Saturday, January 23, 2010

انا الفارس .. قصيده جديده

اصدقائي الاعزاء
هذه اخر قصيده شعر كتبتها .. في انتظار رأيكم عنها ولكم كل محبتى
************
انا الفارس
وانا الحارس
اللي لعنيكي يتفارس
يروح عمري فدى عمري
ويبقى قليل عليه خالص
ولاجلك انتِ اعدي بحور
وسور ورا سور
واحارب الف سيف مسلول
بشوق قلبى
وعليهم ابقى انا الفايز
واشوف قدامي عيون زرقا
عيون خضرا
عيون قتاله ومشاغبه
وماشوفش غير عنيكي السود
جوه بين حنايا الروح
متمكنه وساكنه
ومعاكِ ابقى طفل وديع
إن تأمريه يلبي يطيع
تقولك عنيه بكلام مسموع
لو كل الناس تبيع حبك انا شاري
وقلبك بيتى وعنوانى
وايدي ممدوده بلا مفارقه
يا بلسم روحي وجروحي
ومستقبل عمرى ومشروعي
انا معاكي نسيت ما كان
وبكره هو موضوعي
وبكره هو ده انتِ
انتِ نوحي وسفينتي
تنجينى من بحور الآه
لشط نجاه
ابنى عليه حلمي
خلاص كشفت كل اوراقي
ومش باقى غير إنك تجاوبيني
قولى الكلمه هديني
وتعالى نسمع كل الناس
إنك عاشقه وبتحبيني
قوليها لاجل الدنيا تدور
والعمر يطول
والعالم العايش في جنون
يشوف بعنيه
إنه مهما يكون ويكون
اكيد الحب في يوم فايز
اكيد الحب في يوم فايز

16 comments:

!!! عارفة ... مش عارف ليه said...

ماشاء الله

أيه كمية التفاؤل دي كلها يا درش

ولكم باك

أيوة كده منور مكانك

بشعر ماشي برباعيات ماشي بقصة ماشي


المهم نشوفك كل يوم :)

mostafa rayan said...

وليد : الله يكرمك يا جميل ومتشكر قوى لكلامك الحلو ده عنى
ان شاء الله البوست الجاي يكون رباعيات ويكون الاهداء ليك يا صديقى العزيز

شمس النهار said...

ياسيدي ياسيدي

ماشي

جميل والله جميل

عجباني بجد
ممكن تنفع اغنيه
:)

سلامي

mostafa rayan said...

شمس النهار
ازيك يا شموسه يا جميله يارب تكونى بخير وفي احسن صحه وحال
فرحان انها عاجبتك ممكن تنفع اغنيه بس هي جت قصيده على العموم يا ستى اكتب اغنيه وانزلها هنا وان شاء الله تعجبك بردو
لك كل التحيه والمحبه يا شموسه يا جميله

donya said...

مساء الخير
كلمات حنونه جميلة

بس مالها العيون البني مالهاش نصيب


حلو الكلام اوي

ربنا معاك


باي

mostafa rayan said...

دنيا
العيون البنى زي الفل
تحياتى لك يا دنيا

أبو حميد said...

حلو قوى الكلام يا فنان
نازلك كتب فى المعرض السنة دى؟

mostafa rayan said...

ابوجميد
الله يكرمك يا جميل
لا مافيش غير مجموعتى القصصيه اعترافات رئيس سابق وان شاء الله ممكن تلاقيها في جناح دار اكتب صاله 3 علوى
وكمان في جناح مؤسسه الاهرام
تحياى لك يا جميل دايما

الشعب لابد له من حكومه تشكمه said...

مع انى معروف عنى انى مش برد على بوستات شعر,لانى مش بعرف اقول ايه.
دا غير انى اخدت موقف من الشعر من زمان:)

بس دا ميمنعش انى بقرا فى صمت وامشى فى هدوء,وبجد كلامك واسلوبك حلو جدااا وعجبتنى اوىىىىىىىىىىىىى البدايه لحد الف سيف مسلول عجبتنى بجد.

على فكره متابعاك من زمان بس فى صمت:)

mostafa rayan said...

الشعب لابد له من حكومه تشكمه
شيما اهلا بيكي بعد طول الصمت
فرحان ان القصيده عاجبتك لدرجه انها غيرت رأيك في التعليق الشعري
ويارب اكتب حاجات احلى واحلى وتعجبك كتر واكتر
لك كل التحيه يا شيما

Tamer Nabil said...

كلمات القصيدة جميلة ياصاحبى

انا قريتها واستمتعت بيها
تسلم عليها

ربنا يوفقك ويكرمك

مع خالص تحياتى

dramaqueen said...

حلوة اوى اوى اوى

بجد جميلة
تسلم ايدك

salwa said...

السلام عليكم اخ مصطفى
تعبير صادق و شفاف
و يا رب السعادة دائما تجاريك بحياتك
سلام

mostafa rayan said...

تامر نبيل
باشا طبعا فرحان ان القصيده عاجبتك
لك كل التحيه والود يا جميل


- دراما كوين
الله يخليكي وبجدفرحان انها عجبتك
لك كل التحيه والود


- سلوى
اهلا بصديقتى البيروتيه الجميله
اشكرك على ثنائك وتقبل الله منك الدعاء
لك كل المحبه والود يا غاليتى الكريمه

تايه في وسط البلد said...

ايوا يا عم كده

ارجع نور تاني وظبط

القصيدة حلوة كتير وختامها قوي

تحياتي يا فنان

mostafa rayan said...

تايه في وسط البلد
اخى وصديقى العزيز كم سعدت المدونه بهذه الزياره
لك كل المحبه والود يا اخى