Monday, July 14, 2008

من يغالب الله يغلب

اولا وقبل كل شيئ - حابب انوه زي البوست اللي فات بردة - صديقتنا العزيزة
دعاء مواجهات رجعت من العمرة
بالسلامة وكتبت اول تدوينتها عن رحلتها الممتعة للأراضي المقدسة
ياريت ياجماعة كلنا نروح نباركلها ونستمتع معاها بتفاصيل
هذه الرحلة الجميلة .. رزقنا الله جميعا بها
.........................................
تفاصيل هذا الخبر المشؤوم موجودة على هذا الرابط
تقول التفاصيل ان الحزب الوثني سيبدأ في مناقشة
علي تعديل قانون الأحوال الشخصية وسيدرس الأقتراحات التي
قدمتها جمعيات حروق المرأة وبعد ذلك يعرضها علي هذه الجمعيات
ثم يعرضها للمناقشه علي الرأي العام هذه التعديلات تشمل
1- رفع سن الزواج للفتيات من سن 16 ل 18
2- تقيد تعدد الزوجات وجعل ذلك بيد االقاضي فهو الذي يحدد هل يستطيع الرجل الأنفاق علي اسرتين ام لا
3- اعطاء المتزوجة عرفيا نفس حقوق المتزوجة قانونا
4- وتوسيع حالات الخلع لتشمل اكتشاف الزوجة عيباً في الزوج لا يمكن البراء منه، سواء أكانت تعلم بهذا العيب قبل الزواج أو لا تعلم
1: من المعلوم للجميع ان هذه الجمعيات تمول تمويل خارجي - وذلك ماصرحت به د.فرخندة حسن مسؤولة المجلس القومي للمرأة قالت بالحرف يعني بكرة لو الأمداد الخارجي توقف احنا هنقفل -
2 : ومعروف ايضا ان الخارج لا يريد ابدا الخير للداخل .. معروف ايضا ان مسؤلي هذه الجمعيات مجموعة من العوانس المخابيل الذين لا هم لهم سوى نفث سمومهم في المجتمع
نأتي لمناقشه هذه التعديلات التي لو لا قدر الله سمح بها تكون الكارثة والمصيبة العظمى

اولا : رفع سن الزواج : معلوم لنا جميعا انن ا نعاني من حالة من العنوسة في المجتمع فهل من العقل عندما يأتي رجل محترم لأب ليخطب بنته التي تبلغ من العمر 17 سنة يعني شابة كبيرة تستعد لدخول الجامعة ان يقول له الأب عفوا لن ازوجك بنتي لأن القانون لا يسمح ، منذ قدم الأزل والنساء يتزوجن وهم نساء صغار والحياة ماشية زي الفل .. انا شخصيا لي قريبة تزوجت وهي ابنه 17 عام ، ابنتها الكبرى تعتبر اختها هذه الأبنه تزوجت وانجبت وقريبتي اصبحت جدة وهي في منتصف الأربيعينات وهي فرحانة جدا ببنتها وبحفيدتها وتقول لك انا الأن اعيش اسعد ايام حياتي ، ثم ان في ظل الظروف الراهنة اي زواج يحتاج لسنة على الأقل لكي يتم التجهيز لبيت الزوجية يعني كدة كدة لو عندها 17 لن تتزوج إلا في سن 18 طيب ليه بقي نعطل الناس ونصعب الأمور عليهم
ثانيا : تقييد تعدد الزوجات : اولا نحن جميعا نؤمن ان التعدد هذا تشريع رباني شرعه لنا الله سبحانه وتعالى .. نؤمن جميعا ان الله سبحانه إله رحمن رحيم عليم حكيم خبير هو لم يشرع لنا إلا مافيه مصلحتنا وما نقدر عليه فالتعدد ولا شك فيه فوائد كبيرة للناس ثم هو رخصة من اراد ان يستخدمها يستخدمها ومن لم يرد هو حر هناك نساء ترفض ان تكون زوجة ثانية وهناك نساء تقبل فما دخل القانون في ذلك ؟
يعني انا لما اكون راجل متجوز واحدة وعايز اتجوز تانيه العقل يقول اني اروح عند المأذون ولا المحكمة .. انا موافق والست موافقة طيب دخل القاضي ايه ؟
وبعدين يا جماعة هي المحاكم مكفية على حالات الطلاق لما هتكفي على التعدد كمان ؟
ان التعدد واسع وسعه الله علينا فلم نضيق علي انفسنا إذا كنا نحن دائما نشكو من هؤلاء الذين يضيقون علينا ويشددون ؟ ثم لا قدر الله لو انه تم سن هذا القانون فالذي يرد ان يعدد لن يجد صعوبة في الألتفاف حول القانون وايجاد صغرة فيه يبقي ليه نصعبها على نفسنا من الأول ؟
ثم ألستم معي ان التعدد يمكن ان يساهم في حل مشكلة العنوسة التي نعاني منها الأن ومعلوم لدينا جميعا حال الفساد الأخلاقي الشنيع في البلاد التي اصدرت قوانين تحرم ذلك مثل تونس
وجدير بالذكر انه في عصر الرئيس السادات كانت السيدة جيهان تريد اصدار قانون مثل ذلك وكان شيخ الأزهر وقتها فضيلة الإمام الشيخ محمد شلتوت فأخذ موقفا حاد وهدد ان يخرج هو وطلبة الأزهر في مظاهرات لتندد بذلك ولم يستطع السادات تمرير القانون .. فهل يمكن ان يفعلها مولانا الشيخ حلاوة الأن ؟
ثالثا: اعطاء المتزوجة عرفيا نفس حقوق المتزوجة قانونا :
طيب يعني هما منين بيحاربو الزواج العرفي ومنين هيعطوا له نفس الحقوق ؟ !
هل من العدل ان نعطي تلك التي تزوجت بأذن اهلها زواجا شرعيا وقانونيا وبوجود الولي وامام الناس جميعهم نفس حقوق واحدة اتجوزت تحت المدرج من وراء اهلها بورقة من الأرض ماضي عليها اتنين من اصحابها .. هل هذا اصلا يعتبر زواج ام زنا مقنع ؟
طيب تعالو نربط بين ثانيا وثالثا مش ممكن واحد يتجوز واحدة واتنين وتلاثة عرفي ويقولهم ماهيبقي ليكوا نفس الحقوق ؟
فهل هذه ماتريده حكومتنا الرشيدة ؟
رابعا : توسيع حالات الخلع : ما اعرفه ان من حق المرأة ان تخلع في حالة وجود عيب لم تعلم به قبل الزواج ولكن إذا كانت تعلم بهذا العيب من قبل ووافقت عليه فهل من حقها ان تصر على الخلع ؟ هل الزواج والطلاق تلك اللكلمة التي يهتز لها عرش الرحمن يمكن ان تكون لعبة في يد المرأة
( اه كنت فاكرة اني هقدر اتحمل لكن بعد الجواز اكتشفت انه لاء ) هل يمكن ان يكون الأمر بهذه السهولة ام اننا يجب ان نحافظ على استمرار ذلك الرباط المقدس المسمى زواج .. ثم لماذا نقيد التعدد ونوسع حالات الخلع ؟ وإذا كان هذا قانونا يعرض على مجلسي الشورى والشعب مادخل جمعيات حروق المرأة بذلك ؟
اعتقد ان الأمر واضح ولا يحتاج لشرح
وبعد فأن الناظر لهذه القوانين يجدها تعدي صارخ على حدود الله وعلى شرعه
والعجب ان هناك الكثيرون فرحون جدا بهذه التعديلات المقترحة
ولكل هؤلاء اريد ان اقول ان من يغالب الله يغلب
...........................................
- تحديث
( اول مرة احدث والبوست لسة نازل .. ليا السبق في دي )
كلفني اخي تايه في وسط البلد بحل تاج الواجب
هذه التاج قد مرره لي اخي ادم قبل ذلك ولكن اكراما لأخي التايه اعيد اجابته بنفس الأجابة السابقة.. شروط الواجب ان اذكر ست اشياء عني لايعرفهم احد
وطبعا انا مش عارف الست حاجات دول إيه فهقولكم اهم حاجة
- دي اللي علي الأقل عارفها - انا عكس كتاباتي اللي البعض بيشوفها جريئة حبتين
- لكن انا بشوفها عادية جدا اقرؤا لغيري وانتو تتأكدو من دة بنفسكوا -
انا خجول جدا في الحياة العادية ودة بيخلي الناس تفتكر اني مغرور لكن والله انا انسان بسيط جدا كل الموضوع اني بحترم نفسي جدا ومش بحب افرض نفسي على حد يمكن الموضوع دة - الخجل يعني - بيضيع عليا فرص كتير لكن انا بحاول اخفف منه .. ادعولي بقي ولواني شايف ان الخجل صفة جميلة لكن طبعا لما بتزيد مش بتكون حلوة
ثانيا : اهدي التاج لمين ؟ كالعادة لأى حد

22 comments:

محمد حلمي مخلوف said...

- رفع سن الزواج للفتيات من سن 16 ل 18
----------------------------
والله كده كده نوسه وسن الزواج مرتفع
وبعدين يا مصطفي الفتاة ذات الستة عشر ربيعا كيف ستواجه متطلبات الجواز وكيف ستدير شئون منزلها
-------------------------------
- تقيد تعدد الزوجات وجعل ذلك بيد االقاضي فهو الذي يحدد هل يستطيع الرجل الأنفاق علي اسرتين ام لا
--------------------------------
والله المسألة وصلت لشهوانية بحته وهناك بعض الشيوخ اللي ربنا ياخدهم فرضوا التعدد واعتبروه سنه كل ده علشان هم يتجوزوا ويشبعوا رغباتهم
اعتقد ان المرأة من حقها ان جوزها يكون لها وحدها طالما ان امرأة كامله لا عيبا فيها
-----------------------------------
- اعطاء المتزوجة عرفيا نفس حقوق المتزوجة قانونا
-----------------------------------
اعتقد ان الزواج العرفي الشباب اصبح يتسلي به لأنه عارف ان المسكينه اللي ضحك عليها هتخبط رأسها في الحائط
لازم تأخد نفس الحقوق علشان يقل لأنه كتير بصوره ممله اعتقد
------------------------------
وتوسيع حالات الخلع لتشمل اكتشاف الزوجة عيباً في الزوج لا يمكن البراء منه، سواء أكانت تعلم بهذا العيب قبل الزواج أو لا تعلم
--------------------------------
من حقها طبعا لأنها متضرره يعني الراجل لو كانت الست فيها عيب مثلا ومش قادر يعاشرها هيتجوز عليها اشمعني هي تتحمل العذاب ام تلجأ الي الحرام والعاده السريه
----------------------------------
من المعلوم للجميع ان هذه الجمعيات تمول تمويل خارجي
2: ومعروف ايضا ان الخارج لا يريد ابدا الخير للداخل .. معروف ايضا ان مسؤلي هذه الجمعيات مجموعة من العوانس المخابيل الذين لا هم لهم سوى نفث سمومهم في المجتمع
نأتي لمناقشه هذه التعديلات التي لو لا قدر الله سمح بها تكون الكارثة والمصيبة العظمى
------------------------------------
لو عندك ادله ماديه قولها
--------------------------------
انا الجمعيه دي لا فيها امي ولا اختي علشان محدش يقول اني بدافع عنهم
بس انا بدافع عن المرأة ضد المجتمع الذكوري المتخلف

المـــفـــــــقــــــــوعـــــة مــرارتـهــا said...

رفع سن الزواج للفتيات من سن 16 ل 18
الصراحة احسن يامصطفي جايز الرجالة تسيب البنات الصغيرة في حالها وتتجوز البنات المخللة في بيت ابوها
لان الموضة دلوقتي انك تلاقي البنات الكبيرة قاعدة متخزنة والصغيرين متجوزين ومخلفين


التعدد
تصدق فرحتني بالخبر ده
كدة الواحد يطمن انه مش هايتاخد غدر من رفيق عمره لما التجاعيد تزحف وتستوطن الوجوه


علي فكرة يامصطفي
قصصك من اكتر القصص اللي قريتها واللي بتدافع عن حقوق المرأة
فليه مستكتر علي القوانين انها تنصفنا وتحافظ علي حقوفنا

Anonymous said...

محمد حلمي مخلوف
منور يا قمر
ولكن لو قرأت البوست جيدا سوف تعرف ادلتي على كل نقطة اهاجمها
دومت بخير ياأخي

المفقوعة مرارتها
منورة المدونة
ولكني ارى ان هذه القوانين لن تدافع عن حقوق المرأة ولكن تهدف لنشر الفساد والخلل في المجتمع
نورتيني يا جميلة

رحــــيـل said...

شوف اولا
رفع سن الزواج انا شايفه انه صح ومش معترضه عليه
هو كده احسن البنت لما تجوز كبيره شويه يعنى على الاقل عشرين سنه قبل ماتتحمل مسئوليه بيت واسره
----------------------
ام التعدد
فانا لن افتى اوق اوقول سوى لو اننى متزوجه ورغب زوجى فى اخرى فليطلقنى اولا مهما كان سبب الزواج
مساله تقبل من جميع الاطراف
المحكمه ملهاش دعوه بيها فى واحده تقدر تقبل وضع زى ده واخرى لاء
------------------------
اعطاء المتزوجه عرفى حقوق

ده فى جانب سلبى اللى هو انه بيشجع البنات وبيخليها مش قلقانه
وايجابى لان الشاب بيخاف وممكن يتراجع ويفكر ميت مره قبل مايعمل حاجه زى دى
---------------------------
اما موضوع الخلع فبدال الست اساسا مش عايزه تعيش معاه لاى سبب
هو يخلى عنده كرامه ويطلقها
فى رجاله كتير بيبقوا على زوجاتهم عشان بس يقرفوهم فى حياتهم
الحياه اصلا مدام واحد من الطرفين مش عايز يكمل لاى سبب كان هتكون مستحيله

محمد حلمي مخلوف said...

انا عارف ادلتك يا مصطفي انا بختلف وقرأت البوست كويس
كل الحكاية انا متفق مع القوانين الجديدة
لاتنسي اخي انني في الاصل رجل قانون
شكرا لك

تايه في وسط البلد said...

والله يا درش انا عاوز اقول حاجة

اولا انا مش باحب احط نفسي في موقف اللي بيقول بيقول وغيره بيعمل بيعمل لذا فرأيي في التعديلات سلأحتفظ به لنفسي

ثانيا ان التعديلات قد دخلت مناطق غير مسبوقة من الحياة الشخصية للناس وهذا وان كنت اراه زيادة شوية - خصوصا ان تم بعيدا عن رأي الدين - لكن احب ان اقول للناس بكل بساطة انتم السبب!!ه

ومن لا يوافقني فليتفضل ويذهب لأقرب محكمة لكي يري ما يجري بين الناس وبعضها خصوصا في قضايا الاحوال الشخصية

النقاء دوما يـي من الداخل ليفيض بنوره علي الكون

Unknown said...

السلام عليكم
مصطفي باشا

يانهار ابيض
بجد مش قادر اقول غير حسبي الله ونعم الوكيل

ربنا يهدهم ويارب اللي يتولي امر المسلمين يكون حد بيقدر اللي احنا فيه

تحياتي

Unknown said...

رفع سن الزواج للفتيات من سن 16 ل 18

انا كنت فكراه حينزلوه تانى
:)

WhItE HeArT said...

بالنسبه لرفع سن الزواج
اولا بالنسبة للرؤيى العقلانيه فده انسب لإن الطبيعي ان محدش بيتجوز قبل 18 سنه
وممكن يستنوا سنة او سنتين معتقدش دي اللي هتأثر في قضية فلسطين يعني

بالنسبة للرؤيى الدينيه
حرااااااام



وبالنسبه للتعدد

بالنسبه للعقلانية

انا شايف انه منطق صحيح لإن مش طبيعي ان الراجل لمجرد ان يشبع شهوته يخلف ويرمي ولاده في الشارع لازم يكون قادر على الصرف عليهم


بالنسبه للدين

برضه حرااااااااام


تحياتي وبوست مميز

Samar Ali said...

بجد يا مصطفي انا مش شايفة اي مطلب منهم غلط

عاشــــــ النقاب ـقــــة"نونو" said...

فعلا فعلا الهدف حضرتك قلته نشر الفساد
وفيه اهو اتهامات بتقول ان التبشير الغربي ورا الموضوع وادي فؤخندة هانم واشباهها قالت علةى اللي فيها
وربنا بسترها وحسبنا الله ونعم الوكيل
تحياتي

canary said...

بقى يا راجل وانا اماله اقولك يا مبدع ويا فنان تطلع من بقايا اهل الكهف يا مصطفى؟وكمان راكب ديناصور؟
راجل مين اللى يجيله عريس لبنته اللى عندها 17 سنه ويجوزهاله دة دة حتى فى عرف الدنيا دلوقتى تعتبر طفله ولا تستطيع صحيا وجسديا تخلف عيل سليم وتربيه الناس دلوقتى صحتها مش زى الاول زمان كان ينفع وكنت اقولك اة بنت 17 تقدر تبقى زوجه وام لكن دلوقتى مينفعش
كمان بالنسبه لموضوع الخلع ترضى انت تعيش مع واحدة مش قبلاك ولا طيقاك؟مظنش
وحجه ان الستات ناقصات عقل ودين فى الموضوع دة غير مقبوله لأن مفيش واحدة هتتطلق او تخلع لمجرد انها كانت واخدة فكرة عن الجواز وطلعت غلط متهيئلى انت تعرف ان الستات اكبر من كدة شويه ومش كلنا مرفهات وغير قادرات على تحمل المسؤليه ومش معنى ان شويه كدة نبقى كلنا عبايط ومش عارفين مسؤليتنا
بلاش تجر شكل الستات يا مصطفى وخصوصا انى محرجه عليك قبل كدة وليك سبقه معاهم بدل ما ييجو ينفضو المدونه بتاعتك على دماغك

بنت مصريه said...

دى تبقى كارثه
لو القرارات دى اتنفذت
وانا معاك ف كل اللى قولته
وبعدين تعدد الزوجات دا من الثوابت اللى ف القرءان ولا خلاف عليه
هيجادلوا ربنا كمان
حسبى الله ونعم الوكيل
والله منا عارفه احنا رايحيين فين ربنا يستر

mostafa rayan said...
This comment has been removed by the author.
mostafa rayan said...

اولا انابعتذر عن التأخرفي الرد الجهاز رجع اتعطل تاني وانا دلوقتي بكتب من جهاز احد اصدقائي

رحيل
منورة بالنسبة للخلع او كانا معاكي مايصحش راجل يبقي علي ست مش عايزاه بس لو هي عارفةالعيب من الاول كانت وافقت ليه هو المفروض يطلقها بس هي مش المفرزض تاخد الجواز لعبة الطلاق دةبيتهزله عرش الرحمن يا رحيل
بالنسبة للجواز العرفي ازي نكون بنحاربه وبعدين نرحب بيه ونقوله اواك اهلابيك عندنا وكانواليه بيحابوه طول السنين دي
وبعدين باي منطق نساوي بين جواز قدام الناس كلها وبين ورقة بتتكتب تحت المدرج الموضوع كبير يا رحيل
بس انتي منورة


محمد حلمي مخلوف
انت منور ياقمر


تايه في وسط البلد
منور ياجيمل كالعادة

براقش
وانا بدعي معاك وبقول امين
منور ياقمر


عاليا حليم
منوراني ياقمر


وايت هارت
اولا :انت منورة
بالنسبة لرفع السن ماهما كدة كدة لو اتقدم وهي عندها 17مش هيدخلو قبل سنة ولا اتنين يعني كدة كدة السنتين
هيعدو يبقي نأخر الناس ليه
بالنسبة لتعدد مين اللي قال ان كل اللي بيعدد بيرمي عياله ومراته في الشارع ومين اللي ان التعدد حرام انتي هنحرمي شرع وحلال ربنا ليه
كلمة التعدد حرام دي كبيرة قوي
نورتنيني

سمر المنوفي
طبعا اناشايف ان كل الطلبات دي منتهي الغلط
لكن انتي منورة يا قمر

نونو
نورتيني وراي عاقل وهادئ كعادتك دائما اسعد الله اوقاتك يا اختي الكريمة


كناري
يا انتي لسه فاكرة البوست اياه ياشيخة دة انا نسيت ثمانا رأي انا لستات هما احلاى حاجة في حياتنا
بس انا عايز اقولك بالنسبة
لرفع السن يا قمر ماهو لواتقدم في ست 17مش هيدخلو قبل سنتين يعني كدة كدة مش هتدخل قبل 19 ولا عشرين يبقي نعطل الناس ليه وبعدين 17 يعني بنتوته بتستعد لدخول الجامعة وكمان سنتين يعني هتبقي فى تالتة
يعني عروسة كبيرة
بالنسبة للخلع طبعا مافيش راجل محترم يرضي يبقي علي ست مش عايزاه لكن
ينفع ان كلمة الطلاق تبقي
شخيخة في ايد الست يعني هي عرفت بوجود مرض
في الزوج قبل الزواج ووافقت طيب بعد الزواج تخلع ليه
انا عارف انها ممكن ماتتحملش لكن ماكانت ترفض من الأول
انا عارف ان الوضوع شائك
بس انتي نورتنيني
اه على فكرة انا شاب كول جدا وعصري جدا وعندي ايميل ومدونة وبروح مع اصحابي سيتي ستارز وبلبش جينز وكوتشي مش رجعي خالص
بس بردة انتي منورة وانا بفرح بزياراتك وبحب تعليقاتك المناكفة دي

بنوتة مصرية
انتي منورة وانا بردد معاكي حسبنا الله ونعم الوكيل

!!! عارفة ... مش عارف ليه said...

درشاوي حبيب قلبي
انا متفق معاك في كلامه كله
لكن
اختلف معاك في موضوع 18 سنة ده وانا بصراحه معاه
ومش زي ما انت بتقول تتخطب 17 وبعدين لما تتجوز تبقى 19
لا الموضوع مش كده خالص لان في ناس ممكن تكون جاهزة مثلا وعايزة تجوز العيلين قوام قوام وعادي وكمان ممكن تكون اصغر من 16 ويحاولوا يجوزوها
وكمان في حاجة مهمة اللي بيتجوزوا صغيرين بدري دول بعد شوية بيغير رأيه لانه في سن متقلب وممكن يشوف انها اتسرع او ما احسنش الاختيار والكلام للولد والبنت

المهم الناس دلوقت مش زي زمان

وعلشان تتأكد من كلامي شوف معدل الولادات الطبيعية ومعدل الولادات القيصيرية كام مقارنة بعشرة أو عشرين سنة فاتوا مثلا
لان معدل الصحة العامة في النازل والقدرة على الانجاب الطبيعي بقت اقل
وكمان حتى علشان البنت دي تبقى ام مستوعبة تقدر تربي اولادها ازاي

اما باقي تحفظاتك انا موفقك فيها

تحياتي يا صحابي
وليد

مرجانة said...

ازيك يا مصطفى
كتاباتك مش شايفة انها جريئة على نحو مبتذل طبعا بالعكس انت لسة ملمستش مناطق كتير بنرفض نتلكم فيها مش فهمه ليه مع ان كل قضية قابلة للنقاش
اما بالنسبة للقانون الجديد للمراة فالحق ان محدش هيقدر يحمي المراة غير المراة نفسها وحسن تصرفها
تعدد الزوجات رغم اني ضده لكن مينفعش نقيده ضمانا لحرية الانسان وحرية اختياراته
اما الجواز العرفي فانا ضده تماما و للاسف القانون بيشجع على انتشاره ربما حلا لمشكلة العنوسة ولا ايه ؟؟؟ الله اعلم
تحياتي
على فكرة انا نزلت الجزء السادس شرفني بالقراءة يا باشا
تحياتي

mostafa rayan said...

عارفة مش عارف ليه
منور يا جميل وطبعا كلامك منطقي ومعقول جدا

مرجانة
منورة يا جميلة
ياريت تقوليلي على المناطق اللي انتي شايفة اني لسة ملمستهاش علشان اكتب فيها
بجد مستني رأيك
ونورتيني

مرجانة said...

ازيك يا مصطفى باشا تاني
طبعا المناطق اللي ملمستهاش مثلا هما ليه الشباب بتعاكس البنات ؟ يعني اثبات ذات ولا هتقولي البنات بيشجعوهم ولا عادات وتقاليد ولا ايه ؟؟؟
سؤال تاني ليه يالحجاب لما انتشر اوي كدة فقد مصداقيته ونجد ان الاخلاق فى النازل مع انتشار المظاهر الدينية فى الجانبين المسيحي و المسلم فى نفس ذات الوقت
وضيف عليهم كمان تأجج العصبية و التطرف ؟؟؟؟
كمان ليه المسيحيين حاسين بالضيق وحتى لو حد بيسخنهم طب ليه اصلا بيسخنوا ؟؟؟؟ماحنا كلنا مهضوم حقنا وكله مشاي بالدراع اشمعنى المسيحيين يعني؟؟؟
وفيه قضايا اخري واسئلة بس لما افتكر بأة
تحياتي

Anonymous said...

-الأخت العزيزة مرجانة
اشكرك على اهتمامك بتنبهي بالموضوعات التي تري اني لم اطرقها بعد
فعلا موضوعات شائكة وتوحي بالكتابة سواء كقصة او مقال
برجاء لما تفتكري ادخلي عندي على طول من غير كسل وفكريني
نورتني بزيارتك وبأفادتك
دمت بخير وصحة وعافية

Ahmed Kamal said...

انت لو لاحظت القوانين المتعلقة بالمجتمع و الأسرة حتلاقي إنها واخده خط معين خصوصا من أيام مؤتمر السكان إياه ، و تلاقي بسم الله ما شاء الله الفتاوى ماشية مع القوانين تمام يا ريس ، و لاحظ كده قوانين الختان و الطلاق و الخلع و ترقيع الغشاء و نسب الطفل للأب من الزنا و و ، و انت حاتفهم المطلوب بالضبط .. و سلم لي على ماما .. أمريكا مش حد تاني !

mostafa rayan said...

احمد كمال
العيب مش على ماما امريكا العيب علىة اللي بيمشى وراها يا صديقي وبيقول امين
نورتني كعادتك