Thursday, May 15, 2008

زوجة بنت اصول ... قصة جديدة

اهداء
( هذه القصة مهداه لأخي احمد العجوز لعلها ترسم بسمة علي شفتيه )
كانت حياتي تمشي بصورة روتينية فما حدث اليوم هونفسه ماحدث امس هو نفسه ما سيحدث غدا
استيقظ كل يوم الساعة السادسة صباحا اوقظ زوجي ثم اعد طعام الأفطار ثم ننزل للذهاب إلي العمل
اعود انا حوالي الساعة الرابعة ارتب البيت واطبخ الطعام وانتظره حتي يأتي بعد المغرب فيرمي متعلقاته كل جزء في ناحية وامشي انا وراءه ألملم ما يرميه واضعه مكانه ثم يدخل ليغتسل واذهب لأعد الغداء وبعد ذلك اقوم بغسل الصحون ويذهب هو للأنتريه ليشاهد التلفزيون لأسمع صوته وهو ينادي علي بطريقة مفزعة
- يا منال
فأترك ما في يدي واخرج مسرعة ظنة ان مكروها حدث
ليكلمني بمنتهي الهدوء وهو يضع ساقا فوق الأخري
- ممكن لو سمحتي تناوليني الريموت
يتملكني الغضب اشعر انني اريد ان اطبق في رقبته فيحدثني بكل برود
- سوري اصل جاي من الشغل تعبان
اناوله الريموت وانا يكاد الغيظ ان يقتلني لا يمنعني منه سوى تذكر كلمة امي
(ان الست الأصيلة لابد ان تطيع زوجها ولوطلب منها عينيها تعطيها له عن طيب خاطر) – والغريب انه كام كل يوم ينادي عليا بنفس الطريقة واخرج انابنفس الفزعة ولم يخطر علي بالي يوم ألا اهتم بالخروج كل يوم اقول لنفسي لن اخرج وكل يوم اجد نفسي اهرول إليه عندما ينادي -
بعد ان انتهي من غسل الاطباق اعود إليه لأجده ذهب إلي حجرة النوم واصبح مستغرقا فيه احاول ان اوقظه إلا ان كل محاولاتي تذهب هباء فأقوم وانا مغتاظة اشاهد التلفزيون متململة .. اقلب في القنوات بلا اي هدف واخيرا اذهب لأضع جسدي بجواره واتسأل في حيرة كيف يأتيه النوم بكل سهولة وهوالذي يستمتع بكل هذه الرفاهية وانا رغم كل المجهود الذي ابذله لا يأتيني النوم إلا بعد عناء وبعد ان يأتيني النوم وابدأ في الشعور بلذته اجد يدا توقظني في الثانية او الثالثة فجرا
- منال انا جعان قومي حضري العشاء
ارد وانا احاول السيطرةعلي اعصابي
- ما الأكل عندك في التلاجة قومي حضر لنفسك
- يا شيخة حرام عليكي هو انا مش جوزك بردة
اقوم وانافي قمة غضبي
- حاضر حاضر ماهو التعب مكتوب عليا صبح وليل
لأجده بعد ان يتعشي وبعد ان اكون انا قد بدأت استعيد النوم يطلب مني شيئا اخر
اصعب علي من طلبه الأول
- منال قومي اعمليلي الشاي
- مانا عملتهولك مع الأكل
- مانا علي بال ماكلت كان برد .. يرضيكي يعني اشرب الشاي بارد
ارد بمنتهي الضيق
- لا طبعا مايصحش تشربه بارد ازاي
ليتحدث معي ببرود قاتل
ايه ياحبيبتي انت زعلانة كدة ليه هوانامش جوزك بردة
اعطيه الشاي الساخن فيأخذه مني ويعطيني كوب الشاي البارد
- اتفضلي انت خدي اشربي دة
- مش عايزة اشرب شاي
ليرد بلهجة تشعرني بالذنب
- مش حرام يعني لما نرمي نعمة ربنا
لأرد وانا اكاد انفجر من الغيظ
- لا طبعا حرام
اخذ منه الشاي واشربه وانا احسه سما في حلقي
لينام هوبعدها بكل سهولة بينما اظل انا متملمة في الفراش بعد ان طار النوم من عيني
لأجد جرس المنبه يوقظني مرة اخري بعد ان كادت عيني تعرف النوم ثانية
لأقوم واكرر نفس البرنامج اليومي
حتي جاء ذلك اليوم الذي انفجرت فيه
- حرام بقي حرام انا مش قادرة اكمل دة انا لو كنت ماكينة كنت رحمتني كنت قولت
اريحها شوية علشان ماتعطلش
- ايه اللي جري مالك ؟
- مش قادرة خلاص هنفجر
- يظهر عليكي اتجننتي
- ايوة اتجننت يوم ماقبلت اني افضل عايشة معاك علي الوضع دة .. دي الخدامة احسن مني علي الأقل بتاخد مرتب كبير ويومين اجازة في الاسبوع لكن انا بدفع وبشتغل برة وجوة ومابخدش اي اجازة
ذهبت بعدها إلي منزل ابي .. إلا ان رأي امي كان نفس رأي زوجي
- انت اكيد اتجننتي تسيبي بيت جوزك علشان مش قادرة تخدميه
- بقولك تعبت مش قادرة اكمل انا حاسة كأني ثور بيدور في الساقية
مش من حقه حتي يقول آه او يقف ياخد نفسه علشان يقدر يكمل
- كل البيوت كدة وبعدين الراجل لو مالقاش راحته في بيته يلاقيها فين
- يعني هويلاقي راحته وانا اموت من التعب
لترد في منتهي الحسم
- اسمعي يامنال الكلام اللي انت بتقوليه دي تشيليه من دماغك خالص احنا صحيح مسلمين لكن الجواز عندنا زي الاقباط مافهوش طلاق ايه عايزة تطلقي من جوزك وتيجي تقعدي جنبي عايزة الناس تضحك علينا
- انا ماليش دعوة بالناس
إلا ان امي انهت الحوار بكل حدة
- اسمعي يابنت هي كلمة واحدة هترجعي لبيت جوزك يعني هترجعيه بلاش كلام فارغ
- يعني ايه ؟
- يعني تدخلي دلوقتي تغيري هدومك وتحصليني علي المطبخ خلينا نطبخ لقمة للراجل ياكلها
ثم نظرت إلي ابي
- وانت يا رمزي تنزل دلوقتي محل الحلواني هات حاجة حلوة ياخدوها وهما مروحين
ثم امسكت امي بموبايلها واتصلت بزوجي وتحدثت بكل ود
- ايوة ياشريف انا عزماك النهاردة علي العشاء .. اكلة حلوة انت بتحبها .. ايه وراك شغل لا احنا منتظرينك لازم تيجي
وجاء زوجي في المعاد المحدد وتناول العشاء الفخم الذي طبخته امي بعد ذلك ذهبنا لأخذ الشاي في الأنتريه
بعد ان وضعت الشاي طلبت مني امي ان اذهب لأغيرملابسي حتي اذهب مع زوجي وذهبت يائسة إذ انني تيقنت انني ليس لي مكان في بيت ابي
بعد ان دخلت الحجرة تحدثت امي معه في كل هدوء – حتى لا اسمعهم ويشعرهو
بالحرج -
- ايه ياشريف مزعل منال ليه ؟
- انا ياحماتي دي هي اللي زعلت لوحدها والله العظيم انا ماعملتش حاجة دة انا حتي ببذل كل وسعي علشان اريحها
- اسمع انا اديتلك بنتي اغلي حاجة عندي علشان حسيت انك راجل شهم وتستحقها خلي بالك منها ربنا يحميكوا يابني
وهكذا ذهبت إلي بيت زوجي مرة اخري ليبدأ البرنامج اليومي مرة اخري إلا انني كنت قد كسرت من داخلي صاحب ذلك دلع من زوجي اكثر وزيادة في طلباته اكثر إذ ان اخر كلمة قالتها امي لي وانا اغادر البيت
- مش عايزة اشوفك هنا تاني إلا مع جوزك الست مالهاش غير بيت جوزها
وبنت الأصول لازم تسمع كلام زوجها
وقد لعب زوجي علي هذا الوتر جيدا
إلا انني لم استطع ان اتحمل فقد طلبت منه الطلاق ورضي هو بعد ان تنازلت له عن كل شيئ وبعد ان اخبرني انني امراة مجنونة وانني لا استحق ان اعيش حياة هادئة مثل هذه مع رجل فريد ومريح تماما مثله
اخذت تحويشة عمري التي كنت ادخرها من مرتبي من وراء زوجي بالطبع
– فقد كانت مصاريف البيت بالنصف بيننا غير ان امي كانت كثيرا ما تعطيه نقود ا من معها حتي يشتري لي وله كل مانحتاجه وبالطبع كان جزء كبير من هذه الأموال يأخذها هولنفسه – وذهبت إلي الأسكندرية حيث لايعرفنى ولا اعرف احد وعملت هناك سكرتيرة في مكتب مقاولات صغير وقد حرصت ان اتعامل مع الجميع - رجالا ونساء - بكل جدية – مبالغ فيها في كثير من احيان - حتي انهم اطلقوا علي لقب ام زعبل
- نسبة الي السجن- وقد سمعت المدير يتحث عني مع احد العملاء ان الشي الوحيد
الذي يجعله متحملا – لبوزي الدكر – هو اخلاصي وانتاجي في العمل علي عكس الأخرين الذين يضحكون كثيرا ولا ينتجون شيئا ....
إلا انني لم اعرذلك اي اهتمام
علمت بعدها ان زوجي باع الشقة بالاثاث وهاجر إلي كندا وان ابي ضاق ذرعا
بأمي وبالسجن الذي كان يعيش معها فيه فطلقها وتزوج فتاة اصغرمني في السن
- لم تكمل الواحد والعشرين وهو الرجل الذي يكاد يبلغ الستين- وانه خلع كل
البدل الكلاسيك واصبح لا يرتدي إلا الجينز والكاجول وانه الأن يتبع رجيما
قاسيا وقد عمل عملية زرع شعر , وعاد شابا صغيرا .. اصغر من السن الذي
تزوج فيه من امي التي اصيبت بانهيار عصبي حاد جراء كل ماحدث فذهبت إلي اهلها في محافظة الغربية إلا انهم لم يتحملوها كثيرا
و اودعوها في دار للمسنين – تدفع نفقاته من مالها الخاص-
اما انا فقد قررت ان انسي ذلك الشيئ المسمي رجل وان
اعيش لنفسي .. نفسي فقط
وان انسي بالطبع ذلك الوهم المسمي اخلاق بنات الأصول
( تمت )
ملحوظة بعد القرأة
هذه القصة من الكنوز الدفينه للمدونة اردت نشرها لتأخذ حظها من القرأة وتأيدا مني لحق المراة في الثورة والغضب

76 comments:

اهو ده عيبه said...

اولا احييك على المدونة

ثانيا القصه جميلة رغم انها بتعبر عن واقع اليم بيوت مصرية كتير عايشاه
بس انا احييك على الحيادية فى تناول القصه
لكن ارجع واقول ان الكبت لازم يولد الانفجار

تحياتى ليك

كاميليا بهاء الدين said...

كده يا مصطفى؟؟؟

خلاص .. انا اتعقدت
مش هاتجوز


القصة جميلة وتحمل من الواقعية ملامح كثيرة جدا والاسلوب غايو فى العمق والوضوح فى نفس الوقت
وهو ما يطلق عليه السهل الممتنع

أحييك على هذه الموهبة
التى لا يمتلك مفرداتها إلا القليلون

دمت صديقا عزيزا

حياتى

عاشــــــ النقاب ـقــــة"نونو" said...

ايه دة هو لسة الكلام دة موجود؟؟؟
ولا الظاهر انا اللي مش من هنا ولو ان عندي نموذج يعني يقترب بس مش كتير اوي بس بنعدل فيه ربنا يسهل
هقولك حاجة اللي بتختار نموذج زي دة لما تيجي تحاسب الاول تحاسب نفسها لعدم حسن اختيارها من الاول
دلوقتي البنات لما بتيجي تختار شريك حياة بتختاره غالبا على اساس مادي وما عدتش حد بيسال انت بتصلي ولا لا انت عارف ايه عن دينك لانها بتبقى فاكرة ان دة ممكن يتصلح بعدين مع ان الواحدة لو فكرت كويس ان البني ادم دة اللي مقصر في حق الخالق اللي مديه دة كله نعم يبقى هيعرف يديها حقها ويراعي ربنا فيها ؟؟؟
معادلة صعبة
قصة جميلة
تحياتي

رحــــيـل said...

انا عجبتنى قوى القصه بجد
تهى دى الستات ولا بلاش
يعنى واحده عشان خايفه من الطلاق ومن كلام الناس تفتضل عايشه حياتها فى عذاب وقرف كأنه مكتوب عليها
وكان الطلاق ده مصيبه
رجاله هم بصراحه الرجاله اللى بتعمل كده
واهالى هم برده اللى يعملوا كده فى بنتعهم
ومجتمع هم برده اللى احنا عايشين فيه
بس بجد هى اتصرفت كويس جدا
برافوا عليك يامصطفى
تحياتى

خمسة فضفضة said...

السلام عليكم ورحمة الله وبركاته


جميله جدا واسلوب السرد والحكي رائع

بس للاسف في ستات كتير بيعانوا اكتر من منال مليون مره بس ماعندهمش الشجاعه الكافيه انهم ياخدوا الخطوه اللي خادتها
متخذين من المثل القائل ضل راجل ولا ضل حيطه شعار لهم لاسباب كتير منها الولاد وكلام الناس والعادات والتقاليد وغيرها من الحاجات اللي بتمثل طوق كبير حوالين رقبة الست بيخليها مستحمله وساكته


سلام

بنت مصريه said...

ايه يا مصطفى دا يا مصطفى دا فيلم يابنى
بس دراما قوى
عارف الحق على منال هى اللى مدبحتش لجوزها القطه من اولها هههههه
بوست جميل
احييك
لوعايز تخرج من الحاله اللى انت فيها دى
وتضحك شويه نورنى

Ahmed El-Agouz said...

عزيزي مصطفي
متشكر جدا علي الاهداء ده
وقصة اسلوبها رائع بصراحة بس انا حاسس ان الكل غلطان
مش عارف اتعاطف مع حد
بصراحة الزواج ده مشكلة في ازواج زي الرجل ده هو شايف ان ده درو المراة فقط خدمة الزوج وان هي مش ممكن تتعب منه ابدا
ودي نظرة خاطئة بصراحة
والام من عهد سي السيد تهتم بالمظاهر وكلام الناس حتي لو ان ده هيجي علي حساب حياة بنتها
والزوجة تفقد لغة الحوار مع زوجها وتفضل كاتمة كاتمة لحد ما تنفجر مرة واحدة وتترك البيت والزوج مستغرب طبيعي فهو مش شايف انه بيعمل حاجة غلط

بص انا شايف ان القصة كانت ممكن تنتهي نهاية حلوة حتي لو كانت بالطلاق
عادي يعني الطلاق ده مش حاجة صعبة وساعات بيكون اسهل من حلول تانية كتير

اخيرا
انا بشكرك مرة تانية علي الاهداء
واهو اللي يشوف بالاوي الناس تهون عليه بلوته

وانا الحمد لله دلوقتي بحاول اكون احسن
ونتقابل ان شاء الله في قصة احسن ونهاية سعيدة علي وعليك
العجوز

مصــــري said...

كيف الحال يا مصطفي.

القصة رائعة جداً وبتعبرعن واقع مرير للأسف.

فبعد الزواج يتحول الرجل لألة لجلب المال،وتتحزل المرأة لألة لجلب الاطفال والتنظيف وعيره وغيره.

معظم العلاقات الزوجية تفشل بسبب الروتين وقد تناولتها ببراعة.

وفي النهاية أقول "الضغط يولد الانفجار"

تحياتي
أسامة

عـــفـــراء said...

السلام عليكم
جميلة اوى القصة
بس مااعتقدش ان دة لسة موجود فى زمنا
اعتقد انة العكس
لان المرأة اصبحت متمردة
احييك على اسلوبك وتعبيرك
خالص ودى

الـسـيـدة نـون said...

لو بطلة القصة ماكنتش اتطلقت انا كنت طلعت قلت كلمة ابيحة
انا ضغطى على وانا بقرا القصة
والبت صعبانة عليا
وعايزة اضرب جوزها بالبونية فى وشه

قصة حلوة جدا
بس يا ترى دى حقيقة ولا مجرد خيال كاتب

تحياتى

اختك خيخة

mostafa rayan said...

- اهو دةعيبه
منور يا جميل ومبسوط قوي ان المدونة والقصة عاجبوك وكون انك شايفها بتعبر عن واقع كتير من البيوت عايشاه فطبعا دة شيء يفرحني اكتر
دومت كل الخير يا اخي الفاضل

- كاميليا
يعني انتي لما تقوليلي ( أحييك على هذه الموهبة
التى لا يمتلك مفرداتها إلا القليلون )
انا يعني هقدر اوصفلك فرحتي ازاي ولا حتي بعد كدة هتعامل مع اللي حواليا ازاي ماحدش هيعرف يكلمني كدة
كاميليا كل كلام والحب والشكر مش هيقدر يعبرلك عن اللي جوايا وكلامك وسام علي صدري اعتز به كفاية انه من انسانة متفردة المشاعر والأحاسيس مثلك
دمت بكل الخير يا صديقتي الجميلة

- الأخت الفاضلة عاشقة النقاب
انا فرحان قوي بزيارتك وبأن القصة عاجبتك
وموافقك على رايك وان كان للأسف لدي كثير من المسلمين فصل في الدين بين العبادات والمعاملات رغم ان الدين المعاملة كما قال صلي الله عليه وسلم
دمت بكل الخير ايتها الأخت الفاضلة

- رحيل
منورة يا قمر
بصي انا لمابفكرفي القصة كقارئ بعيدا عن كوني كاتبها بلاقي ان اللي عاملته منال ده هو الحل الوحيد
بصراحة انسانة صبورة قوي منال دي
دمت بكل الخير يا صديقتي الجميلة

- خمسة فضفضة
منوراني دايما يادكتورة وكلامك وتشجيعك ليا بيدفعني دائما للأمام
بس بجد في حد اصعب من شريف جوز منال
دة وفي ستات عندهم صبر اكتر من منال دي لو كدة الله يكون في عون الستات بجد
سعيد جدا بزيارتك يا دكتورة ويارب دايما في تقدم

- بنت مصرية
ازيك يا قمر
الحمد لله انه طلع ياباني اصل ازعل قوي لوكان فيلم مصري
وحلو ان الدراما قوية دي بشرة خير
يعني ان في امل في اخوكي
منورة يا قمر وان شاء الله هدخل عندك

- اخي احمد العجوز
اردت فقط ان ارسم بسمة علي شفتيك اعرف انك تحتاجها في الحقيقة كلنا محتاجينها وبصرف النظر عن القصة وموضوعها لو انك ضحكت وابتسمت شوية يبقي انا كدة نجحت في مقصود القصة
ربنا يا اخي يكرمك ويوفقك لكل الخير

مصري
انا موجود يا عم اسامة
انت ايه اخبارك يارب تكون بخير
وطبعا انما معاك في رأيك دة المفروض الست بعد الجواز تخلي بالها من نفسها ومن شكلهاوالراجل كمان يراعي مراته ويعرف انها انسان ولها نفس حقوقه
ربنا يهدي الجميع
نورت يا جميل وطبعا مش محتاج اقولك ان البيت بيتك

- عفراء
اولا : ازيك وايه اخبارك يارب تكوني بخير
وطبعا فرحان ان القصة عاجبتك
وانا معاكي ان المرأة دلوقتي بقت اكثر تمردا ودة اللي عاملته منال في القصة
اصرت في النهاية علي طلب الطلاق
نورتنيني واحب اشوفك دايما هنا

- بت خيخة وأى كلام
ازيك الأول ... يارب تكوني بخير
والحمد لله انها اطلقت والموقف بقي تحت السيطرة
بصي كون ضغطك يرتفع والبت تصعب عليكي وتتخنقي من جوزها دة اكبر دليل علي نجاحي واني قدرت اوصل بيكي للشعور دة
اكيد طبعا اتخنقتي من امها ومن سلبية ابوها
بصي كلامك بيقول اني بكتب حلو ودة كفاية عليا قوي
نورتي يا قمر واحب اشوفك دايما هنا

Desert cat said...

المشكلة ان فى فعلا رجاله بتتعامل مع الستات على اساس انها الفلبينية اللى جابها بدون مقابل مادى ولا حتى معنوى
حاسس علشان هو الراجل يبقى خلاص من حقه عليه تشتغل خدامة 24 ساعه وكانها الة مش من حقها الراحه مش كفاية انه من عليها واتجوزها
اللى مش قادره افهمه موقف والدتها
مهما كانت مستحيل تبقى اسيه عليها كدا
لكن من يزرع القسوة لا يطرح الى قسوة ايضا
تحياتى لقلمك الرائع

Mafrousa said...

ههههههههههههه
ايه يابنى ده...انت كانك بتحكى عن جوزى 85%...الله يطمنكوا يعنى حبقى اخرتها كرسى فى الكلوب و على اسكندريه اشتغل سكرتيره........هوه مافيش حل تانى يا مصطفى؟

المـــفـــــــقــــــــوعـــــة مــرارتـهــا said...

القصة دي تليق بأن تكون كنز من كنوز المرأة المصرية بشكل خاص
والله وانا بقراها كأني أنا اللي كاتباها من أول عشا نص الليل اللي بييجي لما النوم بيهل علي جفون الواحدة لحد لما تروح بيت اهلها اللي بيقابلوها وناقص يقفلوا الباب في وشها والكل يطلعها غلطانة عشان بعد كل ده انفجرت وقالت كفاية
انا تعبت
لو كل واحدة طلبت الطلاق عشان السبب اللي اتطلقت عشانه بطلة القصة يبقي هاتلاقي ستات مصر كلهن مطلقات
عارف العيب علي مين العيب علي الست اللي ربته أمه أو حماتها ... ماتقولش عليا مزوداها بالنسبة للحماوات ... انا قصدي مامته اللي ربته بمنطق انه احسن من البنت وفاضلت مابينه وبين اخته وجعلتها خادمة طائعة لطلباته

العيب علي الأم اللي بتخرج النوعية دي من الرجالة

المـــفـــــــقــــــــوعـــــة مــرارتـهــا said...

العيب علي الأم اللي يوم ماروحنا اشتكينالها من أبنها قالت ببجاحة بنتكم اللي متدلعة .. مالرجالة كلها بتعمل كدة
كفاية كدة بقي عشان يومي يعدي علي خير احسن انفجر انا كمااااااان

rovy said...

السلام عليكم
احييك على كتابة هذه القصه المبدعه
وعلى احساسك بالمرأه وما تعانيه احيانا مع زوج لا يعرف معنى الود والرحمه التى نص عليهم القرأن الكريم
تقبل مرورى
تحياتى
rovy

mostafa rayan said...

- قطة الصحراء
سعيد قوي بزيارتك وبان القصةعاجبتك ولمست حاجة جواكي
لكن هي الأم اتعاملت زي كتر من الأمهات اللي بيشوفوا ان البنت مالهاش غير مكان جوزها حتي لوكانت بنتها مش مرتاحة في المكان دة
سعدت بزيارتك واحب اشوفك دايما هنا

- واحدة مفروسة
اولا: ازيك وكمان انتي منورة الدنيا هنا
طبعا فرحان ان القصة عبرت عنك
اقولك انا بجد اتخضيت لماقرأت التعليقات ولاقيت ان نموذج منال وشريف موجود في كتير من البيوت ربنا يصلح الحال
منورة وسعيد جدا بزيارتك

- حماتي ملاك
طبعا بعد اللي قولتيه ماينفعش انا اتكلم
لكن انا فرحان ان القصة نفثت عن اللي جواكي وخرجت شحنة غضب ولو عن طريق كتابتك للسطور دي
بجد فرحان قوي بزيارتك وربنا يصلح الأحوال ويهدينا رجالة وستات

- rovy
سعيد جدا بزيارتك وبأطرائك
وبجد صدقيني انا ماكنتش اعرف ان القصة دي هتمس قوي مع الستات للدرجة دي
ربنا يصلح الأحوال
نورتي يا قمر ومش محتاج اقولك ان البيت بيتك واني احب اشوفك دايما كتيرقوي

جيفارا المصري said...

درش حبيبي
منتهي الأبداع
و اسلوب جزيل في السرد لواقع سيء جدا تحياه العشرات من النساء في مصر
دم مبدعا صديقي العزيز

اهو ده عيبه said...

عزيزى مصطفى

انا واحده مش واحد
واسمى داليا

عموما حصل خير

mostafa rayan said...

جيفارا المصري
نورت ياجميل مبسوط ان القصة عاجبتك
دمت بكل الخير يا اخي

- اهو دةعيبه
الأخت العزيزة داليا انا اسف لهذا الخطا غير المقصود
اكرر اعتذاري لكي
دمت بخير ياعزيزتي الجميلة

funckydoctor said...

يااااااااااه
الظلم وحش
والبلد ده عوجة
عايزة تتعدل

E.S.L.A.M said...

قصة حلوة قوي
تسلملنا افكارك

تايه في وسط البلد said...

واقعية قاتلة
واسلوب عالي
فين الكنوز التانية يا درش ؟

mostafa rayan said...

funckydoctor
منور يا دكتور ومعاك طبعا ان الظلم وحش .. وحش قوي كمان
تحياتي الخالصة ليك يا جميل

E.S.L.A.M
منور يا اسلام
واحب انك تيجي هنا كتير

تايه في وسط البلد
ازيك يا قمر يارب تكون بخير
وفرحان قوي ان القصة عاجبتك ومادام عجبك الكنز دة هبدأ افتش في التدوينات الأولي واطلع بقية الكنوز
نورتني يا جميل

شهرزاد said...

بجد رائعة..
تحياتي لقلمك الجميل..
وفي نهاية القصة أنا مكنتش عارفة أضحك ولا أبكي..
والحقيقة انك ناقشت قضية حساسة جدا وتطالب بها النساء وهي عمل المرأة خارج المنزل.. فهي تعمل داخل البيت وخارجه.. والرجل لا يقدر ذلك أبدا ولا يحاول مساعدتها في عمل البيت على اعتبار أن ذلك ليس من مهامه..
والحقيقة أنك أعطيتني صورة واقعية عن الجواز.. جعلتني أحمد الله أنني لم أتجوز..
هههههه

تحياتي لأسلوبك الجميل الشيق
ومن إبداع إلى إبداع
تحياتي

شهرزاد

Unknown said...

مصطفى القصة هايلة والاسلوب رائع كما تعودنا منك
اتمنى ان تترك الاثر الذى تريده فى نفس من اردت

تقبل تحياتى

الدرعمي said...

حبيبي مصطفى

ياراجل د انت لو كنت من جمعيات حروق المرأة

ماكنتش أمعنت كده في وصف المرأة الصابرة والمجتهدة والمطيعة المتمثلة في الزوجة

والمرأة العاقلة المصلحة الهادئة المتمثلة في أمها

ولا كنت صورت الراجل في أسوأ صوره وأبشعها في صورتي الزوج والحما

انت معانا ولا مع العدو ؟

اعترف

الإنكار مش هينفعك


منتظر اعترافاتك


آدم

المـــفـــــــقــــــــوعـــــة مــرارتـهــا said...

احب اطمنك عليا
واقولك ان اللي كنت خايفة منه حصل وشلت الفتيل
بووووووووووووووووووووم

سارة البحر said...

دي اول مره ادخل المدونه ليه تعمل فيا كده
انت عقدتني من الجواز خالص هههههههههههههههههههه
بجد والله ده واقع بيحصل كتير في البيوت العربيه
بس بجد اتمنى من كل قلبي انه مفيش بنت ترضى تعيش في مهانه زي دي
ومن الحاجات المهمه اللي وردت في القصه هو انه غلط اوي الاهل يحسسوا البنت انها ملهاش مكان تاني في بيت والدها
زي ما يكونوا بيقولولها ده احنا ما صدقنا خلصنا منك

بس بجد القصه تحفه وبتعاج شئ مهم جدا مرسي اوي وتحياتي ليك بجد

بحق عندي سؤال صديقك احمد العجوز بيتهيالي اني اعرفه عن طريق منتدى عربي لو ممكن بس تقولي الاقيه ازاي يعني لو عنده مدونه او كده

كفايه بقى غلست عليك اوي كده هههههههههههههههه معلش بقى

mostafa rayan said...

شهرزاد
اهلابيكي ياقمر ومبسوط قوي ان القصة عاجبتك
بس انا مش قصدي خالص انك تتعقدي من الجواز ... صوابعك مش زي بعضها يا قمر ربنا يكرمك بأنسان جميل زيك

- هيثم الدهشان
اهلا بيك يا صديقي
وشكرا علي كلامك الحلو عني وبجد انا اتتخضيت لما قرأتالتعليقات ولاقيت ان فيبيوت كتير كدة
ربنا يحفظنا ويهيئ لنا الخير

- ادم
ازيك يا صاحبي ومنور الدنيا كلها
بص يا عم ادم اولا انا مش مع جمعيات حقروق المرأة لأني شايف انها ضدها مش معاها العلاقة بين الرجل والمرأةعلاقة تعاطف وتكامل .. علاقة تقاطع مش توازي يا صديقي

- حماتي ملاك
طمنيني بس ماذا بعد الأنفجار ؟ حصل اصابات ولا أيه
منتظر ردك

- سارة البحر
ازيك يا قمر ماعاش اللي يعقدك من الجواز يا قمر وانتي لو نزلتي بعد القصةدي ببوستين هتلاقي قصيدة كلها مشاعر ورومانسية اسمها
( صرخةامرأة عاشقة ) احب انك تقرأيها وتقوليلى رايك
ويارب تتجوزي راجل كويس مش زي شريف جوز منال بطلة القصة
بجد انا لما كتبتها كنت قاصد اكتب قصة كوميدية ترسم البسمة علي شفة قارئها لكن فوجئت انها تحكي عن واقع كثير من البيوت وكأنها مست الجرح بجد انا كقارئ بقولك اللي عملته منال دة هو الصح ومش مهم كلام الناس لأنهم مش هيفيدوها بحاجة وبصراحة شريف كان مزودها قوي
اتدلع علي مراتك اه لكن مش للدرجة دي
بالنسبة للاخ احمد العجوز فلينك مدونته اهو
a-agouz.blogspot.com
هتلاقيه سابع تعليق هنا
وانت ماغلستيش ولا حاجة وطولي زي ماتحبي المدونة مدونتك ياقمر

Hanan Said said...

انا متاكده ان كل واحده متجوزه هتكون قصتك دي بتمثل جزء من حياتها
انا متهيألي ان اغلب الرجاله ان ماكنش كلهم بيبقى البيت عندهم استراحه وزوجته هي السرفيس بتاعته
....
بس ده مايمنعش ان للرجال حق في ان زوجته تلبي كل احتياجاته بس الحلقه الناقصه هو انه يهتم باحساسها
... يعني طلبات الزوج ده مراته ممكن تتقبل كلها اذا (ونخلي بلنا اوووي من اذا دي )
اذا كان هتم بيها وباحساسها بيديها وقت لانه يقعد معاها ويتكلم يحسسها بحبه وحنانه
والله يعمل كده ويطلب بعدها عنيها مش هتتاخر ويكون ليه حق
....
وطبعا في زوجات هما الي وحشين
وربنا يستر
تسلم يا مصطفى على البوست ارائع ده

رندا said...

مصطفى
اية القصص الجامدة دى

حلوة جدا وكويس انك اعدت نشرها
عارف كل تعبيراتك من واقع الحياة فعلا وبالذات الريموت دة هههههه
اصلى عندة عقدة منة
انت اكيد هتكون زوج هايل يابختها بيك بجد

ابهرنى اسلوبك جدا

دمت بكل حب

رندا

دكتور بهــدوء said...

فعلا الروتين حاجه منتهي الملل
وده سبب خراب بيوت كتير اكيد


الاسلوب بصراحه هااااايل
تحياتي
فعلا رسم بالكلمات
:)

Empress appy said...

لااااااااااا بجد صعب قوى الراجل ده وبعدين هو ده بقى غلط الاهل
يعنى ايه يقولوا لبنتهم كده دى مش موضوع بنت اصول خالص
اه ممكن يحلوا المشكله انما مش برمى البنت يا مصطفى
بس بينى وبينك ساعت بتحصل والنتيجه زى ما انت قولت عقد وكلاكيع

سنووايت said...

تصفييييييييييييييييييييق حاد
بجد القصة حلوة جدا , ايه الواقعية دي , انا لحد اخر سطر كنت حاسة اني بأقرأ قصة من قصص بريد الجمعة بكل اللي فيها من مواقف واقعية وحقيقية جدا

"خلع كل البدل الكلاسيك" أعتقد اننا كلنا محتاجين نخلع كل البدل الكلاسيك والقوانين اللي وضعناها من انفسنا ورضيينا بيها واللي هي سبب كل البلاوي اللي في الدنيا , رغم ان بيوت كتيييييير اوي مقفولة علي نفس القصة وزوجات كتير مستحملين وساكتين خوف من كلام الناس , خوف من بكرة , خوف من كسر القواعد , لكن اللي ترضي بانها تعيش كدة هي اللي تستاهل

مرة اخري باحييك بشدة علي القصة

رباب كساب said...

تعرف يا مصطفى أنا اتنرفزت لها سلف

إيه القرف دا

الجواز مش استعباد

ولو كل الرجالة كده يغوروا بجد ( معذرة )

جميلة يا مصطفى والأجمل قرارها بالانفصال
تقبل مروري وتحياتي

mostafa rayan said...

nanooo2100
منورة يا قمر وفرحان قوي بزيارتك دي
ومعاكي في رأيك الراجل لو حسس مراته بألاهتمام هياخد عينها
دمت بكل الخير يا صديقتي الجميلة

-راندا
منورة يا قمر
ايوة كدة قولي للبنات اني شخصية جميلة وهبقي زوج هايل و رائع والحاجات دي خليهم يخلوا بالهم مني شوية
فرحان قوي بزيارتك وبأن القصة عاجبتك
اسعد الله ايامك يا عزيزتي الجميلة

- دكتور بهدوء
منور بيتك يا قمر
ومبسوط قوي ان اللوحة عاجبتك يارب اقدر ارسم لوح تانية وتعجبك اكتر واكتر
خالص حبي لك يا دكتور


ابي
منورة يا قمر
سيبك انتي من العقد والكلاكيع والحاجات دي ألف مبروك بخصوص حفل توقيع مدونات مصرية للجيب
انتي تستحقي كل الخير
دمت بكل الخير يا عزيزتي الجميلة

- سنووايت
منورة يا قمر
وبصراحة بعد اللي قولتيه دة انا مش لاقي حاجة اقولها
فرحان قوي ان القصة عاجبتك وفرحان اكتر اني اتعرفت علي انسانة جميلة قوي زيك
اسعد الله كل ايامك يا صديقتي الجميلة

بنات صاحبة الجلالة said...

هههههههههههههههههههه بجد قصة رووعه ونهايتها كدا حلوة ريحت دماغها بلا رجالة بلا هم وفعلا القصة بتحكي واقع لاغلب البيوت بس يمكن الواحدة بتتسحمل علشان خاطر عيالها انهم يكون ليهم اب وميتحرموش منه في حياته بس بصراحة الزوجه في القصة دي كتر خيرها بصراحة

بجد مت علي روحي من الضحك عجبتني اوي القصة رووعه تسلم ايديك يامصطفي بجد تحفة
احيك
لك خالص التحية

mostafa rayan said...

الأديبة الجميلة : رباب كساب
منورة يا قمر
وانا فرحان قوي بكلامك دة وبنرفزتك دي
لأن دة معناه ان اخوكي بيكتب حلو لدرجة انك اتنرفزتلها بالشكل دة
اتمني انك تفضلي تيجي هنا دايما واقدر اكتب قصص توصلك اكتر واكتر
دمت بكل الخير يا اديبتي الجميلة

mostafa rayan said...

- بنات صاحبةالجلالة
بصي اهم حاجة انك ضحكتي والقصة رسمت على شفاهك بسمة نحتاج لها جميعا
- انا شخصيا لما بقرا القصة كقارئ عادي بعيدا عن كوني كاتبها بضحك قوي زيك كدة -
اسعد الله كل ايامك يا عزيزتي الجميلة

dodda said...

القصه جميله ..لازم تنتهى بتمرد وثوره
السلبيه اخرتها الجنان الرسمى

اهم حاجه ان مافيش اولاد..بعنى سهل
الانفصال
بس لو فى اولاد كان الحال بقى اصعب

اكتر من مليون ست على وشك الانفجار ومتماسكين علشان اولادهم
المهم الموقف اللى بتاخده من اول الجواز
يعنى مش تعوده على الدلع وبعدين مش عاجبها!!!

mostafa rayan said...

dodda
منورةيا قمر
بصي مش عيب ان الست تدلع جوزها اوتشيله جوة نن عينها
لكن المفروض الراجل يراعي ويخلي بالي من مراته
تحياتي ليكي

nana said...

جميل خالص

بجد حسيت نفسي عايزة اوقف واصفقلك على القصة الحلوة

فعلا زي ما لازم الوحده تكون بنت الاصول بعيون الناس والراجل كمان لازم يكون ابن اصول

يعني الحياه بدون دلع الاتنين على بعض ويخدمو بعض بمحبة وتفاهم ما تصحش

الزواج حياة مشتركة بالرغم في حاجات الست لازم تعملها لوحدها بالمقابل الراجل عنده كمان حاجات يعملها لوحده


مش حندخل كتير بالموضوع ده لانه بحر واسع

بوست رائع

تحياتي

انا مش حرة said...

احنا صحيح مسلمين لكن الجواز عندنا زي الاقباط مافهوش طلاق

احنا و الله ما خرب بيتنا غير الكلام ده
مسيحيين في الزواج و هندوسيين في الترمل

مشمش said...

ماهو عشان كدة لازم نفكر الف مرة في الجواز اصلا

كيكى عوووووو said...

اييييييييييييية احساسك العالى دة....تحياتى

mostafa rayan said...

نانا
نورتيني يا قمر
وانا مبسوط قوي بكلامك الحلو دة عني ربنا يقدرني واكتب قصص احلي واحلي وتعجبك اكتر واكتر

- انا مش حرة
سعدت جدا بزيارتك واحب اشوفك وتنوريني دايما

- مشمش
منورة كالعادة يا قمر

- كيكي
نورتي يا قمر ومنتظر زيارتك القادمة

Anas said...

مرحبا يا حج
شو اخبارك وعلومك كيفها الحياه معك
والله حبيت اسلم عليك اعذرني ما قرأت الموضوع انشالله الي رجعه
يعطيك العافيه :)

امل said...

السلام عليكم
قصة صعبة قوي وتعقد صراحة
ده انا حاسة ان اعصابي تعبت معاها
حقيقي في ستات كتير كده في مصر واصعب كمان بس زعلت على اللي حصل لامها
ربنا يرزقنا برجالة طيبين ومش متدلعة
اسلوب جميل جدا وشيك
تقبل تحياتي واحترامي

FaceMoon said...

صديقى الصدوق مصطفى
بعد السلام الكتير الكتير
انا عجبتنى القصة هيا واقعية فى حاجات كتير ان فعلا فيه ناس كتير بتعيش بالطريقة دى دايرة فى ساقية زى ما
بتقول لو كان جوزى كنت طقيت برضة
الجواز مودة ورحمة وميثاق غليظ لازم الطرفين يفهموا كدة
ملحوظة : انا اكتئبت المرة اللى جاية قصة رومانسية بقى

أسماء علي said...

أول غلطة كانت في تربية البنت انها آداة لراحة الزوج وفقط دون التفكير في نفسها
مع ان الحياة مشاركة ..
...
القصة أسلوبها سهل ممتنع والسرد جميل بجد ..
...
دام ابداعك ..

ليله بكى فيها القمر said...

دا فعلا اللى الواحده مننه مرعوبه منه حياه زوجيه تقليديه للغايه متعبه معاده طرف يدى و طرف يخد و ف الوسط تفقد جميع الاطراف الاحاسيس وتتبخر و ف النهايه ينفجر البركان قصه معبره وواقعيه
تحياتى العميقه

يقول أنى امرأة said...

طبعا القصة مكتوبة باسلوب ادبى اكثر من رائع اهنيك
اللوم يقع على 3 من الدرجة الاولى و بعد كدة الزوج
بعيد عن التربية و المفاهيم الغلط للام
الاب الى معززش بنتة و خلى جزها عارف ان ملهاش مكان تانى غير العذاب فى بيتة لان اهلها طردوها بالزوق
و الغلط عليها لان من النهاية باين ان فية مشكلة فى الاسرة يعنى هى من البداية كان لازم تعامل زوجا بالمعروف و بالكرامة كمان
الموضوع محتاج كلام كتير بس دة للاسف ثقافة مجتمع الا من رحم ربى

mostafa rayan said...

انس
الحمد لله انا في احسن حال بس يا عم انا كنت عايز اعرف رأيك في القصة .. علي العموم منتظر عودتك

- امل
سعيد جدا بزيارتك واشكرك علي اطرائك الجميل .. اتمني دائماان اظل عند حسن ظنك
دمت بكل الخير يا قارئتي الجميلة

- فاسمون
ازيك يا قمري الجميل
طبعا انا معاكي ان الجواز مودة ورحمة وميثاق غليظ وبردة لو انا كنت ست وشريف دة كان جوزي كنت هطق من جنابي بردة واحتمال كبير كنت هروح فيه تأبيدة ... فرحان ان القصة عاجبتك اما القصة الجاية ان شاء الله فانا معرفش انتي هتشوفيها رومانسية ولاء بس كل اللي اقدر اوعدك بيه انها هتكون حالة انسانية خاصة جدا.. بس انتي ازاي مالاحظتيش ان القصة دي غارقة في الرومانسية ههههه
دمت بكل الخير يا صديقتي الجميلة


- د\أسماء علي
سعيد جدا بزيارتك وانا متفق معك في رأيك واود ان اشكرك علي اطرائك في اسلوب كتابتي
دمت بكل الخير والسعادة

- ليله بكى فيها القمر
اهلا بيكي يا قمر وان شاء الله ربنا يكرمك بزوج جميل يسعد ايامك واوقاتك وتجدي معه كل ما تحلمين به في الطرف الأخر
اسعدني مرورك وارجوان تعتبري المدونة مدونتك وفي انتظار زياراتك الكثيرة القادمة

- يقولون اني امرأة
اشكرك جدا علي اطرائك وانك تري ان القصة مكتوبة باسلوب ادبي اكثر من رائع .. هذا كلام اكبر مني بكثير اتمني ان اظل عند حسن ظنك وظن باقي القراء
واود ايضا ان احييك علي نظرتك التحليلية العميقة لهذه الأسرة يبدوان السره اصلا فيها حاجات كتير غلط بدليل ان الاب طلق الأم وتزوج فتاة اصغر من سن ابنته
يبدو ايضا ان فتاتنا هذه كانت مفتقدة للأشياء كثيرة في بيت اسرتها ولم تجدها في بيتها ولذلك فهي لم تحزن لأي شيئ لا لطلاق امها و لا لبقائها في دار المسنين ولا لزواج الأب قررتان تنسي كل من حولها وتعيش لنفسها فقط
احيكي مرة اخري واتمني ان تستمر زيارتك وتحليلاتك العميقة للموضوعات القادمة
دمت بكل الخير يا اختي الغالية

Anonymous said...

وجدت تعليقك عند الاستاذ احمد شقير فقلت ارد بعد اذن حضرتك

www.mkhassan.blogspot.com

ليها الرد

ســـــــهــــــــــر said...

دعنا نعبر القصه باحداثها المتكرره ف بعض البيوت
لكن الم يكن هناك خط التفاهم مع الزوج ان يخفف من بعض متطلباته ف مقابل ما يرتفع به مستوى معيشتهم من راتب الزوجه ؟
اسمع احدا يقول انى واهمه او اتيه من عالم اخر .. فقط لقبونى حالمه .. ان يكون خط التفاهم هو الابقى

اجد بعض المبالغه فى نهاية القصه بزواج الاب لشابه صغيره
و كاننا نقول ان كل زوجه التزمت بان تكون زوجه رزينه مؤديه لدورها الاساسى ف المنزل نهايتها الدمار
بالرغم من ان هناك نماذج عديده تشبه ما ذكرت

لكن كل هذا لا يقلل من موهبتك ككاتب و من تعاطفك مع المراه فى عصر يبدو انها اخذت به حريتها و لكنه ف الواقع زاد قيد الملتزمات و اطلق عنان ال...
سيدى
تقديرى واحنترامى

Zika said...

انا قريت لحد
"يعني هويلاقي راحته وانا اموت من التعب
لترد في منتهي الحسم"
بجد عايز اكمل بس للاسف مضطر انزل هكمل واجي تاني ان شاء الله
تحياتي

mostafa rayan said...

انومنيس
اهلا بك يا اخي
ولكن صدقني انا لست اعرف عن اي شيئ تتحدث ؟ لعل الامر يكون خيرا
تحياتي لك

- سـهــــر... ساكن دروب الليل .. مستنى نقطة نور
سعدت جدا برأيك وبمرورك
واتمني ان اراك هنا كثيرا جدا

!!! عارفة ... مش عارف ليه said...

يعتقد كثيرين أن الحياة تتوقف عند الطلاق بينما من الممكن جدا أن تكون هذه هي البداية لحياة مستقرة أكثر نضوجاً

تحية لأسلوبك الرائع ومفرداتك الغنية
الأحداث مبررة ومنطقية جداً وتطور الشخصيات يتم في سياقه الطبيعي

أخيراً
أستمتعت بوقتي هنا وأرجو أن نصبح أصدقاء وأتمنى دوام تبادل الزيارات

تحياتي

Mohamed Kamal Hassan said...

السلام عليكم
العنوان موجود فى التدوينة ونفسها
وموجود ازاى توصل كمان
((:

Unknown said...

عادي يا عزيزي

في أسوأ من هيك نماذج عالأقل منال ما كانش عندها أولاد يكسرو ضهرها و يخلوها تتراجع

بس تعرف أنا بحيي كل ست بتقدر تحكي لأ و تكون حالها

مشكلة الرجال أنهم بيفكرو انهم بس يتجوزو الوحده امتلكوها خلص و ما في داعي يغلبو حالهم ع أي شي

يعني هون عنا في الأردن بيحكو "الزلمه رحمه و لو كان فحمه"
أسلوب سلس و بسيط بس سؤال:
هو أبوها اتجوز لأنو أمها بأفكارها هي كانت المسؤوله عن خربان بيت بنتها و بيتها هي كمان؟؟

mostafa rayan said...

وليد
ازيك يا جميل
والله انا فرحان قوي بكلامك الحلودةعني وان القصة عاحبتك ربنايقدرني واكتب قصص احلي وتعجبك اكتر وطبعا يسعدني جدا اننا نكون اخوات مش اصدقاء وبس

- محمد كمال حسن
اناقرأت العنوان وان شاء الله هحاول اجي

- مياسي
اهلا بيكي ياقمر وبكل اهل الأردن .. فرحان قوي ان المدونة بقي لها قراء من الأردن انتي وانس وايناس ربنا يكرم ويزيد عدد القراء العرب اكتر
وفرحان قوي ان القصةعاجبتك وانها عبرت عن واقع ليس في مصر فقط ولكن يبدو انه في كل البلاد العربية
بصي واضح ان الست في بيت منال هي اللي كانت متحكمة واضح كمان انهم كانواعايشين كدة وخلاص علشان يربوا العيال - منال يعني - واضحان جوزهااتخنق منها ومن تحكماتها فتخلص منها مع اول فرصة واتجه انه يعيش حياته ويتمتع بيها
طبعا دة نموذج ولو كان موجود إلا انه غلط ليه تجبر نفسك انك تعيش مع حد مافيش بينك وبينه تفاهم
نورتي ومنتظر زياراتك القادمة

klmat said...

قصه واقعيه جميله اوى
اسلوبك جميل جدا كنت بقرأ
بسرعه عايزه اعرف منال حاتعمل ايه
هى تربيه المشكله من الام اساسا طاعه الزوج واجب لكن الرحمه والتعاون مطلوب
بين الطرفين والمثل الشعبى بيقول جوزك
على ماتعوديه وابنك على ماتربيه دى
حقيقه من الاول يكون فى تعاون
تسلم ايدك وتفكيرك
ربنا يوفقك دايما

mostafa rayan said...

كلمات
سعدت جدا بزيارتك
ولكن اسمحي لي ان اختلف معك في هذا المثل فأنا لا احبه
الزواج حب وشراكة وتعاون
اما جوزك علي ماتعوديه فدة كلام غلط لأن الزوج قد لا يقبل هذه العادات ويتمرد عليكي وعليها
في القصة طلق والد منال امها تمرد عليها وعلي عادتها وتزوج من امرأة غيرها
الحياة يا صديقتي تعاون وليس جوزك علي ما تعوديه
ارجو منك ان تقبلي رأيي
ودمت بكل الخير

حاجات جوايا said...

قصة جميلة أخى الفاضل
وان كنت ارى فيها كثير من المبالغة خاصة فيما يخص والد ووالدة منال
وما آل إليه مصيرهم


اما منال وزوجها
فاعتقد ان كل الرجال كده
والستات يا إما بتستحمل يا إما بتناقشه وتحاول تغيره
لكن توصل لطلاق
لالالالالالالالالالالالا
لان ده سبب ميستاهلش الطلاق
لا هانها ولا خانها ولا بخل عليها

كان ممكن تسيب شغلها عشان يبقى عليها حمل البيت لوحده
لأن الاتنين حرام
وحرام تهد بيتها وتضحى به عشان شغلها إلا لو كانت بتكره زوجها ومش طايقاه خااااااااااص

بس القصة حلوة
دمت بخير اخى
سالى

mostafa rayan said...

الاخت الفاضلة سالي
اولا : اهلا بكي ضيفة كريمة وعزيزة في هذه المدونة التي اريد ان تعتبريها منذ الأن مدونتك انتي تأتي إليها وقتما تريدين
ثانيا : اود ان احييك علي هذه العقلية الناضجة وهذا الفكر العاقل وهذه الشخصية التي يمكن ان تضحي من اجل استمرار الحياة
ادام الله عليكي عقلك الناضج هذا وحقق لك كل ماتريدين

واحد وبيتكلم said...

القصه جميله جدا وتعبر فعلا عن الواقع

تعبيرتك مؤثره من المرات القليله التي لا احتاج الي حذف سطور من الرغي اثناء القراءه فعلا كل كلمه في موضعها

Wish I were a Butterfly ... said...

قصة جميلة أوي :)،و أسلوبك كالعادةبسيط و لذيذ أوي

بس الحقيقة إني متعاطفتش مع منال أوي بصراحة..أيوة في الأول تعاطفت معاها بس لقيتها هي برده اللي زودتها جدا... يعني طبعا طاعة الزوج و تنفيذ أوامره و كل حاجة، بس هم المعاملة بينهم خالية من أي حوار أو تفاهم، كمان مستوى الاحترام بينهم مش متساوي!! يبقى ازاي قبلت تستمر فترة كبيرة كدة معاه من غير ما تحاول تتناقش حتى من قبل أي خطوة تمرد؟

بس الحقيقة إن القصة واقعية جدا و بتحصل يوميا في كل مكان-خصوصا مجتمعنا- بس أتمنى مش يكون نهاية أي ست في الواقع مكان بطلة القصة اللي شخصيتها اتغيرت و قررت تلبس قناع غير طبيعتها الحلوة عشان تقدر تتعامل مع المجتمع
تحياتي لموهبتك في سرد القصص الجميلة أوي بجد

Wish I were a Butterfly ... said...

نسيت أقول حاجة معلش
:$
الناقد الغلس قرر إنه لازم يظهر سامحني!! بقالي ساعة بتخانق معاه بس مفيش فايدة
:))
فعلا عجبتني القصة جدا جدا، بس لي ملاحظة و أتمنى مش تتدايق منها

نهاية القصة سودا أوي و حسيت فها بمبالغة
يعني ليه يحصل كدة لأبوها وأمها؟ حسيتها دي مش واقعية أوي، كمان ممكن تكون واقعية في حالة إنك أعطيت خلفية لتفكك العائلة أو كدة..حاجة تنبئ بالنتيجة دي، لكن كدة مستغرباها شوية
:)
بس بجد عاجبني البلوج كله أوي :). دي كانت ملحوظة بسيطة..و يمكن أكون غلطانة فيها بس دة رأيي الشخصي. يارب متكونش زعلت منها
تحياتي

mostafa rayan said...

- واحد وبيتكلم
اهلا بيك يااخي الفاضل ... فرحان قوي ان القصة عاجبتك واتمني ان اقدر اكتب قصص احلي وتعجبك اكتر
منتظر زيارتك القادمة
دمت بكل الخير

- Wish I were a Butterfly
ازيك يا قمر ... عاملة ايه ؟ يارب تكوني بخير
انا فرحان قوي ان القصةعاجبتك وشوفتيها بسيطة ولذيذة
بالنسبة لملاحظتك انا مش مضايق منها خالص بالعكس انا فرحان بيها جدا
لكن عايز اقولك ان القصة دي فن واحنا مش بننقل من الواقع بالكربون لاء في مساحة من الحرية والاختلاف لازم تكون موجودة علشان الفن دة يعجبك
بس واضح ان الزوجة هنا هي اللي كانت متحكمة ولعلك لاحظتي دة لما البنت راحت بيت ابوها هي اللي اتكلمت مع منال وهي اللي كلمت شريف وبعدين امرت جوزها
-والد منال ينتزل يشتري ليهم حاجة حلوة - ولما شريف جه هي اللي اتكلمت الاب ماكانش موجود في الصورة شخصيته ضعيفة او مكبر دماغه دي حاجة كل قارئ يحللها زي مايحب هو
لكن هو في الأخر اتخنق وقرر يتمرد علي الوضع دة وطلق ام منال واتجوز واحدة تانية ودي حاجة متهيألي بتحصل كتير
مرةاخري نورتي واحب اني اشوفك هنا كتير قوي ومنتظر رأيك في القصة القادمة لأنها بجد ان شاء الله هتكون قصة مختلفة
تحياتي ليكي

Unknown said...

السلام عليكم ورحمة الله وبركاته
أ.مصطفى
120سطر+او -5
بمعنى انك كتبت مائة وعشرون سطرآ(مع اضافة اونقص 5أسطر كما نفعل فى الاحصائيات لتجنب الخطأ
اقول 120 سطر تصف فيها حالة بطلة قصتك المقهورة على امرها بامر العادات والتقاليد والعيب ووواوامر امها ايضآ
ولكن هناك بركان خامد ومارد نائم ما ان اوقظ الا استيقظ وقلب قصتنا رأسآ على عقب فى 20 سطرآ يزيد وينقص سطرين
او اكثر
ياسبحان الله
ياسبحان الله
فعلا اتقى شر الحليم اذا غضب
تمنياتى وتحياتى بدوام التوفيق

المـــفـــــــقــــــــوعـــــة مــرارتـهــا said...

ماتخافش يامصطفي أصل أنا عاملة ذي القنبلة البايظة بتطلع تطلع وتنزل علي مافيش
ومش بأعرف آخد خطوات في القرارات المصيرية
ربنا يهدي الحال

رحاله said...

بسم الله
ازيك يا مصطفى عامل ايه؟
اتمنى تكون بخير
نيجى بقه للبوست
اولا طريقتك حلوة اوى فى السرد وبتوصل لقلب كل انسان
بجد حسيت انى عايشه فى قلب القصه زى ما تكون تميثليه بتفرج عليها
وعمالها ادعى ان القدر ينصف الغلبانه دى وفرحت اوى انها اتطلقت
بس كان فى حل تانى من وجه نظرى
ان الشخص دا كانت تقرب منه اوى وتحسسه انها محتاجه لحب وعطف وياعملها انها انسانه من لحم ودم مش مجرد آله
اظن انها بالمواجهه كانت حتصحى جواه حجات غايبه عنه
فى النهايه اظن ان دا كان بيحصل زمان ولو حصل دلوئتى يبقه نادرلان المجتمع دلوئتى عكس زمان
حاجه اخيرة بس غلسه شويه
اظن ان الرجاله دول عاملين زى كف ايدك قبل الخطوبه ابيييييييض زى كف ايدك من جوة
بعد الجواز
زى كف ايدك من برة
عاوزين الواحده زى العبده ومش ننكر ان فى رجاله بيتقوا الله فى كل حاجه
.....................
مصطفى
كلمه اخيرة بجد احيييييييييييك
تقبل تحياتىوعذرا على الاطاله
جيلان

mostafa rayan said...

norahaty
انا سعيد جدا بزيارتك وبرأيك دة
واتمني اني اقدر اكتب قصص احلي وتعجبك اكتر واكتر
تحياتي ليكي

- حماتي ملاك
بجد انتي انسانة جميلة قوي
ودمك زي العسل ودةمش رأيي لوحدي دة رأي كل الناس اللي بتتدخل عندك
تحياتي ليكي وربنا يكرمك وييسر لكي كل الخير

- رحالة
انا سعيد جدا بيكي وبزيارتك
ربنا يديم المودة والتواصل بيننا
طبعا فرحان قوي بكلامك عن مقدرتي ككاتب دي مجاملة جميلة اشكرك عليها
وطبعا الحل اللي انتي قولتيه حل جميل جدا
بالنسبة لرايك حوالين الرجالة انا شايف ان دة مش بينطبق بس علي الراجل
في ستات كمان كدة
لكن زي ما انتي قولتي مش كل الرجالة كدة وكمان مش كل الستات كدة في لسة رجالة وستات حلوين قوي وبني ادمين بجد
اتمني ليا وليكي ان يرزقنا الله بأشخاص صالحين
تحياتي ليكي يا اختي الكريمة
ومنتظر اعرف رأيك في القصة بتاعة نجلاء السيد
دمت بكل الخير

Fatma said...

اولا احب اشكرك على تعليقك الرقيق في مدونتي :)

ثانيا مش قادرة اوصفلك الاحاسيس اللي هاجمتني وانا بقرأ الموضوع دا

تقدر تقول اني تقريبا بغلي

العيب بجد في الاهل اللي ربوا الولد على انه السيد المدلل وان جنس المرأة خلق لخدمته من اول الام مرورا بالاخوات وانتهاء بالزوجة

والعيب في الاهل اللي ربوا بناتهم ان الست مالهاش غير بيت جوزها ولازم تاكلي السم وانتي مبسوطة ومبتسمة

ايه دا بجد

ايه دا

مبدئيا انا مش ضد ان الست تخدم جوزها وتكونله كل حاجة في الدنيا

بس في المقابل يكون هوا راجل

النموذج اللي انت ذكرته لا يمت للرجولة بصلة من وجهة نظري

هيا بتشتغل زيها زيو

وبتصرف ع البيت زيها زيو

يبقى على اساس ايه هيا تتحول لخدامه وتناوله الريموت عشان هو جاي من الشغل تعبان

دي زوجة مش عبده اشتراها
عايز مراته تعمل كل الواجبات المنزلية يبقى هو كمان يقوم بواجبه في الصرف عليها وعلى بيته

لو هيا بقى عايزة تشتغل بعد كدا بمزاجها هي حره بس واجبها عليه انها ماتقصرش في بيتها

انا رغيت كتير اوي بس بجد انا مفروسة

العلاقة بين الزوج والزوجة المفروض تبقى حاجة تانية خالص غير اللي انت حكيته

عليك الصلاة والسلام يا رسول الله

نموذج يدرس في التعامل مع المرأة

عيب والله كدا عيب

رجالة ايه دي

care olders said...

احصل الان على افضل دار مسنين بمصر الجديدة
فهي توفر الرعاية والاهتمام بكبار السن والعمل على راحتهم وتوفر ايضا جليسة مسنين
لتلبية احتياجاتهم كما يوجد برامج ترفيهية واجتماعية لتساعد على تحسين حالات المسنين النفسية ويوجد ايضا عدة فروع اخرى للدار منها : دار مسنين بمدينة نصر
وبها مجموعة من الاطباء ذو كفاءة عالية في جميع التخصصات التي من الممكن ان يحتاجها المسنين كما يوجد دار مسنين بالمعادي
باقل الاسعار والتكاليف وافضل خدمة .