Sunday, August 8, 2010

الفاكسون والشعب الاهبل(درشاوي مستشارك العاطفي)

مقدمة -ولابد منها-
لو لا قدر الله تعرضت لتلف شاشتك وذهبت بها لمركز الصيانة ستمر بالمراحل التالية
1-تدفع 20 جنيه مصاريف فتح وغلق الشاشه
2-تدفع 10 جنيه مصاريف فحص الشاشة –فقط ليقول لك العطل كذا وهنعمل كذا-
3- تدفع مصاريف التصليح وثمن شراء قطع الغيار الجديدة .
لتجد نفسك في النهاية خارجا من المحل وقد دفعت 60او70جنيه طاروا جميعهم من جيبك لا تعرف
إلى اين طاروا ولكنهم طاروا وبلا عودة
***********************
مع بداية الالفية الجديدة وتوغل الفضائيات ومواقع الانترنت خاصة في النصف الثانى من عقدها الاول ظهرت على الساحة مهن جديدة لم نكن نسمع عنها واصبح يشار إلها بالبنان مثل صحفي الكترونى ..مدير موقع ..مشرف منتدي..خبير الرشاقة والتجميل..خبير الطهي الصحي..مستشار الافلاك والنجوم ..مستشار العلاقات العاطفية ..المدهش ان هذه المهن في حقيقتها ماهي إلا (اب ديت) لمهن قديمة كانت موجودة منذ القدم فمثلا خبير الطهي الصحي اب ديت لابلة نظيرة وخبير الافلاك والنجوم اب ديت لفلكي النجوم ومستشار العلاقات العاطفية اب ديت لقاضي الغرام ولكن في الماضي كانت مهن على الهامش ..من يعملوها يعملوها بجوار مهنتهم الاساسيه ففلكي النجوم يقدم هذا الباب مع عمله الاساسي في الصحيفة وكذلك قاضي الغرام حتى من توسع في الامر لم يكن مجرد قاضيا للغرام ولكن مثل المصلح الاجتماعي الذي يتحدث في المشاكل الاجتماعية المعقدة للاسر والناس –مثل باب اهرام الجمعه- وحتى هؤلاء لم يكن هذا عملهم وفقط فعبد الوهاب مطاوع كان نائب رئيس تحرير الاهرام ورئيس تحرير مجلة الشباب وبريد الجمعه على هامش عمله وكذلك الحال الان مع خيري رمضان ليست هذه مهنتهم الوحيدة والمتخصصة مثل هذه الايام .. المثير للضحك انه مع كثرة البرامج اصبحنا نري تضاربا في اقوال اصحاب المهنة الواحدة فعلى قناة تجد خبير الطهي الصحي ينهي الناس عن الطهو بالزبدة البلدي(وكان سعرها يعنى في متناول الجميع مش الكيلو بالشيء الفلاني اللي يكسر الضهر) لانها ملئية بالكلستلور تقلب على القناة الاخري تجد خبير اخر يقول لك الطبخ بالسمن البلدي هو الصحي ولكن بكميات قليلة فالسمن النباتي مليئ بالزبوت المهدرجة التى تضر بالصحة . تجد خبير الافلاك يقول عن برج الحمل صفاته كذا وكذا (تجده طالع بيه السما) على القناة الاخرى تجد خبير اخر يقول لك لا دة كذا وكذا(يطلعه كانه شيطان رجيم) الغريب ان اصحاب هذه المهن ينظرون لأنفسهم على انهم اوصياء على الناس والاغرب ان الناس يصدقون ذلك وينظرون إليهم على انهم هم المخلصون لهم فتجد واحدة من هؤلاء الخبيرات تقول للمتصلة انتي برج كذا وهو برج كذا مافيش بينكم تواصل وانا بحذر من الجوازة دي وتجد المتصلة تتحدث وكأنها تائهة في الصحراء وهذه هي الدليل الوحيد(حضرتك انا برج كذا وخطيبي برج كذا تفتكري ممكن تنفع العلاقة بينا) مما يجعلك تصرخ ايه الناس الفكسانة دي وايه الشعب الاهبل دة ..يعني يا جماعة لو حد بيحب حد هل سيتخلى عنه من اجل كلام الابراج؟ فمثلا انا من مواليد برج الحمل ويقال عنهم انهم يعشقون الحرية والاستقلال ولايخضعون للقيود فهل معنى ذلك اننى لو احببت واحدة من برج له نفس الصفات مثل برج الاسد اتخلي عنها حتى لا يحدث التضارب او هل معنى الكلام اني ماحبش حد من برج الحمل لاننا احنا الاتنين نفس الصفات وممكن يحصل بينا مشاكل كتير ؟ هل دة كلام عقل او منطق؟وهل اللي بيحب حد بجد ممكن يفكر في الموضوع ده من الاصل؟ الشيئ المثير للضحك مهنة المستشار العاطفى التى بدأت تنتشر هذه الايام واصحابها يظهرون في البرامج والفضايئات والاذاعات ويخصص لهم مساحة كبيرة في الصحف والمواقع وكأن (كوكو فرقع جيجي) و( وسوسو علشان تخلي توتي يغير ويحس بيها عاكست ميمي وتوتي ياعينى زعلان ومتكدر رغم انه بيحب عليها عشرة تانين ) اصبحت مشكلة وتحتاج لمستشار ليحلها –انظرور لحجم الكلمة مستشار عاطفي- في احد الايام كنت اشاهد برنامج على القناة الثالثة في التلفزيون المصري(برنامج شارع الشباب) كان ضيف الحلقة مستشار عاطفي لحل مشاكل الشباب واتصلت احدي النساء لعرض مشكلتها التى تتلخص في انها كانت على علاقة حب بابن عمها ولما نار الحب زادت بينهم كان يجب ان يطفئوها بعدها ابتعد ابن عمها عنها وعندما طلبت منه الزواج لاصلاح خطأه تهرب منها (انا ماقدرش اتجوز دلوقتى ولا اتحمل مسئولية بيت وزوجة واسرة ) وعندما مل من كثرة الحاحها سافر بعيدا وتركها وحدها مع الخطئيه, تقدم إليها بعدها رجل محترم وابن ناس-كما وصفته هي- اعترفت له بخطأها فسامحها وقال لها ( ننسى الماضي واحنا ولاد النهارة)وبالفعل تزوجت منه وانجبت طفلان وهي تعيش حياة مستقرة وبعدها بفترة جاء ابن عمها من السفر واخد يشاغلها ويطلب منها ان تترك زوجها لأنه مازال يحبها وطوال سفره كان يفكر فيها واكتشف انه لا يستطيع البعد عنها وكان سؤالها الخطير والفظيع لحضرة المستشار انها الان محتارة بين الحب القديم الذي دق قلبها وصحي فجأة بعد غياب وبين بيتها واسرتها وحياتها المستقرة (التفكير هيفرتك دماغي وبجد يا دكتور مش عارفة اعمل ايه انا محتارة قوي قوي ومش بنام طول الليل وبقيت عصبية ومودي وحش قوي) بالطبع مشكلة مثل هذه ليست لها إلا جملة واحدة مكونة من اربع كلمات اولها كلمة لطيفة مكونة من الفان بينهما حاء وبقيتها (يابنت التيت)وبالطبع كان ردالرجل-لأنه في مكان رسمي وامام الملاين- استعيذي من الشيطان وخلى بالك من بيتك واسرتك وابعدي نهائي عن الشخص دة ..هذا نموذج من نماذج المشاكل التى تعرض على المستشارون العاطفيون والتى ياخذون مقابل حلها الألاف المؤلفة ..وبناء عليه وبعد كل ما تقدم وبما اننا نعيش في العصر المباركي النظيف-النضيف قوي اللي من كتر نضافته نضفلنا جيوبنا وقطعها 100حتة- وبما ان الدكتور تنظيف نزل علينا بالكبيوتر
بتاعه اللي هيحل لنا كل المشاكل–واضح انه بايظ وعايز يتفرمت- وبما أن أول قواعد كمبيوتر دكتور نظيف التخصص وبما انى حاصل على ليسانس كلية الاداب قسم اجتماع يعنى حل المشاكل دي حبيب هارتي وملعبي وانا البرنس فيه فانا بقدم نفسي لكل مسئولي الصحف والمواقع والقنوات والبرامج كمستشار عاطفي دارس ومتخصص وبأعلن عن قيام مكتب (درشاوي لحل المشاكل العاطفية )وهدير المكتب دة من قهوة الحرية بعيدا عن جلسات هؤلاء الذين يطلقون على انفسهم مثقفين في البورصة والبستان – اللي مابناخدش منهم غير اللوكلوك والرط وبس- وكأبه قهوة التكعيبة الخنيقة.وهيكون نظام العمل كالتالي:
20جنيه مصاريف سماع المشكلة
30جنيه مصاريف التفكير في المشكلة وايجاد الحل
العميل يقوم بدفع كل المشاريب
ولو حد قال انى كدة مغلي والحاجات دي هيكون ردي (حضرتك مش اقل من شاشتك) -راجع المقدمة-
وايمانا مني بالتكافل وبمناسبة افتتاح المشروع فسوف اخفض المصاريف ل30جنيه فقط
ولو الموضوع مشي معايا هعمله موقع –بفلوس واشتراك مافيش اي حاجة مجانى- وبعدها خط 0900(خط درشاوي دليليك لحل كل مشاكلك العطفية) اماالسادة اصحاب مشاريع (معلش يا استاذ مصطفى اصل احنا شباب وبنبدأ ومحتاجين لحضرتك معانا)و(احنا بنستأذن حضرتك تكون معانا ولما المشروع يكبر هندفع فلوس حضرتك) يمتنعون يمتنعون يمتنعون .. ليس فقط لأن العمل يعنى وقت ومجهود والاثنان لا يساوا إلا المال وليس فقط لأن لا أحد يقدر التطوع ولكني لأنني ايضا لست اقل من هؤلاء الذين يأخذون على هذا العمل الكثير والكثيرجدا

16 comments:

أحــوال الهـوي said...

كل سنه و انت طيب يا ابني الجميل


و صديقي العزيز

و ربنا يحقق كم امانيك و يرزقك المغفرة و العتق من النار


تحياتي

P A S H A said...

كل سنة وحضرتك طيب وبألف خير وصحة وسلامة إن شاء الله
:)
رمضان كريم

فاتيما said...

يا لهوى يا مصطفى
ربنا يسعد قلبك

فطستنى م الضحك

بس انتا كدا
ليك عندى 30 جنيه يا فندم
اجرة سماع مشكلتى
آخر مرة و احنا مروحين
م التبرع بالدم ..صح ؟!!


ايد دا انا جاية اقرى البوست
و لا جاية أدفع فلوس ؟!!!


لا انا جاية اقولك
كل سنة و انتا طيب
يا الطيابة ذاتها


و حكاية
ان واحدة تكلم حد تانى
غريب عنها تماما عشان تسأله
تسيب خطيبها
و لا جوزها او تكمل معاه ؟!!

هيافة ما بعدها هيافة

بس دى فضائيات يا صفصف
و ساعات فاضية
لازم تتملى بكلام فارغ
و اعلانات ع الكلام الفارغ
و للأسف بتستقطب الفارغين زيهم
و كتير منها بيكون متفبرك كمان
بس ضحك ع الدقون
و تصدير صورة
بغرض الالحاح لحد ما تبقى عادى


نصيحة اخوية
تنزل أسعادك شوية يا درشاوى
عشان بس تكسب زبون ف الاول



و لو عاوز سوكورتيرة
انا موجودة اهو
بعد الضهر
و هاخد نسبة
و اجيبلك كل المشاكل العاتيشفية
لحد عندك يا عم
و لا اعلانات و لا تكلف روحك

و معلشى بقى
برج الأسد من انسب الابراج لسيادتك
لأنها عكسد ف حاجات كتير
و هتكملك و تعملوا توازن
مش العكس



ممكن تسلملى على الحاجة
و تقولهها
رمضان كريم عليها
و ربنا يديها الصحة و تفرح بيك
و بعيالك بقى عن قريب ؟

طيييييييييب

كل سنة و انتا بالف خير يا مصطفى
يا الطيابة ذاتها

۩

mostafa rayan said...

كل سنة وانت طيب وبخير
ربنا يتبل منك دعوتك الجميلة دي
ويحقق لك كنت كمان كل ما تتمنى

باشا
وانت طيب يا جميل وبخير وسلامة

فاتيما
ازيك يا جميلة كل سنة وانتي طيبة وينعاد عليكي بالخير
بصي بقي يا ست الكل ووردة النت كله بالنسبة لعاطفياتك انتي بالذات فانتي سبشيال كيس كل عاطفياتك فور فري ..اه المكتب مكتبي وانا حر بقي ..بالنسبة لشغلك معايا ماشي يا ستي خصوصا انك هتوفري لناالزباين كمان بس بلش تظهري حنيتك علشان نعرف نتعامل مع البشرية دي
بالنسبة لموضوع الابراج فحضرتك انا برج الحمل فلو تشوفي لنا ايه اكتر النساء الملائمة له من الابراج الاخري فتبقي خدمتيني واهو هحط الموضوع في الاختيار رغم انه القلب لمابيدق يا فاتيما مش بتفرق معاه لا اسد ولا عذراء
انا معاكي ان فضح الاسرار على العلن تفاهة واضح اننا بقينا خبراء في التفاهة وبقت مسيطرة علينا لدرجة ان واحدة جاية تسال اكمل مع جوزي وعيالى ولا اتطلق وارجع لواحد ضحك عليا وسابنى في اكتر وقت كنت محتاجة له فيه
من عنيا هسلملك على امي وان كنت مش عارف هي ممكن تفرح امتا بيا ..ربنا يقدر لنا الخير كلنا

salwa said...

السلام عليكم اخ مصطفى
رمضان مبارك
و الله يحسن الحال باحسن الاحوال
سلام

همس الاحباب said...

*كما تعودنا منك على فعل الخير
ندعوك للمشاركة فى يوم خير جديد
التفاصيل هنا
http://kouskoza7.blogspot.com/2010/08/blog-post_12.html
و هنا
http://hams07.blogspot.com/2010/08/blog-post.html
كل سنة وانت طيب
ورمضان كريم

رحاب صالح said...

لالالالاء برج الاسد محدش يتكلم عنه اه معلش بقي ده برجي انا وبلا فخر ...برج العباقرة ...والرومانسية والللامنطقية وكل حاجة كدة غريبة يمكن تلاقيها ف البرج ده يمكن انا مش عارفة بس برغم اني برج الاسد في حاجات ف شخصيتي مش فيه خاااالص
كل سنة وانت طيب ورمضان كريم
انا بقي هفتح انا كمان مستشارك العاطفي وانافسك ...هههه
رمضان كريم وربنا يسعد ايامك

mostafa rayan said...

سلوى
كل سنة وانت طيبة وبخير
ربنا يتقبل دعوتك الجميلة دي

خالد
ان شاء الله اكون معاكو ويكون يوم جميل ومميز


رحاب
انا ماقوتش حاجة عن برج الاسد دةاناحتى قلت بينه0 وبين الحمل صفات كتير مشتركة وحتى فاتيما بتقولك من اكتر الابراج توافق مع بعضيتهم يعنى
اما حوار مستشارك العاطفي اللي انت حابة تفتحيه فبللاش نقطع على بعض غير كمان ان انا صاحب الفكرة الرئيسية بالصلاة على النبي يعنى
هههه
كل سنة وانتي طيبة ويارب يسعد ايامك

تيمور said...

كل عام وانت بخير

تحياتى

شمس النهار said...

ازيك يارب تكون بخير

كل سنه وانت طيب

رمضان كريم
:))

KHALED said...

كل سنة وانت طيب
ورمضان كريم

اقصوصه said...

رمضان كريم

وكل عام وانتم بخير :)

Sameh Ezzat - (خواطر خاطر) said...

يا عم العاطفي .. عايزين نجوزك بقا لحسن انتا خطر علي نفسك

بنت الغربة said...

كل سنه وانت طيب وعيد سعيد عليك
ولو سمحت 20 جنيه حق انى عيدت عليك
اه ماهى كل حاجه غليت دلوقتى اشمعنى
الاستشارات العاطفيه وفك الشاشه
تحياتى لقلمك الجميل

richardCatheart said...

ازيك يا مصطفى كل سنه وانت طيب وبخير

Aliaa Art said...

علي فكرة موضوع مستشار النفسي مهم فيه ناس كتير محتاجاه بس مش المشاكل الهايفه دي فيه ناس عندهم بلاوي لازم يتكلموا مع حد بيفهم وعاقل بما فيه الكفاية ولو علي التريقه علي كده الدكتور النفسي اللي دارس قد كده ليه بيدفعوله بس علشان الفضفضة لو جربيت نفسيتك تتعب بمعني الكلمة حتعرف احساس الناس دي وبيدفعوا كتير بس عشان حد يسمعهم وعلي فكرة حتي الدكتور النفسي مش بيقول حاجة مفيدة قد اللي بيقدم كلامه بناءا علي تجارب حية مش قصدي حاجة بس حبيت اقول رأيي في ان فيه ناس مش بتلاقي حد يسمعها بجد غير الناس الهيفا دي اصلا اللي بيدفعوا فلوس بيبقي مصايبهم اكبر من كده بكتيييير