Tuesday, June 17, 2008

بشتاق لعنيكي ... اغنية لمصر

تحديث مهم جدا
دة يا جماعة لينك مدونة صديقي المبدع الشاب محمد حلمي مخلوف
( لمحة من حياة الكائن صفر)
makhlof-kaensafr.blogspot.com
واللي كتب قصة ( بين عربات القطار 999)
اللي عجبتكم واثنيتوا عليها
ياريت ياجماعة بعد ماتقرؤ البوست دة وتعلقوا عليها تروحو تزوروا محمد وتقرؤا أول قصصه في المدونة ( من اجندة الروائي )
مرة تانية مبروك يا محمد وفي انتظار الأبداعات الجامدة منك .
.........................................
اولا : وقبل كل حاجة عايز اقول ان يوسف شاهين ياجماعة في فرنسا دلوقتي للعلاج لازم كلنا ندعي له ربنا يشفي عنه وعن كل انسان مريض وزي ماقولت قبل كدة نختلف حول افكاره او حوله هو كشخص لكن مانقدرش ابدا نختلف علي انه بيحب مصر قوي ... ربنا يشفي عنك ياشاهين وعن كل انسان مريض .. قولو امين
..............................................................
بشتاق لعنيكي
بشتاق لعنيكي في الغربة
بشتاقلك ياللي وحشاني
بعيد عنك دي الحياة صعبة
ونفسي ارجع ليكي من تاني
مشتاق لحضن امي
مشتاق لحنان ابويا
مشتاق لعيون اختي
مشتاق لهزار اخويا
مشتاق لشلة اصحابي
والخروج والسهر علي النيل
نشوف فيلم سينما
وناكل ايس كريم
ياما في الليل سهرنا
وقولنا كلام كتير
وبسرعة الوقت فاتنا
وحان وقت الرحيل

بيني وبينك بعد ومسافات
لكني فاكر كل الحاجات
ليه غربتيني وخلتيني ابات
بعيد عن حضنك
اللي دايب فيه
انا لما لاقيت الجرح زاد
ماكانش حل غير البعاد
عايش وحيد وفي قلبي اهات
بس قوليلي
كنت اعمل ايه
وزعلانة ليه لما بلوم
بلوم عليكي لأنك امي
مش سهل اعيش منك محروم
وانتي بتجري جوة دمي
............................................
ملحوظات حول الأغنية
1- هذه الأغنية مهداه لكل من يتهمنا نحن مواليد مابعد حرب اكتوبر بعدم حب الوطن هذه الأغنية هي الموجز اما التفاصيل ان شاء الله في البوست القادم
2- لو حد بيلحن واعجب بكلمات الأغنية وحب يلحنها يقولي الأول علشان نقدرنظبط مع بعض
واخيرا لكم جميعا كل محبتي واحترامي .

58 comments:

أم فريده said...

شوفت واضح ان زياراتى هتكررلا ومش هتكرر وبس وكمان التعليق الاول
وربنا يشفى يوسف شاهين
الكلمات جميلة تصور انى افتكرتها بجد اغنية لحد بس بلاش نعاكس بنت حلوة دى غض البصر يا استاذ هههههههه
وعلى فكرة ازاى احنا مش بنحب البلدى لو مش بنحبها مكناش تعبنا عشان اللى بيجرى فيها ولا كان همنا انا بعشق البلدى لما بتخنق على الاقل بمشى فى شوراعها طبعا بليل واحس انى طايرة مع النسيم
وعلى فكرة انا اخدت كتير من البلدى ومش كرهها ابدا
عارف مين قال ان مفيش شغل وفى بطالة لاء دة مفيش تعب ولا سعى بجد دا انا اول ما خلصت الكلية وقبل ما تطلع النتيجة كنت اشتغلت من غير واسطة بس بشوية تعب يعنى لما قدمت فى الشغل عملوا 3 امتحانات ذاكرت عشان انجح فيهم انا .
وتصور انى قدمت فى مدرستين ونجحت فى الاتنين يعنى بشوية تعب ومجهود وتوفيق من ربنا وصلت
البلدى جميلة اوى دة كفاية ان احنا منها عشان نحبها وعلى راى حسين فهمى فى فيلم مافيا _اصل انا متابعة جيدة للافلام_انت بتحب والدتك عشان هى والدتك مش احس ست فى الدنيا دة كفاية انها والدتى عشان تكون احسن ست فى الدنيا

وتصبح على خير بقى انا هقوم اصلى وانام وتحياتى

رندا said...

ملحوظات حول الأغنية
1- هذه الأغنية مهداه لكل من يتهمنا نحن مواليد مابعد حرب اكتوبر بعدم حب الوطن هذه الأغنية هي الموجز اما التفاصيل ان شاء الله في البوست القادم

..................

عارف الكلمة دى بجد استغربت ليها جدا
هو الى بيحب مصر
لازم يكون من مواليد الحرب
الحب دة بيتخلق مع كل حد
فى اجيال كتيرة قوى زيك
وبيحبوا مصر جدا
انا ولادى منهم
وحتى قلت مرة لابنى
تسافر برة مصر ولا تعيش فيها
رد قالى
اعيش فيها حتى لو مش فيها
اى شئ يتحب
برضة هحبها وهفضل احبها
ومش مسافر انا قاعد ليهم فيها

كلمة مهمة قوى انت قلتها
وتنبية للكل
ان لازم يحبوا مصر اكتر

دمت بكل خير

رندا

خمسة فضفضة said...

السلام عليكم ورحمة الله وبركاته

ماشاءالله علي الابداعات

وادينا سمعنا الموجز وفي انتظار التفاصيل
بس ما تطولش علينا

سلام

محمد حلمي مخلوف said...

جميل جدا مشاعرك طبعا كلنا بنحب البلد دي الاول لازم نسأل احنا عملنا لها ايه مش هيه عملت لنا ايه
علي فكره يا مصطفي ومتزعلش مني
انت في القصه احسن بكتير مش لازم تكتب كل الفنون بس يا ريت تبرع في احداها
وبعدين يا عم انت فينك مش عارف اشوفك
سلام لكل الناس
ولخمسة فضفضه اللي الظاهر زعلت مني لما قلت ان المدونيين تنقصهم الثقافة بس انا قلت الكلام ده لأني بحب المدونيين ونفسي يكونوا احسن ناس ويطردوا انصاف الموهوبيين من الساحات

mostafa rayan said...

الأخت الجميلة دعوةللحب
اهلا بيكي تاني وتالت وعاشر ومليون
بصي انا عايز اقولك حاجة طبعا هوفيه بطالة في البلد اوعلي الأقل الناس مش بتشتغل في اللي هي درسته او حبته يمكن يكون فيه شوية كسل بس دة سبببه الأحباط اللي قلب بلا مبالاة بس بردة سبابنا بخير وبيحب البلد دي اكتر من جيل اكتوبر كمان
احلام سعيدة وتصبحي على كل الحب والخير

- راندا
اهلا بيكي وربنا يكرمك في اولادك وتشوفيهم احسن ناس

- خمسة فضفضة
ربنا يخليكي يادكتورة وبجد فرحان قوي ان الأغنية عاجبتك
تحياتي ليكي ودمت بكل الخير

mostafa rayan said...

محمد حلمي مخلوف
ازيك ياقمر منور الدنيا كلها
والناس ياعم كلها بتسلم عليك وانا ياعم موجود وتحت النظر
تحياتي لك ودومت بخير

Mafrousa said...

انا لسه كنت بفكر اكتب بوست حوالين الغنيه بتاعتك
حاوه اوي

!!! عارفة ... مش عارف ليه said...

جميل يا مصطفى دايماً مبدع

وعلى فكرة بقى الناس اللي بتحب البلد دي ملهاش علاقة بقبل أو بعد اكتوبر ولا حتى قبل 78 أو بعدها
حب البلد دي بنشربه مع نيلها
دا حتى الناس اللي بتزورها ولو لمرة واحدة مبتقدرش تبعد عنها وبترجع لها تاني


وعلى فكرة أنا فرحت اووي لما عرفت انك كنت مع باسم واتفرجت معاه على الفيلم وشوفت عم إبراهم وكمان نجم

وربنا يشفي الاستاذ

تحياتي

Anonymous said...

عزيزي مصطفي

ربنا يشفي جميع المرضي في جميع انحاء العالم و يقوملنا الفنان المبدع يوسف شاهين بسلامه و يتخطي مرحله الخطر و فعلا حتي و ان اختلفنا مع بعض في اي شئ سواء معتقد او فكره او اي حاجه قدام المرض لا نملك سوا الدعاء

لفته كريمه منك عزيزي جزاك الله خيرا عليها

تحياتي ليك

mostafa rayan said...

واحدة مفروسة
وانا فرحان بتوارد الخواطر دة

- عارفة مش عارف ليه
دايما منور ياصاحبي ومبسوط انالأغنيةعاجبتك ويارب افضل دايما عند حسن ظنك وبالنسبة للأستاذ ربنا يشفيه ويشفي كل مريض
دومت بكل خير

- اجندا حمرا
ربنا يخليكي وبنا يشفي جميع مرضانا
بس ماقولتيش ايه رأيك في الأغنية

مصــــري said...

بوست رائع كالعادة

كله إحساس
احنا مظلومين بحكمهم ده
وان شاء الله نثبت العكس
ان احنا بنحب مصر اكتر منهم

تحياتي
أسامة

عاشــــــ النقاب ـقــــة"نونو" said...

جمييييييييييييييييييلة
مين قال ان اللي بعد الحرب اتولد اقل وطنية
يا سلاااااااااام ليه
قانون
تحياتي

Anonymous said...

جميل اننا نحس بالحب وجميل نعبر عنة
والاجمل اننا نثبت عاطفتنا بالعمل والمثابرة
والانجاز
دومت بخير

Anonymous said...

طبعا جميله يامصطفي الأغنيه
بالرغم من المسافات الاشتياق موجود و عمره مابيقل بالعكس بيزيد

تحياتي ليك مصطفي

سنووايت said...

تاني قصيدة اقراها في حب مصر النهاردة
مين اللي يقدر يقول ام الجيل دا مش بيحبها؟!!!
سلمت يداك

شهرزاد said...

كلمات جميلة في حب مصر
وكأنها محبوبة تركت جرحا في قلب حبيبها
فغادرها مرغما
مع انه يحمل حبها في قلبه
لكنه لم يحتمل الجرح

تحياتي
ودمت صديقا مبدعا

محمد حلمي مخلوف said...

عملت مدونه يا مصطفي يا ريت تكون اول زوارها

mostafa rayan said...

مصري
ربنا يخليك يا صاحبي وفعلا احنا مظلومين بحكمهم دة

- نونو
اللي اتولدو قبل الحرب هما اللي بيقولو بس الواقع بيثبت عكس دة
تحياتي لكي بردة

- احلام اليقظة
طبعا انا موافقك في رأيك دة
دومت بخير

- اجندا حمرا
ربنا يخليكي
ودمت بكل خير

- سنوايت
نورتيني بزيارتك يا قمر

- شهرزاد
دةبالظبط اللي عايز اقوله من الأغنية والحمد لله ان المعنى وصلك
دومت بكل خير

- محمد حلمي مخلوف
مبروك يا صاحبي وانا فعلا زورتك وعلقت عندك وعملت اعلان لمدونتك كمان

Gannah said...

اخى الكريم
اولا دعائنا ان يشفى الله كل مريض
يعنى انت جيت على الجروح واحنا وانا كمغتربة حاسة جدا بالكلام وفاكرة كل الحاجات بس نعمل ايه ربنا يصلح الحال
تحياتى

Fatma said...

اولا عايزة اشكرك على تعليقك الرقيق في مدونتي :)

ثانيا

جميلة كلماتك انا دمعت غصب عني وانا بقراها

يظهر الواحد بقى نفسه يسمع اليومين دول اي حاجة بتقول بحب مصر

ثالثا الف سلامة على جو وربنا معاه يا رب

اخيرا بقى :)

انا سمحت لنفسي بالتجوال في مدونتك وشدني جدا موضوع قديم باسم زوجة بنت اصول ورديت فيه بعد اذنك

اتحادالمدونين المصريين said...

العزيز

mostafa rayan

شكرا لك اخى مصطفى مرورك وبخصوص

سؤالك اود توجيه نفس السؤال لك

ماذا تقترح علينا القيام به ؟

فالامر شورى ..

فى انتظار رايك لنتفق على خطة مواجهة

هذا المد الذى تتحدث عنه

فنحن فى حاجة لافكار الشباب والتى ندعمها بخبرة الشيوخ شكرا لك مشاعرك ووطنيتك واحساسك الراقى فى حب مصر

mostafa rayan said...

Gannah
واناايضا ادعو معكربنا يصلح الحال ويشفي كل مريض ومبسوط بجد ان كلمات الأغنية اثرت فيكي كدة

- Founoon
اهلا بك اخت عزيزة وصديقة جميلة ودائمة للمدونة
بخصوص جو ربنا يشفيه ويشفي كل انسان مريض
بخصوص كلمات الأغنية طبعا فرحان قوي انها عاجبتك
وبخصوص زوجة بنت اصول
كون اني وصلتك للحالة دي دة معناه اني رجل بيكتب حلو لأن اقصي طموح اي كاتب ان يصل لقلب قارئه وان يصدقه هذا القارئ .. فاسمحيلي اقولك ان ردك وسام على صدري بافتخر بيه
واما انك تجولتي في المدونة فطبعا دي حاجة انا مبسوط بيها قوي لأن معظم اللي بيدخل بيقرأ اول بوست بس
تحياتي ليكي ولكل مواليد برج الحمل
الجامدين قوي قوي قوي

mostafa rayan said...

اتحاد المدونين المصريين
اعطني بعض الوقت للتفكير وان شاء الله سوف ارد عليك في مدونتك
ولكن اكرر يجب ان نفكر جميعا في ايجاد حل لتلك المشكلة الخطيرة جدا

محمد حلمي مخلوف said...

شكرا يا مصطفي علي زيارتك مدونتي
وشكرا علي الدعايه اللي ببلاش

اتحادالمدونين المصريين said...

اخى الفاضل

مصطفى

شكرا لك تواصلك واهتمامك ..وطبعا التفكير مطلوب واساسى للوصول لحلول متميزة لاى مشكلة ..عندى اقتراح ياريت تنفذة
طالما انت اول من بادر بطرح هذا الموضوع بصورة علنية ..لماذا لا تقوم بعمل بوست عن هذا الموضوع وليكن على شكل سؤال
--------------------------
كيف نواجه المدونات التى تدعوا الى البهائية ؟
---------------------------------
وتدعوا الجميع للاجابه وفى النهاية نلتزم جميعا بما يتم الاتفاق عليه بس اتمنى ان تخبرنى لاساعدك فى التواصل مع الاعضاء
شكرا لك وفى الانتظار

mostafa rayan said...

اتحاد المدونين المصريين
شكرا لأهتمامك وهذامافكرت فيه بالفعل وان شاء الله هذا الأمر سيكون موضوع البوست القادم وقد قمت بالفعل بالحديث مع بعض الأخوة في هذا الأمر وانا في انتظار رأيهم
لك كل الشكر لأهتمامك

اتحادالمدونين المصريين said...

اخى الفاضل

مصطفى

بداية اتمنى ان نحصر اسماء هذه المدونات

ليتم التحذير من التعامل معها فلتبدء

من الان تجميع اسماء هذه المدونات ونقوم بحمله كما طلبت ونحن معك وجهز شعار وانا هحاول من جهتى ونلتقى على خير ان شاء الله
للعلم نحن نجهز حمله من اجل اسرى المسلمين وحق العودة لاهلنا فى فلسطين وسوف ينزل البوست يوم 20 ان شاء الله بالتعاون مع مدونة الايجابية والاصلاح وسوف نطلب من الجميع وضع هذا البوست على مدوناتهم خلال فترة واحدة من 3/7/2008 وحتى 10/7/2008
فيارب تعمل حسابك وانت تعد لحملة
لا للبهائية
فى انتظار اراؤك

mohamed ibrahim said...

هو لو كلامك موجه لمصر
احسنلك مش توجة كلامك ليها
لان مصر مش ذنبها انها تعمل فينا كدة
الناس الي ماسكين مصر هم الي عملوا فينا كدة
بس عموم حلوة منك جدا جدا يا مصطفي

كيكى عوووووو said...

الحب مش بيرتبط بزمن معين..
يارتنى كنت مغنية ولا ملحنة
علشان كنت اقول الكلام الجامد دة
دومت بخيرررررررررر

استراحة محمد said...

اذيك يا مصطفى باشا
الأغنية حلوة ، وانا معاك ان يوسف شاهين قيمة ، وعشان كده بندعى ربنا يشفيه
تحياتى دائما

رئـــــيسـة حزب الأحلام said...

ماشاء الله كلمات جميلة
وجيل مابعد73 فعلا مظلوم
وبيتقال عنه كتير
ولكن بايدنا اننا نغير الفكرة
تحياتى

بنت مصريه said...

ايه الجمال دا يا مصطفى
الاغنيه جميله جدا
احنا بنحب مصر بس فيه ناس بتكرهنا فيها
ياللا ما علينا
برغم اعتراضى على اسلوب يوسف شاهين
بس بقول ربنا يشفى كل مريض

محاولة لكسر الصمت said...

(وزعلانة ليه لما بلوم
بلوم عليكي لأنك امي
مش سهل اعيش منك محروم
وانتي بتجري جوة دمي)
*********************
بجد الكلمتين دول تحفة....بس مين قال اننا مش بنحب مصر....طبعا انا مش هقعد اوقول ده حب الوطن من الايمان والكلام ده...بس هقول كلمة واحدة بس.....دي مصر.......ازاي مانجبهاش؟!!!!!!!!!!!!!!!!!

Desert cat said...

هما بيتهمونا يا مصطفى اننا مبنحبهاش لاننا بصراحة مشوفناش فيها حاجه تخلينا نحبها
يعنى هواء ملوث مياة ملوثة اكل مسرطن تعيلم متدهور
بس بالرغم من كل ده بنعشقها مش بنحبها بس
وبالتالى مش من حق حد يوجه لمواليد ما بعد اكتوبر اى اتهام
ربنا يشفى عمونا شاهين ويرجعه بالسلامة

خاطبة المدونات said...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com

Anonymous said...

السلام عليكم

حبك يا مصر جوانا بيجرى
من اول لحظة فى عمرنا وهو بيسرى
ولو بعدنا ورحنا ولفينا يمين وشمال
مانلاقى غيرك جوانا ودايما على البال

مصر يا حبيبتى انتى مش مجرد بلد
مصر انتى اهلى واخواتى واصحابى
ولمة عيلتى

انتى سكون الليل وشمس النهار
ومشى العصارى وكوباية الشاى

وكلنا بنحبك يا مصر

الدرعمي said...

السلام عليكم

أخي الأكبر

أعاتبك لأنك لا تطمئن عليّ

وقد عدت لقاهرة المعزّ وأود أن أراك

اترك على الماسنجر رقمك وسأتصل بك


تحياتي


آدم

just me said...

وحان وقت الرحيل
---------------------
فعلا حان وقت الرحيل
بجد كلام جميل ومؤثر ببساطته

rovy said...

السلام عليكم
ربنا يشفى يوسف شاهين و كل مريض يااارب .
الاغنيه جميله قوى يا مصطفى و مليانه
احساس بيوصل للقلب بجد
اكيد يا مصطفى كلنا بنحب مصر بس المشكله ان في ناس احيانا بتعبر عن الحب ده بطريقه غلط .
دمت بخير و دمت مبدعا
وفقك الله
تحياتى
rovy

Zika said...

أولا انا بدعي كل يوم ربنا يطول في عمره
بجد قيمة كبيره اوي هزعل اوي لو خسرناها في الوقت ده

اما بالنسبة لصديقك محمد بلغه تحياتي
الاغنيه جميله فعلا
لحنها موجود فيها من غير ما حد يلحنها
تحياتي

wael9@aol.com Wael - وائل said...
This comment has been removed by a blog administrator.
صبرني يارب said...

والله يا اخ مصطفى احنا كلنا عايزين نسمع اغنيه فى حب مصر

انا دايما اقول اختفت الاغنيه الوطنيه خالص

فى المناسبات الوطنيه بنغني لمبارك ونقول اخترناااااااااااااااااااك

واحنا لااخترناه ولا اخترنا غيره اصلا

حقيقى مفتقده
يا احلى اسم فى الوجود
مصر هى امي
عاشت بلادنا
يا حبيتى يا مصر يا مصر

مستنين نشوف الباقي

mostafa rayan said...

وعد العيون
نورت يا جميل وفرحان انك متابع للمدونة

- كيكي
نورتني يا قمر

- استراحة محمد
الله يسلمك يا صاحبي وربنا يشفي جميع المرضي

mostafa rayan said...

رئيسة حزب الحلام
وانا متفق معاكي تماما في كلامكدة

- بنوتة مصرية
نورتني يا قمر

- دواير
فرحان قوي ان الأغنية عاجبتك
نورتيني بجد

- قطة الصحراء
كلامك جه علىالوجع
نورتيني

- كلمة حق
اشكرك على هذا الشعرالجميل وبجد نورتيني

- ادم
تركت المطلوب علي الماسينجر
نورت يا صاحبي

- لست ادري
فرحان ان الأغنية عاجبتك

- روفي
سعيد بزيارتك وربنا يوفقنا جميعا

- زيكا
دايما منور يا قمر

- Wael
طبعا مش محتاج اقولك انك غير مرغوب فيك في المدونة لا انت ولا اصحاب مذهبك الهدام
لغيت تعليقك واي تعليق اخر منك او من اصحابك سوف الغيه
وان شاء الله سأكتب عنكم وعن مذهبكم الهدام
وسأحذر كل قرائي منكم
فأنتم لستم اكثر من مجاهيل

- صبرني يارب
نورتيني

Hanan Said said...

انا شكلي اتاخرت كتير اووي عن دخول مدونتك
وموضوعيك ديما مميزه
عجباني جدا الاغنيه
وحلو احساسها
بس تعرف
لو انت ربط جبنا لمصر (او زي ما الناس ربطو ) بالحرب
ده لاهم يمكن كانو عملو حاجه ايجابه لمصر يعني من قبل الحرب والثوارت والاعترضات والايجابيات كانت كتير
اوووي
احنا بقت الايجابه عندنا ونسقف للي يفتكر في كلامه واغايه واشعاره اسم مصر ويغنيلها
بس نتفرج كده على بعض ونبقص تلاقينا فعلا مش ايجابين
يمكن السبب في كده ان الي حضرو الحرب هما بردو يتملو جزء من شخصيتنا وسلكونا ده
يمكن منهم الي ربى ولاده عن كفايه الي راح ونسي ان في حجات كسبناها
مش عارفه ايه السبب
بس
كل الي انا عرفاه ان اغنيتك وكلمه مواليد مابعد الحرب دي
حركت فيا احاسيس وتفكيرات كتيره
يمكن مش مرتبه وتحسها كده في ردي
بس يجد تحياتي ليك يا مصطفى

Empress appy said...

مين بيقول علينا كده يا مصطفى تصدق عيب بقى والله الكلام ده زعلتنى
طيب اغير بطاقتى وابقى من مواليد الحرب ولا اعمل ايه يعنى ولا ارمى نفسى من فوق الجبل ولا السجاده
سيبك انت حلوة والله

دعاء مواجهات said...

الكلمات جميلة

وكفاية انها عن مصرنا

انا اى كلمة حلوة عن مصر

ابصم عليها بالعشرة

بجد كلمات رقيقة وجميلة


تحياتى لييك

متبقااش تغيب عننا كتيير


بيس

رؤية said...

ومين مننا ممكن مايحبش بلده، مهما كان فيها واصابه فيها!!!المشكلة فى الناس مش فى البلاد،وعموما فكرة حلوة،
ولك منى التحية

zOzO said...

كلماتك حلوه

واحساس عالي

بجد تسلم ايديك

وف انتظار التفاصيل

اتحادالمدونين المصريين said...

العزيز

مصطفى ريان

شكرا لك اهتمامك وان شاء الله يتم التجهيز لحملة جديدة بعد الانتهاء من هذه الحملة وربما يكون عنوانها
*********( لا للبهائية ) ********
اتمنى ان تجهز بانر بهذا الاسم لعمل موضوع لحملتنا وتجهز ايضا بعض اسماء المدونات التى تعرفها لهم للتحذير منهم
شكرا لك وفى انتظارك موعدنا 10/7/2008
بعد انتهاء خملة الايجابية والاصلاح

عروسة ننوسة said...

اغنيه حلوة كتير

دعاء مواجهات said...

يوصل الدعاء بإذن الله

تحياتى ليك ولدعواتك الصافية

اشوفك على خير

walaa said...

مفيش حد مش بيحب بلده اللى عاش فيها وكبر فيها
فيها اهله وناسه
فى ضحكته وحزنه
تحياتى ولاء

تايه في وسط البلد said...

بص يا درش

انا عاوز اقولك انك مش مضطر ترد علي اي حد يقول ان احنا مش بنحب البلد
وان اللي اتولد قبل اكتوبر زيه زي اللي اتولد بعد اكتوبر
لكن الفرق ان جيل اكتوبر هو اللي شال الراية واخد فرصته ودي كانت النتيجة(وانا لا اتكلم عن الحكومة والرياسة فقط)ه
وجيل ما بعد اكتوبر لسه ما اخدش فرصته اساسا عشان حتي يظهر حبه للبلد

انت بتحب البلد دي بجد؟
ما تسكتشي علي الظلم فيها..وقول بأعلي صوتك

كلبوزة لكن سمباتيك said...

ربنا يشفيه و يشفي كل مريض


تحياتي

alzaher said...

اضم صوتي لصوتك
وأدعو الله الشفاء ليوسف شاهين

dina said...

دى جبارة بجد
حلوة اوىىىىىىىىىىىىىىىىى

mostafa rayan said...

انا بشكركم يا جماعة علي ردودكم