Saturday, June 5, 2010

امورة من لبنان*



اهداء

إلى الاسكندرية الجميلةالتى شهد طريقها كتابةهذاالزجل

(1)

امورة من لبنان كانت جاية كايرو


تسأل على كاتب شاب في مجلتها تحاوره


وقالولها في كاتب جامد كتاباته والله جنان


قالت طب اسمه إيه؟ قالوا مصطفى ريان


(2)

وانا كنت قاعد يومها مخنوق والدنيا ضلام


رن جرس تليفونى قالو لي تعال قوام


روحت لاقيت سنيورة فشر جمال الحور


قالتلي عيونك مالك .. قلت انا مبهور


(3)

وفضلنا نحكي ونتكلم اكتر من 5 ساعات


دقيقتين عن الكتاب والباقي ضحك وحكايات


وفي اخر الليل قالتلى يادرش انا لازم امشي


قلت رحيلك على عينى بس الأول تتعشي


(4)

ماعرفتش انام ليلتها وفضل بالى مشغول


عمال بفكر فيها وعقلى يقول ويقول


وفضلت ماسك تليفونى مستنى اول نور


قلتلها انا جايلك قالت هحضر احلى فطور

(5)

اخدت الورد في إيدي ولبست احلى ما عندي

قلتلها تتجوزينى قالتلي دخيلك دة يوم سعدي

قلتلها قولى لبايك من بكرة عليه راح افوت

هنقيم ليل الافراح من مصرإلى بيروت


__________


*:هذه هي التجربة الاولى لي في كتابة الزجل احببت ان اطلعكم عليها وارجو أن تنال اعجابكم

9 comments:

Unknown said...

اياك تنسي تدعينا ع الفرح
يوم ها يبقي كله مرحد
ضحك وجد ولعب ...و حاجات حلوه كتيييييير

richardCatheart said...

هههههههههههههههه
والله صدقت وفرحت يا اخى

جميله ومتظبطه يا فنان
ودمها شربات

تسلم ويسلم ذوقك اللبنانى العالى

وايه الصور دى يا نجم ماشاء الله صورك جميله انت اكيد هاتبعت للموزه البنانى الصور دى صح ابقى هاتها عندنا اسكندريه نقوم بالواجب
تحياتى
ربنا يسعدك ويفرح قلبك

أحــوال الهـوي said...

يا عاشق لبنات الشام
كل مرة سوريه او لبنانيه
و الله يادرش انا باعشق البنت المصريه
جرب كده تكتب عنها هتلاقي كلامك اختلف

السيناريو رائع في الحدوته وهذه من مهاراتك الخاصة
تحس انها حدوته مظبوطه و محبوكه
بس انا راح اقولك مبرووووك لو كانت العروسة مصريه

تقول تعصب اقولك وماله

تحياتي

maxbeta3zaman said...

http://www.adab.com/modules.php?name=Sh3er&doWhat=shqas&qid=323
عزيزى مصطفى
افكارك وطرافتها شىء جميل ويزيده حسنا النظم والموسيقى الشعريه الرابط الموجود عاليه فيه معظم شعراء العرب خاصة "العاميه" اقرأ لصلاح جاهين والأبنودى وبيرم التونسى وهناك شاب فلسطينى مصرى اسمه البرغوثى عظيم فى زجله مع تمنياتى لك بالتوفيق

أنا - الريس said...

مبروك ياعم
مفيش احسن من الحلال برضوا
وعبال ما تعزمنا علي الفرح

dr.lecter said...

عايزه فتوش لبناني في الفرح ومناقيش بالزعتر

mostafa rayan said...

فركشاوي
انت تؤمر يا جميل هعزمك من عنيا وتبقي سهرة صباحي
هههههههه
لك تحياتى يا اخي

- قلب القطة
مارو بجد انا فرحان ان الزجل وكمان عاجبوكي ومن عينا حاضر اول ما تيجي كايرو هاخدها طيران على ألكس ونقضي يوم دلع زي بتاع الاسبوع اللي فات
تحياتي لك يا اختى العزيزة

- احوال الهوي
استاذ عصام حبيب قلبى حاضر هكتب عن المصري ونشوف هتبقي النتايج ايه بس بقى ربك يستر وماتقلبش نكد
هههههههه
تحياتى لك يا جميل والله زيارتك دي بتفرحنى قوي

-maxbeta3zaman
انا فرحان ان الزجل عاجبك واشكرك على الرابط المفيد
لك كل التحية يا استاذي الفاضل

MR.PRESIDENT
انا قلت كدة بردو خصوصا ان البنية مافهاش غلطة يعنى وحاضر هعزمك يا عم انت تؤمرنى
هههههههه
تحياتى لك يا اخي الفاضل

dr.lecter
وكفتة وكبيبة شامى كمان يا جميل كل طلباتك اوامر بس انت تنورنا
لك كل محبتى يا اخي

النكرة
والله يا غير معرفة دة شيئ مايخصكيش انتي تبقى الاولى ولا الاخيرة دة بلوجي واكتب فيه كل اللي يعجبنى بغض النظر عن رأيك ولو الشغل ماعجبكيش فيبقى احسنلك تحرمينا من زيارتك وماتجيش تانى كفاية انك نكرة واجبن من انك تظهري نفسك في العلن

salwa said...

السلام عليكم اخ مصطفى
موفق ان شاء الله و ما كتبته رائع و اعذر تقصيري

mostafa rayan said...

سلوى
صديقتي البيروتية الجميلة
لا يوجد اي تقصير ويارب التوفيق لينا كلنا
تحياتى لك ودمت بكل الخير