Wednesday, December 10, 2008

كل سنة وانت طيب يا درشاوي + تاج العيد

كل سنة يا اصدقائي وانتو طيبين ويارب تكونو جميعا بخير

النهاردة تالت يوم العيد من يومين يبقي انا كدة كملت سنة تدوينة كاملة بالحساب الهجري

ففي العام الماضي وفي اول يوم العيد وبعد ان رحل اقاربنا دخلت على بلوجر وبدأت اول تدويناتي ورغم إن الأنسان بطبعه مش بيحب يحس انه بيكبر لكني فرحان إني معاكم وبكبر وسطكم ودي فرصة اني اتكلم معاكو شوية على قصتي مع التدوين طبعا انا اتجهت للتدوين علشان انشر قصصي واشعاري وابداعاتي من حق اي مبدع ينشر ابداعه للناس وبما انه مكانش فيه فرصة للنشر الورقي فكرت في النشر الألكتروني دة
كنت بكتب في بعض المنتديات لكني كنت محتاج مساحة خاصة ليا اكتب فيها لحد ماتعرفت على التدوين ... اتعرفت عليه خلال مدونة غادة عبد العال ماكنتش اعرف انها مدونة كل اللي اعرفه انه كان موقع بنت بتتكلم فيه عن عرسانها وكل لما بدخل فيه بموت على نفسي من الضحك لحد ماعرفت ان دي اسمها مدونة وبدأت التتدوين
( وبالمناسبة دي بشكر بنت مصرية اللي استفدت جدا من النموذج اللي كانت مصمماه لمعرفة التدوين )
- كنت فاكر اني لما انزل اول بوست هلاقي التعليقات بقي بتنهمر عليا زي المدونات الأخري لكني فضلت حوالي 3 او 4 شهور ماحدش بيدخل عندي غير اعداد قليلة جدا منهم (رئيسة حزب الأحلام اللي بشكرها جدا وبقولها كل سنة وانتي طيبة وبخير )
اللي كانت من اول الناس اللي دخلو عندي رغم اني كنت بدخل مدونات كتير واسيب تعليقات هنا وهناك لكن ماحدش كان بيدخل.. مابدأتش اتعرف غير بعد مانشرت قصتي الشهيرة ( الحل الأمثل ) بدأت التعليقات تنهمر عليا وكأن المدونين فجأة التفتو لمدون اسمه مصطفي ريان لدرجة انها وصلت ل 32 تعليق طبعا العدد دة بالنسبة لواحد كان اخره 3 ولا 4 يعتبر انجاز كبير جدا لكن اللي كان بيميز القصة دي انها خلتني اتأكد إني بكتب حلو لدرجة ان الناس كلها افتكرت ان دي قصة من الواقع واني بحكي عن نفسي رغم إن بطل القصة اسمه طارق ورغم اني كنت مستمتع باللعبة دي لكني اضطريت اقول للناس اني عازب ولسة مش متجوز ولا حتى خاطب
-لكن لوفي سؤال التدوين اعطاني ايه ؟ طبعا فرصة اني انشر ابداعاتي وقصصي واعرف رأي القراء فيها
- كمان قدرت اتعرف على نماذج مختلفة من الشخصيات والتفكير
- كمان عرفني على ناس جميلة جدا باعتز جدا بمعرفتها وصداقتها وعلى سبيل المثال لا الحصر صديقتي الغالية والعزيزة جدا صفاء جلال واخي تايه في وسط البلد واخي وليد (عارفة مش عارف ليه ) واخي الذي اعتزل التدوين آدم وضي القمر وكاميليا اللي دايما بيقولو عني كلام اكبر مني بكتير ومحمد غالية واحمد علام وخالد وتنفيس مالكش فيه ومحمد ابراهيم وخمسة فضفضة واحمد سووو واحمد العجوز ومفقوعة مرارتي من حماتي ودعاء مواجهات وجارتي وبنت منطقتي العزيزة مولان ومحاسن صابر اللي ساعدتني من غير ماتعرفني معرفة شخصية واخي المهاجر وسمر المنوفي وحسن ارابيسك والأديبة الجميلة رباب كساب وابراهيم عادل وصبرني يارب وكوكب آبي واحمد سمير وناس كتير تانيين
- لكن لوفي سؤال التدوين اخد ايه مني ؟ فهو اخد وقت طويل كان بيروح مني في القرأة علشان كدة انا بقول لكم وبقول لنفسي اننا لازم ننظم وقتنا ومانخليش التدوين يسرق عمرنا ولا ياخدنا من ذلك الساحر المسمي كتاب
كل عام وانا وانتم بخير وسعادة وتقدم دائم
.................................
تاج العيد
التاج دة وصلني من العزيزة سالي ( حاجات جوايا )
1- ماذا يمثل لك العيد ؟ وما أكثر شئ يبهجك في مظاهر العيد
العيد فرحة طبعا واكتر شيء بيفرحني فيه اجتماع الأهل مع بعضهم البعض
2- اوصف لنا طقوسك في العيد .. من ليلة العيد لآخر يوم ؟
ليلة العيد بصوم واتفرج على مناسك الحج في عرفات بروح اول يوم اصلي واستني قرايبي بعدها بخرج مع اصحابي
3- احكي لنا أطرف موقف حصلك في العيد ؟
صراحة مافيش شيء معين اقدر احكيه يمكن كنت خارج مع اصحابي نروح سيتي ستارز سواق الميكروباص كان مشغل شريط اغاني كله نكد ( دقيقة حداد واعتبره قلب وراح وكل يوم نتلاقي) وانا مش قارد اتحمل جرعة النكد المكثفة دي اخر مازهقت طلبت منه يشغل اغاني تانية قلتله كل سنة وانت طيب احنا في العيد ) قالي ياراجل عادي خلينا ننكد شوية كمان في واحد صاحبي مرة بعد صلاة العيد بعد ماعيدنا على بعض قالي تعالى بقي روح معايا علشان اديلك شريط عذاب القبر .. قلتله يا راجل حرام عليك عذاب القبر ايه في العيد
4- بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
اهلي بيجولي .. بهني اصحابي
5- مين أول حد تزوره أو تكلمه في التليفون /الموبايل عشان تهنيه بالعيد ؟
مش حد معين
6- إيه الفرق بين العيد الحالي .. وعيد (أيام الطفولة )؟
ايام الطفولة كان في انطلاق اكتر
7 - كلمنا عن ذكرياتك في العيد
ذكريات حزينة ابويا الله يرحمه مات اول يوم العيد الصغير سنة 2000وبدل ماروح السينما ( كأي مراهق لم يبلغ عامه التاسع عشر بعد ) روحت القرافة .. اكتر من حد عزيز عليا مات في العيد بلاش موضوع ذكريات العيد دة علشان مانقلبش المواجع
8-تفتكر الحياة من غير عيد .. هتفرق كتير ؟؟؟
اه طبعا العيد فرصة للألتقاء الاهل اللي اغلب الوقت مش بيقدرو يشوفو بعض العيد فارق جدا طبعا
9- إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟
( بعدد خطوات نبينا من مكة للمدينة يجعل العيد سعيد عليكم وعلينا ) جاتلي من بنت خالتي
10- احم احم .. لسه بتاخد عيدية ؟؟ من مين ؟؟ وبتديها لمين ؟
باخد آه من امي وجدتي وخالاتي واخوالي .. لكن لسة مش بادي لأن ولاد اولاد خالي لسة صغيرين ربنا يكرم ويكبرو وانا اتجوز واخلف وادي للعيال كلهم
11- إيه رأيك في التاج ؟
حلو ومختلف
12- تحب تمرره لمين من المدونين ؟ اذكر على الأقل 10
اي حد يحب يجاوبه يتفضل

27 comments:

A.SAMIR said...

مصطفى.....ازيك؟
كل سنة وانت طيب يا باشا وكل سنة ومدونتك الجميلة تشع ابداعا وتألقا دائما وابدا ان شاء الله
بالنسبة للتاج فأجاباتك اكثر من رائعة
ربنا يديم عليك الاعياد
تحياتي

مولان said...

انا جيييييييييييييت ياابن منطقتي

مولان said...

كل سنه والمدونه بخيييييييييير

الحمد لله التدوين مسرقش مني الكتاب

لسه لان الدراسه هي اللي ربطاني بالكتاب مش ينفع نت بس

كل سنه وانت طيب ياابن منطقتي


وربنا يرحم باباك ويدخله فسيح جناته

في امان الله

صفـــــــاء said...

.
كل سنه وانت طيب يا مصطفى وكل سنه وأبداعات كمان طيبه
والله انت كمان طيب وجميل وغالى عندى جدا
ودايما تكسفنى وتحرجنى بكل رقتك وذوقك دة

أن شاء الله دايما بخير وسعادة وتتهنى وعاوزة ابارك قريب على احسن الاخبار

مش هقول السنه الجايه على عرفات لسه بدرى شويه
بس ربنا يكتبهالك يا درش
تعيش وتعيد والمدونه موجودة معانا
كل سنه وانت طيب
.

mostafa rayan said...

احمد سمير
وانت طيب يا قمر وربنا يوفقك يا صاحبي وتنجح كمان وكمان

- مولان
يعني حدائق حلوان واهلها وكل الناس
الحلوة اللي منها
وانتي طيبة يا قمر وربنا يعيد علينا وعليكي الأيام بالخير
بس يا مولان لازم تحبي القرأة في المجالات الأخري مش الدراسة بس القرة حياة يامولان
لك مني كل التحية ياجارتي العزيزة

- صفاء جلال
صديقتي واختي الغاليةالعزيزة جدا وزميلة الكفاح في مشوار التدوين
ربنا يكرمك يا صفاء ويسمع منك ويكتبلي الحج يارب السنة الجاية علشان احج وانا لسة صغير وبصحتي
وان شاء الله تباركي للأخوكي على خير كتير جاي
وانتي كمان ربنا يكتبلك كل الخير انتي انسانة جميلة وصاحبة صاحبها بجد
تسلميلي وتعيشي يا قمر

مولان said...

اكيد يامصطفي في الفتره الاخيره ابتديت اقرا في الادب

واحلي سلام لاهل الحدائق كلهم

mohamed ghalia said...

كل سنة وانت طيب حبيب قلبى
شرف ليا غنك تذكرنى فى الناس المفضلين عندك
وربنا يعلم مدمنتك وشخصيتك بحبهم أد ايه
ربنا يزيدك دايما
كل سنة وانت طيب
دمت فى حفظ الله
أخوك محمد

Khaled said...

كل سنة و انت طيب يا مصطفى و انت بجد بتكتب كويس و أنا شخصيا باحب أقرالك

كل عام وانت بخير ياصاحبى

محمد ابراهيم said...

كل سنة و انت طيب يا صحبي
و عقبال مية سنة
و اشكرك جدا و ليا شرف كبير انك تعتبرني صديق و ان لسه علي قدي
تحياتي
محمد

mahasen saber said...

كل سنه وانتا منور التدوين يا مصطفى يا مبدع
والبلوجر كسب كيبورد مبدع زى كيبوردك كده

وانتا من الشخصيات اليى الواحد بيتشرف وبيفرح بمعرفتها

ربنا يوفقك ويصلحلك حالك
وينجحك فى كل ما تسعى فيه

خمسة فضفضة said...

السلام عليكم ورحمة الله وبركاته

كل ينة وانت طيب يا مصطفي وعقبال ميت سنة تدوين

ويارب السنه الجايه تكون حققت كل اللي بتتمناه

حلوه اجابات تاج العيد

فعلا العيد فرحه وسعد نبيهه كمان

الله يمسيها بالخير بقي طنط صفاء

:))))))))))

ضــى القمــر said...

كل عام وانت بخير يا مصطفى
ويارب يكون عيد سعيد عليك يارب

وجميل جداا أنك ذكرت قصتك مع بدايه التدوين . وذكرتها بأسلوب شيق جدا :)

شكلى هغش منك الطريقه واذكرها فى احتفالى بتمام علم على تدوينى .. ههههه

وبشكرك جداا جدا على ذكرك لأسمى .. وربي انك تستحق كل خير يا مصطفى .
وتستحق أكثر مما اقول يا مصطفى .. لأنك بحق كاتب متميز جدا جدا من رأيى المتواضع .

وعلى فكرة جميل جدااا التاج ده .
وتسلم على اجاباتك يا اخى .
.
أجمل تحيه نابعه من القلب لك يا اخى
عيد سعيد يارب عليك .. وعلى كل احبابك :)
خالص احترامى لشخصك

kochia said...

والله فعلا التدوين بيسرق الوقت
بس ممتع انك تكتب او اقرا
او تتفاعل مع الاخرين

وكل سنة وانت طيب تدوينيا

تحيات

كاميليا said...

مصطفى

كل سنة وانت طيب
عيد سعيد

وكل سنة وانت طيب
بمناسبة مرور عام هجرى على مدونتك
ربنا يبارك لك فيها يارب
وتكون نقطة انطلاقك نحو الابداع الفهنى المنشور فى عالم الادب

انت تسحتق كل الخير مصطفى

دمت جميل كما انت

mostafa rayan said...

- مولان
ودة شيئ يفرحني جدا ماتخليش التدوين يسرق منك الكتاب المقرء فلا سحر يقارب سحر الكتاب
دمت بكل الخير ياجارتي العزيزة

- محمد غالية
وانت طيب يا جميل
ربنا يحفظك ويكرمك يا محمد

- خالد
طبعا دي شهادةاعتز بيها من فناجميل زيك
كل سنةوانت طيب يا خالد وربنا يقدرلك كل الخير

- محمد ابراهيم
دة الشرف ليا انا
كل سنةوانت طيب يا جميل ودايما في تقدم

- محاسن صابر
ربنا يكرمك يا محاسن والله انا فرحان اني اتعرفت عليكي انتي انسانة حلوة قوي وتستاهلي كل الخير
دمت في خير يا محاسن

- خمسة فضفضة
وانتي طيبة يا دكتورة
ان شاء الله السنالجاية ستحمل خيرا كثيرا
للأخوكي مصطفي وان شاء الله رنيكرمنا كلنا
دمت بكل الخير يا دكتورة

- ضي القمر
وانتي طيبة يا قمر وربنا يارب يتمم لك الخير
وبالنسبة لطريقةالتدوين اتفضليها على الرحب والسعة هدية مني للأحلى قمر
اشكرك لتمنياتك الطيبة لي وان شاء الله غدا سيحمل خيرا كثيرا لي عندما يتحقق فعليا سوف اخبركم به لتفرحو معي
دمت بكل الخير يا صديقتي العزيزة

- كيوشا
طبعا التدوين حلو بس الأحلي الكتاب المقروء ذلك السر الذي لا يضاهيه سحر
كل سنة وانتي طيبة وبخير
ويارب في تقدم مستمر

- كامليا
ربنا يكرمك يا كامليا
وانتظري اخبارا سارة قربية جدا بالنسبة للأخوكي مصطفي
دمت بكل الخير والسعادة يا حلى كامليا في الدنيا كلها

تايه في وسط البلد said...

الاخ العزيز مصطفي ريان

السلام عليكم ورحمة الله وبركاته

كل سنة وانت منور الانترنت بكتاباتك وابداعك ومدونتك واخده حقها ووضعها الطبيعي

انا تشرفت بمعرفتك جدا ولا ازيد

اقصوصه said...

مبروك التاج

اجابات جميله

وكل عام وانت بخير :)

مصطفي ريان said...

تايه في وسط البلد
وانا يا جميل اتشرفت اكتر بمعرفتك
ربنا يوفقك يا صاحبي ومن تقدم للأخر

- اقصوصة
الله يبارك فيكي وانتي طيبة

Desert cat said...

النموذج الى كانت مصمماه بنت مصرية فى بدايات التدوين افاد ناس كتير جدا وانا منهم
بالنسبة للتاج اجابتك قيمة ياباشا
تحياتى

بنت الغربة said...

كل سنه وانت طيب - وشكرا على مرورك عندى وانا حبيت اسلم عليك قبل مارد على تعليقك عندى -مش عيب الواحده تعمل عمليه علشان تبقى حلوة فى عين جوزها -لكن العيب انها تعملها علشان تبقى شبه واحده جوزها بيحبها - ساعتها مش هتعرف نفسها -وهيجيلها يوم تكرهها
تحياتى

mostafa rayan said...

قطة الصحراء
طبعا نموذج بنت مصرية افاد ناس كتير
كل سنة وانتي بصحة وخير

- بنت الغربة
كل سنة وانتي طيبة
انا متفهم وجهة نظرك
بس رأيي زي ماقولتلك مش عيب ان الأنسان يدلع نفسه ويهتم بيها
لك كل التحية والود

أحمد حشمت said...

كل سنة وانت طيب قوي

مصطفي ريان said...

- احمد حشمت
وانت طيب يا جميل قوي قوي

محمد عتلم said...

كل سنه وانتا طيب يا عم مصطفى بمناسبة العيد وبمناسبة اول سنه تدوين وصباح الفل

mostafa rayan said...

محمد عتلم
صباحك قشطة يا جميل
ويارب دايما تكون بخير وهنا

!!! عارفة ... مش عارف ليه said...

كل سنة وأنت طيب يا درشاوي

مرتين الأولى علشان عيد ميلادك التدويني الأول
والتانية علشان عيد الأضحى

ومعلش سامحني على التقصير بس أنا كنت جيت والله قبل العيد لكن مع الأسف مقدرتش أعلق عندك على الجزء التاني من القصة
لأن الموضوع كان عايز مخمخة في الرد
وطبعأً مينفعش أرد عليك رد دبلوماسي وأكبررر معاك

والحمد لله جت المناسبة دلوقت علشان أقولك رأيي في الجزء التاني من القصة
وكنت قولته هناك وهقوله هنا تاني

-----------
هناك بعض الإعمال الفنية تظهر خلالها شخصيات عامة وبأسمائها الحقيقية

مثل حسين فهمي في فيلم "مافيا"لشريف عرفة

ويحيى الفخراني في فيلم "الصرخة" لمحمد النجار

وأعتقد أن تم إضافة مشهد للأحداث بحضور د. هبه قطب صاحبة برنامج "كلام كبير"

وبالتالي سيكون لحضورها دور بارز في تغير سير الأحداث وسيكون تحول مبرر ومقنع

-----------------
ده إقتراحي يا درش ... وإنت أدرى بأبعاد الشخصيات أكتر مني


وتقبل تحياتي
وليد

مصطفي ريان said...

اخي العزيز وليد
كل سنة وانت طيب وسعيد وبخير
شاكر ليك حضورك ادائم واقتراحك اقتراح جميل ومنطقي برو
دمت بكل الخير والسعادة يا اخي