Monday, November 3, 2008

انهم يتحرشون بفوزي ... دعوة للحب

في الفترة الأخيرة اصبحت كثير من المدونات النسائية تشن حربا شعواء على الرجل وتصفه بصفات اقل ما يقال عنها انها بذيئة اصبح لا هم لهم سوي الحديث عن التحرش والمعاكسات وكأن هم الرجال فقط عندما ينزلون للشارع ان ( يخلعو ملابس النساء )
وبما إني شاب قاهري كثيرا ما انزل وسط البلد – موقع الأحداث - فأنني اقول وبضميرمستريح انني لا اري هذه التحرشات بل إن ما اراه هو العكس .. العكس على كافة المستويات .. فعندما اركب المترو اجد رجالا في الخمسين يقومون من امكانهم ليجلسو فتيات في سن ابنائهم لا يتعدون الثانية او الثالثة و العشرين واجد شبابا يقومون من اماكنهم ليجلسو النساء واجد نساءا في الثلاثين والاربعين يقفون على المحطة وصحتهم زي الحصان إلا انهم اول ما يصعدون للمترو يصابو بكل امراض الدنيا لكي يقوم لهم رجل ويجلسهم بل انهم يتعمدون ألا يركبون عربية النساء لأنهم يعرفون جيدا ان المرأة لا تقم للمرأة حتى لو كانت في سن جدتها وليس امها على عكس الرجل الذي يقوم عن طيب خاطر رغم انه في كثيرمن الأحيان عندما عندما تنزل المرأة تنادي على فتاة اخري لتجلس لأنها على ما يبدو تظن ان كرسي المترو قد ورثه لها السيد الوالد رحمه الله ولا تبد اي اهتمام بذلك الشاب الذي قام لها
انا شخصيا قمت احد المرات لمرأة وبدل من ان تجلس اجلست ابنها الذي لا يتعدي العاشرة – كان عيل متدلع بشكل ينرفز– كنت اريد ان اطبق في رقبتها ولكني اكتفيت ان انظر لها شذرا ثم ذهبت لمكان اخر فلم استطع ان اظل واقفا بجوارها
- اريد ان اقول وبلا تحيز ان النساء الأن يتحرشون بالرجال .. لا تستغربو ولكن عندما تري فتاة – مزة جامدة – ترتدي بدي كت ستومك مفتوح من عند الصدر وبنطلون جينز ضيق أليس هذا تحرشا بالرجل .. عندما تنزل التحرير وتجد رجال ونساء في اوضاع يعاقب عليها القانون في الحديقة التي تقع امام مسجد عمر مكرم والمجمع إليس هذا تحرشا بالرجل .. عندما تفتح قنوات الأغاني او حتى التلفزيون المصري وتجد نساءا يرتدون ملابس قصيرة ومفتوحة ويهزون مؤخراتهم وصدورهم كما فتيات الليل أليس هذا تحرشا بالرجل والغريب ان جمعيات حروق المرأة لم تفكر يوما ان تناقش هذه القضية - صورة المرأة في اغاني الفديو كليب – لم يفكرو ان يهاجمو ايناس الدغيدي التي لا ترى في المرأة سوى مجرد جسد فقط كل من يهاجم ايناس هم الرجال ولكن المرأة لا تذكر ذلك
- المضحك ان كثير من النساء يقولون ان الرجال يتحرشون بالمحجبات والمنتقبات ويصفوهم بأنهم كلاب وحيوانات وما شابه ولكن السؤال هل ما نراه في الشارع يعد حجابا ونقابا حقا ؟ هل الفتاة التي ترتدي بدي وبنطلون جينز ضيق وتضع ( فول ميكب ) وتضع على رأسها كولكشن – طرح ليس بينهم اي تناسق – هل هذا يعد حجابا ؟
هل هذا الحجاب الشرعي الذي امر الشرع به ؟
هل المرأة التي ترتدي عباية ضيقة جدا وتعمل في عينها كل انواع (البدع ) هل هذا هو النقاب ؟
الرجل مهما كان متبجحا لن يعاكس ابدا امراة محترمة .. انا لم اجد فتاة ترتدي حجاب محترم او نقاب شرعي وشخص عاكسها
لا انكر انه في بعض الأحيات تتعرض النساء للمعاكسات ولكنها لا تتعدي جملة او كلمة
او يمشي ورأها اما بخصوص موضوع التحرش فهذا الأمر لم يحدث إلا في العيد وما فعله هم مجموعة من الشباب – اللي غالبا بيكون محششين ليلة العيد ولا يكونو في كامل وعيهم – ومعروف ان اي حد بيخاف على اولاده – رجالا ونساء – لا يسمح لهم بالنزول مفردهم في العيد
ما اريد ان اقوله اننا بلاش نكبر المواضيع ونعطيها قدر اكبر من قدرها لأن الشباب المصري مازال بخير ومازالت الشهامة موجودة في كثير من الرجال .. بل في معظمهم

- امر اخر والشئ بالشئ يذكر انتشرت في الفترة الأخيرة على مدونات بعض الفتيات كثير من الكلمات التي لا تصح عن الرجال مثل ان الرجالة ماتو في 73 وان الرجالة راحو في الوبا ... هذه الكلمات تدل على عدم احترام للرجل وبالتالي عدم احترامه للمرأة التي
لا تحترمه .. فإذا كانت الرجالة كلها ماتت في الحرب وراحت في الوبا هل معني كدة ان المجتمع كله قلب لحريم وبقينا كلنا مغطين رأسنا ؟
واذا كان كدة ليه الستات مستعجلين على الجواز وبيشكو من العنوسة وان الرجالة مش عايزين يتجوزو ؟
ولما ست تتجوز وهي من جواها غير مرحبة بالأمر فقط من اجل اشباع غريزة الأمومة
هو مش دة يعتبر اكبر ظلم للراجل اللي سوء حظه وقعه فيها ؟ مش دة يعتبر بردو ظلم لنفسها ولعيالها لأن الحياة هتبقي سواد لأنها من جواها مش مقتنعة بالموضوع كله
- كمان واحدة كانت عمالة تتريق وتقول ان الراجل بيدلدل ودانه وهو بيكلم الصيدلي
ما اريد ان اقوله ان المقويات الجنسية ليست عيبا على الأطلاق والرجل عندما يشتريها
لا يوشوش الصيدلي بل يطلبها كأي دواء عادي فهي يصنع لها اعلانات في الجرائد والفضائيات وتضع الصيدليات اعلانتها كأي دواء عادي اخر
اريد ان اقول ايضا ان العلاج من الضعف الجنسي ليس عيبا على الأطلاق وعيادة طبيب الأمراض التناسلية ليست شيئا يكسف او يحرج فالرجل يفعل ذلك ليمتع نفسه ومن معه حتى لا تكشر في وجهه بنظرة ترفع الضغط وتجيب المرض .. يعني المفروض الراجل يشكر مش نتريق عليه
الغريب أن الذي يقول هذه الأشياء فتيات متعلمات مثقفات يتعاملون مع التكنولوجيا يعني المفروض طريقة تفكيرهم تكون احسن من كدة لكن للأسف كل ما بنتقدم في التكنولوجيا بنتأخر في التفكير والتعامل .. اشعر في احيان كثيرة ان جدتي تلك المرأةالريفية التى لا تقرا ولا تكتب افضل من هؤلاء الفتيات كانت نعم المعين لزوجها كان عندما يعود من العمل تضع له قدمه في المياه الساخنة وعندما توفي وكانت لم تكمل عامها السابع والعشرين رفضت الزواج وربت ابنيها – ابي وعمي – حتى وصلت بهم لبر الأمان
اذكر ان جدتي الأخرى – ام والدتي – عندما كنا نتجمع في البيت القديم – في الدرب الأحمر قبل ان يهد في الزلازل – كانت تقول لبناتها ان يضعن طبق اللحم الكبير وصينية الثريد الكبيرة امام الرجال كانت تقول لهم – خلي الرجالة تاكل –
كانت تعيش مع جدي في بيت اهله مع خمسة اخوات نساء واخين رجال والأم وكانت تعمل في البيت بمنتهي الحب فهي تخدم اهل زوجها لأنها تحب زوجها وتحب اهله وخدمتهم من خدمته .. هل رأيتم كيف كان احترام المرأة للرجل ولذلك لم نكن نسمع عن طلاق مبكر ولا مشاكل من التي نسمع عنها الأن .. بل ان المرأة في القديم كانت تنصح ابنتها : كوني له امة يكن لك عبدا – ولذلك عاش معها زوجها عشرين عاما لم يحدث بينهم اي خلاف إلا مرة واحدة وكان هو المخطىء فيها –
مااريد ان اقوله ان العلاقة بين الرجل والمرأة علاقة حب وتفاهم علاقة تقاطع وليس توازي .. فالرجل ليس له إلا المرأةى ولا يستطيع ان يعيش بدونها وكذلك المرأة ليس لها إلا الرجل ولا تستطيع ان تعيش بدونه فبدلا من ان ننصب الحرب والعداء لبعضنا البعض تعالو بنا نمد ايدينا للطرف الأخر لتكن العلاقة علاقة حب وود واحترام وعطف واحتواء
فليس لنا إلا بعضنا
واخيرا : اعرف اني اطلت ولكن الموضوع يستحق
لكم مني كل الحب والود

24 comments:

mahasen saber said...

ايه يا درش ده انتا على الاخر منالستات هو فيه فى كلامك وجهات نظر سليمه زى صورة المراه فى الكليبات وغيرها بس برضه فيه تحرش بالستات وظاهره واضحه وضوح شمس اغسطس
..
بس لا الرجاله فى المجمل وحشين ولاا الستات فى الغالب صح احنا فى الاخر بشر
...........
المهم بئه امبارح اول ما دخلت النت فتحت الايميل والمدونه وبعتلك رد على الايميل بالمعلومات اليى عايزها وصلك لانى لقيته مبعوتلى تانى فبعته على الايميلين النهارده تانى بس يا مصطفى هو ايميلاتك فيها سباس مسافه بعد الرقم ولاا ايه
لو سمحت ويا ريت لو وصلوك تطمنى وتقولى
........
وربنا يوفقك

mostafa rayan said...

محاسن صابر
طبعا لا كل الرجالو وحسين ولا كل الستات وحشين ودة اللي عايز اقوله
__________
بخصوص الإيميل لم يصل اي ايميل على الأيميلن والأيميل مافهوش سباس
بس انا بعتلك ايميل من على الجي ميل يارب يكون وصلك

- ربنا يكرمك يا محاسن وييسر لك كل الخير

عايش علي الهامش said...

ياراجل انا اضطريت اشيل الويب بلوك علشان اعرف اقرا كل الوصف الدقيق الي انت وصفه للبنات ده ....بهزر طبعا
بس ايه ده عرفت منين الاستوماك والكولكشت والفول ميك اب لا لا انت واصل الباشا مباحث
مشكلة البنات انهن صرن يتحدثن واضح انهم قرروا يشتغلوا في السياسه زمان في واحد حكيم قال النساء اكثر حكمه من الرجل لانهن لا يتحدثن وتركن هموم الدول لرجال فان تحدثن فكلمتهن مسموعه وفعلهن كفعل السحر .... وطبعا احسن مثل لده ستات الصعيد زمان عندنا
اما دلوقتي فمرحب بيهم في الاتوبيس اتوبيس الكلام ابن عم الحديث
بس اموت واعرف مين فوزي ده الي هن يتحرشن به
اما من جهة ارائك الي بدات تعترض علي المراه فانا عاوزك من دلوقتي تعمل مدونة عانسون للابد لان انت وانا وكل ولد رد هيتحط في البلاك لست

بس الصراحه انا معاك في كلام كثير من الي انت بتقوله كل واحده عاوزه تلبس الي هي عوزاه والاولاد يحترموا نفسهم وتقول حريه انا معاهم ان المفروض اننا فعلا نلم نفسنا مهما كانت الظروف فالثواب علي قدر المشقه ولا ايه
بس احنا برضه ممكن نعمل حملة ونلبس الاولاد تيشرتات بنشات وبنطلونات سترتش وبارفان بلاي بوي وسلملي علي البطاطا بس ياتري هنعرف نفرق بينا وبينهم بعدها

اما ما يحدث في الحدائق فمتلمهومش لوحدهم متنساش يا درش نحن نحمل نصف الذنب ايضا
انا من هنا بقدم دعوه ان الرجاله كلهم ينقلبوا طه حسين بقدرة قادر واه كله بثوابه
ونقول الحمد لله الذي جعلنا عميان حتي لانري حريتكن

وعلشان الهدنه البنات ملائكه جيدون جدا ولكن فقط اذا عادوا الي الفطره مع العلم ان مؤمن ببعض حقوقهن التي اقرها الاسلام طبعا كلها
لكن هناك بعض الحقوق انا ارفضها كطلبهن تربية الشنبات اقصد ... انا كنت عاوز اقول ايه سيبك

اه متزعلش من كلمة الرجاله بتوع 73 لانهم مع احترامي كانوا فعلا جيل من الرجال لن يعوض مهما كان لانه جيل مختلف ولن يتكرر الا عندما نوضع في ازمه مماثله تلك عادة المصريين

اما الوبا فانا مسمعتش عن رجاله كلها الوبا لا انا سمعت ان هنادي بس الي كلها الوبي والسير القديمه من طراز سيرة الهلالي كان في سيرة عاشور الناجي الوحيد الي نجامن الوبا يعني متخفش الوبا راجل والراجل ميجيش علي الولايه الي زيه
طب بقلك ايه نا هستأذن لحسن الوبا الخاين بدا ياكلني اه و....... م

mostafa rayan said...

- عايش على الهامش
حبيب قلبي والله العظيم انت زي العسل
ربنا يوفقك يا جميل ويسترها عليك وعليا

حازم سويلم said...

متفق معك يا درش فى اغلب ما سطرته هنا, واوافقك القول بأن بعض بنات حواء ينزلون الشارع والعمل والنادى من اجل التحرش بالرجال, وان لم يكن بطريقة مباشرة فعن طريق الملبس او نظرة عين او عطر فواح
ـ ـ ـ ـ ـ
تظل العلاقة بين الرجل والمرأة تحمب بداخلها بعض الغموض, وتعانى من الألتباس وسوء الفهم المتبادل والقهر المتبادل بينهم.. مادمنا نحيا فى مجتمعات كالخرفان وتجكمنا قوانيين القطيع

تحياتى

كاميليا said...

أحييك على استمرارك فى مناقشة قضايا هامة جداً .. وتوضيح وجهات نظرك ووجهات نظر الآخرين ..

كل الود مصطفى

Hannoda said...

كلامك فيه من الصح في وجهة نظري الكثيييييير


لكن المشكلة انت كمان وقعت فيها و هي بقت زي مصيدة غريبة كلنا عمالين نقع فيها

وهي الهجوم على الآخر و كإنه هو السبب في المشكلة

الست تهاجم الراجل و تركبه كل الذنوب
و العكس صحيح

ليه بس بنختصر المشكلة كلها فراجل و ست
الموضوع ده كبير قوي و حايطول
ماشي؟؟
الحكاية كلها هي انحدار الأخلاقيات
شوف في الجامعة ايه اللي بيحصل من الشباب بشكل عام.. لازم نخلي نظرتنا على الكل مش بنات في جانب وولاد في جانب منفصل

شرب و مخدرات عادي جدا
لبس ملفت و مبالغ فيه
ارتباط بين الاتنين في سن مالوش علاقة بالارتباط و المسؤولية وواصل لحدود و قوانين هم اللي حاطوها و حطولها منطق و فلسفة اقتنعوا بيها حتى اولياء أمورهم اللي المفروض انهم كبار و عاقلين

ده غير ان الجنس بقى مباح فعلا زي ما قلت
انا فاكرة أيام ماكان ماعندناش غير القناة الاولي و التانية.. كانت أفلام عبد الحليم و شادية و سعاد حسني و رشدي أباظة

كنا بنتكسف نتفرج عليها قدام بابا وكنا نقوم نشرب مية أو ندخل الحمام ييجي أربع خمس مرات خلال الفيلم منعا للإحراج من مشاهد كنا بنقول عليها قبيحة جدددا

دلوقت الافلام ده عادي جدا و بنضحك لما بنفتكر تصرفاتنا زمان
وده مش لإن المشاهد كانت عادية و إحنا اللي كنا مبالغين

لكن عشان بقينا بنشوف اللي ألعن منها في الكليبات و الافلام الجديدة و حتى في الشوارع زي ما قلت

فبقى الجنس عادي الكلام عنه و الفرجة عليه.. و بقى احمرار الوش وانخفاض العين موضة قديمة و منظر يضحك

الكدب على الاهل بقى حاجة بديهية
و قفش البنت المرتبة مابقتش كارثة أسرية

ده تدرج عادي جدا
احنا بتسيبنا خلقنا عادات و تصرفات بينا احنا نفسنا اللي رافضينها

راجعة أكمل بس لاااااااااازم
امشي دلوقت


سامحني على الاطالة الف\ظيعة بس زي ما قلتلك

الموضوع كبيييير

صبرني يارب said...

شوف يا مصطفى بجد بجد انت عايز بوست اكبر من بتاعك عشان ارد عليك

التحرش مش ان واحده تمشي لابسه ضيق ولا مكشوف
لما تبقى واحده من البنات دول تمد ايدها عليك او حاجه تانيه ده يبقىاسمه تحرش

ومليون مره اقول امرنا جميعا كمسلمين نساءا ورجالا
اللبس الشرعي وغض البصر
كل واحد ينفذ الى عليه من غير ما يقول للطرف التاني ساعدني من فضلك

يعنى غض البصر يا مصطفى مش معناه انك تغض عن الى لابسه محترم بس عن كل الستات ياابنى والله

والتلفزيون له زرار وفيه قنوات والله العظيم وانت بكامل اردتك بتجيبه وتتفرج

وحضرتك لما تقول ان المحترمات مش بيتعاكسوا ده لان يمكن والله ا علم برضه مش بتعاكس المحترمات
انما حضرتك اسأل اي واحده ست محترمه ولابسه لبس شرعي فعلا ان كانت بتتعاكس ولا لا
انا على فكره لما رجعت من بره كنت فاكره انا لمعاكسه فىا لشوارع دي بقى موضه قديمه بقى وخلصت
بعدين اكتشفت بعد كده ان الهبل ما زال مستمر

وساعات بابقى عايزه اقول لاي اهبل بيقولي كلمه فى الشارع يا ابني اقعد فى جنب انت من دور اولادي

لكن هو اصلا مش بيفرق ولا الموضوع يفرق معاه
وقبل ما دماغك تروح يمينا ويسارا
ولله الحمد بالبس عبايات محترمه جدا ولا ضيقه ولا بتلمع ولا ملفته ولا طرح كتير ولا الوان ولا فول ميك اب ولا بتنجان

القصد اقولك ان السافل مش محتاج اسباب لسفااالته
التبرير التبرير التبرير
بتبرر الغلط ليه
انا مش باقول ان الرجال كلهم ذئاب بشريه
ابدا لكن كمان مش الستات يشيلوا مصايب سفالات الناس

يعنى لو ولد ماشي يا مصطفى على الشط وطالع بمايوه كات ولبس غير شرعي والستات اغتصبوه على الشط يبقى هما معذورين ؟
هههههههههههههههههههههههههههه
خصوصا انت انت بتقول اهو ان فى نقص فى الجواز

وبعدين على فكره البنات مش بيقولوا ان الرجاله ماتوا فى الحرب من قليل
ماهو مافيش رجاله يا ابنى
وهما يعنى عنسوا من ايه ؟؟؟
قال ابوك مات من الجوع قال يعنى كان لقي اكل ولا كالش ؟؟؟
هما كانوا لقوا رجاله يتجوزوهم وقالوا لا ؟؟؟

اما بالنسبه للمقويات الجنسيه فهى فعلا زي ما انت بتقول تعتبر علاج ماشي والمفروض انها مش عيب ماشي لكن ده لما تكون بنتعامل معاها صح
مش هبل من الى بيحصل في السوق حواليها
وكمان ياريت نكون صرحاء بيشتريها عشان يتمع نفسه اه
عشان يثبت لنفسه فحولته اه
انما عشان مراته بتكشرله ؟؟!!!!
حضرتك مش من المجتمع بتاعنا ولا ايه ؟؟؟
90% من الستات فى السن فى مجتمعنا بيرفضوا العلاقه الجنسيه تقريبا لاسباب كتير مش مجالها دلوقتي

وحكاية جدي وجدتك
خليك انت كمان زي جدك وانت تلاقي واحده زي جدتك
تحياتي لك يا مصطفى
يااااااا تاعبنى هههههههههههههههههههههههههه

mostafa rayan said...

- اخي حازم سويلم
اتفق معك في الرأي ولكن المشكلة اننا بنطبق القوانين دي على نفسنا ومش عايزين نتخلص منها
نورتني يا حازم ويلا ياعم بقي نزل الشغل الجديد

- كامليا
يا ايه الريحة العطرة اللي انا شاممها في المدونة دي
نورتنيني واسعدتيني يا كامليا زي عادتك دايما

- هنودا
اتفق معك في كلماتك كلها ومنتظر العودة
دمت بكل الخير والسعادة

- صبرني يارب

تعالي نتناقش بهدوء
انا معاكي ان التحرش موجود بس مش ظاهرة حالات فردية الراجل لما بينزل بيكون في دماغه مليون حاجة غير حوار التحرش دة
معاكي كمان ان غض البصر للجنسين وان بأيدينا نختار القناة او نحولها
- بالنسبة للمعاكسة
انا عايز اقولك بس ان انا شخصيا عمري ماعاكست اي بنت حتى ايام المراهقة لأني بحترم نفسي جدا وماقبلش على نفسي ابدا ان اي واحدة ست مهما كانت تبصلي بصة وحشة او تقولي كلمة ماتعجبنيش لمجرد اني عاكستها لأن في الأول والأخر انا راجل وهي ست
فبلاش تقولي اني مش بعاكس المحترمات
- كمان انا دماغي مارحتش لبعيد ولا حاجة وانا من خلال كلامك توقعت ان ملابس حضرتك محترمة ومحتشمة
- كمان معاكي ان مش كل الرجالة ذئاب بشرية في رجالةوستات زي الفل
واذا كان الأمر كدة يبقي بلاش الستات تقول الرجالة راحو في الوبا والكلام دة ماهو اذا كنتي اصلا مش مقتنعة بوجودي خلاص خليني بعيد عنك وبلاشه جواز بس ماتجيش تقولي عنوسة بقي والكلام دة
بلاش تخوفيني منك قبل ما جيلك من الأصل
ياريت تكوني فهماني
اما المقويات الجنسية انا معاكي ان فيها فوضي
لكن الرجل بياخدها علشان نفسه وكمان علشان مراته انتي لو كنتي راجل كنتي اكيد حسيتي بمدي الجرح اللي بيحس بيه الراجل لما يلاقي في عيون مراته نظرة غضب نتيجة ضعفه في اللقاء النظرة دي مش بتجرحه بتتدبحه واكم من ستات اطلاقوا او مشيو في الغلط بسبب ضعف ازواجهم ودة شيئ ماحدش ينكره
اما ان 90% من الستات بيهربو من العلاقة فانا مش عارف النسبة الضخمة دي انتي حصلتي عليها منين لكن معاكي ان الست ممكن تهرب من العلاقة بسبب عدم تقبلها النفسي والأجتماعي للرجل لكن في العادي الست بتكون راغبة في العلاقة زيها زي الرجل وبتشعر بالضيق عندما يفشل الرجل تماما مثلما يشعر الرجل بالضيق عندما يشعر ان زوجته مصابة بالبرود .. الفرق ان الرجل يمكن ان يعبر عن غضبه هذا اما المرأة فهي تكتم في داخلها وتصمت على امل ان الوضع يمكن ان يتحسن في المرات القادمة
يا صبرني زي ما قولتلك كلنا بشر وكلنا محتاجين لبعض والبوست اسمه دعوة للحب واننا نقرب من بعض وبلاش نجرح بعض لأن لسة في رجالة وستات زي الفل
لا الرجالة كلهم راحو في الوبا ولا اخر الستات المحترمات كانت الست امينة رحمها الله
يارب تكوني فهمتي وجهة نظري
تحياتي لك ودمت بخير

mohamed ghalia said...

أخى العزيز
كل حاجة فيها الكويس والوحش
فى بنات فعلا لبسها ملفت بشده
واحنا بطبيعتنا الرجال نميل بشهوتنا
وعلى الوجه الأخر هناك شباب ورجال يتحرشون ولو بكلمات تضايق
حقيقى اخى الكل مخطأ من تلك الفئة الشباب والفتيات والكل يتحمل ليس جنس بعينه هو من يتحمل مايحدث
تحياتى
لك موضوع رائع

مصطفي ريان said...

محمد غالية
اتقف معك في رأيك وهذا ما اردت ان اقوله من خلال البوست
لك مني كل التحية والود

محمد ابراهيم said...

يا مصطفي
انت بتكلم مين ؟
الي بيشتموا في الرجل دول تنابلة السلطان بجد
و لا تاخد بالك منهم في اي حاجة
واحدة منهم اسلوبها استفزني بجد
لما رديت عليها بنفس اسلوبها قالتلي انت متناقض
هي ممكن تكون عندها تفكير محترم و كيس
بس في الحتة دي افورت بجد
لا و ايه
الراجل يشك برجولته عشان بيقول انا راجل
بلا خيبة .

تحياتي
محمد

safaa galal said...

لا يا مصطفى اسمحلى .. انت متجنى شويه فى رايك دة ... ايوة لما بركب المترو فيه شباب بتقوم وتقعدنى انا منكرتش دة ... لكن كمان انت متنكرش انه فيه شباب اخلاقهم زى الزفت ... كمان مش كل البنات والستات (بيتحرشو ) بالرجاله زى ما انت بتقول ... معاك ان فيه لبس مستفززز جدااا ... بس برضه مش كل الحريم من نفس الصنف ... كمان على اللبس والمكياج انا ولا بلبس ضيق ولا قصير لكن برضه بسمع كلام ملوش اى لازمه خااالص ومن عيال أنا اخلفهم ... بالنسبه للأدويه أو خلافه ف دى مش من حق اى واحدة او واحد انهم يتكلمو عليها ... دة شئ خاص جدا بأصحابه ومش من حق اى حد أنه يستعرضه بالشكل دة ولا على المدونات ولا حتى بينهم وبين بعض ... دى حرمات ناس الكلام عنها ميكونش بالشكل دة ... وبعدين برضه يا درش الخدمه فى البيت مش عيب ولا حرام ... كلنا بنخدم فى بيوتنا يا سيدى ودى متعتبرش خدامه يعنى والا كان الراجل اللى بيخرج ويشتغل عشان يفتح بيت يبقى هو كمان عبد ... طولت عليك خالص بس طبعا البيت بيتى
( وخصوصا بعد ما بقيت مشردة حاليا وبيتى راح فى الردم ) بس الغرض أننا بلاش عشان ندافع عن وجهه نظرنا نهاجم وجهه النظر التانيه ... تحياتى وسلامى ليك يا مبدع

ن said...

السلام عليكم ورحمة من الله وبركاته
تحياتى إلى كل المدونين الجادين وأتمنى أن يشاركونا الرأى والأجتهادات للخروج من تخبط الأراء التى كثرت عن الدين ودرء الشبهات التى تلصق الى الأسلام بتصيد بعض الأخطاء التى الصقت ببعض المفاهيم ..وعبر هذه المدونة علينا أن نبحث فى مصداقية الروايات السابقة وتخير الأجتهادات الحالية بما يخدم الأسلام وقضاياه .
مع خالص تحياتى
أمل فتحى عزت

مصطفي ريان said...

صفاء جلال
يا صديقتي العزيزة انا مش متجني ولا حاجة كل اللي عايز اقوله ان زي مافيه الوحش فيه الحلو كمان
وفي رجالة وستات زي الفل ودة شيئ ماحدش يقدر ينكره
وبعدين يا ستي طولي زي مانتي عايزة
البيت بيتك يا صفاء
دمت بكل خير يا صديقتي العزيزة

-أمل فتحى عزت
مبروك المدونة وان شاء الله هجي وازورها

مصطفي ريان said...

محمد ابراهيم
عارف ساعات بحس ان اللي بيشتمو الرجالة عمال على بطال دول بيكون لأسباب شخصية
لأن واحدة متجوزة ومخلفة عيال وسعيدة مع جوزها هتشتم الرجالة ليه
نورتني يا جميل ودمت بكل الخير

mohamed ghalia said...

ها مش ناوى تجاوب التاج ولا ايه؟

مصطفي ريان said...

اخي العزيز محمد غالية
ان شاء الله سوف اجب على التاج ولكن كما اخبرتك في البوست بعد القادم
ارجو يا اخي ان تكون متفهما لوجهة نظري
واخيرا لك مني كل التقدير والأحترام

المـــفـــــــقــــــــوعـــــة مــرارتـهــا said...

انا معاك في موضوع المترو

عربية الرجالة احسن الف مرة من عربية الستات
عارف يامصطفي وانا كنت حامل جوزي صمم انه يركبني وحدي في عربية الستات وكنت في آخر شهور الحمل علي اساس ان الستات هاتحس بتعبي وحد منهم هايقعدني
ولكن اللي حصل اني فضلت واقفة بس بعد كدة بقيت اعيط لجوزي عشان يسيبني اركب عربية الرجالة لأن الستات ماعندهاش زوق
دي الصراحة فلتسقط عربية الستات
تاني حاجة يامصطفي مش كل الشباب متحرشين واللي يقول غير كدة يبقي بيبالغ بس اللي بيعاكسوا هما نوعية الشباب العشوائيين الجاهلين
الست مش بتزعل من المعاكسات غير لما تكون بتتعدي حدود الأدب
انا من يومين كنت ماشية في الشارع وطفلين لم يتعدا العشر سنين عاكسوني وبطريقة مستفزة جدا كنت هااقف اقول لهم يعني ترضي لمامتك تتعاكس كدة والمهم انهم كانوا بينادوني ببت تعالي هنا يابت
التحرش موجود يامصطفي بس انا افضل اقول عليه معاكسات
بس انا معاك ان السبب في قلة الادب دي الافلام والفيديو كليبات والمخدرات بعد كد

EmY said...

معلش اسمحلي اطول انا كمان في التعليق

نسبة التحرشات و الاغتصابات و المعاكسات زادت بشكل ملحوظ و نسبة الرجوله و الشهامه و الجدعنه قلت بشكل ملحوظ يعني انا شخصيآ نادرآ لما بقابل راجل محترم او شاب محترم المعظم مافيش اخلاق عنده

الملابس مش مبرر للتحرش و الاغتصاب و مش معني كلامي ان البنت تنزل بالبكيني بس بردو مانعملش اللبس شماعه لان حتي لو هي لابسه مش من حقه التحرش بيها ولا ده سبب ولا مبرر يخلي الي عمله ده مش غلط

هو الراجل قبل ما يعاكس بيعرف منين الست دي محترمه ولا لاء
اللبس مش مقياس احترام و في رجاله مش بيفرق معاهم لا لبس ولا حاجه اي مؤنث يبقي يتعاكس و خلاص

تحياتي

Rania said...

اخى العزيز
يجب ان نجتنب التعميم فى هذه الحالات
فى بدايه حديثك تهكمت على بعض المدونات الانثويه التى تشن حربا على الرجل و تقول عنه متحرشا
و ها انت فى موضوعك تشن حربا على الانثى و تدافع عن الرجل
و انت حقا تعلم ان التعميم هنا يعتبر خطا لان المتحرشين امر واقع يوجد الكثير منهم كما يوجد الرجال المحترمين
و النساء بعضهم متبرجات كما يقولون و بعضهم منتقبات و محجبات
فلا يحجب التعميم ان كل النساء المحجبات ليسوا محجبات فقط لانهم يرتدون طرحا ملونه ليس لها علاقه ببعض
او انها تضع فول ميكب كما ذكرت
هل يعتبر هذا مبرر للتحرش بانثى صديقى العزيز|؟
هل كل " كل " الرجال لا يتحرشون ابدا بالمراه المحترمه
هل جذمت و انت جالس امام جهازك
ان كل الضاحيا لهذا النوه من الرجال ليسوا محترمات
هل اذا نزلت اختك من بيتك و مشت فى طريقها و اذا برجل مريض نفسى تحرش بها
اذا فهى تستحق ما حدث
هل دائما نلقى اللوم على الانثى اخى العزيز
انا لست ادافع عنها ولست ادافع عن الرل ايضا
و لكننى فقط ارفض التعميم

تحياتى

mostafarayan said...

المفقوعة مرارتها
وانا بالطبع اتفق معك وهذا ما اردت ان اقوله مش كل الرجالةولا كل الستات وحشين لسة في ناس كتير رجالة وستات زي الفل
تحياتي لك ودمت بخير

- ايمي
انا اتفق معاكي ان التحرش موجود وفي رجالة وحشين وان لبس الست مش مبرر
بس مش معني كدة كله وحش لاء في رجالة كتير جدا حلوين قوي وزي الفل من اللي انا بشوفه اسمحيلي لاء المعظم كويس بس لأن الوحش هوالظاهر فحنابنقول كله وحش لآء صدقيني المعظم حلو
تحياتي لك ودمت بخير

- رانيا
صديقتي الغالية
انا لا اشن حربا على احد والبوست اسمه دعوة للحب
وانا ارفض التعميم ولبس المرأة ليس مبررا للتحرش ولا المعاكسة لأن اللي بيحترم بيحترم نفسه سواء راجل او ست
وهذا ما اردت ان اقوله ان التعميم مرفوض لا كل الرجالو وحشين ولا كل الستات وحشين بش ياريت الستات اللي بتشن الحرب دي تعرف كدة
ارجوان تكوني متفهمة لوجهة نظري
تحياتي لك ودمت بخير

سارة نجاتى said...

هاى
بص يا مصطفى

أولا : تقارير المنظمات بتاعت الحكومة نفسها بتعترف بزيادة نسبة التحرش بشكل يومى تصل الى 80 % , فأنك مش بتشوف ده , مش معناه أن الاحصاءات الكتيرة دى من منظمات دولية , و محلية و حكومية بتألف أو بتبالغ


ثانيا : أنت عارف أول حاجة بيحذروا من السائحات فى مصر ايه ؟ التحرش , كان زمان بنشتكى من سرقة السياح دلوقتى بيحفظوهم جمل يعرفوا بيها المتحرش

ثالثا : صاحبتى حصل لها محاولة تحرش و هى فى اعدادى و هى ترتدى الخمار من اعدادى برده , و محاولة التحرش أثرت هليها نفسيا بشكل سيىء جدا , لأنها لو كانت واقفة بترقص فى الشارع مكنش المفروض يحصلها ده .

رابعا : الولاد عمالين يقولوا لبس البنات , تلات أرباع بنات مصر محجبات , حتى اكتر من دول الشام , و نص المحجبات ما بين مختمرات و منتقبات ,عاوزين ايه تانى ؟ , و بعدين هو لما كانت أمهاتنا و جداتنا فى الخمسينات و الستينات بيلبسوا مينى جيب , كان حد بيعمل معاهم كل ده ؟؟ ,أول يقولهم حرام عليكوا مش قادرين , مع ان دولا كانوا ستات , و دولا برده كان رجاله و ليهم شهوة و البنات اللى بيلبسوا الملابس اللى بالوصف اللى أنت قلتوا ده محدودين جدا , يعنى انت عد فى الشارع كام واحدة محجبة و كام واحدة مختمرة و كام واحدة مش محجبة بس محترمة و كام واحدة كاشفة صدرها .

خامسا : كل حالات التحرش اللى حصلت فى العيدين اللى فاتوا و اللى قبلهم كانت بمحجبات , و منهم واحدة فى وسط البلد منقبة قلعوها النفاب من عليها .

سادسا : الملبس ده حرية شخصية , تحرش بالرجل ده لما تيجى و تشده من صدره , أو تصفعه على مؤخرته , أو تحسس على ظهره , أو تقلعوا هدومه فى الشارع ,أو حتى تقولوا كلمة خارجة ذات ايحاءات جنسية , و بعدين ربنا أمر بغض البصر عشان الحالات اللى زى دى , و لا احنا نعمل كبنات اللى ربنا قالنا عليه و نغطى صيف شتا , و أنتوا مش هاين عليكوا تدوروا وشكوا الناحية التانية .

و صدقنى مفيش حرب و لا حاجة , بس أنا لما ألاقى نفسى مهما أعمل , أرفع من مستوى تعليمى و ثقافتى , و أكون فى بعض الأحيان أكثر كفاءة من ولاد , و فى الأخر ألاقى كتير بيتعاملوا معايا على أنى "بنت " بالمعنى الحسى للكلمة لازم أختنق و أضايق و دول أكتر بكتير مما أنت فاكر , أنت بس مصاحب ناس حلوة .

طبعا أنت دخلت على مدونى و قرأت البوست اللى أؤيد فيه الصراحة فى التعليقات أنا قلت رأييى بصراحة , فاوعى تكون زعلت .
لا فى حرب و لا حاجة انا قابلت ولاد و رجالة أجدع من بنات كتير أعرفهم

سلامى ليك يا باشا و تحياتى

مصطفي ريان said...

سارة نجاتي
طبعا انا فرحان بزيارتك دي قوي
وفرحان انك قابلتي ولاد احسن من بنات كتير
- انتي اتكلمتي في نقط كتير انا عايز اقولك اني ضد التحرش بكل صوره
- بس انتي ذكرتي اللبس طبعا لبس المرأة مش حجة للتحرش بس هل كثير ممن نراه من حجاب في الشارع هل هو حجاب شرعي ولا شيء بيعد عن كونه حجاب بلاش اقول انه لا مؤاخذة (هبل)
كمان انتي قولتي غض البصر بس عايز اقولك انه للطرفين مش الرجالة بس لاء الستات كمان لازم يغضو
الغرض من البوست اني عايزاقول بلاش نعمم مش كل الرجالة ولا كل الستات وحشين في ناس كتير رجالة وستات زي الفل
ارجو انك تكوني متفهم لرأيي
تحياتي لك ودمت بخير