قصيدة إليها .. انتي فين

انتي فين
كل ما اروح المكان اياه
بدور عليكي مش بلاقيكي
انتي فين
ياللي في لحظة واحدة سكنتي القلب
وشغلتي البال
وحلمت بيكي العين
انتي فين
انا شاب زي الفل والله
مش حمل بهدلة
ولما شوفتك ماعرفش ايه اللي جري لي
نسيت مين انا
ارحميني
ارحمي شاب كل مشكلته في الحياه عشقه للجمال
لما يشوف ضحكة حلوة ينبهر
يروح في الف احتمال
وانتي مش بس احلي ضحكة
دة انتي احلى نسمة
دة انتي القمر بذاته
والقمر جنبك يطلع ايه
دة عيل صغير يشوفك يستخبى ويقف انتباه
خليني اشوفك حتى من بعيد لبعيد
خلي العين تسلم وبلاش سلام بالإيد
شوفتي عملتي فيا ايه
رجعتيني خمسين سنة لورا
ايام احمد ومني
وانا شاب عصر الديجتال
وفل وقشطة واوك يا مان
خلتيني مش عارف اقولك ايه
انا اللي شاعر وظيفته الكلام
مش عارف اقولك ايه
وكل الكلام يا حبيبتي معاد
واكيد انتي سمعتيه
اناعايز اشوفك
عايز اسلم عليكي واكلمك
لاء مش سلام بالعين
سلام بالقلب وسلام بالأيد
مش هضعف زي المرة اللي فاتت
واسيبك تفلتي مني
وكل الناس تعرف مشاعري ناحيتك إلا انتي
انا عارف انك حقيقة مش اوهام
وان دة مش خيال شعراء ولا احلام
واني شوفت القمر بعنيا
ولولا اني خجول شوية
كان ممكن يبقي بينا احلي كلام
خليني اشوفك بس مرة تانية
واوعدك مش هضعف ولا هتردد
هتقدم واقولك على اللي بيا
انك احلى بنات الدنيا
واني من ساعة ماشوفتك بفكر فيكي ومش عارف انام
بس اعرف انتي فين وانا اروحلك
وحتى لو في القمر هطلعلك
صدقيني دة كلام حقيقة مش بكذب
هأجر سفينة واوصلك
بس اعرف انتي فين
انا مستنيكي ماتتأخريش
وبنادي عليكي ماتبعديش
مستني مطر هواكي يروي عطش قلبي
مستني حنان حنينك ينور ضلام عمري
كل الحاجات الحلوة اللي جوايا مستنياكي
زهرة شبابي وحنان قبلي واشتياقي ليكي ولهفتي
وحضني اللي بيحلم بيوم تسكنيه
حتى الشاعر اللي جوايا مستنيكي
ومحضرلك احلى كلام .. لاء مش كلام
احلى مشاعر ممكن يقولها حبيب لحبيبته في يوم
مستنيكي ..
وحرام عليكي تعملي فيا كدة
وفين تلاقي حد يحبك كدة
وتعالي بقي
لانك وحشتيني
ولأني بحبك
بحبك ومش هقولك كلمة تانية

يوم التدوينة البيضاء

تضامنا مع مدوني تونس .. لا لكبت الحريات في تونس وفي اي مكان

منتظر الزيدي شعرا عند البسطاء

تحديث مهم جدا

انا ياجماعة مسحت بوست الهجرة

مسحته بمزاجي وكامل ارادتي الحرة ومن غير اي ضغط من حد

مسحتها لأن صاحبها مسح المدونة كلها ولاني دلوقتي ببدأ صفحةجديدة من حياتي ومش عايزالماضي يأثر علي المستقبل اللي فارد ايده ليا

ياريت يا جماعة محدش يكلمني عنها تاني لأنها خلاص صفحة وانطوت للأبد

......................

يارب يا جماعة تكونو بخير وصحة وسعادة

البوست دة يمكن يكون اسرع بوست نزلته من اول انشاء المدونة

وانا بقلب في النت لاقيت علي موقع محيط

http://moheet.com/show_news.aspx?nid=201228&pg=1 خبران شعبان عبد الرحيم بيجهز للأغنية جديدة عن ضرب البطل منتظر الزيادي لبوش بالجزمة

ولما قرأت الكلمات عجبتني جدا وحبيت اشركم معايا فيها انا لستمن محبي شعبان ولكن كلمات اسلام شدتني قوي فتحية له:

خلاص مالكش لازمة .. يا بوش يا بن اللذينه
تستاهل ألف جزمة على اللي انت عملته فينا
والله وجه اليوم يا واطي ووشك إتفضح
وشافوك الناس مطاطي من جزمتين شبح
الجزمة كانت مفاجئة .. تمام زي الزيارة
والدنيا بحالها فرحت والناس فضلت سهارى
يا قلوب كتير حزينة قومي ياللا اتبسمي
شوفي بوش وهو خايف والجزمة بتترمي
بصراحة ما قدرش أغشك وأقول زعلت عليك
ياريتها جت في وشك وخزقت عينيك
صدام اللي دبحته في أول يوم العيد
أهو ربك خد بتاره وفي نفس المواعيد
تحية عشان منتظر وتحية لجزمته
فرحنا في بوش أخيراً على آخر خدمته

بجزمتين في وشك هتسيب أمريكا على نارك
ويا عيني مش هتلحق يا بوش تاخد بتارك
في ناس كتير بسببك في الدنيا متبهدلة
بتقول يا ريتها كانت صاروخ أو قنبلة
العالم ده كله شافك وبالسعادة حس
والجزمة زي الكورة وداخلة في المقص
مليون شهيد وأكتر في الجنة فرحانين
ربك كبير وقادر يهد المتفرعنين
ضيعت شعوب كتيرة من هنا ومن هنا
بصراحة مش خسارة فيك جزمة معفنة

*****************

هتلاحظو يا جماعة ان رغم بساطة الكلمات( لتناسب ذوق مستمعي شعبان) إلا انها صادقة وخارجة من القلب ودي اكتر حاجة عجبتني فيها

كمان عجبني قوي في التعليقات رقم 33للأخ منالسعودية قال فيه

(وتلك الايام نداولها بين الناس تمثال صدام انضرب بالجدمه بس بوش هو اللى اترمي بالجذمه حد قدر يرمي صدام وهو عايش بالجذمه مااات اسد)

نختلف او نتفق على صدام ولكنه في الحقيقة مات وهومتماسك جدا حتي في لحظة الشنق

**************

كان فيه في التعليقات بردو قصيدة حلوة قوي للأخ اسمهmohamed55يبدوانه مصري يعيش في السعودية كان قايل فيها كلام جميل قوي .

يازايدي قلت لا

بسم الله الرحمن الرحيم

اهداء الى الشعب العربي الحر,وتحية لشرفاء الشعب العراقي,وتحية خاصة للبطل الشجاع "منتظر الزايدي" 15/12/2008

*********

يا زايدي قلت لأه وصلت رأينا

مصري وعراقي سوري جمعت شملنا

الجزمة صوتها لسة بيرن فودننا

يا جزمة ليه بعدتي الوش من هنا

قرفانة تقربيله طب العلم هنا

تسلم ايدين لابسها ده دا اللي فنفسنا

بالجزمة مش رصاصة قتلت عدونا

قتلت كل حجة لخوفنا وضعفنا

عرفت كل ظالم دا سلاحنا فرجلنا

صحصحت فينا حاجة مدفونة فقلبنا

دي فرحة بعد عيدنا خلدتها لنا

دا رأي شاب عربي ورأينا كلنا

رسالة لكل حاكم الكيل طفح بنا

*********

في ناس بتقول ده همجي وانشق عننا

احنا العرب نسالم وبوش جاي عندنا

والجزمة مش طريقة ده سود وشنا

دا نقوله اللي زيك كثير قوي عندنا

مليون شهيد عراقي ضحايا لسلمنا

ابو غريب ده صوره مالية النت عندنا

روح شوف شباب عراقي مقتول هنا وهنا

وان شاب متقتلشي بعاره عاش وسطنا

والست دي لو امي ده شرفنا وعرضنا

والطفل ده لو ابني ازاي هنعيش هنا

روح خش أي موقع معرفتش قولنا

السلم عند قوة دي وصايا نبينا

*********

يا بوش بوشت هيبتك بدخولك أرضنا

أخذت حق لينا قتلت شعبنا

ظلمت ناس كثيرة فعراقنا وقدسنا

الجزمة مش خسارة دي فمتحف عندنا

دي مكافأة مش كبيرة دي أقل ماعندنا

والله انت حقك كل الجزم هنا

تاخذ مكان في وشك ده ختم حبنا

الكلب مش شتيمة ده بيحمي أهلنا

ده الكلب لو سألته هيزعل مننا

هيقول دانا الشهامة أنا هاعترض هنا

لو كان الكلب بوش دي اهانة لكلبنا

واحنا اللي منوفقشي نهزأ كلبنا

وصلنالك رسالة يالا امشي من هنا

*********

هيعذبوك يازايدي ويهزو فرحنا

وتخش سجن عالي وضباط هنا وهنا

قلوب الناس معاك ومعانا ربنا

متخافش بس وادعي ده قدر مكتوب لنا

لازم شوية تصبر والناصر ربنا

ده الحق ثمنه غالي وانت المثل لنا

ربك قوي بجلاله هيجبر كسرنا

والظلم وقته ساعة ويهده ربنا

والنصر يبقى لينا

*********************

اكيد بعد الكلام دة اللي قال كل حاجة رغم بسطاته ووجود بعض الكسر في الوزن والأخطاء في الكتابة (والتي تعمدت ان انقلها كما هي ) ماينفعش حد يقول حاجة تانية

ربنا يقرب النصرويجعلنا اهل له

واخيرا دمتم بكل الخير والود

الحلُّ الأمثلُ..قصة قصيرة جديدة

تحديث مهم جدا

تحية إلى منتظر الزيدي الرجل الذي اثبت انه مازال في العرب رجال حقيقيون

الذي اثبت لكل الدنيا ان حذاءه اقوي من كل اسلحة العرب وغيرهم .. تحية لمنتظر الزيدي الرجل الذي فعل في وقت اكتفي فيه الكثيرون بالكلام..وياليتها كلمات تفيد

فآه يا منتظر فكم انتظرناك

- على هذا اللينك طرائف ساخرة جدا على موضوع ضرب بوش بحذاء منتظر .. اقصد قنبلة منتظر

http://moheet.com/show_news.aspx?nid=201094&pg=1
كل عام وانتم بخير يا اصدقائي

كل عام وانتم في سعادة وحب وقلوب صافيه هانئة لا تحمل حقدا او ضغينة للأحد

كل عام وانتم في تقدم ونجاح مستمر

بمناسبة الأحتفال بعيد ميلاد المدونة يسعدني ان اعيد نشر هذه القصة

والتي كما اخبرتكم كانت بمثابة تميمة الحظ بالنسبة لي في عالم التدوين فبعد ان نشرتها اصبحت بحمد الله مدونا له قراء كثيرون بل اصبح البعض يدخل ليسألني على الشغل الجديد .. الشئ الطريف انني بعد ان نشرت قصة اخري بعدها كانت التعليقات ماتزال تأتي عليها

اعيد نشرها واتمنى ان تعجبكم

ومرة اخري كل عام وانتم في خير وحب وسعادة وتوفيق

.........................

الحل الأمثل

عدتُ من عملي في مساء ذلك اليوم منهكا .. كان أقصي ما أتمناه أن آخذ حمـَّـاما باردًا ، وأتناول العشاء الفخم الذي وعدتني به زوجتي في الصباح .. ولكن
زوجتي خلفت الوعد .. إذ إنها أخبرتني وهي تحاول أن ترسم على وجهها علامات الأسف أنها لم تطبخ لأن أمها اتصلت بها فذهبت إليها ، وظلت معها طوال اليوم .. وطلبت مني أن نشتري طعاما جاهزا ، مع وعدٍ حقيقيٍّ منها أن ذلك لن يحدث في المستقبل . كنتُ متعبا ولم أشأ أن أصنع معها مشكلة أختم بها يوما كان مليئا بالمشاكل .. فطلبتُ الطعام ، ولكني شعرت بالحسرة وأنا أدفع ستين جنيهًا في أربع ساندوتشات وزجاجتي مياه غازية .
- آه ... كانت الستون جنيهًا كافية أن تصنع وجبة فخمة لشخصين -
لم يمر أسبوع بعدها حتى وجدتها تكرر نفس الشيء .. وكانت الحجة هذه المرة انشغالها مع ابنة خالها لشراء مستلزمات الزواج .. وسكت للمرة الثانية بعد أن أقسمت أن هذه هي المرة الأخيرة .
إلا أن زوجتي سرعان ما حنثت في قسمها .. ففي الأسبوع التالي كررت نفس
الأمر مع اختراع حجة جديدة .. قرأت في عينيها وهي تتحدث أنها باتت تستمرئ
هذا الأمر – الذي يكلفني أكثر من طاقتي – لم أستطع أن أصمت ، صِحتُ في وجهها أنني لست متزوجا لكي آكل دوما من الشارع ، كما أن المرتب لن يكفي أن نشتري كل أسبوع أربعَ ساندوتشات تكلفنا أكثرمن ستين جنيهًا .
في هذه اللحظة أخذت تبكي ، وتنعي حظها السييء الذي أوقعها في رجل
بخيل – كما وصفتني – يستخسرفيها عشاء من الخارج كل أسبوع .. في ذلك الوقت لم يكن هناك أي مجال للمناقشة معها .. فتركت البيت وذهبت لأتناول العشاء في الخارج .
- كان يجب أن يكون هناك حلٌّ رادعٌ مع هذه المرأة .. فكرتُ أن يكون المواجهة وبالفعل ففي الشهر الذي يليه أعطيتها مصروف البيت ناقصا حوالي النصف
وعندما سألتني عن السبب اخبرتها أن ذلك هو ثمن شراء وجبات الطعام من الخارج .. فهي لم تعد تطبخ في البيت .. كنت أريد لحظتها أن تتحدث ونتواجه
وننهي هذا الأمر .. ولكنها صمتت وقالت عيناها في هذه اللحظة ما حدث بعد ذلك .
إذ إنها أصبحت تتطبخ طعاما لا يؤكل ، وفي كل مرة تعتذر ببرودها القاتل المعروف .
- فكرت بعدها أنه يجب أن يكون هناك حلٌّ أمثل بعيدا عن المواجهة ، والعند اللذين لن يُجديا معها .. فكرت طويلا ثم ظفرت بالحل الذي بدأت على الفور في تنفيذه .
- ففي اليوم التالي عندما ذهبتُ للعمل قمتُ بإنشاء إيميل لفتاة وهمية أسميتُها (إنجي) أرسلت إليها من خلاله - هي وبعض زميلاتي في العمل التي لا تعرفهم بالطبع وذلك حتى لا تشك في الأمر كله – رسالة على لسان إنجي هذه أسميتُها
(نصيحة إنجي لكل بنات جنسها ) .. قلت فيها : ( إنها امرأة تبلغ من العمر الآن ثلاثين عاما كانت متزوجة من رجل فاضل .. كان يضعها بين عينيه ، ويفعل كل ما في وسعه من أجل إسعادها .. كان جميع من حولها يرون أنها تعيش في منتهى السعادة ، ولكنها للأسف لم تحافظ على هذه السعادة وأضاعتها من بين يديها .. إذ إنها بدأت تتمرد عليه ، وتكلفه أكثرمن طاقته ، وعندما كان يتحدث معها كانت تغضب وتخاصمه ، واستمر الأمر كذلك حتى وصلت به إلى طريق مسدود أدى إلى الطلاق .. وهي الآن تعيش وحيدة وهي مازالت شابة صغيرة تتذكر الماضي وتندم عليه .. في الوقت الذي تزوج فيه هو بأخرى بعد الانفصال عنها وكل أخباره التي تصل إليها تقول إنه يعيش حياةً سعيدةً وإن زوجته تضعه في عينيها فهي لا تريد أن تكون نسخةً ثانيةً منها .. ولذلك فقد قررت أن تستخدم النت لتخبركل بنات جنسها بقصتها حتى يتعلمنَ منها ولايكررنَ نفس أخطائها)
- عندما عدت إلى البيت في مساء ذلك اليوم وجدتُ زوجتي على غير العادة تستقبلني وهي في أبهى صورة .. تستقبلني استقبالا حافلا حميمًا مثلما كانت تفعل أيام الخطوبة وأيام الزواج الأولى .. وقد أعدت عشاءًا فخمًا لم تعده منذ شهور طويلة ، وتجلس معي وتضاحكني وقد عادت ذلك الملاك الذي تعرَّفت عليه منذ سنوات وأحببته وارتبطتُ به .
وبعد العشاء ذهبت لتعد الشاي ... أحضرته وجلست بجواري ، ثم مدت يدها
وأدارت جسدي نجوها ، وضمت يدي بين يديها في دفء لم أعهده منها منذ كثير :
- طارق هل مازلت تحبني ؟
اصطنعتُ الدهشة وأنا أسألها :
- لماذا تسألين هذا السؤال الآن ؟
ردت في إصرار واضح :
- فقط أجِـب سؤالي .
- نعم أحبك .
صمت لحظة ثم أكملتُ :
- ولكنك ...
امتدت يدها على فمي لتقاطعني :
- أعرف أني منذ فترة أفعل أشياءًا تغضبك ولكني أريدك أن تسامحني .. أريد أن نبدأ صفحة جديدة منذ هذه اللحظة ، وأعِدُكَ أنني لن أفعل بعد ذلك أي شيء يغضبك
قلت في لهجة عتاب مريرة :
- وعد مثل وعودك السابقة ؟
ردت في لهفة ممزوجة بالأسف الواضح :
- لا ، وعد حقيقي .
صمتُ لحظة ثم أكملتُ :
- طارق أنا أحبك .. ليس لي أحدٌ في هذه الدنيا إلا أنت ، ولا أريد أن أخسرك وأخسر هذا البيت الذي تعبنا سويا في بنائه .
ابتسمت لها في هذه اللحظة .. وفهِمَت هي معنى ابتسامتي .. وملأ الفرح وجهها وارتمت بين أحضاني .
في تلك اللحظة ظهرت على وجهي ابتسامة لها معنى آخر لم ترَها زوجتي وصِحتُ بيني وبين نفسي فرحًا :
( بركاتك يا إنجي )

(تمت)

كل سنة وانت طيب يا درشاوي + تاج العيد

كل سنة يا اصدقائي وانتو طيبين ويارب تكونو جميعا بخير

النهاردة تالت يوم العيد من يومين يبقي انا كدة كملت سنة تدوينة كاملة بالحساب الهجري

ففي العام الماضي وفي اول يوم العيد وبعد ان رحل اقاربنا دخلت على بلوجر وبدأت اول تدويناتي ورغم إن الأنسان بطبعه مش بيحب يحس انه بيكبر لكني فرحان إني معاكم وبكبر وسطكم ودي فرصة اني اتكلم معاكو شوية على قصتي مع التدوين طبعا انا اتجهت للتدوين علشان انشر قصصي واشعاري وابداعاتي من حق اي مبدع ينشر ابداعه للناس وبما انه مكانش فيه فرصة للنشر الورقي فكرت في النشر الألكتروني دة

كنت بكتب في بعض المنتديات لكني كنت محتاج مساحة خاصة ليا اكتب فيها لحد ماتعرفت على التدوين ... اتعرفت عليه خلال مدونة غادة عبد العال ماكنتش اعرف انها مدونة كل اللي اعرفه انه كان موقع بنت بتتكلم فيه عن عرسانها وكل لما بدخل فيه بموت على نفسي من الضحك لحد ماعرفت ان دي اسمها مدونة وبدأت التتدوين

( وبالمناسبة دي بشكر بنت مصرية اللي استفدت جدا من النموذج اللي كانت مصمماه لمعرفة التدوين )

- كنت فاكر اني لما انزل اول بوست هلاقي التعليقات بقي بتنهمر عليا زي المدونات الأخري لكني فضلت حوالي 3 او 4 شهور ماحدش بيدخل عندي غير اعداد قليلة جدا منهم (رئيسة حزب الأحلام اللي بشكرها جدا وبقولها كل سنة وانتي طيبة وبخير )

اللي كانت من اول الناس اللي دخلو عندي رغم اني كنت بدخل مدونات كتير واسيب تعليقات هنا وهناك لكن ماحدش كان بيدخل.. مابدأتش اتعرف غير بعد مانشرت قصتي الشهيرة ( الحل الأمثل ) بدأت التعليقات تنهمر عليا وكأن المدونين فجأة التفتو لمدون اسمه مصطفي ريان لدرجة انها وصلت ل 32 تعليق طبعا العدد دة بالنسبة لواحد كان اخره 3 ولا 4 يعتبر انجاز كبير جدا لكن اللي كان بيميز القصة دي انها خلتني اتأكد إني بكتب حلو لدرجة ان الناس كلها افتكرت ان دي قصة من الواقع واني بحكي عن نفسي رغم إن بطل القصة اسمه طارق ورغم اني كنت مستمتع باللعبة دي لكني اضطريت اقول للناس اني عازب ولسة مش متجوز ولا حتى خاطب

-لكن لوفي سؤال التدوين اعطاني ايه ؟ طبعا فرصة اني انشر ابداعاتي وقصصي واعرف رأي القراء فيها

- كمان قدرت اتعرف على نماذج مختلفة من الشخصيات والتفكير

- كمان عرفني على ناس جميلة جدا باعتز جدا بمعرفتها وصداقتها وعلى سبيل المثال لا الحصر صديقتي الغالية والعزيزة جدا صفاء جلال واخي تايه في وسط البلد واخي وليد (عارفة مش عارف ليه ) واخي الذي اعتزل التدوين آدم وضي القمر وكاميليا اللي دايما بيقولو عني كلام اكبر مني بكتير ومحمد غالية واحمد علام وخالد وتنفيس مالكش فيه ومحمد ابراهيم وخمسة فضفضة واحمد سووو واحمد العجوز ومفقوعة مرارتي من حماتي ودعاء مواجهات وجارتي وبنت منطقتي العزيزة مولان ومحاسن صابر اللي ساعدتني من غير ماتعرفني معرفة شخصية واخي المهاجر وسمر المنوفي وحسن ارابيسك والأديبة الجميلة رباب كساب وابراهيم عادل وصبرني يارب وكوكب آبي واحمد سمير وناس كتير تانيين

- لكن لوفي سؤال التدوين اخد ايه مني ؟ فهو اخد وقت طويل كان بيروح مني في القرأة علشان كدة انا بقول لكم وبقول لنفسي اننا لازم ننظم وقتنا ومانخليش التدوين يسرق عمرنا ولا ياخدنا من ذلك الساحر المسمي كتاب

كل عام وانا وانتم بخير وسعادة وتقدم دائم

.................................

تاج العيد

التاج دة وصلني من العزيزة سالي ( حاجات جوايا )

1- ماذا يمثل لك العيد ؟ وما أكثر شئ يبهجك في مظاهر العيد

العيد فرحة طبعا واكتر شيء بيفرحني فيه اجتماع الأهل مع بعضهم البعض

2- اوصف لنا طقوسك في العيد .. من ليلة العيد لآخر يوم ؟

ليلة العيد بصوم واتفرج على مناسك الحج في عرفات بروح اول يوم اصلي واستني قرايبي بعدها بخرج مع اصحابي

3- احكي لنا أطرف موقف حصلك في العيد ؟

صراحة مافيش شيء معين اقدر احكيه يمكن كنت خارج مع اصحابي نروح سيتي ستارز سواق الميكروباص كان مشغل شريط اغاني كله نكد ( دقيقة حداد واعتبره قلب وراح وكل يوم نتلاقي) وانا مش قارد اتحمل جرعة النكد المكثفة دي اخر مازهقت طلبت منه يشغل اغاني تانية قلتله كل سنة وانت طيب احنا في العيد ) قالي ياراجل عادي خلينا ننكد شوية كمان في واحد صاحبي مرة بعد صلاة العيد بعد ماعيدنا على بعض قالي تعالى بقي روح معايا علشان اديلك شريط عذاب القبر .. قلتله يا راجل حرام عليك عذاب القبر ايه في العيد

4- بتحرص على تهنئة الأهل والأقارب والأصدقاء بالعيد .. ولا مش بتهتم ؟؟

اهلي بيجولي .. بهني اصحابي

5- مين أول حد تزوره أو تكلمه في التليفون /الموبايل عشان تهنيه بالعيد ؟

مش حد معين

6- إيه الفرق بين العيد الحالي .. وعيد (أيام الطفولة )؟

ايام الطفولة كان في انطلاق اكتر

7 - كلمنا عن ذكرياتك في العيد

ذكريات حزينة ابويا الله يرحمه مات اول يوم العيد الصغير سنة 2000وبدل ماروح السينما ( كأي مراهق لم يبلغ عامه التاسع عشر بعد ) روحت القرافة .. اكتر من حد عزيز عليا مات في العيد بلاش موضوع ذكريات العيد دة علشان مانقلبش المواجع

8-تفتكر الحياة من غير عيد .. هتفرق كتير ؟؟؟

اه طبعا العيد فرصة للألتقاء الاهل اللي اغلب الوقت مش بيقدرو يشوفو بعض العيد فارق جدا طبعا

9- إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟

( بعدد خطوات نبينا من مكة للمدينة يجعل العيد سعيد عليكم وعلينا ) جاتلي من بنت خالتي

10- احم احم .. لسه بتاخد عيدية ؟؟ من مين ؟؟ وبتديها لمين ؟

باخد آه من امي وجدتي وخالاتي واخوالي .. لكن لسة مش بادي لأن ولاد اولاد خالي لسة صغيرين ربنا يكرم ويكبرو وانا اتجوز واخلف وادي للعيال كلهم

11- إيه رأيك في التاج ؟

حلو ومختلف

12- تحب تمرره لمين من المدونين ؟ اذكر على الأقل 10

اي حد يحب يجاوبه يتفضل