Wednesday, April 22, 2009

ليه ؟ ! .. اسئلة حائرة تبحث عن حل

ليه اصحابى – المفروض كدة يعني – اللي على الفيس بوك بيخفو وجودهم اول مااضغط عليهم رغم اني مابكونش عايز اتكلم .. عايز بس اشوف مين دة اللي اون لاين

ورغم انهم ضايفني برغبتهم وماحدش ضغط عليهم

2- وليه الراجل جاري ببفضل يبصلي نظرات كلها شك وريبه وهو ماشي وراء بنته ومراته بحولي 60 متر في رمضان علشان الصلاة رغم اني بكون خارج من بيتي عادي جدا ومافيش في دماغي اي شيء غير الصلاة وهما اللي بيعدومن قدامي ورغم كمان ان بنته مش هي الموزة الجامده للدرجة .. وليه هوماريحش نفسه ويريحنا ويمشى جنبهنم مادام هو عامل فيها عم السبع رجالة لدرجة دي

3- وليه امي بتتضايق مني لما اقولها اني انا اللي هختارعروستي بنفسي من غير مساعدات حد رغم ان دي حقي الطبيعي وكلام مافهوش اي شيئ يضايق

4- وليه قريبتي اضايقت مني لما كانت بتقول لاخوها اللي لسة هيكمل 27 بعد شهرين يتجوزصاحبتها اللي كملت 27 من شهرين وانا قلتله لاء ماينفعش لازم مراتك تكون اصغر منك .. رغم ان دة شيء طبيعي وكمان معروف ان اي راجل بيحب الست الصغيرة ودة طبيعة بشرية وشيئ مايزعلش حد

5 – وليه الست بعد الجواز بتقول لجوزها يا بابا ؟ ليه ماتدلعوش وتقوله يا حبيبي

اويا حياتي او اي حاجة من الحلوة دي .. وليه دايما بيكون التبرير اصله نوع من انواع الرحمة بين الازواج .. بصراحة دةكلام خايب قوي ومالوش اي منطق لأنه مش معقوله يعني لوانا اكبر من مراتي بخمس اوست سنين اكون خلفتها مش معقول يعني اكون متجوزها وانا في كجي وان وليه مايكونش الرحمة بالدلع والحنية بدل حوار بابا دة

ملحوظة مهمة لزوجة المستقبل : ( ممنوع منعا باتا تقوليلي يا بابا )

وليه انا بكتب كل الحاجات دي

لو حد يعرف اجابة للاسئلة دي برجاء يقولنا عليها

مع العلم ان دي اسئلة جد جدا .. فمافيش اي داعي للتهريج اوالاستظراف في التعليق لأني بجد نفسي اعرف

24 comments:

ملكة بحجابى said...
This comment has been removed by the author.
ملكة بحجابى said...

انا اول تعليق
هيييييييييييييييه
لولولولىىىىىىى

ايه الحيرة دى كلها يا مصطفى بس .. وبعدين زوجة المستقبل مش هتقولك يابابا الا لو انت بتعاملها بطريقة اوبوية .. روتينيه .. تخنق عليها فتخنقك
هههههه
انما لو مدلعها كدة .. وفى الداخلة والخارجة من غير مناسبة تتلكك عشان تقولها ياروحى ... ووحشتينى يابيبى .. وتدلع المحروسة اسم لتشيف يناسب اسمها .. اكيد هيا هتدلعلك ومش هتقولك يابابا دى .. خاصة البنات بعد مااصابو بحما اغانى الصفيقة هيفاء وهبى بئو ماشين يحبو على نفسهم ويغنو .. تسمحلى أدلعك ؟ خد قلبى منى ماترجعوووش
ههههههههههه
والله انت رايق

رؤية said...

احيانا بنتعامل بحساسية مفرطة مع من حولنا..
واحيانا بنركز معاهم زيادة حبتين فيركزوا معانا تلات حبات..
الخلاصة..
كبر دماغك..
هاتلاقى كل الامور دى اختفت

وما تضايقش نفسك
تحياتى

مصطفي ريان said...

ملكة بحجابى
اميرة منورةالدنيا كلها
بس يا اميرة انا محتار ولا رايق .. حيرتيني بجد
سسيك انت المهم نورةالدنيا كلهات
تحياتي لك

- رؤية
فل هكبر الدي واروق الجي
يمكن يتروح الحيرة دي
منوراني

MǿиY El-Shreef said...

اولا حمدلله ع السلامه

افتقدناك ياراجل

ثانيا بالنسبه لاسألتك

والله يامصطفى الله اعلم حكايه اول استفسار

بس انت عاملهم بالمثل وشوف ايه رد الفعل

ثانيا الراجل جارك لازم تمشي جمبه وعينك تيجي كل بنات الشارع الا بنته عشانمايخدش ف نفسه مقلب بعد كده

ثالثا حكايه يابابا دي تعود لو سبتها تقولك يابابا مش هتبطل

كويس انك نبهت من دلوقتي

وبالنسبه لماما حاول تفهمها انه حقك الطبيعي واكيد مش هتكون حاجه هي مش راضيه عنها

ربنا معاك ف كل دي اسئله ياسيدي

..

:)

إيناس حليم said...

:)
بص يا مصطفى.. الحاجات اللي قلتها دي كلها حسستني انك مكبر الكواضيع اوي او فعلا مركز فيها زيادة عن اللزوم..

بص موضوع الفيسبوك ده ممكن تلاقيله مليون عذر ان الناس مشغولة مثلا في اي حاجة..
وموضوع الراجل اللي خايف على مراته وبنته اكيد ميقصدكش انت بالذات يمكن حركة تلقائية عنده انه يبص حواليه واكيد برده عنده عذره انه ميمشيش جمبهم بالظبط ولو اني مش عارفة ايه وجهة نظره..

وموضوع انك تتجوز واحدة اكبر منك بشهرين ده عادي جدا وانت لو كنت حبيتها كنت هتتغاضى عن الموضوع ده وممكن مكنتش تاخد بالك منه اصلا.. بس عشان مش من اختيارك فانت مركز في السلبيات اوي..

بالنسبة بقى لموضوع الدلع ده :) فيه ناس بتعتبر بابا وماما دي دلع
يمكن عشان لما بيكبرو بيتكسفه من عيالهم.. ايا كان يا درش متركزش معاهم اوي كدة.. واكيد بيدلعو بعض بس مش قدامكو :)))

وبس كفايا رغي كدة
متزعلش

الدرعمي said...

السلام عليكم .. بص يا مصطفى ياخويا دي إجابات سريعة ومش تبرير لأي حد : 1 ناس كتير وأنا منهم بيكرهوا شات الفيس بوك لأنه رخم جدا . 2 هو غيور على حريمه وأهو أحسن من الديوث اللي بيسيبهم يسرحوا كاسيات عاريات . 3 ماما بتحبك وهتفضل شايفاك صاصا اللي بتختار له هدوم العيد وهو صغنووون والعروسة كمان . 4 فيه ناس كتير مبتهتمش بالسن لأنه لو متفقين فمفيش مشكلة فيه اللهم إلا إن الأمتع أن تصغره العروس . 5 عادة شعبية تعني الاحترام أكتر من الرحمة ، كمان هي بتتكلم زي ولادها تقوله بابا وتقول لعمتهم يا عمتي وتقول لجدتهم يا نينة وهكذا ... @لا تتأخر@

د. ياسر عمر عبد الفتاح said...

إيه الأسئلة الصعبة دي؟
مفيش إختيارات

فيه حاجات كده في عقليات الناس ملهاش إجابة
زي أغلب الأسئلة دي

2wzeyad said...

عندك حق حاجات غريبه من نوعها أحيانا يقف عند تفسيرها العقل بس لو فكرنا شويه فى مجتمعنا هنلاقى اننا بقينا مش على فطرتنا الفطرة الطيبه اللى بتقول اننا مخلوقات جواها خير واضحه وصريحه معندهاش اللى تخبيه
جارك الللى عامل ذى البودى جارد على مراته وبنته خايف....عارف خايف ليه ولا من ايه ؟ ..من البشر اللى انا لسه قايله انهم المفروض طيبين مبقوش طيبين قى كلهم شر وخيانه وتعدى على حقوق غيرهم
طب ليه مش ماشى جنبهم لانه مفترض الخبث والتلصص والاقنعه اللى الناس لابساها يعنى من الاخر بيتفرج على مراته وبنته فى المجتمع بس من بعيد
صحابك الى ضايفينك على الفيس بوك ااقولك انا الف سبب ممكن يخليهم يخفوا ظهرورهم لما يشفوك ممكن يكونوا غارقانين فى حبهم مع ناس تانين او ياعينى غرقانين برده فى مشاكلهم فمش عندهم استعداد حد يقولهم مالكم احيانا الانسان بهمومه بيبقى مش عايز مخلوق يشوفه ويقوله مالك او معلش صدقنى مش لازم يكونوا وحشين او قاصدين يضايقوك
قريبتك اللى زعلت منك عشان قلت لاخوها كده...خليك اعمق وارحم فى نظرتك ليها .. هى مزعلتش منك هى زعلت على نفسها حست انها اكيد كانت فى الموقف ده وحد قال عليها نفس الكلام .. اتوجعت وجايز كان زعلها منك قناع بتدارى بيه حزنها على نفسها وحست انه جه دورها تدافع عن اللى زيها وملهاش اى زنب انها وصلت للسن ده ولسه متجوزتش
اما الواحده اللى بتقول لجوزها يابابا ...صدقنى انا متجوزة وعمرى ماقولت الكلمه دى لجوزى بس اتمنى اقولها ...واسمحلى اوضحلك معناها الحقيقى والبعيد تماما عن اللى انت فكرت فيه...كلمه بابا معناها اعتراف بالاحتواء حاسه انها هى وولادها مسؤله منه هو فى معنى للامان اكبر من كلمة بابا؟ ...حتى لو مقاليتهاش بلسانها لازم تقولها بقلبها والا بيكون اكيد فى حاجه ناقصه
اما ماما زعلانه منك عشان عايز تختار عروستك بنفسك ليه؟ لانك لسه معرفتش تفهم ماوراء الاشياء وهى اكيد بخبرتها هتساعدك بس لايمكن تكون هتحجر على رغباتك دى ام
اسفه طولت عليك بس حسيت انك اخويه ومفيهاش حاجه نفضفض سوا
متشكرة على وقتك واتمنى تشرفنى فى مدونتى

نهر الحب said...

شكلك حساس جدا الناس ظروفها بتختلف وبتتغير
ممكن اللى انت شايفة بيبص لك كدة ميكونيش شايفك اساسا من الزعل او انه بيفكر فى موضوع تانى
او اللى اوف لاين على الفيس بوك مشغول ومش متعمد يعمل كدة

بطل حساسية
تحياتى

alshared said...

بما أنك يا درش لغيت التهريج والأستظراف في التعليق
وبما برده اللي أنتا كاتبه فيه شوية سواد

أذا

كن فقط كما أنت ولا تؤثر فيك أفكار الغير
وبس

لا تظن أنك مختلف بل هم المختلفون

دمت أخي دوما بكل الود
أخوك

كيــــــــــــارا said...

يالهووووووووووووووووووووووووي كول دي اسئله

هقولك

انا مش فهمت بتات الفيس بوك اصلي مش ليا فيه اوي الجهل بقي عاااااااااااااا

************

اما بالنسبه لجارك فكل الرجاله بتكون عندها مبدا ان كل الشباب وحشه بس انت قولتها لما هو قلقان كدا طب مايمشي معاهم ثم ان انت في رمضان ورايح تصلي يالهوي علي البشر

**********

اما موضوع طنط فهقولك ماما برده فاكره ان اخويا هيختار بنت تضحك عليه وتمشي ورا كلامها فافكره انها لما هتختار هيا هتنقيها بقي علي الفرازه وحشه انها لاغيه شخصية محمد خالث بس علي مين هو برده اللي هيختار :)

*************

طبيعي البنت تكون اصغر مش انعره ولابنا ولا عشان حاجه بس البنت فسيولوجيا بتكبر عن الولد يبقي في التلاتين كدا هو بقي في ريعان شبابه وصحته وهي بقي بدات تروح

يعني هبص لغيرها وبلاوي زرقا زي مازميلي واخد واحده اكبر منه بخمس سنين ودلوقتي بيدور علي انسانه ينجوزها تاني وليه اصلا نبدا غلط امال العقل بيعمل ايه

حاجه واحده اللي اقول اه ممكن بس دي مستبعده شويه لو كانوا بيحبوا بعض

وياجماعه لما اقول كدا مش تقولولي الرسول صلي الله عليه وسلم مش كل حاجه عملها احنا نقدر نعملها

********

اما بقي بتاعت بعد الجواز فادي مشكله المشاكل والله موضوع الجواز بخاف منه لما بشوف زميلي بيتكلموا عنه علي انه شر

مع ان لو الاتنين اتعاملوا زي مالقران قال كل شي هيتظبط اين الموده والرحمه ياقوووووم

**********

انا خلثت بقي ثلام يابن منطقتىىىىىىىىىى

هاني النجار said...

انا بصراحة كنت هادخل اهرج معاك يا درش
لأن قايمة الأسئلة اللي بالشكل ده طويلة جداً

مثلا ليه بنكدب مع اننا بنكون مش مضطرين للكدب
ليه بنضحك ونغني وسط ظروف ما يعلم بيها غير ربنا
ليه عندنا أمل في الحياة مع ان كل شيء حوالينا محبط

وكل واحد فينا له قايمة على حسب دماغه

لكن نصيحة من أخوك .. كبر دماغك
وحط الأسئلة دي تحت مبدأ
يا أيها الذين آمنوا لا تسألوا عن أشياء إن تبدلكم تسؤكم

أجمل تحية

صفــــــاء said...

حكايه الفيس بوك دى مش فاهماها
بس موضوع الراجل اللى بيزغرلك دة انت شاغل نفسك بيه ليه ؟
يولع .. انت راجل ماشى باحترامك ومش عامل حاجه تخاف او تختشى منها يبقى ميهمكش بصته
وحقك تتجوز اللى نفسك انت فيها وقلبك يروح لها
وأيوة المفروض الراجل يكون اكبر من مراته لكن ميمنعش ان لو فيه اتنين بيحبو بعض و متوافقين بيبقى السن مش فارق
حكايه بابا وماما دى على حسب كل حد اما بيرتاح لها بقى
وانت حبها وهى هتدلعك وتقولك كل اللى نفسك فيه
أراح الله بالك من الحيرة وهداك حسن الطريق

Khaled said...

أولا إنتا لية بتدى نفسك الحق فى منعنا من إننا نهرج دة على أساس إننا حانهرج


أسئلة سهلة و إجاباتها أسهل

أصحاب الفيس بوك و غيرة أعتقد إنهم بيفضلوا الرغى الناعم على الرغى الخشن أصل هيا مش ناقصة .. !!؟

الراجل عندة حق يزغرلك بما إنة شايفك راجل و كل راجل مدان إلى أن تثبت برأتة

حق و لاتتنازل عنة إنك تختار عروستك بنفسك و مامتك ماعندهاش حق تمنعك بس ليها حق تنصحك لإنها أكيد عايزة مصلحتك و دة مايخليهاش أعلم بإحتياجاتك فى عروسة المستقبل

قريبتك إتضايقت منك لإنك إتدخلت فى مخططها إللى هيا أعلم بية و بعدين إنتا مالك ياعم ماتسيبة يختار بنفسة مش يمكن تريحة أكتر من اللى أصغر منة

الزوجة لما تقول لجوزها يا بابا دليل على نوع من الإحترام و التقدير و ليس إلا و لإن فى بابا قدام الناس فى توتة و فى بيبى و فى حبيبتى بس مش قدام الناس

نيجى بقة إنتا بتكتب الحاجات دى لية علشان تصدعنا يا عم و توجع صوابعنا من كتر النقر على الكيبورد

فهمت يا درش
أظن أنا ماهرجتش و جاوبتك بجد أهة
هعههههههههههههههه

mohamed ghalia said...

يمكن مسأألة تعود
وإننا أخدنا على رتم الحياة المستمر الى مش بيتغير
أى زوة تقول لزوجها ياباب تبقى أكيد غلطته لأنه محسسهاش بمعنى حبيبتى قبل مهى تحسسه بمعنى حبيبى

mostafa rayan said...

اشكر جميع اصدقائي اللي علقو فرد فرد
لأهتمامهم ربنا مايحرمنيش منكوا ابد ويديم الود والمعروف

اخي خالد
ياعم انت تهزر زي مانت عايز دة بيتك ومكانك يا جميل

mostafa rayan said...

محمد غالية
تعليق مع التعليق
منور يا جميل وكلامك صح لحد كبير
تحياتي لك

mohra said...

يعنى اولا بيتهيألى انك واخد الامور بحساسيه
1-الاصدقاء ممكن يكونوا مشغولين و ماعندهمش فكره انت عايز تتكلم و لا لأ..الموضوع مالوش علاقه بك ..مش شرط يعنى

2-موضوع الرجل مش مؤكد يمكن بيتهيألك و يمكن هو موسوس و مافيش داعى تقول البنت حلوه و لا وحشه لانه مش الموضوع اساسا

3-انت ادرى بوالدتك

4-شعور طبيعى ان قريبتك تضايق لانها بتتكلم عن صديقه لها هى تعرفها و بتحبها و مقدره مميزاتها و لولا كده ماكنتش رشحتها لاخوها (اكيد مش هاتجامل صاحبتها على حساب اخوها)و تدخلك ممكن يوقف موضوع هى شايفه فيه مصلحه للطرفين ...كمان افتكر ان الرسول اتجوز السيده خديجه وهى اكبر منه بكام سنه...مافيش قانةن فى الحاجات دى..انت من حقك تنصح و هى من حقها تضايق


5-ماعرفش بس هى اكيد نفس السبب اللى بيخللى الرجل يقول لمراته يا ماما

اتمنى اكون ساعدتك

مصطفى ريان said...

mohra
اشكرك لحماسك ومشاركتك معانا
ربنا ما يحرمنيش من زياراتك ابدا
تحياتي لك

mahasen saber said...

يا درش ايه الاسئله العويصه دى

مامتك طبيعى الامهات بيشوفوا ان ده حق مكتسب ليهم وطبيعى جدا انها تختارلك مراتك وده من وجهة نظرهم

جارك اكيد بيعانى من داء الشك والغيره ومعندوش القدره مثلا انه يمشى جنب مراته بدل ما هو عامل فيها حرس حدود

اصحاب الفيس بوك ممكن مش فاضيين او اصلا بيدوروا على حد تانى يتكلموا معاه حد انثى مثلا

ايه تانى اسئله اه كلمة بابا بين الازواج نمشيها رحمه ونور متفرقش المهم بتتقال ازاى بحب وصدق من القلب ولاا كلمه وخلاص

موضوع السن برضه متفرقش انتا ناسى ان السيده خديجه كانت اكبر من سيدنا محمد
ناهيك ان الجواز اساسه الحب والتفاهم وجوانب الشخصيات المشتركه مش السن
يعنى اليى اتجوزوا اليى اكبر منهم اخدوا ايه

ها فيه اسئله تانى يا درش

dr.lecter said...

انا ريحخت دماغي اصلا وعملت نفسي اوف لاين من الاول

انا مش داخل الفيس بوك علشان اعمل شات مالمازنجر مرمي اهو لازمته ايه

اما الراجل اعذره برده الشك بيجري في طبيعتنا كرجاله شرقيين حتي لو كنا واثقين في نفسنا

علشان الوالده متاكده انك هتختار واحده اي كلام وواحده هتضحك عليك وتخليك زي الخاتم في صباعها وطبعا الام لازم تطمن عليك وتسلمك لواحده مابتقولش بم


الست بعد الزةاج بتقول لرزوجها بابا علشان لسه شايفه بابا موجود في حياتها بشكل او اخر

salwa said...

السلام عليكم
انت تسال هذه الاسئلة لانك منزعج منها
وطبيعي ان كل يكون كل انسان حر ضمن حدود
شكرااا لك
سلام

شمس النهار said...

شوف ياسيدي
اصحابك لو بيعملوا كده دايما مايبقوش اصحاب اصلا الصديق بيفرح بصديقه مش بيهرب منه
لكن لو ده من حين للأخر ممكن يكون مالوش مزاج يتكلم النهارده مع حد يادوب داخل يتصفح وطالع علي طول
2-بالنسبه للرجل اللي بيعمل كده ده عنده تخلف يعني هو منزلهم الشارع ومش عايز حد يبص عليهم عنده خلل في الشخصيه ونصيحتي له يايقعدهم في البيت ياينقبهم يايروح يتعالج نفسيا
3-اما موضوع الوالده الامهات اليومين دول مش واثقين في بنات اليومين دول وخايفين علي اولادهم منهم
فاهي بتطمن نفسها انها هي اللي تختار عشان ماتطلع وحشه معاها
4-طبعا قريبتك اتضايقت عشان انت رمتها بالكلام هي كمان مدام صحبتها يبقا السن واحد معني كده انها هي كمان كبرت ومش من حقها تاخد واحد من سنها
ولوهي متزوجه يبقا زعلت علي صحبتها عشان هي عايزه مرات اخوها تكون صحبتها بدل مايروح يجيب لها واحده تانيه ياتحبها ياماتحبهاش
5-موضوع ان الست تقول لزوجها يابابا ده موضوع جديد علي المجتمع المصري من يجي 30 سنه كده
زمان الست كانت بتقول لزوجها امام الناس ياسي فلان
او يافلان بيك
وبينها وبينه بالحاجات اللي انت ذكرتها دي
بس انا مع ان الزوجه تقول لزوجها الكلام اللطيف ده وبلاش بابا دي اللي بسببها شلت المراره:)