Tuesday, May 27, 2008

عن اعياد المدونين


استمتعت جدا يوم الأربعاء والخميس الماضيين كانا هذان اليومان بمثابة عيدين للمدونين فيهما ظهرت البشائرالأولي لكتابات المدونين في كتب مستقلة بعد ان ظهرت لبعضهم كتبا خاصة بهم يوم الأربعاء كان حفل ( عندما اسمع كلمة مدونة)
قي مقر دار العين حضر الحفلة مجموعة كبيرة من المدونين فهناك رأيت غادة عبد العال صاحبة مدونة ( انا عايزة اتجوز ) في الحقيقة يا جماعة ان غادة شكلها في الواقع اصغر بكتير قوي من شكلها في التلفزيون شفت كمان ازميرالد ونهي محمود
صاحبة مدونة (كراكيب ) وشفت كمان امينة زكي وشفت كمان شيماء زاهر وكمان ابراهيم عادل صاحب مدونة ( انا وانا ) شفت كمان سمراء النيل وكمان شفت محمد احمد صاحب مدونة ( الدليكون ) كمان شفت مؤلفي الكتاب محمد كمال حسين ومصطفي الحسيني وحضر الحفلة كمان شريف الألفي رئيس مجلة ( احنا ) وحضر كمان الصحفي محمد فتحي وشفت ناس تانين بس ماحصلش فرصة واتعرفت عليهم وحضر كمان احمد البوهي واحمد مهنى واحمد الصباغ رغم ان حفلتهم كانت تاني يوم ودي في الحقيقة كانت لفتة حلوة قوي منهم
كان المفرض يحضرالحفلة الشاعر احمد فؤاد نجم والفنان خالد الصاوي وكمان طارق امام لكنهم اعتذروا وماجوش
في الحفلة القي كل واحد من المدونين كلمة قصيرة عن بدايته مع التدوين وعن تأثير المدونة في حياته ادارت الحفلة مدام فاطمة البودي مدير عام الدار وهي كمان ليها مدونة علي بلوج سبوت اسمها ( فرفوشة ) ممكن تتدخلو عليها
في الحقيقة يا جماعة اليوم كان حلو قوي وانا فرحت قوي اني حضرت الحفلة واتعرفت علي الناس دي
يوم الخميس كان حفل توقيع الكتاب الثاني ( مدونات مصرية للجيب )
وكان في مكتبة عمر بوك ستورز في شارع طلعت حرب
ورغم ان المكان كان زحمة قوي إلا ان اليوم كان حلو قوي
انا شوفت هناك دكتور حر والفاتح اليعقوبي وشوفت كمان آبي
وشوفت صاحب مدونة العمود وكمان اشرف توفيق
صاحب مدونة (اخف دم ) ويوميات عيل مصري وقصاقيص ورق وكمان شوفت لماضة وعايزة اتكلم وشوفت كمان دنيا محيراني
وشفت كمان يا مراكبي وكمان بنت مصرية في الحقيقة كان في ناس كتير ودول اللي قدرت اتعرف عليهم لأن المكان كان زحمة قوي
بجد يا جماعة انا بعد ماقرأت كتابي المدونون حسيت ان احنا ناس جامدين قوي مش مجرد شوية عيال لاسعة زي مابيتقال عننا لاء دة احنا شباب جامد قوي ودماغنا حلوة قوي ومننا ناس ماتقلش عن كتير من اللي بيسموا نفسهم كتاب و مفكرين
عارفين احلي حاجة في الحفلتين ايه ؟ انها كسرت حاجز الشاشة اللي كان بينا
الناس رايحة علشان تتعرف علي بعض بمتهي الحب كل واحد شايل في قلبه حب لأخوه المدون رغم ان يمكن دي اول مرة يشوفه فيها
كمان الناس بتمضي لبعض بمنتهي الحب ماحدش باصص للموضوع من زواية شخصية ويمكن يكون اللي بيطلب التوقع اكبر في السن من الموقع لكن هو بيطلب منه دة بمتهي الحب والتاني بيمضي بمتتهي الحب مافيش اي حواجز بينا ككاتب وقارئ لأن كلنا قرأنا لبعض قبل كدة وعرفنا عقول بعض قبل مانعرف الوشوش
عارفين انا بشبه المدونات بفيلم اسماعلية رايح جاي
لأننا زي مابنقسم تاريخ السينما ونقول السينما قبل اسماعلية وبعدها
ممكن كمان نقول الأدب قبل المدونات وبعدها
زي مااسماعيلة عمل نجوم جداد من الشباب قدروا ينافسوا الكبار ويحققوا اعلي ايرادات المدونات عملت كدة بردة بدليل نجاح كتب المدونات الثلاثة لدار الشروق وقد نشرت الأهرام ان الكتب الثلاثة حققت اعلي المبيعات وتفوقت علي الكتاب الكبار
ايضا نجاح كتب لمدونين مثل طارق امام ومحمد فتحي وابراهيم عادل ونهي محمود ومحمد هشام عبيه كل دول كتاب شباب نزلوا كتب والكتب ماشاء الله باعت حلو قوي وربنا يزود المبيعات كمان وكمان
كمان الموجة الشبابية عملت نوع جديد من الجمهور معظمه من الشباب وبردة المدونات عملت نوع جديد من القراء معظمه من الشباب ... شباب بيقرأ لشباب
وزي الممثلين الكبار ماستفادو من الجمهور الشاب اللي صنعته السينما الشبابيه بردة نفس الحال حصل مع الأدباء الكبار لأن اللي نجح كتابات علاء الأسواني وبهاء طاهر الجديدة هما احنا جيل الشباب من العشرينات والثلاثينات
كمان بقي فيه تقاليد جديدة علي الأدب مثل حفلات التوقيع ودي حاجة ماكنتش موجودة قبل كدة
وزي بردة الممثلين الشباب مابيتعرضوا لهجوم من الكبار لكنهم لا يهتموا بهذا الهجوم نتعرض نحن جيل الشباب من الكتاب لنفس الهجوم ولكننا نسير بخطي سريعة جدا تاركين الكلاب في مكانها تنبح
ايضا كما ان شركات الأنتاج تتجمع في كيانات واحدة لتقف في وجه شركات الأنتاج العملاقة تشترك دور النشرالأن في نشر كتاب واحد فمثلا كتاب
(عندما اسمع كلمة مدونة ) نشرته دار العين ودار مزيد و كتاب محمد هشام عيبة ( عزيزي 999) نشرته دار ليلي ودايدموند بوك ولعل هذه الدور الصغيرة تتجمع في كيانات لتستطيع منافسة الدور العملاقة مثل مكتبة مدبولي ودار الشروق
ايضا مثل ان افلام الشباب قدمت مستوي تقني جديد علي سوق السينما
يقدم المدونين كتابات جديدة في الشكل وفي طريقة السرد فمثلا ابراهيم عادل في كتابه ( المسحوق والأرض الصلبة ) لا يقدم لنا نوعا واحدا من الأدب ولكن نصوص متنوعة تشمل الخاطرة والقصة القصيرة والشعر الفصيح والعامي بل وقصيدة النثر وايضا البراء اشرف في تدوينة بعنوان ( عارفة ) يقدم لنا قصة قصيرة في صورة جواب مرسل من الحبيب إلي محبوبته
ايضا مثل ان مستوي افلام الشباب تتقدم مع استمرا رالتجربة كتابات المدونين ستتطور مع استمرار التجربة
واخيرا : اريد ان اقول ان المدونات استطاعت ان تحرك المياه الراكدة في بحيرة الأدب واستطاع المدنون ان يفعلو شيئا بينما ظل الأخرون يكتفون بالشكوي قد يكون للتجربة بعض نقاط الضعف ولكن هذه النقاط ستتدارك مع مرور الوقت
وفي النهاية : اصدقائي المدونين : انا بحبكو قوي
.................................
ملحوظة مهمة :
انا لاحظت يا جماعة ان كتير من القصص اللي بكتبها بتناقش مشاكل الزواج رغم اني لسة مش متجوز ومش بعاني من المشاكل دي تفتكروا دة تفسيره ايه ؟
وسؤال ايضا موجه ليا ولأي حد عنده اجابة هو انا امتي هكتب قصص حب وقصص
رومانسية ؟
تحديث هام جدا :
عندما قلت تاركين الكلاب في مكانها تنبح كنت اقصد رفعت السعيد وروزا اليوسف والسيد ياسين وكل من سن قلمه ولسانه لشتيمة المدونين من غير وجه حق
وذلك من باب المقولة الشهيرة الكلاب تعوي والقافلة تسير
اردت توضيح ذلك حتى لا يفهم احد كلماتي بصورة خاطئة او غير التي كنت اقصد
هداني الله واياكم لسواء السبيل

46 comments:

خمسة فضفضة said...

السلام عليكم ورحمة الله وبركاته

ماتتصوريش يا مصطفي انا فرحانه اد ايه بالكتابيين دول وان شاء الله في اول فرصه اشتريهم

مع اني مش نازلي تدوينات فيهم بس بجد حاسه انه عيد لينا كلنا وان ده بداية عصر جديد للمدونين
بيثبتوا فيه انهم مش مجرد شوية عيال قاعدين ورا شاشات الكمبيوتر

ربنا يوفق الجميع

سلام

خمسة فضفضة said...

اه نسيت اقولك بالنسبة لموضوع نقد الحياه الزوجيه ومشاكلها
اكيد هايخف شوية لما تلاقي نصك الحلوه وقتها هانلاقيك طول فترة الخطوبة عمال تكتب في تدوينات عن الحب والمشاعر والرومانسية
لحين اشعار آخر

:-)

mostafarayan said...

خمسة ففضفضة
كعادتك دائما انتي منورة يا دكتورة
ربنا يوفقك ونحضر حفلة توقيع كتابك الأول وايضا ال100
تقبلي تحياتي ودمت بكل الخير

Anonymous said...

استاذ مصطفي اعتقد انك محصور في فكره واحده لأنك بعيد جدا عن الثقافه
لازم تثقف نفسك وإلا ستظل كتاباتك سطحيه والثقافه مع احترامي لكل المدونيين تنقصهم جميعا

ADAM said...

السلام عليكم


رأيي في الموضوع انت عارفه

مفيش داعي لذكره هنا

بس نذكر جانب واحد

إن الحالة الجميلة اللي بيشعربيها الإنسان لما يتجمع بناس حبهم من غير ما يشوفهم

وإنه يلاقي أعماله بيقراها الناس

بيحس بحالة ممتعة وجميلة

بس الباقي انت عارفه

*************************

بالطبع أوافق الدكتورة خمسة فضفضة

لما تحب وتلاقي نصك الحلو

هتبدأ الكتابات الرومانسية

وربنا يوفقك يا رب

وتلاقي بنت الحلال اللي تستاهلك وتستاهلها

وتحبك وتحبها

وتملا المدونة قصص عشق ورسائل حب فيها


تحياتي


آدم

mostafarayan said...

- اخي غيرالمعرف ( اللي انا عارفه)
انت ظالمتني وتسرعت في الحكم عليا
لوسمحت اقرأ التحديث علشان تعرف وجهة نظري

- اخي ادم
دومت زائرا طيبا للمدونة
تقبل محبتي وتحياتي

سومه...مجنونه فى بلد عاقل said...

كان نفسى حقا اكون معاكم فى هذا اليوم لكن الامتحانات اعمل فيكم ايه بس ياله كله نصيب
اما عن مشاكل الزواج مش بالضروره تكون متزوج لتعانى منها يكفى ان تكون متعايش مع مشاكل اللى حواليك امال الانسان بيتعلم ازاى
وعن العشق والحب فمش بالضروره تكون عاشق لتكتب عن الحب مع انه بيكون اوقع اكيد لو عايش تجربه وانا عن نفسى برايى الشخصى ان المشاعر تكمن فى القلوب ليس بالضروره اخراجها من القلب لنقول اننا نحب احيانا من الممكن ان تعبر اعمالنا اجزل من كلماتنا
اما عن بتوع روزا الاقرف الهى تولع عن بكره ابيها وميتبقاش ولا سنتى متر فى الجريده دى
تحياتى ليك سومه_87

سومه...مجنونه فى بلد عاقل said...

معلش معلومه صغيره لغير معرف واتهامه للمدونين بعدم الثقافه
نحن لا تنقصنا الثقافه فالجهل احيانا يكون ثقافه للمجتمعات انما ينقصنا العلم ومن منا لا ينقصه العلم فالعلم من عند الله ووحده هو العليم اما الانسان فيظل يتعلم حتى يموت ويموت على جهل مهما تعلم
ولو انك حقا عالم لما دخلت بغير معرف على الاقل من العلم والثقافه ان تعرف الناس من انت
تحياتى ليك سومه_87

Anonymous said...

اختي العزيزه انا ماليش حساب علي المدونات هيه دي القصه بس
لكن انا صديق لمصطفي ريان واسمي محمد حلمي مخلوف
وقلت له قبل كده ان المدونيين كويسين جدا بس مشكلتهم الرئيسيه الثقافه لأنهم لو كانوا مثقفين المسأله هتفرق وهتعملوا حاجات احسن واحسن علي الاقل انتوا زي ما قال مصطفي احسن من اللي مرهوش غير الشكوي والتذمر
بس اختي العزيزه انا لا اقصد اني اقلل من شأن المدونيين حاشا لله بس انا نفسي المدونيين يكونوا احسن من كده وبحاول التفت نظرهم لشيء انا شايف انه ناقصهم
ممكن ولا مش ممكن
انا بحبكم جدا

mostafarayan said...

اخي محمد حلمي
اظنك يا اخي لم تقرأ لكل المدونين فكون انك تعمم الحكم ان كل المدونين غير مثقفين اعتقد ان دة شيئ خاطئ ظني انك بتتمني لينا اننا نزود اكتر من ثقافتنا وقرائتنا لكن احنا بالفعل بنعمل كدة وزي سومة ماقالت احنا كلنا بنتعلم لحد ماهنموت
تحياتي ليك

مصــــري..!! said...

أخي مصطفي

المدونات أثبتت كفاءة رهيبة في محاربة الفساد.

والانترنت عموماً صار سلاح فعال ضد المـُفسدين.

وبما إن الصحفيين الكبار أمثال رفعت السعيد وعبدالله كمال لا يفقهون شيئاً في الانترنت.
فهم يخشون جداً جداً من المدونين والفيس بوكيين.

إنه عصر المدونين وبلا شك.

تحياتي
أسامة

Anonymous said...

صحصح ما تقوله صديقي العزيز مصطفي انا اتمني لكم كل التوفيق لأن الساحه بجد محتاجه لدماء جديده
والف سبه لرفعت السعيد ومليون لعيد الله كمال

المخبر العام said...

جميل التقرير بتاعك
ريحتني كتير
ووفرت عليا الكتابة

mostafarayan said...

مصري
منور يا جميل زاحب اشوفك دايما

- محمد حلمي مخلوف
اهلا بك زائرا كريما للمدونة

- المخبر العام
طبعا احنا اهم حاجة عندنا راحة الحكومة

Hosam Yahia حسام يحى said...

ماشاء الله

رلابنا يجعل ايامنا كل ها اعياد ان شاء الله

تحياتى لك

كيكى said...

ايييييييييييية يا مصطفى مش تقول كانت امتى الحفلة دى.....بكرة ربك يرزق ونعمل احنا كمان كتاب....منين صحيح الواحد يجيب الكتب.....ام بلنسبة لسولك.....الواحد من كتر مابيشوف ويسمع عن المتجوزين ومشاكلهم....بيحس انوا كمان متجوز...ويبدع

GiGi said...

يجد فعلا المدونين دول ناس جميله قوي ربنا يكرمك وشرفنى مرورك فى مدونتى المتواضعه

شـمو نشـادر said...

مبروك لينا كلنا ..
كان نفسى ابقى موجود بس الامتحانات بقى اعمل ايه .. خنقه ..
تحياتى ..
أسامة أمين

المـــفـــــــقــــــــوعـــــة مــرارتـهــا said...

رغم اني قريت معظم البوستات اللي نازلة في الكتاب بس اشتريته
فلو ماكناش احنا اللي نقف جنب الشباب اللي عاوزين يطلعوا كتاباتنا للنور مين هايقف
احنا اولي بمساندتهم
وبصراحة مختارين بوستات هايلة لناس رائعة
ومسيرنا كلنا يتنشرلنا موضوعات في الكتب دي
وعقبال الكتاب القادم ويكون نازلك فيه حاجة
صحيح انت امتي هاتكتب في الرومانسية
لو ماكتبتش دلوقتي
ولو ان كتاباتك رائعة وانا من اول المعجبات بها
تحياتي

Anonymous said...

السلام عليكم ورحمه الله وبركاته
بعيدا عن جو الحفله والذى منه
احب اكتب تعليقى
بخصوص اخر سؤالين
انا شايفه ان دا من تأثير الجو المحيط بيك مش شرط عشان الانسان يكتب عن تجربه يكون هو شخصيا مر بيها
ومجرد التعبير عنها او محاوله وصفها باسلوب واقعى متمثل فى كتبات حضرتك دا شيىء غير عادى
النقطه الاخيرة بخصوص الحب والرومنسيات
فاعتقد يعنى ان مع اول دقه قلب صادقه حيكتب القلم بحبرة الازرق ويترجم احلى مشاعر
وعلى كل سوا ء حدث ذللك او لو يحدث بعد
نحن بانتظار مزيد من الافاده والامتاع
دمتم بكل خير
عاشقه المصطفى

لست أدرى said...

شكل الحفله كانت حلوه اوى

واكيد الكتابين جامدين

انا نفسى اشتريهم بس ياترى ممكن الاقيهم فين

وهل الكتب دى هتبقى سلسله مستمره للمدونين ولا هما كتابين خلاص

واكيد زى مانت قلت المدونات بقى صوتها عالى اوى وبيوصل لاى مكان

زى مدونه وائل عباس لما رجت الصحافه

ومدونات كتيييييييييير بنثق فيها بجد

تايه في وسط البلد said...

اهلا درش
مبروك علينا يا مصطفي
وانا وان كنت لم احضر لكن لك ان تتأكد انني كأني كنت معكم

اما بالنسبة لنوعية التدوينات عندك يا ابو درش فاحب اقولك ان انت شخص حساس جدا اثر فيك ما تواجهه المرأة من عنت في هذا المجتمع وتريد ان تواجه مثل هذا بما تستطيعه وهو ان تغير من الافكار بواسطة القصص القصيرة

اذن فالقضية موجودة ومثلما وجدت هذه القضية ستبرز في ذهنك قضايا اكثر

الاهم انك ما دمت تحب القصص القصيرة كفن عليك ان تتمسك به... اقرأفيه كثيرا ..تناقش مع المتخصصين والمبدعين حول اساليب كل راوي واسباب اختياراته..غص داخل فنك وتشربه

صدقني سوف تبرع فيه وستصير احد عمالقته

بالتوفيق

بنت مصريه said...

انا زعلانه منك يا مصطفى مش كنت تقوللى يا عم
عشان
اشوفك
واشوف زمايلى المدونين
كده ماشى
عايزاك تنورنى ولونى لسه مقموصه

mostafarayan said...

ادم
دومت زائرا كريما للمدومنة

- سومة
منورة ياقمر واحب اشوفك دايما كتير
دمت بكل الخير

- حسام يحي
امين يارب

- كيكي
منورة ياقمر وممكن تشتري الكتب من مكتبة عمر بوك ستورز
وممكن تزوري الصباغ هتلاقي عنده معلومات اكتر

- جيجي
انتي الأجمل يا قمر

- شمو نشادر
ربنا يوفقك في امتحناتك
دومت بكل الخير

- حماتي ملاك
ازيك ياقمر
وطبعا احنا لازم نقف جنب بعض ونشجع بعض وربنايكرمك انك معجبة بكل كتباتي
اما بخصوص القصص الرومانسية فمازال السؤال قائم ( انا ليه مش بكتب قصص رومانسية ؟ وامتي هكتبها ؟ والأهم
لو كتبتها هتطلع بأي شكل حزينة ولا سعيدة ولا ايه ؟ ) لو عندك اجابة ارجوكي قوليلي عليها
- أه بخصوص العدد التاني الصباغ قالي في الحفلة هينزل بعد شهرين ان شاء الله

- عاشقة المصطفي
اولا انا عايز اشكرك جدا علي اطرائك الجميل في حقي اما بخصوص القصص
بيني وبينك انا تعبتبقي من حكايات اخوانا المتجوزين دول وكمان قلبي دة مش عارف امتي يعني هيحب وكدة بس لحد دة مايحصل هفضل اكتب عن اللي اتجوز واللي طلق واللي مخنوق من مراته واللي مش طايقة جوزها .... تعبت بجد
بصي ان شاء الله زي ماكتبت عن الجواز وانا مش متجوز هحاول اكتب عن الحب رغم اني مش عايش التجربة بس لازم احاول
دمت بكل الخير

- لست ادري
اه بجد الحفلة كانت حلوة قوي والصباغ قالي الكتاب التاني بعد شهرين ان شاء الله وممكن تشتري الكتب من مكتبة عمر بوك ستورز
تحياتي ليكي ودمت بكل الخير

- تايه في وسط البلد
اشكرك جدا علي كل الكلام الحلو دةعني
بجد انت انسان جميل قوي
لكن انا عايز اقولك ان في العصردة الرجل بردة بيتعرض لعنت ومشاكل مش الست لوحدها
ربنايكرم ويزيح الغمة التي نعيش فيها منذ اعوام طويلة
دمت بكل الخير يا اخي الفاضل

- بنت مصرية
ان شاء الله تتعوض المرة الجاية وانا زورتك علشان بقي تضحكي وتفكي القمصة
تحياتي ليكي يا ياقمر

-

appy said...

مصطفى بجد انا مبسوطه انى شوفتك والله فى الزحمه دى
وفعلا عندك حق فى موضوع روزا اليوسف وفى كلامهم عننا
غير كده بقى
موضوع الجواز عادى كل الشباب بتحلم وانت عاوز تكون مثالى بس يا ريت تستفيد من اللى بتكتبه

mostafarayan said...

ابي
منورة ياقمر
وبخصوص كلامك .. بجد اتمنى ذلك
تحياتي ليكي

!!! عارفة ... مش عارف ليه said...

مصطفي حبيب قلبي

الفرحة كانت هتنط من البوست اللي كتبته الف مبرووووووووك يا درش

وإن شاء الله إلى الأمام دائماً وبالنسبة يا سيدي لموضوع الرومانسية فأنت بواقعيتك دي رومانسي فعلا وصفك وتحليلك للمشاعر في قصة الحياة السرية لنجلاء السيد أكتر من رائعة

وبعيدن مش لازم يكون في اتجاه محدد سلفاً للموضوع انت اكتبه ويطلع زي ما يطلع اياً كان لونه مش مهم

أنت موهوب بجد

تحياتي

monaliza said...

جميل انك رحت الحفلتين واتعرفت على اخوانك المدونين وكسرت حاجز الشاشة على حد تعبيرك
وعلى فكرة قصصك عن الازواج ورغم عدم زواجك متهيألى انه بيدل على شخصية مستمعة جيدة وحساسة للغاية بمشاكل للاخرين وفى كل الاحوال احنا بنستمتع بما تكتب جدا

mostafarayan said...

- عارفة ... مش عارف ليه
منور يا قمر وبجد الكتابين دول انتصار مش بس للمدونين لاء لينا كلنا كشباب
انا ماليش بوستات نازلة بس بجد فرحت وكأني انا اللي مألف الكتابين
دومت بكل الخير يا اخي الفاضل

- موناليزا
ازيك يا قمر
بجد انا بفرح قوي بكلامك دة
ربنايوفقك ويحققلك كل الخير

rovy said...

بجد الموضوع ده يفرح كل المدونين
كان نفسى احضر الحفله لكن كان صعب جدا
اشكرك لانك نقلت لنا اللى قدرت تنقله من اللى شفته والى قابلتهم ..
ربنا يوفقهم كلهم ويوفقك
بقالى كثير ما شفتكش عندى .....
بالنسبه لحكاية الرومانسيه وكتبتك فيها ده حيكون اول ماتحس بمعنى الحب مش لازم تجربه شخصيه ممكن صديقك يوصف لك حالته وحبه لخطيبته او انسانه بيتمنى يخطبها او تأثر فيك قصه او كايه تسمعها او تقرأها .. اكيد حيجى اليوم اللى حتحس فيه ولو بشوية رومانسيه .
وساعتها حنعرف من اللى حتكتبه لنا .
دمت بخير تحياتى
rovy

يا عالم يا هوووووووووووو said...

فعلا الحفلة كانت جميلة
لأن في هذه الحفلة زالت الأقنعة
على العموم موضوع حلو أوي
بخصوص القصص: المشكلة ان الضغوط في المجتمع والتربص بين الذكر والانثى واتهام كل منهما الاخر بشكل اي علاقة.... ربما يكون السبب

smraa alnil said...

يا راجل دة انا كنت داخلة وفاكرة بقي
ان انت هتكتب قصايد عني وعن انجازاتي للشعب

وفي الاخر تكتفي بذكر اسمي

انت مش عارف اني متواضعه ولا ايه
:))

بس دة لا يمنع انك تكتب بوست عني

:)))

كنت مبسوطة بجد اني شفتك

بعيدا عن الموضوع

ياريت تشاركوني في موضوع علي مدونتي
وتنشره معانا
تحياتي

ساره البحر said...

بجد فكره جميله اوي اللي حصلت دي
انا اول مره اسمع عنها يمكن لاني لسه جديده او لاني مش هناك
بس بجد عجبتني اوي الفكره
وزي ما قولت كسرت حاجز الشاشات وكان توقيع لكتب بالنسبه لاي مدون مهمه جدا
اكيد يا مصطفى انه يوم جميل ويارب ايامكم كلها تكون كده
......................
اما بقى على السؤالين اللي في النهايه
اطمن انا متاكده انك اول ما هتلاقي الانسانه اللي قلبك يرتحلها هتلاقي نفسك لوحدك بتكتب رومانسي
بس بجد نفسي اقرالك قصه رومانسيه:)
دومت بخير يارب

عرفة فاروق السيوطى ( الاديب العاشق) said...

السلام عليكم

دى اول زيارة عندك


تفتكر احنا المدونين جيبنا القوة دى منين

من كتر عددنا

ولا من كتاباتنا

اللى بتعبر عن مشاكل المجتمع المصرى بعيدا
عنالاعتبارات السياسية

وغيرها من اعتبارات الكتاب

المشهورين اللى مبيعانوش من ربع اللى بناعنية

اناشايف ان فى اسباب كتيرة منها السببين دول

وحكاية اسماعيلية رايح جاى

فيلم عبود على الحدود سبقه فيها

تحياتى

mostafarayan said...

rovy
نورتي يا قمر
وربنا يجعل ايامنا كلها افراح

- يا عالم يا هوووووووووووو
نورت ياجميل واهلا بيك دايما في هذه المدونة

- smraa alnil
يا فندم بوست واحد عنك ماينفعشي .. لأن الكلام عنك ابدا لا ينتهي
نورتي ياقمر وربنا يحققلك كل الخير

- ساره البحر
منورة ياقمر وربنا يجعل ايامك كلها اعياد
بخصوص السؤالين انا مش عارف الباشمهندس اللي اسمه قلبي دةممكن يدق امتي ولحد سيادته مايدق هفضل انا اكتب عن اللي مخنوق من مراته واللي جوزها مضايقها واللي بيهكر علي بنت خنيقة ...يعني انا مالي انا بكل دة
وبخصوص امنيتك انا بردة زيك كدة بالظبط نفسي اقرألي قصة رومانسية وعلشان كدة انا بدعوكم ان اي حد عنده قكرة رومانسية يقول لأخوكوا عليها وانا اوعده اني اكتب علي القصة فكرة فلان وتأليف : مصطفي
نورتي يا قمر

- عرفة فاروق السيوطى ( الاديب العاشق)
اهلابك يااخي ويارب الزيارات تفضل دائمة ومتصلة
بخصوص الفيلم فاسماعلية كان قبل عبود وهو اللي فتح البا لهنيدي وبعده جيل كامل من شباب الممثلين
تحياتي ليك يا اخي

WhItE HeArT said...

والله يامصطفى انته شبه عملت مقاله رائعه بجد وعملت فيها دمج اكتر من رائع ودمت مبدع بجد

اما بالنسبة لموضوع الجواز فوالله عادي يارتني اقدر اسيب مثلا الشعر الحب واكتب في السياسه ساعات الانسان عقله بيرميه في مجال مش بيقدر يطلع منه بسهوله بس ده ميمنعش اني كتبت حاجة قبل كده في السياسه بس مكنتش مبسوط منها بصراحه وحسيتها مش لوني
ارجو انك تكون فهمت قصدي

اما بالنسبة لروزاليوسف سامحهم الله لإننا بجد اسرة جميله جدا وان شاء الله نتجمع تاني واكون موجود واقابل حضرتك لإني نفسي اني اقابلك واقابل كتير من المدونين لإنكم بجد عيلة رائعه

تحياتي

mostafarayan said...

WhItE HeArT
ازيك ياقمر
وانا بجد نفسي اشوفك واتعرف عليك وان شاء الله دةيحصل في اقرب وقت
ربنا ييسر الأمور
تحياتي ليك يا جميل

funckydoctor said...

ابقى قوللى المرة الجاية

استراحة محمد said...

والله يا باشا كان نفسى احضر لقاء خيرة شباب مصر ده ، بس ما كنش عندى فكرة وان شاء الله تتعوض فى مرة جاية عشان الواحد يتعرف على الناس الجميلة امثالك
اما بالنسبة لمحاربى التدوين فأنا مؤمن بمقولة ان اول دليل على نجاحك ظهور اعداء ليك
وهم كده بيثبتوا نجاح المدونيين
تحياتى يا كبير

mostafarayan said...

funckydoctor
حاضر
نورت يانجم

- استراحة محمد
ان شاء الله تتعوض قريب وانا بجد نفسي اشوفك واتعرف عليك
نورت ياقمر وربنا يوفقك فى امتحناتك وتجيب اعلي تقدير
بخصوص بوست سيدناخديجة احب احييك علي هذا البوست الجميل الراقي

FaceMoon said...

كان نفسى اكون موجودة معاكوا بس اكيد كان يوم جميل وشوفتة بعيونكوا

mostafa rayan said...

وجه القمر
ياقمرى الجميل انتي دايما معانا بروحك الجميلة دي
وان شاء الله نشوفك وتكوني معانا في اقرب فرصة جاية
دومتي بكل الخير ياقمري الجميل

إبـراهيم ... معـايــا said...

تسلم إيدك يااا مصطفى ....

بالمناسبـــة .... أخيرًا عرفت أقرا مدونتك خاصة التدوينات ذات اللون الأحمر، بعدما جهازي عادت له الألوان .....

مممممممممممممممم
شكرًا لكلماتك الجميلة عن المسحوق والأرض الصلبة، وأتمنى أن يكون قد أعجبك
*****************
بالنسبة للنشـر فإيميلي :
ibnzaydooon@hotmail.com
أشوفك على خيييير

mostafa rayan said...

ابراهيم معايا
اهلا بيك ياقمر منور الدنيا كلها مش بس المدونة والف مبروك علي عودة الألوان لجهازك
وانا بجد فرحان قوي اني اتعرفت عليك ومستمتع جدا بكتابك واللي مأخرني عن اكماله انه فجأة وقع تحت ايدي كتاب اختك رحاب بسام
( ارز بلبن لشخصين ) ولاقتني سارح معاها لكن طبعا ياجميل انت الأصل وان شاء الله راجع لكتابك سريعا جدا
ربنا يوفقك يا قمر

Invisible said...
This comment has been removed by a blog administrator.
mostafa rayan said...

انفيزابل
مسحت تعليقك واي تعليق خر منك سوف يأتيني تحت اي مسمى سوف امسحه فالتذهب للجحيم تلك الثقلفة المشؤمة التي تدعو انت إليها