Tuesday, August 12, 2008

رسالة حب + كولكشن رباعيات

تحديث مهم جدا

يوم السبت 23/ 8 الساعة السابعة في ساقية عبد المنعم الصاوي سوف يتم الأحتفال بتوقيع العدد الثاني من كتاب مدونات مصرية للجيب وستكون فرصة كبيرة للألتقاء المدونين ياريت يا جماعة اللي ظروفه تسمح يروح لأنها هتكون فرصة جميلة ان الناس تشوف بعض - نفسي اشوف تايه في وسط البلد وعارفة مش عارف ليه .. يارب يروحوا -

السلام عليكم

ازيكم يا اجمل اصدقاء في الدنيا يارب تكونو جميعا بخير وفي احسن صحة وحال

اولا: قبل كل شيء حابب اقول رحم الله الشاعرالعربي الكبير محمود درويش واسكنه فسيح جناته وتجاوز عنه فنحن لم نكد نفق من صدمة رحيل يوسف شاهين حتى فوجعنا فيه رحمه الله

ثانيا : انا عايز اشكر جميع اصدقائي اللي ردو عليا في البوست السابق بجد كلامكو ليا فرق معايا قوي واللي له اصدقاء مخلصين زيكوا كدة لازم يكون اسعد انسان في الدنيا كلها هي بس كانت حالة وقتيه كدة وخلاص الحمد لله راحت لحالها .. مين اللي قال ان القصص اللي بكتبها مملة او ضعيفة دة انا حتى دايما يقول انها قصص جامدة جدا ومميزة جدا ... اكيد اللي قال كدة ماكانش واخد باله خالص ياريت يا جماعة لما تشوفوه تقولو له مايقولش الكلام دة عني تاني

ثالثا : منذ فترة طويلة وانا لي محاولات في كتابة شعر الرباعيات وبالفعل نشرت هنا حوالي 90 رباعية في تسع بوستات مختلفة ولكن للأسف لم يلتفت إليها الكثير فقرائي الأعزاء انشغلو بالتعليقات على موضوعات اخرى - مثل البت سارة الخنيقة والست الزوجة بنت الأصول-ولذلك فكرت ان اعيد نشر بعضا منها لعلها تعجب اصدقائي
(1)
في يوم بعد الغداء لمحت نملة

بتلم فتافيت الطعام بنشاط وهمة

انا قلت يا مصرنا دة لو كان شعبك نمل

دة انت كنت من زمان وصلتي للقمة
(2)
في زمن عقيم مالوش ملامح او أي شكل

بنقابل ناس كتير منهم وفي واكترهم ندل

ناس يستحقوا نعلق فوق صدورهم طوق من زهور

وناس تانين اقل شيء يستحقوه القتل

(3)

يا مصر يا اللي انت ساكنة في سواد النني

يا اللي انت اغلي عليا من روحي ومن ابني

وحياة عنيكي السود بلاش تقسي عليا

بلاش تخليني اهاجر وابعد عنك غصب عني

(4)
برنسيس اوف ايجيبت بنوتة عرفتها علي الشات
وطلعت اسمها تامر ودي كانت اشتغالات

انا قلت دة زمن العجايب دة يا ولاد

بتسمي الرجالة نفسها اسامي البنات

(5)
- ميلك ايه .. ماعنديش ميل

- معقول في حد في الزمن دة ماعندوش ميل

- اه في ناس كتير تعبانين وشقيانين

لا بيشيتوا على الياهو ولاعندهم ايميل علي الهوت ميل

(6)
وقالوا ايه مبتغي الأعمي .. قال يا جماعة افة عيون

وقالوا ايه مبتغي الشابة .. قالت راجل طيب وحنون

وقالوالي ايه مبتغاك من الدنيا

قلت اخرج منها سالم مأمون
(7)
انا مش تيار اسلامي ولا سلفي ولا تبليغ

مجرد شاب عادي لساني بس بليغ

وعايز اشوف الدين والدنيا بمنظاري

من غير وصاية حد ولا استاذ ولا شيخ

(8)
علي القهوة كنت قاعد بتفرج علي النسوان

في حريم زي القمر وحريم كما الغربان

في حريم بتفتح نفسك للدنيا وللحياة

وحريم تسد نفسك وتخلي قلبك يكره زمانك والمكان

(9)

انا مش زي نزار ولا زي فارق جويدة ولا زي اي حد

ولا زي صلاح جاهين وعمنا الأبنودي انا زي نفسي بجد

شعري ختم صباعي نفسي علي الأوراق

وانا شايف نفسي فريد ماشبهش لأي حد

(10)
لوكنت يوم تاخديني يا حبيبتي جوة حضنك

وتحسيسيني بشوقك وبحنية قلبك

وتبوسيني في خدي وانا بكتب قصيدة شعر

دة انا قلبي يكون اسيرك واعيش العمر جنبك

(11)

ازاي تقولي عليا بصباص وفارغ العين

وهتجوز واحدة تانية وابقي جوز الاتنين

انا مش هتجوزتاني .. مش هغلط نفس الغلطة

مصيبة واحدة كفاية عليا مش هيبقوا اتنين

(12)

مش عارف ليه يا حبيبتي انا مش مطمن ليكي

بتقولي كلام غريب هيعصبني عليكي

قال مش مرتاحة نفسيا ولازم نتلاقي روحيا

ولو ماعقلتيش جديا همد ايديا عليكي

(13)

كل الشباب تعبانة وانت مش دريانه

ولبسة لبس يخلي الأخرس يقول آه يانا

وبغيرعليكي جدا وانت جميلة جدا

ولازم هدومك تتطول وتبقي اكثر احتشاما

(14)

حتة بتلو جامدة من المترو كانت نازلة

وعين الرجالة طبيعي علي الرفارف باصة

ايه اللي بيحصل دة يا جدعان ..صرخت انا

هي الناس دي ليه بمشاعرنا مش حاسة

(15)

وتعالى يابني شوف ازاي امك بتعمل من الفسيخ شربات

وازاي بعد شوية هتبقى واحدة تانية اصبى من البنات

لكن في الحقيقة ودي الحاجة الخنيقة

امك غفر في البيت وقمر وقت الخروجات

(16)

ايوة بحبك انت يعني بحب مين

وكل كلامي عليكي يعني هيكون علي مين

عارف انك مجنونة ودماغك مش معاكي

لكن بردة بحبك ما احنا الأتنين مجانين

(17)

قررت ابعت ايميل واقولك فيه كرهتك

وزهقت انا من غيابك وترددك وعندك

ولكن ياللعجب انا لما جيت اكتب

كتبت كلمة تانية .. كتبت اني بحبك

**********
- ملحوظة مهمة بعد القرأة

انا بحبكوا قوي

85 comments:

مصــــري said...

أخي مصطفي

جميل جميل جميل ما كتبت.

وألف مبروك علي الرجوع الرائع ده.
أيوة كده.
اثبت انك لسة مدون من الطراز الأول.

شد يا بطل.

تحياتي
أسامة

canary said...

ايه يا مصطفى
نص اللى انت كاتبه حلو
والنص التانى يعاقب عليه القانون
وبعدين فيه ايه كمان كل دة عشان قولنالك كلمتين حلوين
العواطف بقى وكدة والمناديل
بس بلاش تمسح مناخيرك فى كمك لو سمحت
امال الكلينيكس ليه
حمد الله على سلامتك يا صديقى

maYHam said...

رباعيات جميلة ومتميزة فعلاً

كاميليا بهاء الدين said...

حبيت اقولك حمد لله على السلامه

وانى عارفة ان مصطفى انسان جميل

وواثقة فى درجة تمسكه باحلامه

هقرأ بقى وانا مستريحة

كل الاحترام

Unknown said...

يا مصر يالي أنتي زي السواد في النني
عجبتني أوي
تحفة

حلوة أوي الرباعيات دي و خسارة أني ماقرتش القديم منها

Unknown said...

عزيزي صاحب المدونة / عزيزتي صاحبة المدونة

أسمحولي بهذة المساحة الأعلانية

------------

للمهتمين بمشاكل الفقراء من فضلك أدخل أعرف التفاصيل و شارك بالي تقدر عليه

http://kouskoza7.blogspot.com/2008/08/blog-post_12.htm

تايه في وسط البلد said...

ميلك ايه .. ماعنديش ميل - معقول في حد في الزمن دة ماعندوش ميل - اه في ناس كتير تعبانين وشقيانين لا بيشيتوا على الياهو ولاعندهم ايميل علي الهوت ميل

يا عيني
فين يا بني من زمان

Anonymous said...

- وحشني الرد على التعليقات والله
نرد بقي ونعوض اللي فات

**********************
- مصري
منور الدنيا يا جميل
وبجد فرحان بكلامك دة قوي

- صفا (كنارى )

لو انتي كنتي عاشية معانا في القاهرة وشوفتي حدة المشاعر اللي الناس وصلت ليها كنتي تفهمتي فرحتي بالكلمتين الحلوين دول
سيبك انتي ...انتي منورة الدنيا يا صديقتي الجميلة

- انا من كنت محتاجا
انت الأجمل يا قمر

- كاكليا
انتي بجد حد حلو قوي
ربنا يحققلنا كل احلامنا

- عاليا حليم
اشكرك .. وعلى العموم تقدري تعوضي الخسارة وتقرأي اللي فاتك منها
قلبي في القديم هتلاقي كنوز دفينة كتير
منورة يا قمر

- تايه في وسط البلد
موجود يا عم من زمان والرباعيات موجودة
بس الناس ماكنتش بتقرأها
انت منور الدنيا يا قمر

Anonymous said...

thx 3ll post

رؤية said...

رباعيات جميلة،
دمت مبدعا،
تحياتى لك.

Eslam Samir said...

قررت ابعت ايميل واقولك فيه كرهتك

وزهقت انا من غيابك وترددك وعندك

ولكن ياللعجب انا لما جيت اكتب

كتبت كلمة تانية .. كتبت اني بحبك


رائع
أكثر ما اعجبني
كان مسك الختام هُنا
اتمنى لك التوفيق

عاشــــــ النقاب ـقــــة"نونو" said...

السلام عليكم
حمد الله على سلامتك
كل عام وانت بخير
جميلة جداااااااا
انا هقول على حاجات بيتهيالي من وجهة نظري لو حطيتها في الحسبان وجربتها هتبقى حلوة ولو اني ما افهمش في الرباعيات والاشعار لكن متذوقة على ادي
اول بيتين
كلمة الطعام لو تبقى اكل هتبقى احلى
بيت وباغير عليكي جدا وانتي جميلة جدا
تبقى وباغير عليكي ياما وانتي جميلة اه يانا
شوف كدة وجرب انا على ادي يعني
تحياتي

Anonymous said...

StEEl BeaUtY
thans

- رؤية
دامت زيارتك وما حرمت منها

- لم يكتمل بعد
وانا سعيد جدا بهذه الزيارة الجميلة واحب ان تتكرر

- عاشقة النقاب
نورتنيني وجاري تجريب المقترحات

Rania Lelah said...

اعجبتنى كل السطور رائعه حقاا
مبدع كعادتك عزيزى

تحياتى

ShimaaMahdy said...

قررت ابعت ايميل واقولك فيه كرهتك وزهقت انا من غيابك وترددك وعندك
ولكن ياللعجب انا لما جيت اكتب
كتبت كلمة تانية .. كتبت اني بحبك

بجد جميل قوى الاحساس فيها

ماشاء الله عليك

Anonymous said...

رانيا
انتي الأجمل

- شيماء مهدي
اشكر رقتك
نورتيني

abo salah said...

بعد السلام عليكم

الله عليك
أيه يابنى الجمال دا

بجد والله رباعيات أكثر من رائعة
أجمل ما فيهم أنك جبت واقعيات من مجتمعنا

تسلم إيدك يا مصطفى

وبخصوص البوست السابق واللى فاتنى لأنى كنت مسافر
فعايز اقولك
ماتقللش ابدا من موهبتك
وخليك باصص بقى فى المراية على طول وبلاش البص جواك

طبعا دا شئ يشرفنى أنى اتعاون مع مبدع زيك

تحياتى
وكل سنة وأنت طيب

م/ الحسيني لزومي said...

اولا انا سعيد جدا بزيارتك العزيزه الرباعيات جميله لاي متزوق لكن كان نفس اقرأ راي متخصص..لاني بأكتب قصة قصيره واحياننا خواطر شعريه او زجليه..لكن كثرة القراءة هي بداية الطريق لصقل الموهبه...مره اخري انا شاكر للزياره
مع دوام التوفيق

mostafa rayan said...

- ابو صلاح
انت منور يا جميل وانا يا عم اللي احي اتعاون معاك وياريت لو نشوف طريقة لكدة
ممكن نتكلم على الأيميل دة the_highstar11@yahoo.com

انت منور يا جميل

- الحسيني
اخي سعيد جدا بزيارتك دي وطبعا احب جدا لو اقرأ قصصك واشعارك لكن المدونة عندك مافيهاش غير مقالات سياسية ممكنلو تحب تبعتلي بعض منها على الأيميل اللي في التعليق اللي فوق دة وانا بكل محبة هقرأها واقولك رأيي عنها
سعيد جدا بتعرفي عليك

حسن ارابيسك said...

درش
وحشنا واللهي يادرش
اولا صدقنى قد لايرى المرء في نفسه أشياء كثيرة جميلة ولكن يراها الأخرون وهنا اهمية التواصل فنحن نتواصل ونلفت بعضنا بعض الي ما هو جيد وماهو سيئ وماهو جديد وماهو جرئ وإلخ
وأنا أصلاً من متابعينك القدامي وبالنسبة لرباعياتك صدقنى أنا واخد منها نسخه عندي لانها لفتت نظري كثيراً فوجدت فيها لغة جديدة يمكن عليا في الشعر وجريئة صدقني بجد فلا تبخس حقك ياصديقي وثق بنفسك وبما تؤمن به بصرف النظر عن النشر فلا تجعله شاغلك وأنت تكتب حتى لاتصبح أسير شئ أخر غير هدفك الذي تكتب من اجله الفكرة
وبخصوص رواية الكاتب السوري سوف أقرأها وأشوف تقييمك جاء في مكانه أم لا فلكل منا أكيد وجهة نظر ربما نتفق وربما نختلف وفي النهاية نحن نتواصل
استمر ياصديقي الفاضل
تحياتي
حسن ارابيسك

كلبوزة لكن سمباتيك said...
This comment has been removed by the author.
كلبوزة لكن سمباتيك said...

الزجل الناجح لا يعتمد فقط على القافية المتماثلة و لكن اهم شئ الوزن و هو ما تفتقده
==
اعجبتني هذه المقولة
قررت ابعت ايميل واقولك فيه كرهتك

وزهقت انا من غيابك وترددك وعندك

ولكن ياللعجب انا لما جيت اكتب

كتبت كلمة تانية .. كتبت اني بحبك


===
انصحك بدراسة العروض و القراءة لصلاح جاهين لتتقدم ان شاء الله
تحياتي

هاني النجار said...

أخي الحبيب مصطفى

طبعاً أنا مدين لك باعتذار بسبب قلة زياراتي لك.. فسامحنى

بخصوص الرباعيات فهى بشهادة حق من متذوق جيد .. مبدعة
والله بدون مجاملة أعجبتني للغاية .. ما شاء الله، تبارك الله
وبالمرة استأذنك في نقل بعض منها إلى منتدى.. طبعاً باسمك

أما بخصوص الموضوع السابق.. انا قرأته في عجالة، فحسيت اني لازم أقولك.. ان كلنا بنمر بالحالة دي .. وبنسأل نفسنا في لحظة احنا بنعمل ايه؟ وليه؟وايه الفايدة؟ وايه العائد؟ وكتير على شاكلة الأسئلة ده
لكن صدقني .. وعن تجربة.. أكبر غلطة بنرتكبها في حق نفسنا اننا نترك نفسنا للهواجس دي ، فبنحس اننا عجزنا واحنا لسه شباب

أجمل تحية لك يا أخي الحبيب

mostafa rayan said...

- حسن ارابيسك الجميل قوي
والله يا اخي كلامك دة مفرحني قوي معقولة يا حسن انا حلو كدة بجد مش عارف اقولك ايه اشكرك واحييك واحبك

- كلبوزة
فرحان للأعجابك وبالطبع دراسة العروض مهمة جدا لثقل الموهبة وصلاح جاهين دة عمنا كلنا
اشكرك لزيارتك

- المهاجر اللي بحبه قوي
لا يا عم ولا تعتذر ولا حاجة هو في بين الأخوات اعتذار بس قولي المنتدى دة اسمه ايه علشان ادخل اشوف نفسي عندكوا طبعا فرحان اخر حاجة لأن الرباعيات عاجبتك وان شاء الله تعجبك الرباعيات الأخري كمان
بجد بعد كلامك وكلام المهاجر الواحد مش لاقي حاجة يقولها وان كنت انا حلو فأنا حلو لأن عيونكم الجميلة هي اللي شايفاني كدة
محبتي لكم يا اجمل اصدقاء في الدنيا

ضــى القمــر said...

أخى مصطفى

بجد رباعيات روووعه روووعه رووعه ..

بجد انبهرت بأسلوبك فيها

بجد تميزت جدا يا مصطفى هناا

ولى عودة لقراءة ما فاتنى فى مدونتك الرائعه هذه

وخاصة فى الرباعيات

اجمل تحيه معطرة لك يا اخى

تقبل تواجدى المتواضع :)

Anonymous said...

ضي القمر الجميلة جدا
زيارتك يا قمر نورت المدونة ورشت عليه فل وورد وياسمين ووكل حاجة حلوة
ودي مدونتك تيجي فيها دايما ووقت ماتحبي
اسعدتني وفرحتنيني

Unknown said...

السلام عليكم ورحمة الله وبركاته
حلوة اوى وكلها احلى من بعض
ولو اخترنا كلها احلى من بعض
ومتشكريين لك انك نشرتها تانى
لاجل مانعرفها ونقراها من تانى
تحياتى لك ولرباعياتك الجميلة

Anonymous said...

norahaty
الرباعيات حلوة لكن اكيد انتي الأجمل
وانا اللي بشكرك على قرائتك واطرائك
تحياتي لك

نوري said...

هاهاهاهاها
بجد جميله قوي
وخصوصا
ازاي تقولي عليا بصباص وفارغ العين وهتجوز واحدة تانية وابقي جوز الاتنين انا مش هتجوزتاني ..
مش هغلط نفس الغلطة
مصيبة واحدة كفاية عليا
مش هيبقوا اتنين

بتبين حجات كتير قوي
وفضحتكو الكلمتين دول
هههههههههههههه
وفعلا لينا حق نحب مدونتك
ع فكره عجباني جدا
و انشاء الله هبقي زبون

بست وشز فور يو

Anonymous said...

نوري
منورة يا قمر وطبعا سعيد جدا انك هتبقي زبون دايم
زورينا دائما تجدي ما يسرك

Ahmed El-Agouz said...

كلمات رائعة
مقتطفات جميلة
واسلوب مميز دائما
ربنا يبارك فيك
ايها الشاب الثائر دائما
العجوز

Anonymous said...

جميل قوى قوى ربنا يوفقك انا كانت اخر رباعيات قرايتها كانت جاهين ..بس لقيت فى مدونتك اشعار ورباعيات جميله ربنا يوفقك استمر ..وشاكره تشريفك لمدونتى وكل رمضان وانتا بالف خير ..فى رعاية الله وامنه..

رحيـــــــــــــــــــــــل said...

كتير كتير حلوه بجد
الكلام راااااائع
وشي جديد علينا
وكلامك ميه ميه صح
والى الامام
تحياتي ليك
رحيل

mostafa rayan said...

احمد العجوز
انت منورالدنيا يا جميل وشكرا لكلامك الحلو عني دة

- عايزة اتطلق
انتي منورة وبجد ربنا يحللك كل مشاكلك وتبقي في احسن حال

- رحيل
شاكر زيارتك يا قمر ربنا يديم بنا كل الخير

Sourah said...

شعري ختم صباعي نفسي علي الأوراق

تمكن شديد من الالفاظ و المعاني ،بصراحة المدونة كلها و لا اروع ، ربنا يوفقك يا مصطفى و تمتعنا بالمزيد ..

Empress appy said...

حلوة او الرباعيات يا مصطفى والاجمل بتاعت النمله بجد فعلا احنا لو كده

ولد مصري said...

بقى لي كتير عندك مابجيش
ايه الحكاية؟ ما تسألنيش
فاتني كتير ودي آخرة
الجري ورا رغيف العيش


بجد كلامك رائع وفعلا يخلي الطوب اللي زي حلاتي ينطق

تقبل تحياتي

Anonymous said...

Sourah
اشكرك من كل قبلي على الأطراء الجامد دة
ربنا يخلكي ويوفقك انت كمان

- آبي
عندك حق والله تصوري لما النمل يبقي احسن من البني ادمين
نورتنيني

- وليد المصري
ربنا يوفقك يا اخي واكيد لقمة عيشك اهم بكتير قوي من اي دخول علىالمدوونات
نورتني

momken said...

الله يا درش

تسلم ايدك
بجد مبدع
وكمان كلامك قريب اوى من القلب
حاسيت انى من نوع كلاكمى وكلام الناس الكتير

انتى فنان جميل

تحياتى

mostafa rayan said...

ممكن
انت الأجمل يا قمر
تحياتي ليك

حسن حنفى said...

بسم اله ماشاء الله

ر بنا يبارك فيك

اتمني التواصل

جوجو said...

السلام عليكم

هههههههههههههههههه

بجد روحة اوى طول ما انا بقراْ قاعدة بضحك

اسجل اول مرورى

جهااااد

mostafa rayan said...

حسن حنفي
انت منور يا قمر

- جوجو
منورة وريارب اقدر اسعدك دايما على طول

!!! عارفة ... مش عارف ليه said...

درشاوي يا جاااااااامد


أنا كمان والله نفسي اشوفك
ويمكن تكون المشكلة اني مش في مصر اليومين دوول

عموما البركة فيك وتغطي الحفل زي ما عودتنا في حفل العدد الأول

واهم ما في الموضوع أننا عرفنا بعضنا كمدونين وقربنا من عقووول بعضنا اووي وكفاية الكلمتين اللي كتبتهم في البوست دوول

عارف يا مصطفى
رٌب أخ لم تلده أمك

-------

وفي يا درش واحد صاحبنا بردو اسمه الشندويلي
http://cinemascopemagazine.blogspot.com/
عبقري في المزيكا
لو كنت موجود كان هيبقى نفسي أشوفه أوووي هو كمان

يلااا اسيبك بقى
علشان اروح اكمل الرباعات
وارجع أرغي معاك شوية

وليد

!!! عارفة ... مش عارف ليه said...

بقى بالذمة يا مصطفى اللي يقول رباعية زي دي
------------
يا مصر يا اللي انت ساكنة في سواد النني

يا اللي انت اغلي عليا من روحي ومن ابني

وحياة عنيكي السود بلاش تقسي عليا

بلاش تخليني اهاجر وابعد عنك غصب عني

------
يبقى شايف نفسه واحد بيكتب اي حاجة ويقول في بوسته اللي فات "اجدها انا في كثير من الأحيان قصص ضعيفة جدا ومملة جدا "

حرام عليك يا مصطفى والله انت موهووووووووووب

وإن شاء الله هيجي اليوم اللي اشوفك فيه اشهر شهير واقول صاحبي أهووووو

ربنا يوفقك
ويحفظك من كل مكروه

أخوك
وليد

Anonymous said...

اخي العزيز جدا وليد
والله انا بعد اللي انت قولته عليا دة مش عارف اقولك ايه صراحة كلامك دة اكبر مني بكتير
وزي ماقولت رب اخ لك لم تلده امك وانت اكتر من اخ ليا
ربنايوفقك يا صاحبي
تحياتي وحبي لك

Amgad said...

مساء الفل يا صاصا
ايه يا عم الحلاوة دي
انا قولت امسي عليك
واقولك احنا كمان بنجبك

محمد عز الدين said...

مصطفى بيه
انا سعيد انك نشرت رباعياتك دي
من المهم جدا
انك تكون جرئ
دي صفة المبدع الحقيقي
تحياتي

mostafa rayan said...

امجد
مساء الفل يا نجم
انت منور الدنيا كلها

- محمد عز الدين
انا سعيد جدا بزيارتك دي ويارب تتكرر
نورت يا قمر

amiragad said...

معقول يعني يا مصطفى بعد كل المشاعر الطيبة و الروح الهادئة التي تفيض بها تدوينتك منجيش نتعرف عليك ؟؟؟ اعتقد صعب عني سأبذل قصارى جهدي لآتي ساقية الصاويتمنياتي لك بكل الخير

Anonymous said...

اميرة جاد
انتي اخت جميلة قوي .. ربنا يوفقك ويحققلك كل الخير

Anonymous said...

كلمات اكثر من رائعة واجمل شيئ انها بسيطة ومعبرة

يوما ما تشرفت برأى لك على مدونتى واليوم صادف دخولى هنا لارى كلمات فعلا تدخل العقل والقلب من اوسع ابوابه

فكشرا لك مصطفى واسمح لى انقل بعض من كلماتك فى مدونتى مع الاشرارة للمصدر طبعا


حالة ملل

mostafa rayan said...

حالة ملل
منورة وطبعا انتي تاخدي من المدونة اللي تحبيه لكن يايت لو تسيبي لينك المدونة علشان ادخل واشوف نفسي عندك
منورة مرة تانية

just me said...

انا مش تيار اسلامي ولا سلفي ولا تبليغ

مجرد شاب عادي لساني بس بليغ

وعايز اشوف الدين والدنيا بمنظاري

من غير وصاية حد ولا استاذ ولا شيخ


-----------------------------

بصراحه احسن رباعيه من وجهه نظرى

دعاء مواجهات said...

ازيك يامصطفى

ياابنى الميعاد 23/8

بكرة يعنى

الساعة7

اوعى يكون حد اداك الميعاد غلط

ان شاء الله هرووح

اتمنى اشوفك

بيس

mostafa rayan said...

لست ادري
وانا بردة شايف انها اهم رباعية
وتحمل معاني كثيرة جدا
تحياتي لك

- دعاء مواجهات
سورى يا قمر وعلى العموم انا صلحت الخطأ خلاص هو بس كان سبق كي بورد
تحياتي لك

Samar Ali said...

fenaak?
i like this post aloooot!
bs enta fenaak kda

mostafa rayan said...

سمر المنوفي
اشكرك لسؤالك عني
بارك الله فيكي يا صديقتي الغالية

أسماء علي said...

بجد يا مصطفى الرباعيات فيها حبة حاجات جميلة جدااا

و فيهم كام رباعية مصاييييييب الصراحة ..

دمت بخير ..

Anonymous said...

د. اسماء علي
والله يا دكتورة تعليقك دةزي السكر
دومت بكل خير

أميمة كامل said...

عندى أيمن ابنى يسأل ليه ربنا خلق النمل ؟
هو بيضايقنا و ييجى على أكلنا
قلت له علشان نتعلم منه فى نظامه و مثابرته واتقانه و همته
في يوم بعد الغداء لمحت نملة

بتلم فتافيت الطعام بنشاط وهمة

انا قلت يا مصرنا دة لو كان شعبك نمل

دة انت كنت من زمان وصلتي للقمة

جميلة جدا

زئير الحب said...

كلمات فاقت الروعة في روعتها...

و أيقظت القلوب برقتها...

لأنها ببساطة ...

نابعة من قلب كاتبها

لذيذة يا مصطفي الكلمات ديه بجد

تحياتي

زئير الحب

Anonymous said...

د. اميمة كامل
شاكر لك هذه الزيارة الرقيقة
كل عام وانت بخير

- زئير الحب
شكرا ليك يا صاحبي هذه الزيارة الرقيقة
انت حد جميل قوي يا يوسف

هانى المصرى said...

ايه يا مصطفى الكلام الجامد ده خلتلنا ايه بقى نكتبه .
يا ريت نبقى اصدقاء ونتبادل الاراء فى اللى بنكتبه .
تحياتى

تايه في وسط البلد said...

حبيب قلبي

خير الناس اعذرهم للناس
وانت من خير الناس يا درش

لكن لو عاوز الصراحة هاقول اني احب الموضوع ييجي تدريجي

انت بس تقابلني الاول وبعدين كل حاجة سهلة بعد كدة

ده ايميلي عشان تضيفني وتسيب رقم التليفون

yyosef82@yahoo.com
تحياتي يا خير الناس

Anonymous said...

هاني علوان
دة انا اللي ليا الشرف اتعرف عليك
انت حد بيكتب حلو قوي

تايه في وسط البلد
جاري الأضافة يا جميل
دومت بكل الخير يا اخي الفاضل

كوارث said...

فعلا يا مصطفى
الانسان ده كده !

mostafa rayan said...

كوراث
رغم غموض التعليق
لكن انت منور الدنيا كلها
تحياتي لك

قررت أكون عانس said...

انا زي نفسي بجدانا شايف نفسي فريد ماشبهش لأي حد

مبروك عليك انك زى نفسك مش زى حد

mostafa rayan said...

- قررت أكون عانس
الله يبارك فيكي وعقبالك

تخاريف خاصه! said...

ماشاء الله

حلو اوى الرباعيات دى....


سلمت يداك ...

هروح اكمل قرايه ف المدونه..

دكتور حر said...

ايه يابني الجمال ده


فعلا بسم الله ما شاء الله


سعدت برؤيتك في الساقيه

وارجوا تسامحني على ذاكرتي الرديئه

ربنا يكرمك يا مصطفى
ونراك على خير دايما ان شاء الله

Anonymous said...

مصطفى ريان

واحشنى قوى يا صديقى

والله كلامك جميل فى اكتر من ناحية

اولها المشاعر الجميلة اللى بتكنها لأصحابك

ثانيا انا مكنتش عارف انك شديد قوىىىىى كدة فى الكتابة

ايه يا عم فكرتنى بجاهين
احلى رباعية الاخيرة

فعلا لازم تكتب كلمة تانيه

تحياتى

ضــى القمــر said...

مصطفى لك عندى واجب تدوينى مهم جداااا

أدخل شوفه وحله بسرعه ..

وانا بدخل علشان اصحح الورق

ههههههه

لا تتأخر على الواجب :)

أجمل تحيه لك يا اخى

Soooo said...

لوكنت يوم تاخديني يا حبيبتي جوة حضنك

وتحسيسيني بشوقك وبحنية قلبك

وتبوسيني في خدي وانا بكتب قصيدة شعر

دة انا قلبي يكون اسيرك واعيش العمر جنبك

---

ازاي تقولي عليا بصباص وفارغ العين

وهتجوز واحدة تانية وابقي جوز الاتنين

انا مش هتجوزتاني .. مش هغلط نفس الغلطة

مصيبة واحدة كفاية عليا مش هيبقوا اتنين

====

اهو الرباعيتين دول في حد ذاتهم وفي ترتيبهم ورا بعض .. قمة السخريه
يعني في الاول عايز تعيش اسير لحبيبتك
ولما الفاس وقعت في الراس .. قلت جااااااي

والرباعيه اللي بعدهم حبيت تعمل فيها السيد احمد عبد الجواد وعايز تمد ايدك عليها قال
يا راجل طيب

===

بص يابو درش .. قسم الرباعيات دي والقديم لمجموعات .. وكل مجموعه تكون عن حاله نفسيه معينه

فاهمني ولا ايه النيظي؟؟

وكل سنه وانت طيب ورمضان كريم

ملحوظه
واحنا بنحبك كمان ياعم




سلاموووووووووووز

عروسة ننوسة said...

الله الله الله ايه الروعة دى الكلام حلو كتير

Cinderella & Cinderella said...
This comment has been removed by a blog administrator.
mostafa rayan said...

تخاريف خاصة
منورة الدنيا كلها
كل سنة وانتي طيبة

- دكتور حر
كل سنة وانت طيب يا جميل .. دة انا اللي فرحان قوي اني اتعرفت عليك وشوفتك
نورتني يا قمر

- عرفة الأسيوطي
انت منور يا قمر وكلامك دة اكبر مني بكتير قوي
كل سنة وانت طيب

mostafa rayan said...

- ضي القمر
اشكرك يا قمر على تذكرك لي في التاج لكن انا جاوبته مرتين معلشي بقي تتعوض في تاجات تانية
كل سنة وانتي طيبةيا قمر

- سوو
حبيب قلبي والله انافرحان قوي اني شوفتك الأسبوع دة مرتين
وطبعا وجهة نظرك جميلة قوي وفعلا تحترم
لكن انا حابب ان المتلقي ياخدها كدة كلها على بعضها من غير ترتيب ..انال كتبتها منغيرترتيب وحابب انها توصله كدة
يارب اكون قدرت اوصلك وجهة نظري
انابجد فرحان انك جيت وعلقت عندي وفرحان اكتر اني شوفتك وان شاء الله نشوف بعض دايما على كل خير

- عروسة ننوسة
انتي الأحلى يا قمر

mostafa rayan said...

Cinderella & Cinderella
اعرف انكم سوف تأتون مرة اخري لقرأة ردي عليكم
حذفت تعليقكم واي تعليق اخرسيأتي منكم سوف احذفه فبالأضافة للأسم المدونة البذئ جدا فأنا مختلف تمام الأختلاف مع افكاركم ومش مرحب بوجودكم هنا
لاداعي لوجودكم هنا مرة اخري ولا داعي للتطاول لأنه لو حدث وفكر احد منكم مجرد تفكير ان يتطاول او يقول كلام خارج هنا لن اسكت وسأسمعه ما لا يرضيه
هذه هي الزيارة الأولي والأخيرة ايضا لكم
وبالنسبة لأجابة السؤال مابخافش غير من ربنا بس
اي مخلوق مهما كان لاء
مش منورين

أمل حمدي said...

تشرفت بمرورك الذي كان السبب لمعرفتي
بمدونتك الاكثر من رائعة

كل عام وانت بخير

mostafa rayan said...

ماما أمولة
انا اللي سعدت بمعرفتي بك كل عام وانتي بخير

3ali said...

very nice poem
"بلاش تخليني اهاجر وابعد عنك غصب عني"
alah ysam7ak , dost 3al gar7
:)

a7'er goz2 3agabni gedan

جسر الى الحياة said...

حلوة جدا مختلطة المشاعر والمعانى احلى حاجة عجبتنى اخر جزء قررت ابعت اميل فعلا الحب لما يتملك انسان لا يستطيع الابتعاد عن من يحب حتى ولو كان ذلك قراره فالحب يظهر دون وعى

دمت بحب ومودة مدونة جميلة

Anonymous said...

3ali
تصدق لو قلتلك انها كمان بتجرحني انا شخصيا وبتيجي على جرحي بحبها وخايف اسيبها لأنها بقت قاسية عليا

- جسر إلى الحياة
( الحب يظهر دون وعي )
صدقتي يا صديقتي العزيزة
دمت بكل خير