Saturday, March 28, 2009

منة مجدي .. تلك الساحرة التي خطفت معها قلبي

لم اكن اتخيل يوما ان اكتب بوستا مثل هذا ولكن ماحدث ينبغي ان اكتب

عنه فهوشيء لا ينسى رغم ان كل كلمات الدنيا لن تستطيع ان تعبر عنه.

يعلم بعضكم اني في الفترة الاخيرة اتجهت للمشاركة في كتابة الاعمال الدرامية . من ضمن هذه الاعمال البرنامج الكوميدي لمبة شو

( وهوبرنامج يقدم اسكتشات ساخرة على الاحداث المختلفة كان يعرض في رمضان الماضي على شاشة شوتايم وهوبطولة منى هلا ومحمدعلي الدين وخالد عليش وانتاج احمد فهمي – مش المطرب - واخراج محمد كوينة ويمكنكم ان تشاهدوبعض المواقف منه على اليوتيوب او انزال الحلقات كاملة من على النت لمن اراد وبإذن الله سأشارك معهم في الموسم الثاني )

امبارح الجمعة كان في كاست تمثيل في المكتب ، ولأني عاشق للتجربة روحت اشوف الحياة بتمشي ازاي في الموضوع دة – مصركلها كانت موجودةعلى فكرة الشعب كله عايز يمثل -

كان فيه بنوتة صغيرة حوالي ست سنين جاية ومعاها ومامتها واخوتها لأن المفروض اننا هنحتاج بنت صغيرة معانا .في الحقيقة يا جماعة البنت مش بس كانت زي القمر لاء كمان زي الملاك

خصوصا انها فاردة شعرها ولبسة فستان بمبي وجاية عايشة دور النجمة قوي

ورغم الشقاوة اللي بتنط من عينها إلا انها –من خضة الموقف - كانت

قاعدة ساكته خالص وماببتكلمش بصراحة انا حبيت انكشها علشان تفك شوية خصوصا ان مامتهاواخوتها عاملين يكلموها وهي لسة قلقانة

- انتي اسمك ايه

- منه

- واقفة بعيد ليه يامنه مش تيجي تقعدي جنبي علشان نتكلم مع بعض شوية

بس يا جماعة اول ما جت وقعدت جنبي وحطيت ايدي على كتفها واخدتها في حضني

حسيت بشعور غريب شعور ماقدرش اوصفه من السعادة واللذة لدرجة اني ماكنتش عايزها تقوم ولاتتدخل تعمل تيست الكاميرا وعايز نفضل نتكلم على طول مع بعض

وفي ثانية واحدة بقينا اصحاب ولاقتني بصغر اكتر من عشرين سنه وفضلنا نهزر ونضحك مع بعض وفضلت بقى تقولي الحاجات اللي

محضراها وغنتلي يا طبطب وادلع بالتمثيل واغاني تانية كيتر

لدرجة ان مساعد المخرج اتغاظ مني وقالي حرام عليك اكلت دماغ البنت قالها كذا مرة واخر مازهقت هي منه قالتله مالكش دعوة انا عايزاه يتكلم معايا طبعا الراجل ماتوقعش الرد

قالها يعني اخرج منها انا فأكدت الكلام بكل حزم : اه اخرج منها انت . وطبعا انا كنت طاير من الفرحة .. خصوصا ان البنت مصدقة نفسها قوي وكانت بتقول لمامتها دلوقتي انا منه مجدي وفيه منى شلبي الناس كدة هتتلخبط ما بينا

مش عارف يا جماعة البنت دي عملت فيا ايه لدرجة انها بعد ماخلصت التيست لاقتني انا

الشاب التنك بقوم بكل لهفة واجيبلها ازازة الحاجة الساقعة اللي ماكنتش شربتها ودخلت التصوير علشان تشربها وبطلب من مامتها انها تصبر شوية لحد ما تخلص وانا طبعا عايز اقعد معاها اطول وقت

- عايز اقول ان الاطفال هما احلى حاجة في الدنيا وبيدونا قدرة رهيبة على الاستمرار رغم كل مشاكل وصعاب الحياة بقول الكلام دة لأن فيه ستات كتير عندهم اطفال وبيفضلو يقولو بلا عيال بلا وجع قلب دول همهم مش عارف ايه ، وماحدش يقول اني هزرت مع البنت نص ساعة وماشفتش حياتها الحقيقة وانها محتاجة للرعاية واكل وشرب وتعليم ومصاريف وكذا وكذا

مهما كان فالاطفال احباب الله ، وهم زينة الحياة الدنيا ربنا يكرم كل حد في اطفاله

ويشوفهم احسن ناس ويرزقني ويرزقنا جميعا باولاد صالحين يكونو في ميزان حسناتنا يوم القيامة

واخيرا صديقتي العزيزة منه كل كلمات الشكر لا تكفي لكي اعبر لك عن لحظات السعادة التي منحتيها لي يكفي انك جعلتيني اكتشف ذلك الطفل الساكن بداخل ذلك الشاب المسمى

مصطفي ريان

واشكر الله سبحانه الذي ارسلك لي ليمنحني لحظات من السعادة مازلت اجد لذتها داخل قلبي حتى الان

28 comments:

د. ياسر عمر عبد الفتاح said...

فعلاً الأطفال ملهومش حل
خاصةً لما بيبقوا دمهم خفيف
متزهقش منهم أبداً

mostafa rayan said...

دكتور ياسر
منور يا صديقي
ربنا يتملك الخير دايما
تحياتي لك

صبرني يارب said...

طيب انا هاسجل البوست ده منك صوت وصوره وادهولك بعد عشر سنين كده تكون جبت بنوته ان شاء الله وبقت اد منه

قشطه ؟؟؟

يارب يديلك الذريه الصالحه يارب

mostafa rayan said...

صبرني يارب
اختي الفاضلة
والله انا كان نفسي اصورها بس للاسف موبايلي جيل تاني مافهوش كاميرا
البنت بجد زي القمر حاجة كدة مايتشبعش منها خصوصا اننا رشقنا بسرعة جدا مع بعض وبقيت زي ماتكون عارفاني من يوم ماتولدت
وبجد الواحد نفسه ربنا يكرمه ببنوتة زي العسل زي القمر اللي مالحقتش اتهني بيه امبارح
عارفة يا صبرني الاول لماكنت بسمع عن الابهات اللي مش بيرحوا ساعات الشغل علشان يلعبومع اولادهم ماكنتش بصدق وكنت بقول لاء دي الناس دي بتدلع
بس امبارح صدقت انه شيء طبيعي جدا
تحياتي ومودتي لك

MǿиY El-Shreef said...

الاطفاااااااااااال

حرام عليك انا وهما اعداء طول عمرنا

بالذات البنات الي بيحسوا ان الدنيا كلها عروسه باربي وفلة والحجات بتاعتهم

اسمحلي اختلف معاك واتفق مع صبرني

هسجلك البوست ده وافكرك بيه بعدييييييين

:D

life said...

الاطفال أحباب الله
ربنا يخليها لأمها
وربنا يسعد قلبك يارب
ويرزقك بالذرية الصالحة
البنت دى تستاهل بوسة عشان عرفت ترسم ابتسامة على شفايف صديقى
ربنا يحرسها يارب
انا فعلا حسيت من كلامك عنها أد ايه جواك طفل كبير مشاغب

fashkool said...

ازيك يا مصطفى ريان .. كيف حالك
يا سلام يا مصطفى على الاطفال احباب الله على الارض

اولادنا اكبادنا تمشى على الارض
بس ما قلتش لنا هى منه مدى نجحت فى التست ولا لأ
كان لازم تقول لنا
تحياتى

إيناس حليم said...

:))
لذيذ أوي البوست ده
هما فعلا الاطفال احلى حاجة في الدنيا بس طول ما هما هاديين وعاقلين وبيروحو الحمام لوحدهم
ههههههه

ربنا يرزقك يا رب يا مصطفى

دمت سعيدا
:)

mostafa rayan said...

موني الشريف
موني اكيد انتي بتهزري الاطفال دول احباب الله وزينة الحياة الدنيا
مش يمكن احنا اللي غلط والحياة سهلة وبسيطة زي ماهما شايفين مش معقدةزي مابناخدها احنا
لازم تعيدي تفكيرك تاني وإلا لو خلفتيلك 3او4 بنات هتتعبيهم معاكي قوي
ههههههه
تحياتي ليكي ويارب دايما بخير


- لايف
ربنا يخلكي يا مروة بس هي مش تحتاج بوسة واحدة دي تحتاج الف بوسة ويادوب تبقي بتجهزي علشان تبوسيها
تحياتي ليكي

فشكول
اهلا بيك يا استاذنا
طبعا زي ماقلت اكبادنا تمشي على الارض بس النتيجة لسة ماطلعتش ان شاء الله بعد اسبوعين بس هو ماكانش فيه اطفال غيرها
تحياتي ليك

- ايناس حليم
ربنا يخليكي يا ايناس
وابقي تابعي البرنامج بقي هوان شاء الله في رمضان دةهيتعرض على قنوات تانية غير شوتايم
تحياتي ليكي

mohamed ghalia said...

فكرنى بالبوست الى كنت كاتبه لزوجة المستقبل وابن المستقبل
إحساس رائع طبعا

شمس النهار said...

ربنا جعل المال والبنون زينة الحياة الدنيا
احلا حاجه في الدنيا هي التعامل مع الاطفال ولولا الملامه كان الواحد خلف دستة اشرار اقصد اطفال

مصطفي ريان said...

محمد غالية
ربنا يرزقني واياك بالزوجة الصالحة
تحياتي لك

شمس النهار
ملامة مين ؟ وميندة اللي يلومك انك تخلفي العدد دة
انا مش شايف اي ملامة يا شمس
تحياتي ليكي ودمت بخير

حاجات جوايا said...

واضح فعلا انها بنت لذيذة وعسولة
ربنا يحميها يارب
ويرزقك ان شاء الله ببنوتة ملاك وزى القمر زيها

خالص ودى

مصطفي ريان said...

حاجات جوايا
ربنا يخليكي ويكرمنا جميعا بالذرية الصالحة
تحياتي لك

هاني النجار said...

يادرش الأطفال نعمة من ربنا ما يقدر قيمتها غير اللي اتحرك منها
ربنا يزقك بيهم ويكونوا اتنين شياطين زي اللي عندي يورك النجوم في عز الضهر

هما شياطين صحيح
لكن الدنيا كلها في كفة وهما في كفة

تحياتي
وفين الربع جنيه اللي عليك؟

mahasen saber said...

ربنا يرزق كل حدمحتاج يحس بالنعمه دى

الاطفال زينة الدنيا والاخره
يكفى انك عايش حياتك بتعمل حاجه عشان حد يبقى فخور بيك وسعيد لاجلك

ربنا يحمى منه وغيرها من الاطفال ويخليهم لاهلهم



ومبروك مبروك مبروك البرنامج
مع انى زعلانه منك. بس ميمنعش انى فرحنالك زى فرحتى لاخويا

مصطفي ريان said...

هاني النجار
ربنا يحفظلك كل احبابك
ويتقبل دعوتك دي
تحياتي ليك يا اخي

محاسن صابر
ايه بس اللي حصل علشان تزعلي
انا ماقدرش على زعلك وانتي عارفة
وبعدين انا مش زي اخوكي انا اخوكي فعلا
ربنا يحفظك ياي محاسن ويقدرلك الخير

mahasen saber said...

طب انا بهزر ازعل من اخويا الصغير ازاى

هو مكنش زعل جامدقد ما هو حزن بسيط بس يعنى هوضحلك بعدين اروح الشغل بس وارجع

سلاممؤقت يا درش يا اخويا الغالى والصغير والطيب

الدرعمي said...

آه يا مصطفى ياخويا آه .. متفكرنيش أكتر منا فاكر ، العيال دول هم أكتر حاجة بدعي ربنا يرزقني بيهم نفسي أخلف ولدين وبنتين حلوين شبه أمهم بس مستني موال الجامعة يخلص هو وموال الجيش وربنا يستر .. ادع لي ربنا ينعم علينا جميعا بالذرية الصالحة @ تحيتي لروحك النقية @

مصطفي ريان said...

محاسن صابر
محاسن ماعاش دةولاكان اللي يخليكي تحزني
اوتتضايقكي ونا منتظرك تاني
ربنا يكرمك يا اختي الغالية

الدرعمي
اخي العزيز احمد
ربنا يكرمك بكل اللي تتمناه ويطلعو كمان احلى من امهم
واضح انك خلاص لقيت اللي عليها العين
ههههههه
ربنا يقدرلك الخير يا صاحبي
تحياتي لك

kochia said...

فعلا الاطفال عندهم جاذبية رهيبة
سبحان الله ربنا وضعهاى فيهم
بنسب مختلفة طبعا

يمكن عشان هم من الضعف انهم لن يحموا انفسهم من اي شئ سوي حبهم الذي يدخل الي قلوب الناس

تحياتي

rovy said...

واضح انك انسان حساس جداا
ربنا يرزقك الذريه الصالحة و يكون عندك بنت عسولة زى منة و تحبها و تعطيها كل حنانك و اهتمامك

دمت سالما

تحياتى

صفـــــاء said...

الأطفال بيكون رزق من الله
يمنحه لمن يشاء
والبرائه والطفوله متلازمان

لكن يا مصطفى اى واحدة بتقول كدة على أطفالها مش بتكون كارهه ليهم أو بتدعى عليهم زى ما انت متخيل
دى أم
شالتهم وربتهم وتعبت فيهم
ولمابتقول حاجه كدة اكيد مش بتتمناها ومش لازم نعتب عليها أو نحاسبها لأن هى امهم
بالنسبه لليوميات انا عارفه رأيك فيها بس للأسف مش هقدر أتناقش معاك الفترة دى لأن خلاص فرح أختى يوم الأحد الجاى عقبالك لما أفرح بيك كدة انت كمان
وأن شاء الله بعدة أرجع أدخل ونقدر نتكلم براحتنا وكل واحد فينا يقول وجهه نظره
جميل البوست يا فنان
سلامى ومودتى ليك
ويا رب تكون بخير

زهرة الكاميليا said...

رزقك الله من فضله

اطفالا يكونون ذرية صالحة
يباهى بها الله الملائكة
من فرط شكرهم له على نعمه وحسن طاعتهم


واشكرك على ما منحتنا من سعادة
اثناء قراءة سطورك الجميلة



لك كل الود

المـــفـــــــقــــــــوعـــــة مــرارتـهــا said...

ربنا يرزقك يارب بالذرية الصالحة التي تكون قرة عين لك
انت انسان محترم وطيب جدا وتستحق كل الخير

تايه في وسط البلد said...

ايه ده؟

ده احنا بعد كده مش هنعرف نقابلك الا في حضانة المروة علي كدة؟!!ه

ههههههههه

سعيد بانك وجدت نصفك الثاني

كل التحية

مصطفي ريان said...

kochia
والله عندك حق بس الطفل بردو بيكون عنده شفافية رهيبة ويستطيع ان يستتعر بفطرته ونقائه قلوب الاخرين بدليل انه مابيروحش لأي حد
تحياتي لك ودمت بخير

- rovy
اشكرك على كلامك الجميل عني
رزقنا الله جميعا بالذرية الصالحة
تحياتي لك ودمت بخير


- ازيك يا صديقتي الغايبة من زمان
انتي قلقتيني عليك
في انتظارك ومبروك لاختك وربنا يكرمها بالذرية الصالحة
تحياتي لك دايما

- زهرة الكامليا
صديقتي الغالية
لا استطيع إلا ان اردد خلفك امين
تحياتي لك ودمت بكل الخير


- تايه في وسط البلد
حبيب قلبي
ازيك يا جميل
بس يا عم منة دي تقدر تعتبرها بنتي اللي احب اخلفها اما نصفي الاخر فمازال البحث عنه جاريا
فقط قد اكون اكتشفت الطفل الذي بداخلي
تحياتي لك يا اخي

مصطفي ريان said...

الفقوعة مرارتها
اختي الفاضلة
ربنا يتقبل منك ويكرمك في اولادك
كل تحياتي الطيبة لك