Thursday, July 1, 2010

في زحمة القاهرة..خاطرة شعرية

في زحمة القاهرة

والدنيا المتوترة

بنعيش حياة صعبة

حياة قاسية ومؤلمة

وانا نفسي اكتب في عنيكي

اشعار بتمطر صور

واقولك وردة قلبي

وخدودك بساتين قمر

لكن بتأبى القصيدة

غير إنها تبقى

شبه وشوش الناس

شبه حياة النهاردة

ويطير كلام الحنين

من بين ضلوع شفاتيا

واكتب كلام مر

كما الحاصل في الدنيا

شبه وشوش ناس

ربك عالم بحالها

امالها في الحياة

تسد جوع عيالها

بكتب بحسرة شاب

وصل للتلاتين ولسة مش لاقى شغلة

اصبح عجوز متشل من قعدته على القهوة

بيقاسي الهوان والذل لأنه مش لاقي واسطة

وبيكبت كل مشاعره الفايرة

وبيقتل في الأحلام

ويصبر نفسه ببكرة

وبكرة مجيئه فى الأوهام

بكتب بأهة بنت هي كمان داخلة على التلاتين

ولسة مش لاقية من يقطف فى الحلال ورد الخدين

وكل يوم بيزيد الحزن اكتر واكتر

وتزيد الثورة اكتر واكتر

وكل ليلة تتدخل اوضتها

وتلبس عروسة في ليلة زفافها

وتبص في المرأة وتبوس روحها

وتحضن مخدتها وتدور

تدور تدور تدور

مين قال حاضنة المخدة

دي بترقص ويا عريسها

بترقص في ليلة فرحها

وبعد انتهاء الرقصة

تضحك تضحك تضحك

وبعدها بتروح في نوبة بكاءطويل

بكتب بحسرة عروسة اترملت

وهي لسة ماكملتش 25

راح راجلها منها في حادثة قطر

كان مسافر للصعيد

كان مسافر يشتري لها فستان االفرح

واهلها واهله هناك منورين الكهارب

وبيوزعو شربات

اتحول في لحظة لقهوة سادة

والفاعل حر بيرفل

في اتواب ملايين السعادة

بكتب بثورة فنان مغمور

بين قلبه سحر ولا الفراعين

نفسه يورى للناس فنه

ولو نص فرصة تشوفه العين

عمال يدور يدور لحد لما كعوبه دابت

وتوبه ثار عليه وماج

وبت تافهة بتلاقيها بكل سهولة

لما بتقلع هدومها في مكتب الانتاج

بكتب بجراح كل دول واكتر

ولسة عندي اكتر واكتر

فماتوقعيش منى اني اغازل شفايفك

او انى اقولك إن عيونك تاج من الماس

وفي حياتى منور

خلاص قلت اللي عندي

والكلام التانى عندك

لا ماتقوليش دلوقتى فكري

خدي كامل كامل وقتك

بس لازم تعرفى لو قلتى ايوة

إن شعري في حياتى قبلك

إن كتبى وقلمي وأوراقى ودفاتري

هماروحي ..هما نفسي

نبض وريدي ودقات قلبى

والهو اللي بتنفسه

هما شمسي وهما قمري

هما دواء جراحاتى الكتير

ومؤنسي في سمري

فمش هينفع اضحي بيهم

او يتاخد من مساحتهم لأي حد

حتى لو كان الحد دة انتي

لوقلتى ايوة همدلك إيدي

واسكنك قلبي

واغطى عليكي برمش عنيا

ولو قلتى لاء هتمنالك وبكل صدق

حياة سعيدة مع حد تانى

وهتفضلي في بالى

وهتفضل روحك تحوم حواليا

هتفضل روحك تحوم حواليا

7 comments:

salwa said...

السلام عليكم اخ مصطفى
اسمح لي ان اقول لك انها من اجمل ما كتبت
شخصت الداء و للاسف يلزم طبيب مخلص و شاطر
لكن سنظل نرى نصف الكوب الملآن
تسلم يدك
سلام

mostafa rayan said...

استاذة سلوي
الله يخليكي وبجد فرحان ان القصيدة عاجبتك
لك كل المحبة والود

dr.lecter said...

مؤلمه

الحب الجميل said...

صباح الخير


الحب جميل

احنا فعلا كنا في اسكندرية من فترة قريبة وكان لقاء ممتع ويوم جميل من ايام عمرنا كلنا .. ان شاء الله ربنا يكرم ونروح تانى قريب .. اسكندرية جميلة وناسها احسن ناس

أولا احب اشكرك على الأهتمام والرد على التعليق عند فاتيما

ثانيا بالنسبه للقاء انا سمعت بيه من قلب القطه وقالتلى انه كان يوم رائع وجميل وانكم كلكم ناس طيبه وجميله وانا نفسى اليوم دا يتكرر لانى مش عرفت عنه الا بعد ما رجعته وللاسف اللقاء فى القاهره صعب جدا انى اجى عشان كدا بطلبه فى القاهر


ثالثا تسلم ايدك بوست معبر اوى
كلمات جميله وخاطره اجمل

رابعا تقبل مرورى ويارب مكنش تقلت فى الكلام اول مره

تحياتى وتقديرى
الحب الجميل

الحب الجميل said...

عذرا

بطلبه فى الاسكندريه
غلطه مطبعيه معليش

mostafa rayan said...

الحب جميل
اهلا بيكي اول مرة وان شاء الله تبقى الزيارات كتير قوي ومتبادله وانتي ماتقلتيش ولا حاجة دة هنا بيتك ومطرحك ومكانك واظن ماحدش بيكون تقيل جوة بيته
بالنسبة لزيارة اسكندرية اليوم فعلا كان جميل قوي وكلنا انبسطنا فيه وكتبنا عنه وبصراحة احنا ادلعنا اخر دلع من اخواتناالاسكندرانية وان شاء الله تتكرر الزياة قريب ونيجي عندكو في اسكندرية الجميلة ونستمتع بالجلوس معاكو يا احلى واجمل ناس
مبسوط ان البوست عاجبك
لك كل تحيتى وودي يا صديقتى الاسكندرانية الجميلة

أبو حميد said...

حلوة يا مصطفى
تسلم إيدك