Saturday, October 31, 2009

تصورى .. قصيده شعر جديده


تصورى
كنت عايز اكتب قصيده عن حكايتنا
لكن لاقتها احقر من انى اتكلم عليها
هويتك لكن لاقيتك غبيه وعقيمه
مع السلامه
ماليش معاكى حتى ذكريات ممكن ابكى عليها
ماتستهاليش حتى حبر القلم والاوراق
والدقيتين اللي هقعد اكتبك فيهم
ماتستاهليش اشغل دماغى علشانك
ماتتستاهليش حتى الكلمتين اللي هشتمك بيهم
يادوبك كليك يمين دليت وانساكى طول عمري
ضغطه واحده ونعشك يخرج
من حياتى ومن قلبي
وماتفتكريش انى ممكن ابكى عليكى
ولا اشكى بسببك للناس همي
انتِ مش اكترمن سيجاره شربتها
ودوست عليها برجليا ونسيتها خلاص
ومستحيل أرجع ابص عليها
وإلا هبقى مسخه قدام الناس
وماتفتكريش انى هقولك فى الوادع
هتندمي بكره عليا والكلمتين دول
تصورى .. ماتستاهليش حتى انى اقولهملك
ماتستاهليش غير انى اقفل بابى فى وشك
واقولك روحى الله يساهلك
لكن بجد انا لو ندمان
ندمان على الوقت اللى راح معاكى
لكن بردومارحش هدر
اتعلمت ماضيعش وقتى
مع قلب قاسي زي الحجر
انا كنت بالنسبه لك شمس وربيع
انا كنت مطر
يدفى روحك ويروي ارضك الصحرا
ينبت شجر
انا كنت حياه
وانت خفتِ من الحياه
فموتى لوحدك ماتستاهليش
حتى من بعد موتك
اقول عليكى كلمه اه

7 comments:

د. ياسر عمر عبد الفتاح said...

بص يا درش
هقولك رأيي بصراحة

احم
مش حاسسها شعر خااااااالص
حاسسها شوية كلام من واحد مخنوق ,, لواحد متستاهلش

Kiara said...

يالهوووووووووووي ايه كل دا ياابن منطقتي

اهدي كدا وروق

مصطفى ريان said...

د. ياسر
من غير احم ولا حاجه فعلا الخنقه هى الحاله اللي تصف شعورى وانا بكتبها
منورنى يا جميل دايما

- كيارا
هههههه
حاضر

donya said...

صباح الخير

عارف انت حزين علي نفسك لكن كمان حزين انها طلعت كده
ولوانت تقصد الكلام ده فعلا ماكنتش كتبته واعلنته

(يادوبك كليك يمين دليت وانساكى طول عمري
ضغطه واحده ونعشك يخرج
من حياتى ومن قلبي)


لوكان فعلا كليك يمين دليت وخلصت
بس هي مش كده دي مشاعر طلعت منك في لحظة صدق اوي
كون المستقبل ماكنش يستهلها او قدها
دي مش غلطتك

والجرح اللي بيتساب جرح ليك انت
القصيده دي صرخه جامده من جوه قلبك
اهي ريحتك شويه
زي المسكن اللي بتخده لما يكون عندك صداع

بس في ناس فعلا ماينفعش غير انك تدلتهم من حياتك ورغم الالم انت الكسبان

مالهمش في الطيب

*تحياتي

ميرا ( وومن ) said...

ايه ده صلي علي النبي يا مصطفي يخرب بيت اللي يزعلك يا شيخ

ادي نتيجة اللي يقل اصلة مع كاتب طيب لما هي متستاهلش كاتب اصلن ليه ؟

الناس اللي زي يتنسوا بس

salwa said...

السلام عليكم اخ مصطفى
اولا اسفة للتاخير
والادراج رائع و يا رب ما تطول هذه الحالة
و للنظر دائما بتفاؤل
لك اطيب التمنيات
سلام

صفــــاء said...

ايه دة يا درش
هو اولا طبعا بلاش تقول شعر
ثانيا انت مشردها خالص وطلعتها ولا جمالات كفته
ما تضربها قلمين احسن
استهدى بالله كدة يا درش
هستنى لما تكتب حاجه راقيه وجميله زى عادتك
تحياتى لك