Saturday, May 15, 2010

رباعيات في حب سوريا

1
قمورة سورية وعيونها عسلية
تضحك وفي ضحكتها سحر وجمال الدنيا
ماتيجي تتجوزينيى..على شرط تدلعيني
ولا يوم تلوي بوزك وتقلبي مصرية
2
مصر وسوريا اخوات من سالف الأزمان
وتعالى يا حلوة نأكد وحدة الأوطان
تسكنى بيت حلوان وانا اسكن بيت حلب
ونخلف بهية ونزار وكمان حنان
3
قمر من سوريا فجأة دخل علينا الكافيه
كل الشباب انتبهت..فضلت تبص عليه
وقالولي اكتب فيها شعر
قلت الشعر عاجز عن وصف اللي احنا فيه
4
وحش سوري جامد قاعد مع شاب مصري
وكان جمالها زايد ..ده كان بشكل حصري
وقلت لصاحبى استنى.قالى هتروح فين
قلت اسأل لو ليها اخت هل ممكن تتجوزنى
5
كريز شفايفك نادى ..وانا عايز ألبي الندا
مش هقدراقف في مكانى ياسورية اكتر من كده
وانا مش قديس لا راهب ومافكرتش ولا عايز
انا عاشق بقلب شاعر بيخطفنى الجمال
وانتى جمالك ساحر وايه اكتر من كده
6
داري جمالك عنهم يا اللي جمالك بزبادة
مكر الحريم قتال وجمالك فوق العادة
لو كان على الرجال نظرة وخلاص هتعدي
لكن آه من الحريم ونفوسهم الكيادة
7
مش قلت انا قبل كده بلاش اللبس ده
ولبس الخروج طويل وواسع ونازل كده
وجمالك ده مايبنش غير عليا أنا بس
وحدي اقطف ورد الشام من هنا وكمان من هنا

8 comments:

صفــــاء said...

تحيا الجمهوريه العربيه المتحدة

بقطريها الشمالى والجنوبى يا سى مصطفى

أنا - الريس said...

بص انا مش هنافقك .. الكلمات طيبة .. بس انا حاسس انك بتتصنعهم .. انا اسف ان بقول كده بس ده اللي انا شعرت بيه وانا بقرا .

تحياتي لك .. وعبال الوحدة .

salwa said...

السلام عليكم اخ مصطفى
ادراج نحس برقته و نعومته
تسلم يدك
سلام

همس الاحباب said...

اممممممم
انا حاسس بحاجة غريبة فى الموضوع دى رباعيات فى حب سوريا ولا بنات سوريا
هههههههه
تحيا الوحدة العربية علشان حخاطرك يا ريس
تحياتى

أحــوال الهـوي said...

اغراض الشعر معروفه
الرثاء الهجاء المدح الخ
لكن الغرض الوحده ما سمعتش عنه
وواضح انك من نواتج الوحده عندك بهيه بطعم مصري ونزار بنكهه سوريه بس حنان هي اللي مزيج وطني اصيل


تحياتي

د. ياسر عمر عبد الفتاح said...

عارف يا درش
إنت أفكارك كلها حلوة
وعندك حس شاعري جميل
يعني بتخلق من مواقف معتادة لوحة شعرية

لكن خلينا أقولك بصراحة
إنت ناقصك تتعلم شعر
يعني تدرس علوم وزن وقافية
لأن طبعاً أبياتك مش موزونة خالص
وكمان القوافي بعض أحيان بتبقى مش مظبوطة وفيها خلل وعدم تناسق


أسف على الإزعاج
استمر يا درش في القصة والشعر

mostafa rayan said...

هي دي الموضوعات اللي بتجيب قراء مرتضى ايه وزمالك ايه.. اغيب ساعه وارجع ألاقى 6 بحالهم .. يا بركاتك يا سوريا ..
****
صفاء
تعيش تعيش تعيش

MR.PRESIDENT
طبعا انت حر في رأيك بس يعنى انا هتصنعهم ليه .. مافيش تصنع ياعمونا

- سلوي
الله يخليكي انت اللي جميلة وتستاهلى كل
خير


- خالد
لا يوجد فرق كبير بين سوريا وبناتها وكما قال الحكيم : هي سوريا تبقى سوريا من غير بناتها
تحياتى لك يا اخي

أ-عصام
ماهي دي الاضافة .. انت عارف انك لازم دايما تجيب الجديد ..حنان مزاج وطنى وبردودة اللي بتمناه يكون في العلاقة
تكون مبنيه على الحنان والدلع من غير نكد ولا لوية بوز

- د.ياسر
انت كلامك صح بص انا ماقدرش اقول انى بكتب شعر ..هي مجرد خواطر بسجلها
انا قاص وروائي بيتمحك في الشعر
لكن بردو لازم الخواطر دي تبقى مدروسة ولازم اتعلم بحور شعر وقافيه وانلا فعلا عملت الخطوة دي وجبت الكتاب وقعدت عليه لكن ماقدرتش استوعب الفرق بين الرجز وبين البسيط والحاجات دي بس بردو مايمنعش انى لازم اقعد واقرأ تانى لان دي مش حجة ولان ده كمان هيفيدنى في القصة والدراما
وعلى فكرة مافيش اي ازعاج على العكس رحم الله رجلا اهدى إلي عيوبى
لك كل محبتى وودي اخي العزيز

ahmed_k said...

ياسلام لو الوحده أستمرت لحد دلوقتي
كان كتير من الجينات إتغيرت هههه

حلوه كلماتك يا درش