Thursday, September 24, 2009

لما ألتقى الاحباب

ازيكو يا احلى اصحاب فى الدنيا
عيد سعيد عليكم كلكم ويارب يتقبل منا صالح العمل فى رمضان
عايز اكلمكم عن لقاء المدونين فى رمضان يوم الخير فى مستشفى ابوالريش ولقائنا فى نادي القوات الجويه مش هحكي عن تفاصيل يوم المستشفى علشان فى ناس كتير حكت عن لكن هحكيلكو عن الناس اللي قبلتهم هناك
اول حد كان خالد (همس الاحباب) وداليا (قوس قزح) اللي بذلو مجهود كبير فى تجميع الناس ونشر الموضوع خاصه يوم المستشفى
كمان شوفت حبيب قلبى وليد الزهيري ( مدونه عارفه مش عارف ليه ) وليد صاحبى من زمان ومن اول الناس اللي عرفتهم فى التدوين وكان نفسي اشوفه قوي وبجد هوحد جميل وشبه كتاباته اللي بيخرج منها عطر الطيبه وبرأه المشاعر وشوفت كمان ابنه مهند وهو ولد زي العسل ( طبعا طالع لأبوه ولصاحب ابوه .. ايه حد عنده مانع؟)
شوفت كمان صديقتى واختى الغاليه والعزيزه واللي كان نفسي اشوفها من زمان
صفاء جلال وطبعا انا مهما قلت عليها مش هوفى حقها انسانه جميله وجدعه وصاحبه صاحبها وتخدمه بعينها وتدافع عنه لأخر لحظه وبنت بلد ودمها زي العسل حد يدخل قلبك ( ويستربع ) فيه من غير اذن
وشوفت كمان بنت منطقتى كيارا ( مدونه عالم مولان ) وهى فى الحقيقه بنت زي العسل
طفله عندها 23سنه متهيألى دي لما تخلف مش هيكون فى اي فرق بينها وبين اولادها طفله كبيره ام لاطفال صغيرين - والله يكون فى عونه بقى يا مولان - وسمعنى احلى سلام اول وتانى وتالت لحدائق حلوان واللي منها
شوفت كمان نور الدين .. وهوفى الحقيقه انسان جميل وروش وابن نكته مش زي ما ممكن تعتقد من كتابته انه حد جامد.. وصلينا العصر مع بعض وفضلنا نتكلم فى حاجات كتير وبالنسبه للموضوع اياه ده فخلاص مالوش دلوقتى اي وجود عندي ولا عنده
وانا مبسوط النى عرفت شخصيته على الطبيعه ويارب يقدر مابينا كل الخير
شوفت كمان ميرا ( مدونه امرأه بعقل رجل ) بنت زي العسل وفضلنا نتكلم فى حاجات كتير قوي قصدي فضلت هي تتكلم - ميرا يا جماعه واخده توكيل الكلام - ومابتحبش حد يعتدي على التوكيل بتاعها
شوفت كمان دعاء مواجهات الصحفيه الجميله المجتهده ومش بعيد بكره تبقى رئيس تحرير الجمهوريه .. بس ساعتها بقى يا دعاء لوحبيتو تعملو معايا حوار ماتبعتليش
صحفى صغير من عندك لازم انت بنفسك اللي تعمليه معايا .. أه احنا بدأين المشوار مع بعض
شوفت كمان فاطيما .. ايه ده حد طيب قوي وقلب يساع كل البشر.. الست دي
ام بالفطره .. احساس الامومه عندها عالى قوي حتى لما بتهزر مع حد بتهزر بالروح دي .. حد يدخل قلبك من غير اذن ورغم انى ماتكلمتش معاها كتير ( ميرا كانت لوكلوك معايا وقتها ) إلا اني بجد فرحان قوي انى شوفتها وحاسس انى عارفها من زمان
شوفت كمان أ-احمد القاضي وهو شخصيه محترمه واراه بجد قيمه وباين انه مثقف وقارئ نهم وخبرته فى الحياه كبيره ( السفر بيضيف على عمر الانسان عمر جديد)
شوفت كمان احمد سو وكيكى عو وسامح ( مدونه خواطرخاطر ) وطبعا الاستاذ شريف الكردي الرجل المحترم الهادئ المثقف وكمان بنت خيخه واي كلام ورحاب ( مدونه كوكب ابي ) وكمان ممدوح الدوح وصيدلانيه طالعه نازله وزوجها واولادها واحمد الصباغ وسومه ( مجنونه فى بلد عاقل ) واستاذ احمد ( رحايا العمر) وصاحب مدونه
مسدس صغير ورانا ( مدونه رنرون ) وكمان ايناس (مدونه نهر الحب ) وكمان صاحبه مدونه ( ساجي) حد محترم قوي وبجد انا احترمتها جدا لأنها ماسبتش حقها فى المطعم بجد كانت اشجعنا واسامه عبد العال
طبعا كان فى ناس تانين بس دول اللي فاكرهم دولقتى او اللي حصل مابينا كلام
طبعا اللقاءات دي مهمه جدا وده انا قلته وهفضل اقوله لازم نكسر حاجز الشاشه اللي بينا ومادام فى مجموعه من البشر على قدر ثقافى متقارب ويجمعهم شئ واحد لازم يتقابلو ويحصل بينهم التقارب الوجدانى والانسانى زي ماحصل التقارب الفكري ده
وحاليا فى فكره اننا نتقابل بشكل دورى بس بندور على مكان يحصل فيه اللقاء ده ويكون مناسب للجميع من حيث مكانه واسعاره لوكان كافيه او نادي او ما شابه وعلشان كده لوحد عنده مكان مقترح ياريت لو يقولنا عليه
واخيرا اصدقائى الاعزاء لكم منى كل المحبه والود
ملحوظه اهلاويه بعد القراه
بعد هزيمه الزمالك كالعاده - ربنا مايقطع له عاده - وفوز الاهلى على البترول ادعو اصدقائى لمشاهده البوست السابق ( هتلر والزمالك ) والتعليق عليه
وكل سنه وانتو طيبين يا كل الاهلويه

16 comments:

salwa said...

السلام عليكم اخ مصطفى
سعيدة جدا بلقائكم هذا
و الله يجمعكم على الخير
و لكم افضل التمنيات دائما
سلام

Sameh Ezzat - (خواطر خاطر) said...

كنت سعيد جدا بمعرفتك يا مصطفي واد ايه انتا تشخصيه محترمه وموهوب فعلا بتمني لك التوفيق في كل شئ

mohamed ghalia said...

كل سنة وانت طيب يا مصطفى

mahasen saber said...

ان شاء الله اشوفك على خير فى اى لقاء قادم

وانتا على فكره متتخيرش عن الناس الجميله اليى اتكلمت عنهم دول

انتا انسان محترم وراقى وتستاهل كل خير الدنيا يا مصطفى

صفــــاء said...

دايما كاسفنى و بتحرجنى بكل ذوقك ورقتك
دة غير مودتك وقلبك شديد الصفاء
انت مش بتعرف حتى تشيل ضغينه لحد

ربنا يحبب فيك كل الناس لأنك تستاهل
ويوفقك ويحقق لك كل الخير يا رب

وكل سنه وانت طيب مليون مرة

mostafa rayan said...

سلوى
كل سنه وانت طيبه وبخير
لك كل التحيه

سامح عزت
ربنا يكرمك يا سامح وانا فرحان اكتر بلقائك ويارب الكتاب يعجبك وهنتظر رأيك عنه

- محمد غاليه
وانت طيب وبخير يا جميل


- محاسن صابر
الله يخليكى يا محاسن وبجد انا نفسي اشوفك بدل مااحنا كده مش بنشوف بعض غبر فى لقاءات التلفزيون بس
ان شاء الله يحصل قريب وكمان علشان اتعرف على الواد بيرو حبيب قلبي


صفاء جلال
اهلا بيكي يا قمرى بعد العوده
وعلى رأي الست شاديه ( المدونه النهارده فى عيد ) ههههه
الله يكرمك يا جميله ومهما قلت مش هقدر اوفي حقك كفايه انك فضلتى تتدافعى عنى شهرين بحالهم
انت جميله قوي وجدعه وست بمائه راجل
وبجد كان نفسي اشوفك وماتتصوريش
قدايه كانت فرحتى لما شوفتك فى النادي
وان شاء الله اللقاءات دي تتكرر واشوفك تالت وعاشر ومليون
كل سنه وانت طيبه وجميله دايما

mohamed ibrahim said...

ازيك يا درش
فاكر و لا نسيت خلاص ؟
معلش بجد علي الغياب كان غصب عني علشان الشغل و كدة
بس كنت اتمني اجي اللقاء ده و اشوف الناس الحلوة دي كلها
و ربنا يوفقك كمان و كمان في مشوارك
و بحسدك بجد انك شفت الناس الحلوة دي كلها و انا مش شفتهم
مع ارق التحيات

محمد ابراهيم

rovy said...

كل سنه وانت طيب يا مصطفى و يارب دايما متجمعين فى الخير و يارب يجى يوم و اكون مع المجموعه الجميله و الرائعه دى حقيقى كان نفسى بجد اكون معاكم ..
ربنا يكرمكم و يوفقكم جميعا

و طبعا الف مبروك للاهلى و يارب دائما نهنيه بالفوز

تحياتى

مهرة سالم said...

السلام عليكم...
ماشاء الله الله يجمعكم دوما على خير يارب ...
في أمان الله

شمس النهار said...

كل سنه وانت طيب
فعلا الاجتماعات دي بتكون جميله جدا

والناس كلها جميله

Kiara said...

مش ممككككككككككككككن صفاء كانت في اللقاء وانا مش شفتها عاااااااااااااااااااااااااااااااااااااااااا

Kiara said...

والله انت ياابن منطقتي اللي انسان شفاف خالث مالث واحلي سلام لااهل منطقة حدائق حلوان

Kiara said...

انا قريت الكتاب وهنزله بوست قريبا عن رايي فيه بكل حيادية (^_^)

mostafa rayan said...

محمد ابراهيم
لا يا محمد انساك ازاي هو حد ينسى اخوه الصغير ... كل سنه وانت طيب وبخير وحمد لله على سلامتك

- روفى
ان شاء الله تكونى معانا فى اللقاءات الجايه
كل سنه وانت طيبه وبخير


- نهار
كل سنه وانت طيبه وبخير


- شمس النهار
كل سنه وانت طيبه وبخير وان شاء الله
تكونى معانا فى اللقاءات الجايه


- كيارا
بنت منطقتى
كل سنه وانت طيبه وبخير
صفاء كانت فى اللقاء التانى اللي حضرتك ماجتهوش ياست هانم
اما بقى بالنسبه لرأيك الحيادي فى الكتاب فطبعا طبعا طبعا ( 3طبعا خلى بالك ) انه رائع وجميل ومالوش مثيل
ولا انت ليكي رأي تانى يا مولان؟
ههههههه
كل سنه وانت طيبه وبخير

حسن ارابيسك said...

درش
الحقيقة صورة جميلة ومعبرة لمعاني كثيرة وأصالة مؤكدة لأبناء هذا الوطن هذا الوطن الذي لديه ثقة كبيرة جداً في كل طوائفه الجميلة
الحقيقة انت بالفعل محظوظ أن ترى تلك الكوكبة الرائعة من مدونين لهم بالفعل منا كل الحب والتقدير
أشكر سؤالك كما أعتذر عن غيابي القهري
تحياتي

اقصوصه said...

كل عام وانتم بخير