميل قوي لما ركبنا المرجيحة اللي بتطير قي الهواء احساس انك طاير مافيش حاجة منعاك او حداك او موقفاك في مكانك وفضلنا نغنى اغنيه ضحك ولعب وجد وحب ..عيش ايامك عيش ليالياك خلي شبابك يفرح بيك ..
صحيح يا جماعة لو مافرحناش دلوقتى واحنا قادرين نفرح هنفرح امتى؟ اسباب الفرح ممكن تكون بسيطة قوي مش لازم يعنى علشان يكون عندك ملاين .بس وانا في المرجيحة جالى شعور الطائر اللي بيكون مرتفع عن كل شيء حواليه حاسس وهو في السما انه اقوي من اي شيئ واعلى من اي شئ ومش محتاج لأي شيئ اصل هو فوق في السما قريب من ربنا ..طب اللي بيبقي قريب من ربنا ده هيحتاج لايه إذا كان هو عنده كل شيئ ..افتكر كان في سؤال في تاج بيمر على المدونين لو ماكنتش بشر تحب تكون ايه؟
كان ردي احب اكون طائر قوي يفرد جناحه في السما ويطير .. طائر من الطيور البرية اللي مابتاكلش البايت ولا الميت عايز اكون طائر حر.بعدها اتكلمنا انا وفاتيما في النقطة دي قلتلها ان صلاح جاهين رغم كل الاشياء اللي مارسها (كتابة الشعر والاغانى والمسرح والاوبريت والفوازير والسيناريووالكتابة للاطفال واعداد البرامج والكاركتير ورئاسة التحرير والتمثيل والانتاج ) سألوه مرة انت عملت كل الحاجات دي ايه الشيئ اللي كان نفسك تعمله قالهم كان نفسي اكون راقص باليه سألوه باستغراب اشمعنى قالهم اصله بيطير في الهوا وانا نفسي اطير ..وانا راكب المرجيحة كنت حاسس انى فارد جناحاتى وبطير ..انا عارف انى طولت في النقطة دي بس مش مهم ..
بعدها كنا لازم نرجع فودعنا الاحباب واستقلينا الميكروباص إلى القاهرة العامرة
افتكرت لحظتها لقطة يحيي الفخرانى في خرج ولم بعد وهو راجع مصر وبيصرخ : جايلك يا مصر جايلك يا احمد يا عدوية ..او بلغة زمانا جايلك يا سعد ياصغير او يا بو الليف.
انا انبسطت قوي في الرحلة دي انبسطت بكل الناس اللي كانت موجودة وطبعا على رأسهم فاتميا اللي زي ماقلت لها محبه في قلوبنا كلنا وبسببها ادلعنا كل الدلع المبالغ فيه ده وعايز اقولها كل سنه وانت طيبة يا فاتيما ويارب يحققلك كل امالك ويرسم السعاده عليك.. هي دايما بتقول على نفهسا وهي معانا( انها امراءة افسدها التدليل) بس يعنى لو احنا مادلعناكيش انتى طب ندلع مين؟ الصح بقي اننا نقول (فاتيما امراءة ماخلقت إلا للتدليل ) ربنا يسعد كل ايامك ..وطبعا عايز اشكر كل اهل اسكندرية اللي كانت فرحتهم بينا لا توصف كلهم احتفلو بينا مش بس شالونا على كفوف الراحة لاء دة جوة عينهم
ولو كنت نسيت اسم ولا حاجة فسامحونى الاحباب كانو كتير اكبر من ذاكرتى التى فعلت بها القاهرة الافاعيل ولكن بالطبع الكل يعرف مدى حبى واعتزازي بالجميع ومدى فرحتى عندما اكون بينكم فكما يقول القائل : المرء قليل بنفسه كثير بأخوانه وانتم خير اخوان لي ويكفي انى جعلت اهداء كتابي الاول لكم فأنتم اول من قرأ لي وها انتم الان تعطرون ايامي بعطر السعادة والفرح ..احبكم واتمنى ان اكون معكم دوما
_______
*: بالنسبة للصور عايز اشكر اخي العزيز خالد همس الاحباب الذي التقطها لي .
********
بعد الفراءة
اريد ان ان اقول رأي في موضوع طرحناه اثناء رحلة الذهاب هو توقف بعض المدونين عن التدوين بعد الزواج.. انا رأيي ان سبب التدوين الرئيسي عند اكثرنا هو ان وصول صوتك للاخر.. بعد الزواج تجد من يشاركك الحياه يسمعك وتسمعه يتفق ويختلف معك اي انك تجد قارئ امام عينيك وليس خلف الشاشة ولذلك من الممكن ان تفقد شهيتك للتدوين.. بعد الانجاب وكثرة مشغوليات الحياة قد ينشغل الزوج بعض الشي عن زوجته ( باللهث وراء لقمة العيش )فتقل مساحة الحديث فتلجأ المرأة للتدوين وتبادل الأراء خلف حاجز الشاشة .هذا رأيي وقد يختلف البعض معه ولكن اختلاف الرأي لا يفسد للود قضية
لكم كل محبتى وودي يا اصدقائي الغاليين جدا

17 comments:

Kiara said...

عااااااااااااااا

غيظونى بئاااا

كلامك فرحنى اوي انكم فرحتو اوووووووي

mostafa rayan said...

كيارا
بنت منطقتى ازيك يا قمراية قالولي انك كنت بتتصلي وبتطمنى عليا فيك الخير والله
بس ماقلتليش أيه رأيك في صور ابن منطقتك؟

Kiara said...

ايوه اتكلمت كذا مرة ووصيت خالد عليك :)

الصور جامده طبعا

mostafa rayan said...

كيارا
ماتحرمش منك يا بنت منطقتى ربنا يخليكي ياقمراية

فاتيما said...

منحرمشىىىى منك يا مصطفى

يا عيال انتوا اخواتى

بجد و الله انتا لازم تيجى معانا كل لقاء خارج القاهرة و جواها كمان
انتا حد جميل
و الطيابة ذاتها يا صفصف

و بعدين اختك جت مجتش
الاسكندرانية مفيش اجدع منهم
هيشلوك على كفوف الراحة
دا مفيهوش جدال

و انا فرحانة بيكم جداااا
لأن ربنا لما بيحب يعوض
بيبقى كرمه وااااااسع
و ربنا كرمنى بيكم
و بكل حاجة حلوة بعيشها دلوقتى
معاك قووووى ف حكاية
اسباب الفرح دى ..جملة تنفع تكون عنوان بوست
لأن فعلا الفرح ممكن تكون اسبابه موجودة قصادنا و نفوته بعبط

مثال على ذلك المراجيح
شوف الحكاية دى بسيطة ازاى
و مع ذلك منفكرش نعملها
متعرفش ليه ؟؟
كسوف و لا عبط و لا ايه؟!!
مع انها بسيطة و سهلة
و متكلفش و بتفرق قوى ف النفسية

كمان الصحبة الطيبة
لما تلاقى ناس حلوة زيكم كدا
و متفتحتش قلبك على وسعه و تحبهم و تصاحبهم و تقضى ايام فسحك معاهم و انتا مطمن على روحك انك وسط اخواتك ...لما ربنا يهاديك بناس حلوة كدا
ليه متتمسكش بيهم لآخر جهدك ؟!!

عشان كدا يا مصطفى
انا بحبكم قوى
و طول الوقت اعلن عن كدا و ناس تفتكرنى ببالغ و بتنحنح و بتاع
مع ان يوم زى دا ..احد اسباب الفرح اللى تخلينى بشوفكم بعيون قلبى
ففرح قووووووووى
لحد ما الحزن ينمحى

كل خروجة و انتا معانا
إن شاء الله
و ميرسى ع الهدية الجميلة
عقبال ما نهاديك
ف فرحك يااااارب
بس انتا افتكر نصايح الميكروبااااص
عشان نجوزك بقى

خالص ودى ليك
يا الطيابة ذاتها

mostafa rayan said...

فاتيما يا جميلة
انا متشكر جدا لكلامك الحلو ده عنى ويلا يا ستى اكتبي بوست اسباب الفرح وقوليلي علشان اكون اول واحد يقرأه
ربنا يفرح قلبك دابما يا اختى وصديقتى العزيزة

أحــوال الهـوي said...

يعني لو نزلت اجازة ممكن اشوف و لو اتنين بس من المدونين ممكن 4 مسموح بسته
طيب لو طمعت ممكن يتكرم علي كام واحد

نزلت مصر السنه اللي فاتت و كنت باشحت ان حد يعبرني مافيش

البركه فيك يا مصطفي انا معتمد عليك

ان شا الله نتقابل في رمسيس و انت مروح

ربنا يسعد ايامك و تتجمع مع كل الحبايب

تحياتي للجميع من اول الدلوعه المدللة
الي اهل اسكندريه الكرام

أنا - الريس said...

أول حاجة اهنيكم علي يومك زي ما هنيت فاتيما .. ويارب يسعدكوا .. ولو ان قلت بصراحة .. اني نفسي اكون في اليوم ده .. بس مش ينفع عشان فيه اختلاط .. انا ممكن أكون ليا رأي مقفل بالنسبة ليك .. بس ده رأي وارجو انك تستحملني

mostafa rayan said...

أ-عصام
ان شاء الله اول ماتنزل نتقابل ده يبقي لينا الشرف اننا نتعرف على حد جميل قوي زيك
لك كل التحية والود يا اخي الفاضل

-MR.PRESIDENT
لا مافيش تقفيل ولا حاجة ده رايك واختيارك وانت حر فيه
تحياتى وودي لك يا اخي

القدر و انا said...

مصطفى يا مصطفى
انت منور يا مصطفى
بجد سعيدة انى شفت شباب زى الورد رغم ان الظروف ما سمحتش معايا بوقت طويل
لكن كان لقاء ممتع يارب يتكرر

د. ياسر عمر عبد الفتاح said...

عملوها المدونين
ياريتني كنت معاهم

كده يا درش تروح من غير ما تقولي؟

mostafa rayan said...

القدر وانا
استاذة نانو حضرتك اللي كن منورة وبجد انا سعيد قوي اني اتعرفت عليكي وعلى اسرتك الجميلة وطبعا لازم اشكرك على اللفته الجميلة اللي عملتيها في المطعم
ربنا يسعد قلبك ويقدرلك كل الخير

د.ياسر
حبيبي انا افتكرتك عارف بس ولا يهمك ان شاء الله تتكرر تانى وتكون معانا
لك كل المحبة والود يااخي الفاضل

لــــ زهــــــراء ــــولا said...

مصطفى

طبعا كان ليا الشرف انى اتقابل معاكم ورغم انى مش قعدت كتير ومش لحقت اتكلم معاك بس عن جد الصحبه كانت كلها بسم الله ما شاء الله ربنا يحفظهم صحبه جميله فى حب الله ...

على فكره انا فعلا اسمى فاطمة الزهراء طبعا مش عارفه انت عرفت المعلومه دى فين ومدونتى بالاشتراك مع صدقتى لولا اسم المدونه بالحب اتجمعنا
وان شاء الله نتقابل جميعا على خير ولتسمح لى ان اضيف مدونتك عندى فى ناس اغلى من الماس

ربنا يديم المعروف


زهراء

dr.lecter said...

هاموت واروحها واحشاني مووت كويس انك روحت قبل زحمه الصيف الغبيه

حنين القلب said...

بجد كان يوم روعه ونورتنا يا مصطفى
انا سعيده جدا انى اتعرفت عليك

ويا رب تنورونا دايما

همس الاحباب said...

الصور روعة يا درش
مش زى صور ناس
علشان تعرف معزتى عندك
هههههههه
كنت ناوى اطلعك صورة و7 عفاريت
بس نصيبك كده
اليوم كان جميل والصحبة كانت رائعة
وانت عبرت عنها بكل بساطة وتلقائية

تسلم يا باشا
تحياتى

richardCatheart said...

هههههههههههههههه مصطفى الجميل

اسلوبك جميل اوى اول مره اقرئلك حاجه
بس تحفه فعلا

احنا حصلنا الشرف يا مصطفى اوىىىىىىىى
اننا اتعرفنا عليك وعليكم كلكم
واليوم فعلا من الايام القليله المحسوبه من عمرنا

ربنا يديم المعروف يارب وديما فى تواصل

اما موضوع التدوين بعد الزواج
انا معاك فى رائيك مليون الميه
واسئل مجرب ياريس

تحياتى يا مصطفى