اغنية جديدة + رباعية

تحديث

اولا الحمد لله ان العطل اللي في الجهاز اتصلح وان شاء الله هنرجع ندخل ونتكلم ونقول كل اللى عايزينه

ثانيا : تاج الأسرار وصلني من اخي ادم المفروض اني اذكر ست حاجات عن نفسي ماحدش يعرفهم وطبعا انا مش عارف الست حاجات دول إيه فهقولكم اهم حاجة

- دي اللي علي الأقل عارفها - اانا عكس كتاباتي اللي البعض بيشوفها جريئة حبتين

- لكن انا بشوفها عادية جدا اقرؤا لغيري وانتو تتأكدو من دة بنفسكوا -

انا خجول جدا في الحياة العادية ودة بيخلي الناس تفتكر اني مغرور لكن والله انا انسان بسيط جدا كل الموضوع اني بتكسف ومش بحب افرض نفسي على حد يمكن الموضوع دة بيضيع عليا فرص كتير لكن انا بحاول اتخلص منه .. ادعولي بقي ولواني شايف ان الخجل صفة جميلة لكن طبعا لما بتزيد مش بتكون حلوة

اهدي التاج لمين كالعادة لأى حد

........................................

حبايب هارتي ازيكو عاملين ايه .. ايه اخباركوا .. يارب تكونو بخير

اولا : انا بعتذر عن عدم الرد على التعليقات الأخيرة وتأخر نزول البوست الجديد

وعدم الكتابة في موضوع الأنتماء وذلك بسبب عطل حدث في جهازي

وحتي انا دلوقتي بكتب البوست دة من سايبر

ثانيا : لحد الجهاز ما يتصلح ونستكمل الحديث فيما كنا بدأناه قولولي رأيكوا في الأغنية والرباعية دول

انا ليكي ايه

انا ليكي ايه

قلب بتحبيه

ولا حد بتنسي بيه

حد تاني خانك

واللي بنبنيه

هتحافظي عليه

ولا هتهديه لو قلبه ندالك

جاوبي سؤال حيران في قلبي

عشقاني ولا هتسيبي قلبي

هتعيشي معايا ولا في يوم

هصحي ألاقي قلبك مش جنبي

بتبقي معايا ومش معايا

شايفاني لكن مش حاسة بيا

وبتبقي ايديك في حضن ايدي

لكن بتبقي بعيدة عليا

واقول كلام مش سمعاه

واحكي في غرام مش حساه

وتقول شفايفك ايوة بحبك

وترد عيونك تقولي لا

..............................

الرباعية دي يا جماعة ممكن ابقي اقولها لمراتي لما تغضب وممكن بردة تقولها انتو

كمان ( احنا برضة اخوات والناس لبعضها ) .. وانا منتظر رأيكوا فيها

يا حبيبتي الست بردة ملهاش غير بيت جوزها

دة المكان الوحيد اللي ممكن يساعها

معقولة نسيتي درشاوي وحكاوي الغرام

ارجعيلي يا اللي غايبة من تلات ايام بحالها

ملحوظات بعد القرأة

1- مرة تانية يا جماعة لو حد اعجب بكلمات الأغنية وكان بيلحن يقولي الأول علشان نظبط مع بعض

2- انا منتظر رأيكوا في الأغنية والرباعية كمان وسامحوني لو اتأخرت في الدخول عندكم وترك التعليقات وذلك حتي يتم تصليح الجهاز

واخيرا انا بحبكوا قوي

بشتاق لعنيكي ... اغنية لمصر

تحديث مهم جدا

دة يا جماعة لينك مدونة صديقي المبدع الشاب محمد حلمي مخلوف

( لمحة من حياة الكائن صفر)

makhlof-kaensafr.blogspot.com

واللي كتب قصة ( بين عربات القطار 999)

اللي عجبتكم واثنيتوا عليها

ياريت ياجماعة بعد ماتقرؤ البوست دة وتعلقوا عليها تروحو تزوروا محمد وتقرؤا أول قصصه في المدونة ( من اجندة الروائي )

مرة تانية مبروك يا محمد وفي انتظار الأبداعات الجامدة منك .

.........................................

اولا : وقبل كل حاجة عايز اقول ان يوسف شاهين ياجماعة في فرنسا دلوقتي للعلاج لازم كلنا ندعي له ربنا يشفي عنه وعن كل انسان مريض وزي ماقولت قبل كدة نختلف حول افكاره او حوله هو كشخص لكن مانقدرش ابدا نختلف علي انه بيحب مصر قوي ... ربنا يشفي عنك ياشاهين وعن كل انسان مريض .. قولو امين

..............................................................

بشتاق لعنيكي

بشتاق لعنيكي في الغربة
بشتاقلك ياللي وحشاني
بعيد عنك دي الحياة صعبة
ونفسي ارجع ليكي من تاني
مشتاق لحضن امي
مشتاق لحنان ابويا
مشتاق لعيون اختي
مشتاق لهزار اخويا
مشتاق لشلة اصحابي
والخروج والسهر علي النيل

نشوف فيلم سينما
وناكل ايس كريم
ياما في الليل سهرنا
وقولنا كلام كتير
وبسرعة الوقت فاتنا
وحان وقت الرحيل

بيني وبينك بعد ومسافات
لكني فاكر كل الحاجات
ليه غربتيني وخلتيني ابات
بعيد عن حضنك
اللي دايب فيه
انا لما لاقيت الجرح زاد
ماكانش حل غير البعاد
عايش وحيد وفي قلبي اهات
بس قوليلي
كنت اعمل ايه
وزعلانة ليه لما بلوم
بلوم عليكي لأنك امي

مش سهل اعيش منك محروم

وانتي بتجري جوة دمي

............................................

ملحوظات حول الأغنية

1- هذه الأغنية مهداه لكل من يتهمنا نحن مواليد مابعد حرب اكتوبر بعدم حب الوطن هذه الأغنية هي الموجز اما التفاصيل ان شاء الله في البوست القادم

2- لو حد بيلحن واعجب بكلمات الأغنية وحب يلحنها يقولي الأول علشان نقدرنظبط مع بعض

واخيرا لكم جميعا كل محبتي واحترامي .

فيديومهم وتاج

• تحديث 3... مهم جدا
• يوسف شاهين يا جماعة عيان قوي ادعوله بالشفاء ... ممكن نختلف معه ومع افكارة لكن ماحدش يختلف ابدا انه فنان حقيقي وانه بيحب مصر قوي
• ادعوله من قلبكوا ربنا يشفي عنه ... ربنا يشفي عنك ويقومك من محنتك يا شاهين يا جميل
• تحديث 2
• التحديث دة ياجماعة يستحق بوست لوحد ولولا اني لسة منزل البوست امبارح كنت كتبته في بوست جديد
• انا ياجماعة النهاردة قصيت سهرة جميلة جدا في دار ميريت حيث كان يعرض الفيلم الروائي القصير ناس من الأيام عن قصة الأديب الكبير ابراهيم اصلان الرجل والأشياء الفيلم سيناريو و حوار باسم شريف واخراج عجمي السيد وشوفت هناك ناس بجد كنت سعيد اوي اني شوفتهم شوفت الشاعر الكبير جدا احمد فؤاد نجم
• (اه والله العظيم شوفته وسلمت عليه وحضنته وبوسته كمان )
• وكان معاه الأستاذ الكاتب الكبير جدا جدا جدا ابراهيم اصلان والمخرج الكبير مجدي احمد علي وقابلت كمان الروائي الجميل طارق امام والكاتب الصحفي محمد فتحي وخالد كساب محرر ضربة شمس بجريدة الدستور .. الوقت بجد كان ممتع قوي
• واخيرا .... باسم الجميل اشكر لأنك اعطيتني فرصة هذه الأمسية الجميلة التي لن انساها
• http://basemsharaf.blogspot.com
• دة لينك مدونة باسم
• ودة لينك مدونة طارق امام
• tareqemam.blogspot.com
• ياريت لوتدخلو عندهم
• ...............................................
• البوست دة ياجماعة جزئين فيديو وتاج
• من غير مقدمات تعالو ندخل في الموضوع علي طول
• الفيديو
• 1- الفيديو دة ياجماعة اكبر دليل علي ان مصرلسة فيها رجالة بجد تقدر تقول

• لاء للظالم .. اكبر دليل علي ان احنا اقوي بكتير قوي مما نتصور وغيرنا اضعف بكتير مما بيحاول يوحلنا بيه
• اكبر دليل كمان علي ان الأمن البعبع اللي الحكومة بتطلعه في وشنا كل شوية ممكن يخوف 100 ولا 200 لكن شعب كامل لاء
• فتحية لأبطال المحلة العظام الذين اثبتوا لنا وللعالم كله ان في مصر مازال هناك رجال شرفاء لا يتنازلون عت حقوقهم ولا يخشون الحاكم ولا يخشون كلابه
• ملحوظات حول الفيديو
• هذا الفيديو منقول من مدونة اخي ( الزاهر )
• http://asfoorelsharq.blogspot.com/
• من اراد ان ينقله وينشره عنده فاليفعل ولكن يشر للمصدر
• 2 - لو حد ياجماعة معاه ايميل رفعت السعيد او السيد ياسين او اي حد من اللي بيشتم في شباب الأنترنت اواي حد معارض للحكومة لو سمحتو يرسل له هذا الفيديو وفيديو بلال طالب جامعة القاهرة ( اللي في البوست اللي تحت دة )
• ويكتب جملة واحدة
• ( هذا مافعله الشباب ارونا مافعلتموه انتم ) او يبعتلي الميل وانا ابعتلهم الفيديو
• ............................................
• ثانيا : التاج
• وصلني من صديقتي العزيزة (سارة البحر )
• السؤال الأول :
• أذكر خمس أحلام على الاقل .. تخص ماضيك وتحلم فيها بتغيير اشياء .. ماذا ستعدل وماذا ستترك ؟
• بما ان اللي فات مات وانامش بحب اتكلم فيه فمافيش داعي نجاوب علي السؤال دة
• السؤال الثانى .. اذكر خمس أحلام على الأقل تخص مستقبلك :
• 1- نفسي اموت شهيد واكون في الفردوس الأعلي من الجنة وربنا يضحكلي يوم القيامة ويعطيني كتابي بيميني واكون جار لنبي محمد صلي الله عليه وسلم في الجنة
• 2- نفسي احج واعمل محتاج الرحلة دي قوي - محتاج اتطهر واتغسل م جوة -
• 3- نفسي ربنا يكرمني بزوجة بنت حلال تتحمل تقلباتي واندفاعي ودماغي الناشفة وتكون مش رغاية ومش بتحب النكد - متهيألي صعب الجزء التاني دة -
• 4- نفسي اكون كاتب كبير ليا اسلوبي الخاص في الكتابة اللي مايشبهش لحد نفسي اخترع اسلوب حديث في الكتابة زي (فرويد) مثلا ماله طريقته في التحليل النفسي يكون ليا طريقتي في الكتابة مش كلاسيكية ولا واقعية سحرية ولا واقعية اشتراكية ... طريقة خاصة بيا يكون مثلا اسمها الطريقة الدرشاوية - نسبة ليا يعني -
• كمان لو كتبت دراما - معظم كتاب الأدب كتبوا دراما بصراحة مش عارف ليه يمكن علشان الأدب مش بيأكل عيش وهو في الأول والأخر بني ادم وله احتياجاته - اكتب اعمال جميله وهادفة وراقية اللي يشوفها يقول الله عليك يادرش مايقولش - زي مانا مابقول علي اللي بشوفه دلوقتي - ايه الهبل دة
• 5 - نفسي ربنا يكرمني واقدر اعمل مشروع خيري كبير يهدف لأطعام الطعام ..اسؤ حاجة في الدنيا الجوع .. الأنسان لما بيجوع بيتحول لوحش وبنسى كونه انسان وممكن يعمل اي حاجة علشان يسد الجوع دة
• نفسي كمان اعمل دار نشر.. تنشر لكل شاب بيدور على فرصة من غير ما اخد منه فلوس - زي مابيحصل دلوقتي - بالعكس لو قدرت اديله فلوس اديله.. علشان يحس انه لما قعد علي المكتب وتني ظهره وخرج عصارة افكاره تعبه دة ماجاش علي الفاضي وانه ماغلطش لما ساب الكرة وجلس يقرأ وزي الكرة مابتدي كتير القرأة والكتابة بتدي اكتر .. اعمله حفلات توقيع والتلفزيون يجي يسجل ونعمل دعاية في
• الجرائد وبوسترات للكاتب والكتاب - وطبعا دار النشر - .. لازم الكاتب في مصر ياخد حقه ربنا يوفقني اني اعمل دة علي الأقل لما اموت هلاقي حد يقول الله يرحمه

السؤال الثالث: أذكر شخصين على الأقل متواجدين فى حياتك حاليا .. كنت تود وجودهم قبل الآن بزمن ..

بصراحة مش عارف مافيش حد معين

السؤال الرابع :

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا

ابويا الله يرحمه لأنه مات وهو صغير - ماكملش 54وانا كنت لسة 19 سنة ومالحقتش اتمتع بيه ... ربنا يرحمه ويرحمنا جميعا احياء واموات

السؤال الخامس .. تهدى التاج لمين ؟؟

لأي حد عايزيجاوب عليه

تحديث

ياجماعة انا لاحظت ان معظم التعليقات بتتكلم عن التاج وبس لو سمحتوا انا بردة عايز رأيكوا في الفيديو كمان .

والله عمار شبابك يامصر

تحديث تاني مهم جدا :

علي غير العادة بعمل التحديث من فوق ودة لأهمية الأمر صديقتنا الجميلة جدا والرقيقة جدا كاميليا صاحبة مدونة (بستان زهرة الكامليا)

http://kamiliaty.blogspot.com

تجوزت يا جماعة ولازم كلنا نروح نباركلها ونقولها ألف مبروك

مرة تانية : ألف مبروك ياصديقتي الجميلة جمع الله بينك وبين زوجك في خير وحققا لكما كل الأحلام وجعل كل ايامكم سعادة

......................................................

ازيكوا يا جماعة .. عاملين ايه .. يارب تكونوا بخير

بصوا تفاصيل الفديو دة

هتلاقوا تفاصيله علي اللينك دة

ttp://www.elbadeel.net/index.php?option=com_content&task=view&id=17546&Itemid=83

انا لما شوفت الفيلم وقرأت التفاصيل قولت جملة واحدة بس والله عمار شبابك يامصر .. يارب يكون رأيكو من رأيي

حاجات مهمة جدا

1- لما تقرؤا التفاصيل لو سمحتو ركزو علي سلوك الناس الكبيرة اللي بتتهمنا دايما - احنا الشباب - بعدم الأنتماء وحب الوطن .. ركزو علشان تتأكدو بنفسكوا مين اللي بيحب البلد بجد ومين اللي مابيحبش غير مصلحته

2- انا جبت التفاصيل من المدونة اللي هتلاقوا عنوانها علي الفديو ياريت تبقوا تدخلو عليها لأنها بجد مدونة جميلة وفيها حاجات مهمة جدا

3- اليومين دول انا بستمتع بقرأة كتابي المدونين ومجموعة ( بحيرة المساء ) لأبراهيم اصلان و ( عزيزي 999)لمحمد هشام عبية وبقرأ بكل الحب والأستمتاع

( المسحوق والأرض الصلبة ) لأبراهيم عادل و( ارز بلبن لشخصين ) لرحاب بسام

بجد ياجماعة لو قدرتو تقرؤا الكتب دي اقرؤها مش هتحسو ابدا انكوا ضيعتو وقتوكو او فلوسكم

واخيرا .... دومتم بكل الخير والحب

تحديث :

اشتريت كتاب رحاب بسام يوم الخميس الظهر لاقتني بنتهى منه يوم السبت الصبح ... رحاب انتي عملتي فيا ايه ؟