Wednesday, May 7, 2008

حمد لله علي سلامتي


سلام عليكم
ازيكو يا جماعة عاملين ايه .. يارب جميعا تكونوا بخيروفي اتم صحة وسلامة
في يا جماعة موقف حصل معايا من يومين حبيت اذكره هنا علشان ناخد بالنا ومانكررش نفس الغلط اللي انا غلط فيه وكمان علشان نشكر ربنا علي نعمة الحياة .....انا يا من جماعة من يومين كنت هبقي من تعداد الأموات ولاكان هيبقي فيه لا مصطفي ولا مدونة ولا شاب ثائرولا ابداعاته لكن الحمد لله ربنا ستر
هو اللي حصل ان سلك المشترك بتاع الكمبيوتر كان بيلمس وكانت امي دايما تقولي غيرالمشترك دة وكنت دايما بأجل واقولها خليها علي الله او هغيره في اقرب وقت .. اللي حصل اني وانا بقرأ تعليقات
قصة ( سارة الخنيقة ) - ويظهر انها فعلا بت خنيقة - شميت رائحة شياط
ورائحة حاجة بتتحرق ببص حواليا لاقيت الفيشة بتاعة السلك بدأت تسيح انا حسيت بالفزع
وطبعا قمت علي طول وشدتها لكن فكرت في اللحظة دي انه كان بيني وبين الموت لحظات معدودة كان السلك هيسيح والكمبيوتر هيفرقع في وشي ولو ماموتش من الكهرباء كان ممكن من الخضة لكن الحمد لله ربنا ستر .
انا اول حاجة عملتها اني سجدت سجدة شكر لله وقلت الحمد لله دة اكيد تذكير من ربنا وتنبيه عليا اني اتوب عن الذنوب اللي بعملها واخد بالي من الحاجات اللي ممكن تكون صغيرة لكن عواقبها بتكون كبيرة
علشان كدة انا بكتب البوست دة علشان اقول لكم يا جماعة خلو بالكوا من اي حاجة حواليكوا ممكن تعتقدوا انها صغيرة ومالهاش اهمية لكن عواقبها ممكن تكون كبيرة بلاش تغلطوا نفس الغلطة اللي غلطتها
بلاش يا جماعة تكبروا دماغكوا في كل حاجة
وبلاش كمان يا جماعة نعمل مشاكل كبيرة علي حاجات صغيرة وماتستاهلش لان
يا جماعة الدنيا منفاتة والأنسان ممكن يفقد حياته في ثانية واحدة ربنا يمتعنا جميعا بنعمة الحياة ويرحمنا من موت الفجاءة

...........................................
ملحوظات مش علي الهامش
1- بخصوص تصريحات رفعت السعيد ويوسف البدري
د. رفعت وصفت شباب الفيسبوك بأنهم مش اكتر من مجرد شوية عيال لاسعة
متهيألي العيال الاسعة دي عملت في مدة بسيطة اللي ماقدرتش تعمله انت الرجل العاقل الخبير في سنين السنين
متهيألي العيال الاسعة دي اشرف منك لأنها ماخافتش وقالت لاء بينما انت جريت بأقصي سرعة علشان توطي علي جزمة الحاكم وتبوسها
وصفتهم بأنهم شوية عيال لاسعة ودة بيدل على مدي احترامك للأخرين ومدي الديمقراطية اللي بيتعامل بها اكبرحزب يدعي الديمقراطية مع المخالفين له في الرأي .... د . رفعت انا دلوقتي بس بحمد ربنا ان حسني مبارك هو اللي بيحكما مش انت لأنك في الحقيقة اكثر ديكتاتورية وغباء وقبح وقمع بكتير قوي منه
- شيخ يوسف وصفت الداعون للأضراب بأنهم هم المفسدون في الأرض .... كلمة واحدة بس عايز اقولهالك ... الدنيا منفاتة وحسبنا الله ونعم الوكيل
2- استغربت جدا ان يشارك مطرب بجماهيرية عمرو دياب في حملة تجميل الريس وان يقدم له اغنية هو لا يستحقها بعنوان كاذب شكلا وموضوعا اسمه واحد مننا.. احترام الجمهور اهم بكثير من رضا الرؤساء يا عم عمرو دياب
3- انتهت اسطورتي الأسيرة صلاح الدين بعد شهر كامل مر علي وكأنه حلم جميل في ليلة صيف هادئة ...حلم جميل لم ينقصه إلا ان يشارك فيه احد من بلادي تلك التى تدعي دائما انها رائدة الفن في الوطن العربي وانها هوليود الشرق

37 comments:

adam said...

عزيزي مصطفى

لازم نحتاط للحاجات الصغيرة اللي عواقبها غير معلومة

الراجل كان بيقول

كل الحوادث مبداها من النظر ومعظم النار من مـُسـتَصـغر الشرر

يعني مـُسـتَصـغرالشرر اللي كان في المشترك كان ممكن يعمل كارثة بس الحمد لله

كمان مـُسـتَصـغر الذنوب اللي بنعملها كلنا ممكن تعمل كوارث

وربك يستر

عن الملاحظات

لأ عيب

الريس مش غبي ولا ديكتاتور
ولا قبيح ولا بيستخدم القمع

الريس مش غبي وإلا مكانش قدر يثبت 75 مليون كل العمر ده

مش ديكتاتور لأن الشعب اختاره

بس مش كل الشعب

القليل اختاره
بس

الأكثرية قعدت في البيت مقالتش لأ

وتتأكد من ده من نسبة المشاركة في الانتخابات

طبعا ده مش ذنبه هو

مش بيستخدم القمع \

هو ماشي حسب القانون

اللي تعرف ديته ... اقتله

وهو عرف ديتنا

وعرف القانون

ومن خلاله .. دون تجاوزه بيعمل اللي هو عايزه

مش قبيح لأنه بسم الله ما شاء الله

قمر

عيب ده ريسنا

وكبير الأسرة


تحياتي لك

وحمد الله على سلامتك يا قمر



آدم

mostafarayan said...

اخي ادم
ماقدرش اقولك غير انك شخصية زي العسل وانا فرحان بتعرفي عليك
تحياتي لك يا قمر

nonoymm said...

الف حمد الله على سلامتك
انا كمان اقتربت من الموت بس بالمرض تعرف ضغط دمي انخفض بشدة في المرض من غير ما اعرف وما اخدتش حاجة ترفعه لاني ما كنتش عارفة ولما زوجي سال الدكتور ووصف حالتي قاله ان دة كان حاجة خطيييييييرة اوي والحمد لله انها عايشة
بس بفضل الله طول ما انا كنت في العيا والسخونة لما تفارق شفتي يارب عفوك ورضاك واه الالم
الحمد لله على كل حال
بالنسبة لرفعت السعيد ففيه اخرة وحساب وهيشوف
تحياتي

mostafarayan said...

الاخت الفاضلة : عاشقة النقاب
الحمد لله على سلامتك وعافيتك واسأل الله ان يتم نعمته وصحته وعافيته عليكي
دمت خير لزوجك واولادك وعائلتك
تحياتي لكي وسلامي

كاميليا said...

حمد لله على سلامتك

وبعد الشر عنك

ربنا يحفظك ويحميك

ملاحظاية:
اوعى تقرب تانى من اى خنيقة
مش عايزين تقوم فى البيت حريقة
ارجع لطريقة الزواج العتيقة
أسلملك
:D

تحياتى وتقديرى

mostafarayan said...

كاميليا
عايزاقولك حاجة مهمة قوي

بحبك قوي يا كاميليا
يا احلي صديقة في الدنيا
كلامك بيفرحني
وبدعي ربك وربي
انه يخليكي ليا

alzaher said...

حمد الله على السلامة
والحمد لله أنها جت على قد كده

عـــــــــــــــروبة said...

مش ح قول " درهم وقاية خير من قنطار علاج"

" تكررت كتير وزهقنا منها "

بس راح أقول ..

" الحمد لله على سلامتك ، الحمد له فقط " ...

تحياتي \\

مسرورة لأنكَ بقيتَ

:)
:)

بنت مصريه said...

اخى العزيز مصطفى
اولا الحمد لله ان ربنا ستر
وجت على قد كده
واكيد دى تذكره من المولى عز وجل
فى رسايل كتير بتيجى من عند الله والمؤمن بجد هو اللى بياخد باله ويشوف الغلط فين ويبتدى يصلحه
اما بالنسبه للتصريحات فانا معاك ف كل كلمه
قولتها
لنا الله
واتمنالك التوفيق تقبل مرورى

ra7eel said...

مش تاخد بالك يامصطفى

يالا الحمد لله انها جت على قد كده

فعلا احنا احسن ناس تكبر دماغها ونفضل نفوت لغايه لما تحصل مصيبه طبع هباب فينا بجد

اما بالنسبه للتحديث فحسبى الله ونعم الوكيل

تحياتى وتقديرى

Ahmed El-Agouz said...

كل ده علشان مسمعتش كلام ماما
حمدلله علي سلامتك

والملحوظات الاخيرة دي جامدة وحسبي الله ونعم الوكيل
العجوز

mostafarayan said...

- الزاهر
الله يسلمك يا صاحبي
منور ومشرف وبفرح قوي بزيارتك ليا

- عروبة
سعيد جدا بزيارتك وبكلماتك واتمني لك كل الخير وان اراك هنا كثيرا

- بنت مصرية
نورتي المدونة
وانا معاكي في كل كلمة قولتيها
دمت بكل الخير

- رحيل
اكيد اتعلمت الدرس
سعدت جدا بزيارتك واتمني لك دوام الصحة والسعادة

- احمد العجوز
ادي جزاة اللي ما يسمعش كلمة ماما تقولها
نورت يا صاحبي ودمت بكل الصحة والسعادة والخير

walaa said...

الحمد لله قدر ولطف حمدلله على سلامتك
فعلا حاجات بسيطه ممكن تودى فى داهيه

ادى جزات اللى مش بيسمع كلمه ماما تقولها ههههه
حمدلله على السلامه
ولاء

و القادم....أجمل said...

ياربنا لك الحمد كما
ينبغي لجلال وجهك
و عظيم سلطانك

حمدلله على السلامه
ربنا يحفظ الجميع

إحترامي و تقديري

dramaqueen said...

حصل خير يا مصطفى الحمد لله انها عدت
حمد الله على سلامتك

حسن ارابيسك said...

الحمد لله جت على قد كده والف حمد على سلامتك وصحيح ساعات تيجي للانسان رسائل لها مغزى لمن يعتبر وينظر على حاله

بخصوص تعقيبك على رفعت السعيد بخصوص الفيس بوك
طبعا انا مش معاه في الكلام ده
لكن أحب الفت نظرك ان رفعت السعيد مش في حزب الأغلبية الوطني
رفعت السعيد من زمان في حزب التجمع

دكتور بهــدوء said...

يحميك ويفاديك ويخليك
امال مين هنقراله لو جرالك حاجه


المهم الكومبيوتر

وانت طبعا
الا هوه انت كنت جايبه بكام
ويا تري لسه سليم بعد الشياط
(مفنجل عينيه ال يعني بحسد)
لسسسسسسسسسسه سلييييم
واااااااااو

شهرزاد said...

السلام عليكم
الحمد لله على السلامة مصطفى
وربنا يجعلها اكبر الحوادث والمصائب
وعايزاك تزور مدونتي
هناك هتلاقي هدية
ويا ريت تقبلها مني

وتحياتي لك
شهرزاد

mostafarayan said...

ولاء
منورة ياقمر وعندك حق

- والقادم اجمل
سعدت جدا بزيارتك وانا ادعو معك هذا الدعاء

- دراما كوين
الله يخليكي ربنا يحفظنا كلنا

- حسن ارابسيك
منور يا فنان
احب اقولك اني عارف طبعا ان رفعت السعيد حزب تجمع وهي دي المصيبة هو دائما يدافع عن الديمقراطية واحترام الأخر مهما اختلفت وجهة نظره
وهو يحتقر الاخر وينظر إليه انه مجرد شوية عيال لاسعة حتي ماقالش شباب ليس لديه خبرة او شباب مندفع ولكن التعبير يوحي بمقدرا الأحتقار الذي ينظربه لشباب الفيس بوك
طبعا مش محتاج أكدلك ان التحقيق كله وجه فج وقبيح لمدي الفساد السياسي
والأعلامي والديني
نورت يا صاحبي واحب اشوفك كتير قوي

- دكتور بهدوء
منور يا قمر

شهرذاد
الله يسلمك وانا فرحان بزيارتك
بس بخصوص التاج مرره لي من قبلك صديقي احمد صاحب مدونة منحنيات ويمكنك ان تقراي اجابته
سعدت لأنك تذكرتيني ولكن خيرها في غيرها

f four a said...

سلام عليكم

ازيك يامصطفى

حمد لله على السلامه وبعد الشر عليك

-------------------------------------
من حقك تدافع عن نفسك وكلامك طبعا صح بس من غير غلط ...احنا ندافع عن نفسنا بحق وفضيله

وربنا معانا
keep in toutch

Anonymous said...

حمدالله على سلامتك يا مصطفى يا ثااااااااااائر والف بعد الشر عنك
انشالله كل اعداء الوطن و الصهاينة و اعوانهم
انشالله الفاسدين و القمعيووون و اعوانهم
انشالله كل متجسس وكل كاذب وكل خائن لبلده ودينه ومبادئه
اما عن رفعت السعيد فللاسف كنت احترمه قبل تلك الجمل
هل جرب البحث و التعمق فى المدونات التي يدينها ؟؟
انها الصحافة الجديدة الحرة انها متنفس الشباب المهمش فى هذا الوطن
انها الصحافة غير الموجهه
انها الكلمة التي تصعد من القلب بغض النظر عن اختلافك او اتفاقك معها
اما عن الدكتاتورية فكلنا دكتاتورين للاسف انما المشكلة فى بطانة السوء ومن يسمتع اليهم ايضا
نحن لا يجب ان نتبرأ من تهمه تأليه أي رئيس سواء مدير او رئيس شركة او دولة بالطبع
ماعلينا
ولا يهمك
المهم انك بخير
تحياتي
مرجانة
مش عارفة ليه مدونتك مش فاكراني اضطررت اكتب اسمي

مصــــري..!! said...

حمد الله علي سلامتك.
وآسف لتأخري عليك.
خد بالك من الحاجات الصغيرة.
وبعد الشر عنك ويارب تيجي في اللي بتكرهه زي د.رفعت وغيره.
الف حمد الله علي السلامة واعذرني علي التأخير.
أسامة

adam said...

يا صاحبي ربنا يخليك

انت أعسل وأقمر

أما أنا فأفرح منك لتعرفي بيك


سلام مصحوب بحب كبييييييييير



آدم

mostafarayan said...

f four a
منورة يا قمر
واما معاكي طبعا ان الغلط مرفوض في كل الأوجه لكن ان كان قصدك وصفي لرفع السعيد بالقبح فأنا اعتقد انها ليس شتيمة ولكنها الحقيقة خصوصا عندما تقتصرنظرته لك علي الأحتقار
سعدت جدا بكلامك وزيارتك

- مرجانة
ربنا يخليكي وانا معاكي في كل كلامك
نورتيني يا قمر

مصري
انا فرحان قوي بزيارتك
ومعاك في دعائك يارب تيجي في كل اللي بنكرهم مش رفعت السعيد بس
نورت يا جميل

ادم
اهلا بيك دايما ياصاحبي
ولو اني مش محتاج اقولهالك لأن ماحدش بيرحب بحد في بيته ودة بيتك قبل مايكون بيتي وانت تحظ رجلك فيه قبلي
سعيد جدا بصداقتك وزيارتك
حفظك الله يا اخي واكرمك

سمراء said...

حمد لله على سلامتك
نحن اوقات مش بنتخيل أن الموت قريب مننا اوى
وأنه فى اى ثانية اى مخلوق ممكن يكون فى خبر كان

الحمد لهل على كل شىء
ربنا يحفظك ويهنيك بشبابك صديقى

mostafarayan said...

ربنا يخليكي يا سمراء
افضل شيئ في المدونة ان الواحد اتعرف علي ناس جميلة قوي زيك
دمت بكل الخير يا صديقتي

alshared said...

الحمد لله أن ربنا ستر عليك

لازم كل واحد مننا يقف مع نفسه في وقت من الاوقات

ولازم نصحح غلطاتنا ونرجع لربنا تاني

بالنسبه للدكتور رفعت السعيد فده راجل مثقف كنت بحترمه قبل ما يعتقل في قفص الحكومه الذهبي

والشيخ البدري أنا أساسا ما أعرفوش بس كنت بأسمع عنه
تقريبا الشيخ نسي حديث الرسول ص (أفضل الجهاد قولة حق عند سلطان جائر)

المنافقين بقيم كتير قوي اليومين دول أكتر من الهم علي القلب

الاخرانيه بقي مش قادر أفهم انتا تقصد أيه
:)

تحياتي يا درش يا جميل

أخوك

Wish I were a Butterfly ... said...

ألف حمدلله على سلامتك، و الحمدلله إن الموضوع عدى على خير
بس هي فعلا سارة الخنيقة هي السبب أكيد
:)

الحقيقة إني عارفة إني جاية متأخر أوييي، بس اعذرني الكمبيوتر كان برده تعبان. كنت عايزة أقوللك إن البلوج بتاعك أسلوبه مميز أوي و عجبني قصة سارة لأن الموضوع شدني لآخر سطر في البوست فعلا واستمتعت بيه أوي
بس الحقيقة إن فيه بنات كتير أوي أوي كدة..بيمسكوا في موضوع معين و يزنوا عليه في حين إن الطرف التاني بيكون شايف إن الموضوع بسيط جدا و مش محتاج كل التفكير دة فبيحصل المشاكل عشان كدة

المهم..حمدلله على سلامة حضرتك :)

mostafarayan said...

alshared
منور يا جميل وانا معاك فى رأيك لازم الأنسان يقف مع نفسه ويحاسبها لكن المشكلةانه في زحمة الحياةالانسان بينسي يعمل حاجات كتير مهمة
تحياتي ليك يا قمر

Wish I were a Butterfly

منورة يا قمر وانتي تيجي في اي وقت لان دة بيتك وانا فرحان ان المودونة عاجبتك وان القصة عاجبتك وفي قصص كتير بردة حلوة اتمني انك تقرأيها واتمني انها تعجبك
اما بخصوص البت الخنيقة دي حاولت ان افهما كدة وانها تشوف الموضوع من زواية تانية وهي اللي في دماغها في دماغها
بنات اليومين دول بقوا مدلعين قوي تحياتي ليكي يا قمر

سنووايت said...

حمدا لله علي سلامتك
وزي ما قلت الدنيا منفااتة

Darsh said...

الأول ألف سلامة عليك و الحمد لله انك بخير

كان هيبقى منظر وحش قوي و بتوع الطب الشرعي بيعاينوا المهم انك بخير

هو الكمبيوتر ده عايز الحرق

الواحد بيضيع قدامه عمره بالساعات و يمكمن عمره كله بالوفاة لا قدر الله

و أهم شيء في الموضوع بقى

لا تنظر إلى صغر المعصية و لكن أنظر لعظمة و كبر من تعصي

أما بخصوص عمرو دياب فليا تعليق صغير ارجوا انك تسمح بيه

مش معنى اني مختلف مع سياسات شخص اني اكرهه أو أشتمه و أكبر مثال الكاتب الكبير الله يرحمه مجدي مهنا كان مثال للشرف و النزاهة الصحفية و على الرغم من ذلك كان صديق شخصي لصفوت الشريف و مجدي مهنا ياما انتقدمه لكن ما شتمهوش و ما تنكرش من صداقته

انا مش شايف اي مشكلة ان عمرو دياب يغني للريس ... و الريس مهما كانت سياساته وحشه فهو واحد مننا ... الريس لو عنده 80 سنة نقول 29 سنة منهم في الحكم فهو عاش 51 سنة مخلص لمصر و بيضحي بروحه علشانها

يا ريت ما نظلمش عمرو دياب أو أي حد غير عمرو دياب

كل واحد مهما كان من حقه يعبر عن رأيه


أما بخصوص رائعة صلاح الدين الأيوبي ... أنا فكرت أكتر من مرة هل ممكن واحد مصري يمثل فيها ؟؟؟

لقيت للأسف أن لأ

و أن الممثلين العظام من أول عماد الدين زنكي للسلطان نور الدين لأسد الدين شيركوه لنجم الدين ايوب لصلاح الدين الأيوبي للقاضي الفاضل

محدش مصري يقدر يعمل شخصية من الشخصيات دي .... الله يرحم الأخوان غيث و محمود مرسي و المليجي و العظام بتوع زمان

Rania said...

الحمدلله
و حمدلله على السلامه
و ربنا ستر
ويلكم باك يا مصطفى
:)
اما بالنسبة للتصريحات
فاعتقد و دة رايى شخصى يا اخى العزيز
ان كل واحد حر فى رايه
و اننا لالالازم نتقبل الراى الاخر
نسمعه فقط
مش لازم نبرر احنا ايه
لاننا شباب واثقين فى نفسنا جدا
و على رايك عملنا الكتير و الى تقريبا محدش فيهم عمله
يبقى لازم نحافظ على اعصابنا
و منعملش زيهم
هما غلطوا فينا علشان هما ضعيفو الحجة
انما هل احنا بردة كدة
؟؟؟ظ
حاشا و كلالالالالالا
تحياتى

mostafarayan said...

سنووايت
منورة والحمد لله في كل الأحوال
الد نيا منفاتة بس مين يسمع وياخدباله
تحياتي ليكي يا ياقمر

- درش
منور يا جميل ايوة كدة خلي الدرشاوية يكتروا ويملو المدونة والواحد يحس بالعزوة في الفضاء البلوجري الواسع قوي دة
بالنسبة لأغنية عمرو فاتنا معاك تماما اننا لماتختلف مع حد مش معني كدة اننا نشتمه لاء لازم نسمعالأخر ونحاوره ونتقبل منه لأن دة اول طريق للتقدم بس انت يأخي لو لاحظت هتلاقيني ماشتمتش عمرو ولا غلطفيه بأي شيء لأن رغم كدةهو مطربي المغضل وواحد من الناس للي انا معجب بكتير قوي من اغانيهم حتي القديمة لحد دلوقتي - اكيد فاكر اغاني زي ياعمرنا ويلوموني وهتمرد علي الوضع الحالي وانسى قلبي مهما تنسى ورجعت من السفر - وغيرها كتير
انا بس انتقدت غنائه للإغنيةدي واكيد في فرق كبير بين النقد والشتيمة
اتمني تكون فهمت وجهة نظري
منور يا قمر ودمت بكل الخير

- رانيا
منورة يا قمر
طبعا يا جميلة انا متفهم لوجهة نظرك بس لماتلاقي حد بينظرلك نظرة مليئة بالألحتقار مش طبيعي انك تضايقي وتدافعي عن نفسك وتبيني حجتك القوية قصاد حجته الضعيفة
الفرق بينا وبينهم اننا بنستخدم اساليب محترمة وشريفة لكن هما اساليبهم وضيعة وسامحيني مش لاقي كلمة متحضرة اوصفها بيها اكتر من دي

Darsh said...

درش
منور يا جميل ايوة كدة خلي الدرشاوية يكتروا ويملو المدونة والواحد يحس بالعزوة في الفضاء البلوجري الواسع قوي دة
بالنسبة لأغنية عمرو فاتنا معاك تماما اننا لماتختلف مع حد مش معني كدة اننا نشتمه لاء لازم نسمعالأخر ونحاوره ونتقبل منه لأن دة اول طريق للتقدم بس انت يأخي لو لاحظت هتلاقيني ماشتمتش عمرو ولا غلطفيه بأي شيء لأن رغم كدةهو مطربي المغضل وواحد من الناس للي انا معجب بكتير قوي من اغانيهم حتي القديمة لحد دلوقتي - اكيد فاكر اغاني زي ياعمرنا ويلوموني وهتمرد علي الوضع الحالي وانسى قلبي مهما تنسى ورجعت من السفر - وغيرها كتير
انا بس انتقدت غنائه للإغنيةدي واكيد في فرق كبير بين النقد والشتيمة
اتمني تكون فهمت وجهة نظري
منور يا قمر ودمت بكل الخير
--------

أبو الدراويش

أنت فهمتني غلط

أنا قصدي أن مش لازم عمرو دياب ما يغنيش للريس لأن البعض هيزعل

يعني قصدي انه حر يغني ليه من عدمه

و مش لازم عمرو يوجه إهانة للريس علشان نحترمه ونحبه أكتر

ساعتها المفروض ينزل من نظرنا لانه اتجه من النقد البناء للشتيمة و الإهانة

غير المعروف عن عمرو أن بيحترم جداً فكر الرئيس مبارك و جمال مبارك و ده قاله في أكتر من حوار و برضه الناس انتقدته علشان كده

الناس زعلت منه علشان قال رأيه أيا كان عن اقتناع و لا نفاق

احنا ملناش ندخل في النوايا و طبعاً اللي ينطبق على عمرو ينطبق على أي مثال تاني

و معلشي بقى تقلت عليك ... انا رغاي حبتين

بنات صاحبة الجلالة said...

الف مليون حمد لله علي سلامتك سوري اننا اتاخرنا في الرد بس عندنا زنقة شغل جامدة والله اعذرنا بقي ربنا ستر ولسة ليك عمر علشان زي ماقلت تتوب عن اي ذنب اقترفته بدون قصد او سهو منك وربنا يخليك لوالدتك وميحرمناش من درش ولا ابدعاته الثائرة وبعد كدا خلي بالك من الفيش
الف مليون حمد لله بالسلامة كمان مرة

تحياتنا وتقديرنا

mostafarayan said...

درش
نورت يا قمر وياعم انت براحتك ارغي زي ماتحب .... احنا درشاوية زي بعض

بنات صاحبة الجلالة
الف شكر ليكي وربنا يحفظنا كلنا من كل شر

ميرو انتكة said...

بجد ما شاء الله مدونة حلوة قوى ومتنوعة وربنا يوفقك

بالنسبة للكمبيوتر انا بقى كهربة البيت اصلا كمان كلها عندى ملمسة يله خير وربنا معانا كلنا وبالذات الكمبيوتر بس ربنا معايه الحمد لله

حمد الله على السلامة