Sunday, June 29, 2008

اغنية جديدة + رباعية

تحديث
اولا الحمد لله ان العطل اللي في الجهاز اتصلح وان شاء الله هنرجع ندخل ونتكلم ونقول كل اللى عايزينه
ثانيا : تاج الأسرار وصلني من اخي ادم المفروض اني اذكر ست حاجات عن نفسي ماحدش يعرفهم وطبعا انا مش عارف الست حاجات دول إيه فهقولكم اهم حاجة
- دي اللي علي الأقل عارفها - اانا عكس كتاباتي اللي البعض بيشوفها جريئة حبتين
- لكن انا بشوفها عادية جدا اقرؤا لغيري وانتو تتأكدو من دة بنفسكوا -
انا خجول جدا في الحياة العادية ودة بيخلي الناس تفتكر اني مغرور لكن والله انا انسان بسيط جدا كل الموضوع اني بتكسف ومش بحب افرض نفسي على حد يمكن الموضوع دة بيضيع عليا فرص كتير لكن انا بحاول اتخلص منه .. ادعولي بقي ولواني شايف ان الخجل صفة جميلة لكن طبعا لما بتزيد مش بتكون حلوة
اهدي التاج لمين كالعادة لأى حد
........................................
حبايب هارتي ازيكو عاملين ايه .. ايه اخباركوا .. يارب تكونو بخير
اولا : انا بعتذر عن عدم الرد على التعليقات الأخيرة وتأخر نزول البوست الجديد
وعدم الكتابة في موضوع الأنتماء وذلك بسبب عطل حدث في جهازي
وحتي انا دلوقتي بكتب البوست دة من سايبر
ثانيا : لحد الجهاز ما يتصلح ونستكمل الحديث فيما كنا بدأناه قولولي رأيكوا في الأغنية والرباعية دول
انا ليكي ايه
انا ليكي ايه
قلب بتحبيه
ولا حد بتنسي بيه
حد تاني خانك
واللي بنبنيه
هتحافظي عليه
ولا هتهديه لو قلبه ندالك
جاوبي سؤال حيران في قلبي
عشقاني ولا هتسيبي قلبي
هتعيشي معايا ولا في يوم
هصحي ألاقي قلبك مش جنبي
بتبقي معايا ومش معايا
شايفاني لكن مش حاسة بيا
وبتبقي ايديك في حضن ايدي
لكن بتبقي بعيدة عليا
واقول كلام مش سمعاه
واحكي في غرام مش حساه
وتقول شفايفك ايوة بحبك
وترد عيونك تقولي لا
..............................
الرباعية دي يا جماعة ممكن ابقي اقولها لمراتي لما تغضب وممكن بردة تقولها انتو
كمان ( احنا برضة اخوات والناس لبعضها ) .. وانا منتظر رأيكوا فيها
يا حبيبتي الست بردة ملهاش غير بيت جوزها
دة المكان الوحيد اللي ممكن يساعها
معقولة نسيتي درشاوي وحكاوي الغرام
ارجعيلي يا اللي غايبة من تلات ايام بحالها
ملحوظات بعد القرأة
1- مرة تانية يا جماعة لو حد اعجب بكلمات الأغنية وكان بيلحن يقولي الأول علشان نظبط مع بعض
2- انا منتظر رأيكوا في الأغنية والرباعية كمان وسامحوني لو اتأخرت في الدخول عندكم وترك التعليقات وذلك حتي يتم تصليح الجهاز
واخيرا انا بحبكوا قوي

15 comments:

Hanan Said said...

نورت يا مصطفى من تاني
.
.
الاغنيه جميله فعلا
وكلماتها معبره كتيييير

ومستنين مواضيعك وزرياتك لينا ديما
وربنا يرجعلك النت بالسلامه ان شاء الله :)
.....
وكمان الجزء من الرباعيه حلو كتير
( الست مالهاش غيربيت جوزها )
متهيقلي مافيش ام مابتقولهاش لبنتها بعد مايلع عنيها في الجواز ههههههه
.........
تحياتي ليك
......
وسعيده اني اول رد على البوست بتاعك

just smile said...

اكيد قمه في روعة الاحساااااس وعمق المشااااااااااعر
تقبل مروري وزيارتي الاولى هنا
بالتوفيق

محمد حلمي مخلوف said...

اولا يا مصطفي ان شاء الله جهازك يتصلح بسرعه علشان نرجع نتكلم زي زمان
ثانيا انا كمان حاولت اكتب شعر بس اكتشفت اني مش بعرف اكتب شعر وانت يا مصطفي مبتعرفش تكتب شعر خليك في القصه احسن انت بتكتب قصه احسن
اوعي تكون زعلت معلش يا مصطفي انا بقولك كده علشان عايز مصلحتك مش عايزك تضيع مجهودك في حاجه انت مش عارف تعملها انت قاص ممتاز طور نفسك وربنا يكرمك اوعي تكون زعلت يا صاحبي بس انا مش هاجاملك

Empress appy said...

يعنى انت توقعت انك هتزعلها من الاول هههههههههه

حلوة يا شاب يا مبدع

تايه في وسط البلد said...

اللااااااااااااااااااااه

ايه يا عم الكلام العالي ده

والست مالهاش غير بيت جوزها والحاجات دي!!ه

هايل يا درشاوي
هنحتاجك علي فكرة في مشوار صلح بنت ام سيد علي جوزها معيطل
ههههههههههه
حبيب قلبي والله
تسلم وتعيش

هاني النجار said...

حلوة الأغنية يا درش
لكن ليه هى شبه أغاني الراب

وبالنسبة للجهاز .. علق عليه صورة واحد حبيبنا نظيف .. بإذن الله هيشتغل زي الفل

تحياتي

سارة البحر said...

الاغنيه روعه اوي اوي بجد عجبتني جدا يا مصطفى
خاصه السطور الاخيره تحفه

اما بقى الرباعيه .....شكلك ناوي تزعلها كتير ههههههههههههههه بس انا متاكده انك لما هتقولها الروباعيه هتصفالك على طول ههههههه

أميرة الاحزان said...

حلوووووووووووة اووووووووووووى يا مصطفى ...

تسلم ايدك ...

كاميليا بهاء الدين said...

حمد لله علي السلامة

ويارب الكمبيوتر يتصلح بسرعة
علشان ترجع لكل اصحابك تانى

الاغنية حلوة يا مصطفى

والرباعية كمان
بس طيب لو غايبة بقالها يومين مش تلاتة او اربعة مثلا
تمشى معاها الرباعية
:D

وحشنا قلمك

دمت بكل الخير

!!! عارفة ... مش عارف ليه said...

سلامات يا درش شدة وتزووول

الاغنية حلوة
والرباعية كمان جميلة بصراحه

مستنينك
متطولش الغيبة
ومتقلقش انا بردو بروح المدونة اشقر واروش مية

تحياتي

استراحة محمد said...

مصطفى باشا
انا رأيى من رأى اخى محمد مخلوف ، فأنت تجيد القصة اكثر من الشعر ، او الأغانى على وجه الدقة ، هى امكانيات واشعر ان قلمك يجد نفسه اكثر فى القصة
تحياتى دائما

dina said...

يا حبيبتي الست بردة ملهاش غير بيت جوزها
دة المكان الوحيد اللي ممكن يساعها
معقولة نسيتي درشاوي وحكاوي الغرام
ارجعيلي يا اللي غايبة من تلات ايام بحالها

بجد دى عسولة جدااا و الاغنية كمان جامدة اوى
تحياتى

mostafa rayan said...

حنان سعيد
انتي اللي منورة يا قمر

-just smile
فرحان قوي انها عجبتك .. نورتيني

- محمد حلمي مخلوف
منور دايما يا صاحبي

آبي
نورتي يا جميلة

- تايه في وسط البلد
منور الدنيا يا قمر مش بس المدونة
وبالنسبة لأم السيد رنلي انت بس
وانا معاك على طول

- المهاجر
دي زيارة عزيزة وغالية قوي يا فندم
يارب تتكرر دايما وماتتأخرش علينا

- سارة البحر
والله انتي بنوتة جمبلة قوي
تحياتي ليكي يا قمر

- اميرة الأحزان
هي حلوة بس انت احلي
نورتي يا اميرة

كاميليا
نورتي يا جميلة وياريت لو تقوليلي رأيك في الأغنية اللي تحتها كمان

- عارفة ... مش عارف ليه
حبيبي دامت زيارتك ليا ويارب ماتحرمش منك ابدا

- استراحة محمد
نورت يا قمر بص الأغنية بالنسبة ليا هوايه بحبها زي القصص
بس سيبك انت المهم انك نورتني يا صاحبي

- دينا
انتي اللي عسولة يا قمر
دومت بكل الخير

مصر يا موكوسه .....يا مزارع الكوسه said...

ع انك دخلت مدونتى كاتبلى كلمتين يادوووووووووووووووووووووووب
لو قريتهم هيخلصوا
بس مشاركتك فرحتنى اوى
وموضوعك جميل اوى
اوى اوى اوى
كتبتة بطريقة جميلة جدااااااااااا

mostafa rayan said...

ابتسم من فضلك
الموضوع جميل لكن انتي الأجمل
سعيد بزيارتك وان شاء الله تتكرر
دايما
تحياتي ليكي