Saturday, March 21, 2009

لما اموت ... قصيدة شعر جديدة

لما اموت يا حبيبتي
لوسمحتي ابقي ابكي عليا
ماتقوليش راجل وراح
وهيجي غيره عشرة ومية
وافتكري اني كنت معاكي
شاب جميل وحسن النية
افتكري لحظةحلوة بينا
وانتي ايديكي في حضن ايديا
واني كنت بقول للناس
كلام جميل عليكي دايما
والكلام التاني مع انه صدق
كنت بشيله دايما ليا
انا حد يستاهل غرامك
ويستحق تبكي عليه
ولما تاخده المنية منك
يستحق تقتكريه
وتقابليه في حياتك مرة واحدة
مرتين لاء مش ممكن هتقابليه
ودلوقتي انتي مش عارفة قميته
لكن بكره هتعرفيه
ومكانه يفضل فاضي في قلبك
ولا حد غيره هيسكن فيه
ورغم عشقه الصارخ ليكي
لكن انتي بتجرحيه
انتي لسة مش حاسة بيه
انتي لسة مش عارفة قيمته
لكن بكره هتعرفيه
لما يضيع منك بكرة
اكيد اكيد راح تعرفيه
****************
بعد القرأة
قمت بألغاء بوست ( جامد اخر حاجة ) واعتذر للأصدقائي الذين علقوعليه .. لأني بعد تفكير لاقيته شغل جامد جدا وممكن يتعرض مع شو تاني وحرام انه يتحرق على النت

50 comments:

د. ياسر عمر عبد الفتاح said...

جميل كعادتك يا درش

ماء تشرين said...

اول زياره

ايه بس الغرور ده ياعنى معقول مش هتلاقى زيه
ممكن
بس مش واخد قلم في نفسو شويه لا هو مش شويه هو كتير
ههههههه
لا بجد حلوة لو فعلا هو بيحبها بجد اكيد مش هتلاقى زيه



تحياتى

mostafa rayan said...

د ياسر عبد الفتاح
ربنا يخليك يا جميل

- ماء تشرين
مش غرور بس هو واثق قوي من نفسه ومن حبه ليها وزي مانتي قلتي هو بيحب بجد واكيد هي مش هتلاقي زيه
تحياتي لك

mohamed ghalia said...

الله عليك يامصطفى كلمات روعة
سلمت يداك
دمت بكل الود

Khaled said...

أية يابنى اليأس
دة كلة .. من أولها موت .. !!؟؟؟

أضحك معايا بقة و أنا متابعك من ساعة ماحطيت بوست كليوباترا 2009
و شيلتة فى ساعتها لدرجة إنى مالحقتش أقراة .. تانى يوم نزلت جامد أخر حاجة وطبعا قعدت أضحك على اللقطة الفانتازيا إللى انتا كتبتها
و عتبت عليك لما الغير معروف علق بكلام مش ظريف و أنت مسحتة و حلفت تمسح بية بلاط المدونات
ههههههههههههههههههه
يا مصطفى خليك واثق من نفسك و كنت رد علية لإنة كان واضح إنة مابيفهمش يعنى إية إسكتشات فانتازيا
هيا الحدوتة كان ناقصها حاجة بس مش عارف اية
عموما ولا يهمك عايز أقرا كليوباترا 2009 بقة

سلام يا جميل

mahasen saber said...

اولا ربنا يبارك فى عمرك وتتجوز وتخلف وتفرح باحفادك مع ان المهم من العمر مش طوله او قصره المهم اليى هيتعمل فيه

بس القصيده تحفه تحفه تحفه وفكرتها جديده ان حد يقول كده لحبيبته

مصطفى فكر تعرضها على ملحن مع شوية تضبيط هتبقى فكرة اغنيه تحفه

mahasen saber said...

اولا ربنا يبارك فى عمرك وتتجوز وتخلف وتفرح باحفادك مع ان المهم من العمر مش طوله او قصره المهم اليى هيتعمل فيه

بس القصيده تحفه تحفه تحفه وفكرتها جديده ان حد يقول كده لحبيبته

مصطفى فكر تعرضها على ملحن مع شوية تضبيط هتبقى فكرة اغنيه تحفه

مصطفي ريان said...

محمد غالية
ازيك يا جميل ويارب تكون بخير وصحة واحسن حال


- خالد
صاحبي الجميل قوي
ازيك يا قمر ويارب تكون بخير وفي احسن صحة وحال
والله يا خلود انا فرحان قوي انك قرات بوست كيلوباترا وانطونيو وفرحان اكتر انه عاجبك
والله يا خالد يا خويا انا الاسكتش دة غيرته كذا مرة الاول عملته عنتر وعبلة قالك لاء غيره اتعمل السنة اللي فاتت غيرته لأنطوينو وكيلو باترا قالك غيرنا النهاية غيرتها وبعد ماتوافق عليها قالك لاء مش هناخده ليه يا جدعان .. من غير ليه سيبك منه واشتغل في الجديد
بس انا لاقيت انه شغل حلو وممكن يتعمل مع شو تاني فقلت حرام انه يتحرق على النت
زي بوست جامد اخر حاجة دة بردو اترفض لأنه شعبي والناس هناك ايه كلاس قوي - مش دماغهم عبد الباسط حتى لوكان مكسر الدنيا -
مش لأنه جرئ وماينفعش يتعرض في التلفزيون وكدة
اما تعليق غير المعرف دة
فانا لما فكرت لاقيته نجاح ليا دى شكلها واحدة دخلت قرأت استفزها الموقف وان الراجل بعد ماكان تعبان عايز يتجوز تاني فراحت بكل غشومية دبت الكلمتين ودة معناه نجاح ليا لأنه اثر فيها مامرش مرور الكرام
ودة معناه انه شغل حلو
وزي ماقلت هي شكلها مش فاهمة يعني ايه كوميدي ولا فانتزيا ولا قادرة تستوعب
- زي ناس كتير - ان الكوميديا فين يحتاج لسعة صدر لاستيعابه وتقبله
ماينفعش نقفش منه ونصده كدة
لأنه اسهل حاجة اني اخليك تعيط لكن اصعب شيئ اني ارسم على وجهك ابتسامه والاصعب انك خليك تموت على نفسك من الضحك
وبمناسبة تعليقك الجامد دة ليك يا عم عندي مفاجأة
ايه عايز تعرف ايه هي .. لأء مش هينفع اقولهالك امال هتبقي مفاجأة ازاي
تحياني ومدودتي ليك يا اخي

مصطغي ريان said...

محاسن
ازيك يا صديقتي الجميلة
ربنا يكرمك يا محاسن
بس هتبقي اغنية نكد قوي دي يا محاسن
تحياتي الكتيرة ليكي ودمت بكل خير

نهر الحب said...

مازلت تبدع
ومازلت تتالق وتألق يذداد بأذدياد كتاباتك
وفقك الله

Khaled said...

هههههههههههههههههههههههههه

كليوباترا و أنطونيو 2009
اللقطة كوميديا عالية جدا و خسارة تتحرق عالنت .. عندك حق

هديتك الغالية وصلت و باشكرك جدا عليها ربنا يوفقك يا درش و دمت مبدعا

بس أنطونيو معاة حق .. حد يسيب نجلا برضة .. ههههههههههههههههههههه

حاجات جوايا said...

ورغم عشقه الصارخ ليكي
لكن انتي بتجرحيه
انتي لسة مش حاسة بيه
انتي لسة مش عارفة قيمته
لكن بكره هتعرفيه
لما يضيع منك بكرة
اكيد اكيد راح تعرفيه
****************


هى الدنيا كده فعلا
منحش بقيمة الحاجة غير لما تضيع من ايدينا


اطال الله عمرك اخى الكريم

دمت بخير
سالى

kochia said...

حلو
بس ليه لما اموت ؟؟

تحياتي

مصطفي ريان said...

نهر الحب
الله يخليكي
ومتشكر قوي على كلامك الحلو واطرائك
على القصيدة
لك كل التحية والود

- خالد
حبيب قلبي ربنا يخليك يا قمر
ومادام يا عم الشغل عاجبك رنلي بس وانا ابعتلك حاجات تانية اجميل
تحياتي لك يا اخي ودمت بكل الخير

مصطفي ريان said...

حاجات جوايا
ربنا يخليكي ويعزك ويجعل اعمارنا في الخير

كوشيا
لأنها وهي معاه مش حاسة بيه ودايما بتجرحه وتجرح مشاعره
زي ما حاجات جوايا قالت ( مابنحسش بقيمة الشيئ إلا لما يضيع مننا )
تحياتي لك ودمت بخير

رؤية said...

يمكن بكرة تنساك
او حتى تندم وتتمناك
ويمكن انت تلاقى هواك
مع واحدة تانية تدوب فى هواك

^_^

مش كل حاجة اكيدة
تحياتى لك

شمس النهار said...

مصطفي انت توهتني
بس اللي انا فهمته من الكلام الصادم ده
انك واثق من حبك وانها مش هتلاقي زي قلبك
بس انت اللي مش واثق منها والا من حبها صح كده والا ايه
المهم ان الكلام جميل

z!zOoOo said...

السلام عليكم

ازيك يا مصطفي باشا

اولا انا جيت اسلم واطمن انا مش عارف اذا كنت فاكرني ولا لا

صحيح القصيده حلوه بس كانت عايزه صياغه أحلي من كده

وعايزه تعبيرات اجمد من كده

علي العموم ده رأيي البسيط

أتمني تكون بخير

تحياتي

اصحى يا مصر : اسلام ديو said...

كلمات جميلة وحساسة
وعلى ما اعتقد ان طريقة كتابتك شبيهة لعادل سلامه
بس الله اعلم
بس احييك على احساسك الجميل
تقبل مرورى وسلامى

مصطفي ريان said...

رؤية
عندك حق في كلامك بس الاكيدانها هتندم
تحياتي لك


- شمس النهار
بصي جمال النص الادبي ان كل واحد يشوفه من وجهة نظره وعلشان كدة مافيش صحولا غلط في وجهات نظر مختلفة
تحياتي ليكي دايما


- z!zOoOo
ازيك يا جميل طبعا انا فاكرك بس انت بقالك فترة ماجتش يا عم
طيب انت شايف الصياغة الاحسن تبقي ازاي قولي وانا هحاول اخد بالي
تحياتي ليك يا جميل

- اصحى يا مصر : اسلام ديو
ازيك يا جميل وانا فرحان ان القصيدة عجبتك
بس يا عادل انا اسلوبي مابيشبهش حد انا بشبه نفسي بس لا عادل سلامة ولا حد تاني غيره
تحياتي ليك يا جميل

المـــفـــــــقــــــــوعـــــة مــرارتـهــا said...

اذيك ياعم
ادورلك علي ايميل مش لاقية
عاوزة لرقم تليفونك ولا اي حاجة عاوزين نخدمك
ماتتأخرش محتاجة رقم تليفونك ضروري لسبب تليفزيوني
بلييييز ضيف نفسك عندي علي ميلي اللي موجود علي المدونة
سلام يامبدع

mostafa rayan said...

المـــفـــــــقــــــــوعـــــة مــرارتـهــا

اختي العزيزة سحراشكرك على كل خدماتك الجميلةمعي تحياتي الكتيرة ليكي

!!! عارفة ... مش عارف ليه said...

جميل يا درش

متألق زي العادة

حتى لو كان الشغل اللي بتنزله على النت نص نص :)

اخوك
وليد

مصطفي ريان said...

عارفة مش عارف ليه
ازيك يا جميل
بس انت حيرتني دلوقتي انت شايف القصيدوحلوة ولا نص نص
تحياتي ليك يا اخي

nana said...

كلمات جميلة وقصيدة تعير عن احساس عالي

!!! عارفة ... مش عارف ليه said...

طبعااااا حلوة

إنما زعلت على

البوست اللي لغيته :)

وإن شاء الله ربنا يوفقك دايماً للخير


تحياتي
وليد

صفـــــاء said...

هههه طب نعمل ايه بس يا درش
ما هو اللى قطع بنفسه لما مات
حد دلوقتى فى الزمن دة يعمل عمله زى دى ومستنى حبيبته تعلن عليه الحداد
يا حبيبى دة كان زمااان
هو مات فيه غيرة
أمال يعنى انت عاوز البنيه تموت روحها وراة ؟
دة حتى متجيش
جميله يا مصطفى وساخرة جدا
.

مصطفي ريان said...

نانا
ربنا يخليكي رأيك دة شرف ليا


وليد
ربنا يخليك ويارب تعجبك الهدية اللي بعتهالك

- صفاء
عندك حق ماحدش دلوقتي بيفتكر حد تى اقرب الناس إليه
بس انا كنت فاكرها حزينة جدا وليست ساخرة جدا
كويس انك شوفتي فيه وش جديد انا شخصيا ما شفتوش
تحياتي ليكي ودمت بخير

الجواز و سنينه said...

اولا الف مبروك يا سياده الريس على الكتاب اللى يادوب عرفت بيه
ثانيه انت ليه مش بتيجى عندى؟؟؟؟؟
ثاثا
عجبنى اوى اوى
"
انا حد يستاهل غرامك
ويستحق تبكي عليه
"
بعد الشر عليكى من البكاء
بس عجبنى اوى

dramaqueen said...

كلمات جميلة كالعادة
للأمام دائما

مصطفي ريان said...

الجواز وسنينه
ازيك يا رب تكوني بخير
وان شاء الله الرئيس السابق ينزل وتكوني معانا في حفلة توقيعه
تحياتي ليكي ودمت بخير

- دراما كوين
ربنا يخليكي
لك كل التحيةوالود

الدرعمي said...

فكرة حلوة يا مصطفى بس ليه كتبت قصيدة شعر ؟ هي فكرة أو خاطرة أو حوار ،، الشعر كلام موزون حتى وإن لم يكن مقفى فيه قصيدة كنت كتبتها اسمها ،، في مراسم وأد قلبي ،، بتعالج نفس الفكرة ابقى شوفها ياقمر المدونين وقل لي رأيك ، ده تقريب لما تحدث عنه زيزووو قمر الصعيد @ تحيتي تصحبها دعواتي @

مصطفي ريان said...

الدرعمي
ممكن تعتبرها خاطرة في شكل قصيدة
تحياتي لك يا اخي وان شاء الله سوف اقرأ قيصدتك

زهرة الكاميليا said...

السلام عليكم

كيف حالك يا شاعر؟

على فكرة ..
أنا أتابع مدونتك باستمرار
لانها عندى فى المفضلة يا صديقى

يعنى دائما اتشرف بقراءة كلماتك الجميلة
وعملت طيب انك رفعت البوست السابق
الحق .. اصبحت المدونات تتعرض للسرقة بشكل غير طبيعى

طبعا مش محتاج رأيى على البوست الجميل ده .. وما أجمل الغرور عندما يكون تاجا على رأس عاشق ..


كل الود صديقى

صفـــــاء said...

هقولك ايه الساخر يا درش
الساخر هو طيبه قلبه لدرجه انه هو بيطلب انها متنساهوش
هى على فكرة كـشعر مش حزينه اوى زى ما انت متخيل
هى بتتكلم عن أحساس سودوى خطر على بال شاب
اللى يضحك بقى انه متخيل انها مش هتنساة
اذا كان العايش بيتنسى ويتباع
حد هيشترى اللى مات ؟

مصطفي ريان said...

كاميليا
اهلا بيكي يا صديقتي العزيزة
وربنا ما يحرمني منك ابدا

- صفاء
تعليق واقعي جدا
يظهر ان بطل القصيدة مش حاسس بالزمن دة
بس عارفة يا صفاء هو الاكيد انه ماحبتهوش لانها لو كانت حبته ماكانش احتاج انه يقول القصيدة اصلا لأن اللي بيحب حد مابينساهوش حتى لوكان بعيد عنه
تحياتي ليكي ودمت بخير

صيدلانيه طالعه نازله said...

يعني لازم نموت علشان اللي بنحبهم يحسوا بينا يبقي بلاش حب احسن و اللي ميعرفش قيمتي بناقصه مش كده و لا إيه تحياتي ليك علي الكلمات الجميله دي

صيدلانيه طالعه نازله said...

يعني لازم نموت علشان اللي بنحبهم يحسوا بينا يبقي بلاش حب احسن و اللي ميعرفش قيمتي بناقصه مش كده و لا إيه تحياتي ليك علي الكلمات الجميله دي

mostafa rayan said...

صيدلانيه طالعه نازله
اهلا بيكي يا دكتورة
دي اول زيارة وان شاء الله مش الاخيرة
عن نفسي اتفق معك في رأيك

المحارب المتيم said...

السلام عليكم

أخى العزيز مصطفى

أوحشتنى

أكل ذلك تم فى غيابى فاتنى الكثير والكثير

من نشر الكتاب والظهور الاعلامى وما تلاه من تطورات

عامة سدد الله خطاك ووفقك

تحيتى

مصطفي ريان said...

المحارب الممتيم
كيف حالك يا اخي انت ايضا اوحشتني اكثر
الكتاب لم ينزل السوق بعد ان شاء الله تكن معنا ونحن نحتفل به
تحياتي لك ومحبتي يا اخي

المـــفـــــــقــــــــوعـــــة مــرارتـهــا said...

انا كنت مستغربة جدا بصراحة ان ازاي موضوع بالحلاوة دي ينزل المدونة
بس بجد هو رائع وكويس انك رفعته
وربنا يسعدك ويوفقك يارب

مصطفي ريان said...

المـــفـــــــقــــــــوعـــــة مــرارتـهــ
اشكرك على مجاملتك الرقيقة يا اختي الفاضلة
لك كل التحية والود

mahasen saber said...

ازيك يا درش اخبارك ايه

يا رب تكون كويس وبافضل حال

dr.lecter said...

لووز

life said...

عارف يامصطفى هى الفكرة جديدة
أن يقول لحبيبته متنسهوش بعد ما يموت
بس ياصديقى اذا كانت مش معبراه هو وعايش هتحزن عليه لما يموت
عارف اكتر حاجة وجعتنى ايه
أن للأسف بقى من الأشياء المسلم بيها أن أى شخص مبيحسش بقيمة الشىء اللى معاه غير لما يفقده
وأنه مش بيحزن عليه غير بعد فوات الأوان
هو ده منطقى؟؟

mostafa rayan said...

محاسن صابر
ربنا يخليكي يا محاسن ومانحرمش من سؤالك الدائم عني

- dr.lecter
شكرا

- لايف
لا طبعا يامروة مش منطقي
بس يا صديقتي هوايه اللي اصبح منطقي في حياتنا
تحياتي ليكي

MǿиY El-Shreef said...

تسلم ايدك يا مصطفى

حلواوي اوي

بجد الرجاله الي بتحب دي بحترمها اوووي

وجرب كده لو حطيت لو خدني الموت منك

مش المنيه عشان يبقى الكلام ماشي مع بعضه مايبقاش في كلمه فصحى وسط العامي

عموما هو مجرد اقتراح مايقللش من ابداعاتك ابدا

تسلم ايدك

smilyrose said...

طب وليه كدا

الطيب احسن

ان شاء الله تعرف

قيمتك دلوقتى وبلاها موت وفراق


وبلاها بكى ودموع


وكفاية احزان

يالله

فيه ايه بس


smilyrose


وردشان

روح الحب الصادق

mostafa rayan said...

MǿиY El-Shreef
اهلا بيكي يا صديقتي العزيزة
اقتراحك وجيه بس انا شايف ان المنية
اقوي شوية في المعنى
تحياتي لك دوما

- سمايل روز
او انساها انا واعرف حد تاني غيرها يفهم ويقدر
تحياتي ليكي يا صديقتي العزيزة