Friday, July 4, 2008

الثانوية العامية في النشرة الضاحكة

ازيكوا يا جماعة .. عاملين إيه .. يارب تكون بخير
بصوا انا محتاج اعرف رأيكو في البوست دة
هو المفروض انه نشرة ضاحكة بتناقش الأوضاع الخاطئة ولكن بشكل كوميدي ساخر
انا كتبتها بطريقة سيناريو السينما (يمين سيناريو - وصف الأحداث - وشمال حوار ) لكن طبعا صعب اعملها كدة في البوست فخلتهم تحت بعض
انا عايز اعرف منكم هل فعلا البوست ضحكو ولا حسيتو انه استظراف مش اكتر
وفين اعلي منطقة كان فيها كوميدي
واخيرا دومتم بكل صحة وخير


مشهد (ا) – ( ليل داخلي )
( ستديو النشرة )
يتحدث المذيع للجمهور
اعزائي المشاهدين كثرت في الفترة الأخيرة الشكوي من امتحانات الثانوية العامة
مراسل النشرة اجرى الحوار دة مع سيد بيه المحترم واضع امتحان التكامل .. تعالو نشوف التقرير ونرجع نستكمل فقرات النشرة
مشهد(2) - ( ليل/ داخلي )
( صالون منزل سيد بيه )
- يجلس سيد بيه واضعا ساقا فوقالأخري وهو يحدث مراسل النشرة
- ( يرتدي بيجامة المنزل ويضع ساقا فوق الأخري )
ويدخن البايب في تعالي
- ( يمكن ان يكون شكله الخارجي رجل رفيع اصلع يرتدي نظارة وجه سميكة ) المراسل : سيد بيه ردك ايه عن ما يقال من صعوبة امتحان التكامل
يفرد سيد بيه ظهره ويتحدث في غضب وتعالى
سيد : دي كلها اشاعات مغرضة الغرض منها النيل من مكانتي العلمية المرموقه المراسل : ايوة يا سيد بيه بس دي كانت شكوي جماعية
سيد : جماعية ايه وفردية ايه يا استاذ .. هي دي اول مرة احط فيها امتحان .. انا سيد بيه المحترم خبرة عشرين سنة في وضع امتحانات الثانوية العامة
- تدخل ( انشراح ) زوجة سيد بيه فجأة
- ( تقتحم عليهم التصوير )
- هي امرأة متوسطة العمر بدينة إلي حد ما ) .. ترتدي جلباب المنزل ، وتضع منديل الرأس
- تصيح غاضبة في سيد الذي يبدوعليه الذعر
انشراح ( في غضب ) : انت قاعدهنا وحاطط رجل على رجل وبتصور للتفلفزيون وسايب المواعين في الحوض
سيد ( في ذعر ) : انا بس هفهمك يا انشراح يا حبيبتي
تخلع انشراح شبشبها وتلوح به في وجه سيد الذي يظهر عليه الذعر اكثر
نشراح : تفهمني ايه انت لسه هتتكلم قوم معايا يلا
المراسل ( موجها كلامه لأنشراح) ايوة يا مدام انشراح بس احنا بنصور
انشراح ( في غضب وهي تلوح بالشبشب في وجهه ) : بقولك المواعين في الحوض تقولي بنصور
تمسك انشراح بياقه بيجامة سيد وتجذبه للخارج
- انشراح : قدامي يلا
- يختفون من الكادر
- تدخل الكاميرا زوم ان علي وجه المراسل
المراسل ( موجها حديثه للجمهور ):
وهكذا اعزائي المشاهدين رأينا صورة حيه من حياة احد واضعي الثانوية العامة .. فإذا كانت حياته هكذا من الطبيعي ان يكون الأمتحان هكذا
في هذه اللحظة ( نرى فردة شبشب انشراح) موجهة ناحية المراسل ويوطئ هو رأسه ليتفاداها
( تمت )

20 comments:

محمد حلمي مخلوف said...

مستهلكه يا مصطفي
فيها شبه من مسلسل مش فاكر اسمه بس احمد بدير كان عامل فيه دور واحد شحات لابس بيجامه وشبب مقطعين وماسك سيجار كوبي وبيقعد حاطط رجل علي رجل
+
ان فيها استظراف زياده
معلش يا صاحبي
ده رأيي واتمني انك تقبله
شكرا لك

mostafa rayan said...

محمد حلمي مخلوف
منور يا صاحبي
بص هو اللي بيفرض الأمر وجود الحدث نفسه وانت عارف ان دلوقتي حديث الناس عن مشاكل الثانوية العامة
هو بس محاولة للبحث في نفسية واضع الأمتحان ولكن بشكل كوميدي
نورت مرة تانية

Desert cat said...

الثانوية العامة الكالو اللى فى دماغ الناس كلها الايام دى
بالنسبة للمشاهد موضوع البوست فمش شرط ان الراجل يكون مقهور فى بيته يمكن يكون مش مواكب العصر وعارف ان المناهج بتتغير يعنى مدرس من منازلهم

خمسة فضفضة said...

السلام عليكم ورحمة الله وبركاته

ازيك يا مصطفي اخبارك ايه

انا كمان معلس ما تزعلش مني ماعجبتنيش ، متوقعه منك حاجه احسن من كده ميت مره
اكتب حاجه تانيه واكيد هاتكون ان شاء الله احسن

محمد مخلوف يقصد احمد راتب في المسلسل اللي كان مأخوذ عن نكت احمد رجب ومصطفي حسين ، شخصيته كانت مش عارفه ايه كده الكحيت ومراته كانت عائشةالكيلاني

معلش ماتزعلش مني بس احب اشوفلك دايما حاجات مستواها عالي

سلام

تايه في وسط البلد said...

درشاوي

اعرف انها مجرد محاولة مثل كل المحاولات
فيها تبحث عن توصيف للحدث بشكل او اخر

عموما انا احترم محاولتك وتعليقات الاخرين ايضا لكن اعتقد ان عندك من الموهبة والاصرار ما يمكنك من الوصول في يوم ما

تحياتي

mostafa rayan said...

اخواني الكرام
انا بشكركم جدا على اهتمامكم وردكم خصوصا ان يوم الجمعة دة بتكون الردود فيها قليلة قوي
وطبعا انا عارف انكم عايزن مصلحتي وعايني دايما في تقدم وابقي احسن
لكن انا عايز اقول حاجتين مهمين قوي
1- في فرق بين النص المقروء والمرئي
في الأخير اللغة بتكون ابسط وبتكون مباشرة شوية لتناسب الكاميرا وحوار الممثلين وايضا الجمهور المخاطب وهو ليس جمعيه علي ثقافة عالية
يعني لو انتو اتخيلتوا المشهد كحوار علي الشاشة ممكن تلاقوه احسن
2- لو شايفين ان في نقط ضعف قولولي عليها وانا ان شاء الله افكر فيها واحاول اغيرها
بصوا هي النشرة فيها 3 مواقف ان شاء الله ابقي اكتب الموقفين الأخرين وان شاء الله يعجبوكوا ويبقوا احسن
واخيرا لكم جزل محبتي واحترامي

Gannah said...

أخى الكريم مصطفى
أنا قريت التعليقات و الحقيقة المشكلة ليست فى الصياغة انما فى الفكرة فهى تبدو معادة فكرة ولكن فى النهاية كلنا بنكتب احيانا اشياء معادة ولا شىء فى ذلك فهو فى النهاية طرح يحق لك ان تطرحه بالشكل الذى تراه مناسبا
وربما لان الجميع يتوقع ان يجد دائما عندك شيئا مختلفا
تقبل تحياتى وفى انتظار الباقى

mostafa rayan said...

Gannah
اشكرك علي كلماتك
بارك الله فيكي ويسر لكي كل الخير

rovy said...

شوف يا مصطفى رغم انى متفقه مع بعض ما جاء فى التعليقات الا انى شايفه انها ممكن لما تتمثل تكون فيها روح ظريفه ..
كمل الموقفين الباقين وان شاء الله العمل على بعضه حيكون حلو ..
وعلى فكره انا مبسوطه قوى انك اول واحد اقرأ له بوست بيحاول يرد رد عملى على مهزله الثانويه العامه يمكن عمل زى ده يخلى اللى بيحط الامتحان يفكر الف مره قبل ما يخترع لنا البعبع اللى اسمه امتحان الثانويه ..
تقديرى و تحياتى
rovy

حاجات جوايا said...

السلام عليكم اخى الفاضل

أولا الفكرة جميلة ومضمونها رائع رغم انها قد تكون معادة كما فى مسلسل " ناس وناس " وفيلم " جاءنا البيان التالى "
والحقيقة انا اقدر كل عمل بذل فيه صاحبه من التفكير والجهد ما جعله يخرج لنا فى إطار موقف من الحياة .. ليس بالضرورة أن يكون كوميدى ولكنه على الاقل واقعى

وفقك الله
وننتظر جديدك

دمت بخير اخى

سالى

mostafa rayan said...

روفي
انا متشكر جدا لتعليقك وبجد انا ماكنتش مهتم قوي بحكاية التجديد دي لأنها مش قصة او روايه بكتبها كان اهتمامي اكتر بالكوميديا في الموقف
وان شاء الله الموقفين التانين يكونو احلي واحلي

- الأخت الفاضلة حاجات جوايا
اهلا بيكي زائرة كريمة للمدونة
بس بجد وانا بكتب الموقف ماكانش في دماغي لا الفيلم ولا المسلسل ودي عادتي لما بكتب اي حاجة مابحاولش اقلد حد
لأني شايف اني اقوي من كدة بكتير ممكن يكون شغلي شبه شغل حصل قبل كدة بس بجد بيكون صدفة
وان شاء الله الموقفين الأخرين يكونو احلي وهما بردة واقعيين قوي وان شاء الله ينزلو قريب
دومت بكل خير

sendrlla said...

هههههههههههههههههههههه
بجد حلوة
ياريت مراته تكون بتعمل كده فيه فعلا بتاع التكامل دا
......................
تحياتى
سندريلا

فرنسا والرايق said...

الصراحه انا قريت البوست
و قريت التعليقات
البوست حسيته اني شوفته مسلسل قبل كده
بس مش مهم لا ن كل حاجه فى حياتنا معاده
اما التعليقات
فكل واحد و ليه رأيه

التنين المحارب عرفة فاروق السيوطى said...

مصطفى

السلام عليكم

جميلة قوى المسرحية الهزلية دى

بس ياريتك تكملها سلسلة

وده حال التعليم والمعلمين فى مصر من حوالى 25 سنه

تحياتى

وبالمناسبة هى تبكى مش تضحك

mostafa rayan said...

سندريلا
ازيك يا جميلة
شكلك كدة ثانوية عامة ومخنوقة من الأمتحانات .. ههههههههه
نورتي المدونة ودومت بكل الخير

- فرنسا والرايق
اهلا بيكوا في اول ومش اخر زيارة ان شاء الله
المهم انتوا رأيكو ايه ؟


عرفة الأسيوطي
منور بيتك يا جميل
بس دي مش مسرحية دي موقف تلفزيوني
وان شاء الله انزل الموقفين الأخرين
نورت الدنيا يا قمر

!!! عارفة ... مش عارف ليه said...

درشاوي

متفق معاك في إن الموقف دا من محض خيالك وإذا كان هناك تشابه ده مش ذنبك والاختلاف في التناول والموضوع المطروح
بس هقولك على حاجة بردو الموقف بصراحه مش يضحك
وبتفق مع عرفة إنه موقف يحزن

تحياتي
وليد

mostafa rayan said...

عارفة مش عارف ليه
منور يا قمر
ودومت بكل صحة وخير

هــــــــــــــــايدي said...

اول حاجه اهنيك على البوست
تانى حاجه الثانويه العامه السنه دى مهزله بكل المقايس لكل فرع من فروع الرياضيات والفيزياء لتالته ثانوى
رابع حاجه سيد بيه مش حط الامتحان كده لان المدام ماسكه له الشببشب لا دا لان وزير التربيه والتعليم هو اللى ماسك الشبشب

Wish I were a Butterfly ... said...

ممكن تكون الفكرة متكررة فعلا و الموقف مش كان يضحك للدرجة. بس برده شايفة إنه لو اتمثل و أضيف ليه شوية حاجات بسيطة ممكن يبقى لذيذ
كمان عجبني آخر مشهد إن الشبشب يكون آخر حاجة تظهر على الشاشة

فعلا تحس إن موضوع الامتحانات دة مش طبيعي!! هو بجد مين المعقدنفسيا اللي فيهم؟؟ دول كلهم ماشاء الله
:)
تحياتي..و اللي قرأته لحضرتك قبل كدة يمكن كان أحلى بكتير من المرة دي
مع تمنياتي لك بكل التوفيق

mostafa rayan said...

هــــــــــــــــايدي
منورة ياقمر واهلا بيكي في المدونة
وفي انتظار رأيك في القصة الجديدة

- Wish I were a Butterfly
اهلا بيكي يا قمر ويارب القصة الجديدة تعجبك
في انتظار رأيك