Tuesday, November 11, 2008

تاج السعادة + قصيدة لفتاة المترو ..الوحش الأحمر

قبل القرأة
قرأت في موقع مصراوي أن محافظ القاهرة اجتمع بالأستاذ جلال الشرقاوي واتفق معه على اعطائه فرصة شهر لعمل الأحتياطات التي تريدها هيئة الدفاع المدني وفي نفس الوقت سوف تعطيه المحافظة قطعة ارض لبناء مسرح جديد لأن المسرح الحالي يمثل خطرا على معهد الموسيقى .. السؤال هل ستشارك الحكومة في تكلفة المسرح الجديد ومن الذين سينفق على العاملين في المسرح في خلال فترة البناء واين كانت الحكومة طوال هذه السنوات الطوال جدا -32- إذا كان المسرح حقيقا يمثل خطرا وهل امة تفكر بهذه الطريقة يمكن ان تنجح او تتقدم ؟
................................
بنوتة زي القمر تشيلني جوة عنيها
وابن طيب لذيذ يعطف عليا وعليها
وصحة من غير مرض وسعة في الرزق
دي جنة الدنيا اللي قلبي مابيحلمش إلا بيها
- الرباعية اللي فاتت تمثل باختصار نظرتي للسعادة التي مرر لي اخي الكريم محمد غالية تاجها
والأن بعد ان قرأتم الموجز إليكم التفاصيل
السؤال الأول:ماهى السعادة من وجهة نظرك؟
اني اكون راضي واحس بسلام داخلي بيني وبين نفسي وبيني وبين الأخرين
السؤال الثانى: كيف تصل إلى السعادة؟
لو عملت اللي عايزه من غير ماغضب ربنا متهيألي اكون وصلت ليها
السؤال الثالث: هل السعادة وهم أم أنها حلم صعب؟
ليست وهما او حلما صعب كل يوم بتعيشه وبتحقق فيه احلامك بتحقق السعادة بس خلي عندك هدف وثقة في ربنا ونفسك انك هتقدر تحقق احلامك وهتلاقيها ان شاء الله
السؤال الرابع: هل السعادة طريق للنجاح ؟وضح؟
آه طبعا لما تكون سعيد هتكون نفسيا احسن ومقبل على الحياة اكتر فهتقدر تنجح اسرع
السؤال الخامس: ماهى أكثر اللحظات التى شعرت فيها بالسعادة؟
مش لحظة معينة او شئ محدد .. يمكن لما نجحت في الجامعة واخدت اعفاء الجيش وارتحت من مشاوير الهايكستب كنت فرحان لكن في الأغلب لما بكتب قصة او قصيدة وبتعجب الناس بكون فرحان قوي
السؤال السادس:هل ممكن أن تحقق كل شىء؟
لو حطيته في دماغك ممكن .. لكن بردو ربنا مش بيدي الأنسان كل حاجة في حاجات بتكون خارجة عن ارادتك
السؤال السابع: السعادة تجعلك تقبل على الحياة أم لا؟
آه طبعا
السؤال الثامن: هل أحسست يوما انك وصلت لقمة السعادة؟
يمكن دلوقتي لاء بس ان شاء الله الأيام الجاية في حاجات انا ماشي فيها ربنا يكرمني وتتحقق ساعتها هحس اني اسعد انسان في الدنيا
السؤال التاسع: لماذا تمر أوقات السعادة بسرعة؟
لأننا بنكون مستغرقين فيها فمش بنحس بالوقت
السؤال العاشر: هل ترى السعادة فى التدين؟
آه طبعا
السؤال الحادى عشر: هل أنت متفائل وعندك أمل؟ وضح؟
بحاول .. زي ماقولت في حاجات ماشي فيها ربنا يكرمني وتتحقق واعلن عنها والناس كلها تفرح معايا
السؤال الثانى عشر: إذا شعرت بالحزن ماذا تفعل؟
بدعي ربنا يشيل عني الحزن
السؤال الثالث عشر: هل يستمر معك الحزن فترة ام ينقضى فى الحال؟
بيقعد وقت لكن مش كتير
السؤال الرابع عشر: ما رأيك فى الأفراد المتشائمين؟
ربنا يسعدنا ويسعدهم
.....................................................
قصيدة لفتاة المترو
يوم الثلاثاء اللي فات وانا نازل من المترو في التحرير لاقيت القمر نزل من السما وعدى من جنبي سرحت بعيني معاه ولما اختفي لاقتني بكتب القصيدة دي ... منتظر رأيكو فيها
(الوحش الأحمر )
وحش ولابس احمر عدى بالصدفة جنبي
اول ماشوفته بعيني رق ودق قلبي
رايح فين يا جميل وسايبني هنا وحدي
وازاي بغمضة عين قدرت تخطفني
طيب سيب حتى التليفون
ولا إيميل يريحني
اطمن منه عليك
واسمك بتفرحني
آه يا برود اعصابك
اخدت قلبي معاك
وماشي وسايبني

26 comments:

mohamed ghalia said...

أخى العزيز
إيه الكوكتيل الجامد ده
حلو قوى الموجز ده
بنوتة زي القمر تشيلني جوة عنيها
وابن طيب لذيذ يعطف عليا وعليها
وصحة من غير مرض وسعة في الرزق
دي جنة الدنيا اللي قلبي مابيحلمش اللي بيها
ربنا يحققهولك
جميل إننا نكون سعداء من غير منعصى ربنا
حقيقى إجاباتك رائعة
مبروك ياعم انك شوفت القمر فى المترو
تحياتى ياحبيب قلبى

mostafa rayan said...

mohamed ghalia
فرحان اني جاوبت اخيرا على التاج وفرحان اكتر انك اول حد علق عليه
دمت بخير وسعادة دايما يا اخي

~*§¦§ Appy §¦§*~ said...

كل ده علشان تاخد نمرتها
طيب ليه كده بس
انا حسه انك شويه وهتشنكلها وتديها مقلب حراميه هههههههه
ربنا يسعدك يا مصطفى وميرسى على كلامك عندى

كاميليا said...

على فكرة
انت انسان كريم اوى
دايما تنزل باكتر من حاجة فى البوست

تاخدنا معاك من فكرة لفكرة
بمنتهى الرشاقة

اتمنى ان ارى تاج السعادة يعلو جبينك قريبا ان شاء الله

تحياتى واحترامى مصطفى

اسامه عبدالعال said...

احلي حاجه فى الابيات دي مش القافيه ولا النظم ولا حوارات الشعر دي
احلا حاجه انها من احساسك ومن قلبك وعفويه

المره الجايه متسيبهاش تمشي هاتها من قفاها

رئيس جمهوريه نفسى said...

ربنا يديم عليك اليعادة ان شاء اللة ويجعلها لون حياتك في قادم الايام

* said...

يا بنى بلاش الكلام جوة عقلك يدوس على بعضه كدة
بالراااحه
افكارك كتير يا مصطفى وكلها بتدوس على بعضها لحد مبقاش عارفه اعلق على ايه ...بس هخلينى دلوقتى فى التاج
لان انا بدعيلك من كل قلبى ان ربنا يديك كل السعادة اللى فى الدنيا لأنك تستحقها
وحكايه البنوته والابن دى هنحطها هى كمان تحت بند السعادة
حكايه الوحش الاحمر دى هى اللى جامدة

بتطلع بضربات شمس جامدة جامدة يعنى
.

كـــيــــــــارا said...

موضوع جلال الشرقاوي بجد تهريج اللي بيحصل ده

********

اما الرباعيه فدي اي انسان بيحلم بيها

******

التاج اجاباتك فيه بجد جميله

******

الوحش الاحمر

سيدي ياسيدي

جميل اوي طيب سميته وحش ليه ؟؟

mostafa rayan said...

آبي
بقولك وحش .. يظهر ان انا اللي اتشنكلت .. البت بجد كانت قمر
كلامي عندك هو الحق انتي حد جميل قوي
دمت بخير

- كاميليا
انتي حدجميل قوي
ربنا يسعدك دايما

- اسامة عبد العال
ربنا يخليك يا جميل .. عارفانا مقتنع ان اهم حاجة في المبدع انه يكون تلقائي وبسيط فهيدخل القلب على طول
- بخصوص الوحش عهندكحق المفروض كنت اتعرف عليها مش افضل اعذب نفسي كدة

..........
- رئيس جمهورية نفسي
ربنا يخليك ويسعدك انت كمان


صفاء جلال
بصي انتي دوسي على ( شو اوريجنال بوست) خلي اكلام قدامك وعلقي عليه نقطة نقطة
اقولك ملحوظتين
1- كان في اكتر من حاجة عايزاتكلم عنها بس اكتفيت بدول بس علشان تعرفي قد ايه انا متواضع
2- في مدونة اسمها (اياكش تولع )
صاحبها بيكتب بطريقة حلوة قوي وساخرة قوي
ادخليها وانتي تعرفي البسوستات الطويلة على حق ربنا
وتتأكدي بنفسك قد ايه انا بختصر
دمتي بخير وسعادة يا صفاء
دايما

- كيارا
ربنا يخليكي
بخصوص الأستاذ جلال زي ماقلت اسمها قلة ادب وناس مش شايفة شغلها وبتعلق فشلها على الأخرين
- بخصوص الوحش
لأنه خطف قلبي وهزني
ولأنها جميلة موت
حاجة كدو كوكتيل جمال وانوثة
تقدري تقولي عليها ست بجد
- على فكرة اناعايز اقولك اننا جيران انا بردو ساكن في حدائق حلوان
يعني على رأي سو ولاد (منطقشة واحدة )
تحياتي ليكي ودمت بخير

كـــيــــــــارا said...

ايه ده فين في حدائق حلوان ؟؟؟

mostafa rayan said...

كيارا
- في تقسيم النصر للسيارات ش 2
الشارع اللي قدام شريط المترو

كـــيــــــــارا said...

ايه ده مش ممكن

انا من مدينه الضباط وفي وشي المترو علطووول


اهلا يابن منطقتشششششششي

Khaled said...

هههههههههههههههههه

الوحش الأحمر يا مفترى
أنا حاسس بيك على فكرة
هههههههههههه
ولا يهمك .. الجايات أكتر

mostafa rayan said...

- كيارا
فل يا كيارا يعني انتي قبالي من الناحية التانية
مبسوط اني اتعرفت عليكي يا بنتي منطقتي
ايوة كدة خلي الواحد يحس ان له عزوة في فضاء التدوين دة
منوراني دايما يا جارتي العزيزة

كـــيــــــــارا said...

ده نورك ياجاررري وابن منطقتشييييييييي

mostafa rayan said...

- Khaled
حبيب قلبي ايوة كدة دة العشم بردو ماهعو مايحسش بالراجل إلا الراجل اللي زيه

- كيارا
والله انا فرحان قوي اني اتعرفت عليكي واحلى سلام لحدائق حلوان وكل القمرات رجالة وستات اللي عاين فيها
منورة

عايش علي الهامش said...

ياه انا بقالي كثير مدخلتش ولا ايه ايه دنيا
تعرف انت اقصر واحد جاوب التاج ده لدرجة اني كنت مستني في الاخر عبارة لمزيد من التفاصيل انظر الكتاب المدرسي صفحة 0000 اه اقصر في الاجابه مش الطول لحسن بعدين تجري ورايه تاخد التار ولا حاجه
اما من جهة الوحش الاحمر فانا حسيت انك بتتكلم عن عربيه سبور او والله اعلم الجيش السابق للاتحاد السوفيتي
يا راجل معرفتش تاخد النمر والعربيه معديه اقصد والحاجه ومعديه مش هتنفع ضابط مرور يا درش
سلم سلاحك ياعم
وبعدين هو انت نخيت لليلي وشركاه من امتي ضغطوا عليك قولي وانا اتصرف واهربك معايه
سلام بقي قبل ما يتوصولو لمكان الاي بي وابقي ضحية مدونتك

سلام يا باشا

kochia said...

ربنا يسعدك ويحقق احلامك ان شاء الله

تحياتي

ضــى القمــر said...

مصطفى انا عندى ليك فكرة ..

نزل بوست كل ساعتين .. وانا هرد عليك دايما ..
لكن ايه الزحمه دى يا ابنى :)

بخصوص موضوع جلال .. فأنا شايفه ان الموضوع هيزيد سوء للأسف .

وبالنسبه لنظرتك فى السعاده ..
فهى فعلا وربي قمة السعاده وراحة البال ..

أما اجاباتك ..

فبجد رووعه .. وميزاتها أنها من احساسك الصادق بجد .

أما بقه القصيده الآخيرة ..
فأنا هدعيلك من قلبى أنك تشوفها تانى ..
علشان تكتب قصيده تانيه لينا..هههههه

تحيتى لك ايها الراقى وللزحمة التى وجدها هناااا ..
ههههههه

mostafa rayan said...

عايش على الهامش
منور يا جميل
بص انتا مبسوط قوي انك شايف اني اختصرت في الأجابات لأن خير الكلام ما قل ودل وقلهم يا عم ياحسن بيقولي اني بطول في البوستات
وبخصوص الوحش فللأسف اول لما شوفت ماقدرتش غير اني اسرح معاه
نورتني يا جميل زي العادة

- kochia
ربنا يكرمك ياربي ويحققلك كل احلامك تحياتي لك ودمت بخير


- ضي القمر
بصي ان كان كتابة بوست كل ساعتين هيخلي القمر يدخل عندي وينور الدنيا فانا مستعد لكدة
بس انا لما لاقيت ان قضية الأستاذ جلال اتحلت الحل الشكلي دة قولت انزل البوست الجديد خصوصا ن اخي محد ارسل التاج من فترة وماكنتش عايز اتأخر عليه اكتر من كدة
- اما الزحمة فانا مش شايف اي زحمة هو بس بيكون عندي اكتر من حاجة عايز اتكلم فيها طيب ايه قولك اني حاولت ارفع ملف صوتي للقصيدة كتجربة جديدة بس الملف ماتحملش
- بلوجر خنق عليا فيه -
اما لتاج فربنا يكرمك ويسعدك انتي كمان
وبخصوص الوحش ادعي كمان اني اتجرأ واروح اتعرف عليه واكلمه
اصل ايه الفايدة الناس كلها تعرف اعجابي بيه وهو لاء
ساعها هكتب قصيدة طويلة اسمها
(وقال الوحش الأحمر )
بس يارب مايعصلجش معايا
لأني في الحاجات الحساسة دي مش بحب اتحرج
حتى لو اللي هيحرجني الزحش اللي بقاله اسبوع ومش عايز يخرج من دماغي لدرجة اني كتبتله مخصوص
ايه دةانا اتكلمت كتير قوي سرسبتيني انتي يا ضي في الكلام
سلاموز بقي ويارب تكوني بخير وسعادة دايما

الشيشان فخر الأمة said...

فعلا السعادة تتحقق إذا تحقق رضا الله عنا...

بوست ربما يدمج قضايا كثيرة...تستحق أن تفرد جميعها فى موضوع خاص للأهمية...

بوركتم

¶¶ღِِAhMeD 3LaMღ¶¶ said...

وحش ولابس احمر
هيه كانت جامده قوي كده ؟هههه
تحياتي يا درش
علي الكلمات الجميله دي
ومتقلئش انا وعدتك بوزارة الثقافه
سلام يا عم الحج
ههه

M.K said...

أخي الفاضل مصطفى..
أدام الله عليك السعاده...
........
وجميل جداما كتبته في وحش أقصد قمر المترو...
لخبطتني بين الاسم ومضمون القصيده ...
بس فكره حلوه...
.......
أحييك على مدونتك الرائعه..
.........
دمت بخير..

تايه في وسط البلد said...

ابو درش
يا اخي الواحد مش عارف ياخد اول تعليق عندك خالص
عامل ايه واخبارك ايه؟
حلوة التدوينة جدا واجاباتك جميلة وان كان يا ابني المترو هيعمل فيك كده بلاشه وانتبه لعقلك!!!ه
هههههههههه

Samar El Menoufi said...

I enjoyed this tadwena gedaaaaan...momte3a

mostafa rayan said...

الشيشان فخر الأمة
جزاكم الله خيرا
ووفقكم لكل الخير

- احمد علام
وانا منتظر
سلام وز يا جميل

- M.K
ربنا يكرمك ويوفقك لكل الخير


- تايه في وسط البلد
حبيبي المهم انك بتجي ومش بتحرمنا منك
ربنا يوفقك يا جميل دايما

- سمر المنوفي
وانا مستمتع اكتر بوجودك
ربنا يوفقك يا سمر