Monday, December 20, 2010

مقتطفات من وجع الروح

1- "يمكن"

انا كنت عايز اقول لها ان عيونها اجمل عيون شوفتها

وان كريز شفايفها احلى من كريز الجنة

وإني نفسي ادوق من الكريز

نفسي افرح واتهنى

وان كريزها هيفرح قوي بعسل شفايفي

وهيرفض لو ثانية فارقني

وان نتيجه الاندماج الرائع هتبقي شئ رهيب.. رهيب.. رهيب

انا كنت عايز اقول لها لكني ماقولتش

يمكن خفت تصدني

او يمكن لان جمالها اكبر من جرائتي

او يمكن لاني خجول

او يمكن لأني عبيط

**********

2- "في جنينة مجمع التحرير"

الولد اللي بيحضن البنت في جنينة مجمع التحرير

هي متأكدة إنه عمره ما هيتجوزها

ولا عمره هيأتمنها على نفسه ولا بيته

ورغم كدة بتروحله وهي في كامل زينتها

وبتضحك وهوبيفعص فيها

وبتبقى في قمة فرحتها

يمكن لأن كل واحد مننا محتاج يسمع كلمة حب

حتى لو مش من القلب

وحتى ولو كانت كذب

***********

3- "خليط عجيب"

عيونك مش ممكن تبقى ملاك

ولا يمكن تبقى هلاك

عيونك في النص واقفة

عيونك خليط عجيب

من بابا نويل

وسلطة بوش في الايام الغابرة

بتوزع باليمين عطاياها على اللي يقولوا امين

وتقتل بالشمال اللي بس يحاول يعترض

او ينبث بكلمة

*******

4-"راية خفاقة"

ليه البنت اللي لابسة حجاب ماهوش حجاب

وبتقول كلام ماهيش فاهماه

ولا هو كلامها

رفضت بشدة وعنف لما يادوب حاولت

امسك إيدها

ولما صاحبي قطف كريزها

وزرع فوق روابيها رايته

ورفرفت خفاقة وعالية

ضحكت وقالت: معلش دي غلطة شباب

********

5- "رأيي"

يمكن

لأني كنت مغفل

او كنت لسة مبهور زيادة

فكنت بقولك على كل حاجة ايوة في الأول

ولما الريح

خلت ورق التوت

يتساقط ورقة وراء التانية

وبدأت تتضحلي الرؤية

زي الصوفي في اعلى درجات الكشف

بدأت اعترض واقولك لاءة

ماتستغربيش

انا ماتغيرتش

دة كان رأيي من الأول

********

6-"راجل مهزوم"

الراجل المهزوم

في شغله

وفي بيته

وفي الشارع

وبيدخل ليالي الخميس

كما تلميذ خيبان في لجنة امتحان

مابتفوتش الهمسة

ممكن يعمل إيه غير إنه يفرغ كبته

في الشيشة

أو في شوطة كورة

أو في تذكر الاسلاف

وذرف دمعة من اعماق اغوار محيط قلبه

مش عليهم .. لاء

على نفسه

3 comments:

شمس النهار said...

ازيك يادرش
ايه يابني ده اول مرة الاقيك عامل بوست كله خروج عن النص

خير مالك

بس بجد عجبتني جدا الفقره نمرة اتنين

علي فكرة في فزورة عندي في المدونة ياريت تيجي تجاوي عليها
:))

فاتيما said...

البوست دا
روعة يا مصطفى



فيه حاجة كدا غريبة
وزى ما يكون حتت بازل وتجمعت عشان تعمل صورة ولو ان كل واحد يبدو ملوش دعوة بالتانى ...


الحزن يمكن لاففهم
ودا الصلة ؟؟

يمكن

بس حلو قوى كل المكتوب


ويا واااااد يا صفصف
ينبس ..مش بالثاء
يا خراشى على مكانتك
الادبية والفكرية دلوقتى
اعمل فيها ايه انا ؟!!!


تعيش وتكتب
يا الطيابة ذاتها

:)

re7ab.sale7 said...

لاء لاء لاء
انا بجد مش عارفة اعلق علي اية والا اية
انت مسبتش ولا كلمة تتقال
بجد انت مبدع يا مصطفي
ربنا يزيدك ويكرمك يارب
دمت بخير