اعترافات رئيس سابق في معرض الكتاب

اهداء

لكم انتم جميعا يا اجمل اصدقاء

*****************

الحمد لله الذي بنعمته تتم الصالحات

____________

فرحان ونفسي اضم الدنيا بين احضاني

ونفسي ابوس الخلق ستات ورجالة

وبعد البوس نبوس تاني

يا ايتها الدنيا اشهدي

بدأت احقق حلم من احلامي

ايها السادة يسعدني ان ازف لكم هذا النبأ الهام والعاجل

ففي معرض الكتاب هذا العام انتم على موعد مع الحدث الادبي الاهم

ذلك الحلم الذي طال انتظاره وهاهو يتحقق بفضل الله

انه صدور المجموعة القصصية الاولي ( اعترافات رئيس سابق ) للأديب والمبدع الشاب

مصطفي ريان والصادر عن داراكتب بالتعاون مع الكاتب

يا اخيرا يا جماعة الحلم اتحقق وهتحول من مجرد كاتب على الأنترنت للأديب معترف به له كتاب في السوق يتادوله الناس ويباع في المكتبات

الحلم دة انا كنت بحلم بيه من ساعة ماكنت طفل صغير ماكملش عشر سنين وكنت بقرأ قصص الأطفال وبعدها اعيد كتابتها مع تغيير في الاحداث على طريقتي انا - لانها بصراحة ماكنتش بتعجبني - ( يعني اخلي الفيل يعمل كذا بدل كذا والعصفورة تعمل كذا بدل كذا ) كنت بقول لنفسي امتي بقي اكبر ويبقي ليا كتاب عليه اسمي والحمد لله الحلم خلاص بيتحقق

المجموعة تحتوي على 19 قصة قصيرة ينتمي معظمها للأدب الساخر والفانتزيا منشور منه خمسة قصص في المدونة والباقي سيكون حصري للكتاب ( علشان ماحدش يقول ماكدة كدة هنقرأها في المدونة )

- ولكن اهم مايميز هذه المجموعة اسلوبها السهل البسيط الذي يصل لقلب القارئ من الوهلة الأولى دون تعقيدات اوتحفظات

كما انها تنتمي لهذا العصر بقوة ... هي لا تنتمي للماضي بل ابنة اليوم بكل مافيه

هي كتابة شابة تتوجه للشباب وتناقش مشاكلهم والتغيرات التي اصبحنا نعيشها ... ففيها مشكلة البطالة وتأخر سن الزواج ومواقع الانترنت المختلفة والمدونات وتعاملنا معها - انا اول كاتب يكتب قصة عن التدوين والمدونات ( قصة قرار هدير ) ودي حصري ليا بذكرها بس للتاريخ -

والمنغاشات الزوجية التي تحدث كل يوم وظاهرة المولات التي اصبحت ملجأ للشباب للتنزه والشراء وايضا القصة الرومانسية التي طالبتوموني كثيرا ان اكتبها

ايضا تحتوى على تجديد من حيث الشكل ففيها قصة قصيرة على هيئة سيناريو سينما في مزج بين القصة والسيناريو ( قصة فيلم الموسم )

- ان شاء الله يا جماعة المجموعة هتكون موجودة في سرايا داراكتب في الدور الثالث علوي في المعرض وبعد المعرض ستكون متاحة في الاسواق في مراكز بيع اكتب في القاهرة والمحافظات وسوف اعلن عن ذلك في القريب ان شاء الله- ايضا هناك حفلة توقيع في المعرض انتم جميعا مدعون إليها فأنتم الذين شجعتموني واعطيتموني مزيدا من الثقة في كتاباتي

كمان الحفلة دي هتبقي حفلة اخوكم يعني حفلتكم واظن ماحدش بيتعزم على حفلته يعني يا جماعة انتم اصحاب البيت مش المدعوين

وان شاء الله سوف اعلن عن معاد الحفلة في البوست القادم

وبما انكم اصحاب البيت عايزين منكم بقي شغل جامد للدعاية للكتاب

- اول حاجة طبعا شراء الكتاب وحضور حفلة التوقيع

- وضع صورة الغلاف في السايد بار للمدونة

- الحديث عن المجموعة في المدونة عندكم

- لو حد يعرف حد صحفي او ناقد ادبي يخبره عن المجموعة وعن معاد حفلة التوقيع

- لو حد بيشتغل في موقع الكتروني او يعرف حد بيكتب في موقع الكتروني يقوله علشان يكتب عن المجموعة

- غير بقي الدعاية الفردية عايزكم يا جماعة تتكلمو مع كل اصاحبكم ومعارفكم عن الكتاب واي حد عارف اي حد رايح المعرض لازم يقوله على المجموعة

عايزكم يا جماعة تفننو ازاي نعمل احلى شغل ودعاية للكتاب

ودة لينك المجموعة على الفيس بوك

http://www.facebook.com/home.php#/group.php?gid=49930751780

واخيرا انا عايز اقول حاجة واحدة

انا بشكركم وبحبكم لأنكم وقفتو جنبي (خاصة صفاء جلال - مهما اقول عنها مش هيكفي كلامي - وتايه في وسط البلد ومحاسن صابر ومحمد حلمي مخلوف

ووليد -عارفة مش عارف ليه - وادم ومحمد ابراهيم وسلوي وضي القمر وسمراء ودعاء مواجهات اللي كانت بتقولي دايما هتنشر امتي من اول زيارة)

ويارب المجموعة تعجبكم

و

بحبكم قوي

عزيزي القارئ انتبه

عزيزي القارئ انتبه

اترك كل مافي يديك ..الماوس .. الكي بورد .. كوب الشاي .. ماج النسكافيه

وانظر إلى هذه الصورة جيدا ..احفظ ملامحها داخل عقلك .. وارسمها بين ثنايا قلبك

فصاحب هذه الصورة هو كاتب هذه الكلمات وهو ان شاء الله سيفجر قنبلة مدوية من العيار الثقيل جدا خلال الأيام القليلة القادمة ...

مفاجأة ستغير وجه هذا العالم وتعيد تشكيل الأوضاع والأحداث بداخله

والأن .. هل تريد ان تعرفها ؟

حسنا تابع هذه المدونة باستمرار .. فإن شاء الله سوف يعلن عنها في القريب ..

القريب العاجل جدا

رباعيات ..حزينة شوية

تحديث 2

يعتب علي صديقي اهتمامي بالسيناريو ومحاولتي للكتابة في الأعمال الدرامية

يقول ان الدراما ستاخذني من الأدب وان قليل من الخبز مع الادب يكفي

واليوم مات الأديب الكبير يوسف ابو ريا بعد صراع طويل مع المرض كان يمكن ان يكون اقل وطأة لو ان الحكومة (الغير محترمة ) سارعت بعلاجه على نفقتها- كماتفعل مع الكثير ممن لا يستحق - إلا انها تلكأت وماطلت رغم مناشدة زملائه الكتاب والأدباء الكبار حتى مات الرجل رافضا ان ياخذ شيئا منها بعد ان اعطاها عمره وشبابه وفكره

- صديقي عفوا لن اخذ بنصيحتك فلا اريد ان امد يدي للأحد ... ولو كان الأدب سيجعلني في مثل هذ المصير فليذهب للجحيم

رحم الله الفقيد الكبير واسكنه فسيح جناته والهم اهله الصبر والسلوان

وحسبنا الله ونعم الوكيل في هذه الحكومة الغبية الفاشلة

..........................

تحديث مهم جداجدا جدا

فاضل على الحلو تكة

..................................

اهداء

الي اخي وليد (عارفة مش عارف ليه)

اعرف انك تحب هذه الرباعيات فاسمح لي ان اهديها لك

(1)

شافوني الناس بضحك قامو حسدوني

قالو فرحان ومزقطط وحلوة الدنيا في عيوني

ياللي بتحسدوني مش كنتو الأول تسألوني

ضحكي مش فرحة سخرية من كتر احزاني وهمومي

(2)

قابلت صاحب ليا ماقبلتوش من زمان

وكنت عايز اجري اخده بالأحضان

لكنه سلم عليا بمنتهي الفتور

انا مش زعلان منه .. ماهو دة حال الزمان

(3)

القضية يا حبيبتي انه اصلا مافيش قضية
القضية إني بايع وانت كمان بايعة القضية
القضية إني هسيب وانتي كمان قلبك هيغيب
واني عمرى ماكنت ليكي ولا انت عمرك هتكوني ليا
(4)

نفضت للمدرسة والأبلة المتنرفزة
لاجل إني اشوف عنيكي وجمالك المعجزة
لكن لاقيتك واقفة بتضحكي مع غيري
لملمت في صمت جراحي ورجعت للمدرسة

(5)

انا حبي ليكي مش بس كلام

انا حبي فعل وعيون ماتنام

لكن انتي قاسية وقلبك اناني

ومهما بعمل دايما ألام

(6)

عيني على بنت اسمها مرمر

الشكل زي القمر والدم شهد مكرر

وسالتها يوم مالك .. الحزن ساكن ملا محك ليه

قالت وصلت لتلاتين وفارس الاحلام لسة ماجاش وتقدم

(7)

بعد العيد يا حبيبتي ما بينفتش كحك
بعد لما نسيتي وهجرتي ازاي هنرجع تانى لبعض
انا مش انا ولا انت انت
اتغيرنا ومش قدامنا دلوقتي غير البعد

(8)

فكرت في كل كلمة يا حبيبتي قولتيها ليا

لاقيت اللي عايزاه مني بجد صعب عليا

صعب اخطبك واسافر وانتي تستنيني

ولا ابقي حاسس بيكي ولاتبقي حاسة بيا

(9)

انا وانتي مقضيناها دايما كدة مسيدات

والعلاقة مابينا زي مانكون اخوات

وانا عايز اقولك كلمة صريحة مريحة فصيحة

ماتيجي نفضها سيرة وننسي كل اللي فات

(10)

كل واحد فاكر نفسه روميو وبيغني علي النسوان
وكل واحدة فاكرة نفسها جوليت ودة فارس الاحلام
عالم عبيطة ودماغها فاضية
مش عايزين يصحوا من الأوهام

(11)

انا والعذاب وهواك عايشين لبعضينا
قولي اعمل ايه وياك في قصة هوانا الحزينة
بتحبني ولا دي اشتغالة و وهم
واركز معاك ولا انسي ليالينا

(12)

اشمعنى يعني الميل اللي هيفتح ماكل حاجة مابتفتحش
واشمعني يعني حبي ليكي هيكمل ماكل حاجة مابتكملش
وكل حاجة في اي حاجة بكل حاجة
بتلف وتروح وتيجي وفي الأخر مابتتحققش

(13)

لما يبقي هم الناس كورة في رجلها
يبقي شيئ طبيعي تتسرق ارضها
وتقف في طابور طويل في اخر الأمم
وتاخد فوق دماغها وينتهك عرضها

(14)

انتي عارفة ان الجواز محتاج مصاريف
وانا شاب لسة في اول حياتي والحياة تجديف
وانتي عايزة وعايزة وعايزة وحقك دة
وانا هعمل ايه وانا لسة .. طيرجناحه ضعيف

(15)

لوكنتي ياعين هتبكي على كل شيئ راح

هنعيش العمر كله في ألم وعذاب وجراح

لكن هقولك كلمة وخديها مني نصيحة

انسي امبارح دة بكرة مليان بالافراح

عن غزة

تحديث هام

اعتقد ان زيارة فنانين مصر لضحايا غزة في المستشفيات لفتة جميلة تستحق الأشادة بها ... هناك اشياء صغيرة يكون اثرها كبير جدا

فشكرا فناني مصر

........................

كنت اريد ان اتحدث عن موضوع غزة من قترة كنت اريد ان اقول اشياء كثيرة ولكن الأجتياح البري لهم لا استطيع إلا ان اقول كان الله في عون غزة وفي اهلها

اريد ان اقول هناك الأن من يتظاهر في الجامعات وامام النقابات ان الحل هو الحرب ويهتف( افتحولنا باب الجهاد) ... اريد ان اقول انا متفق معكم ان اسرائيل لن يخيفها

إلا القوة ولكن للأسف نحن الأن جميعنا لسنا مستعدين للحرب .. جميعنا حكوما وشعبا

الحرب ليست لعبة وليست عواطف وكلمات تقال ولكنها مسؤليه تحتاج للأستعداد ديني ونفسي وذهني وبدني.. تحتاج لتدريب طويل ونحن الأن لسنا مستعدين لها

حتى هؤلاء الذين يهتفون ( مش عايزين شجب وادانه عايزين مدفع ودانه ) اقول لهم انكم لا تعرفون كيف يستخدم المدفع فكيف تتطالبون بحمله

لقد عاش النبي صلى الله عليه وسلم في مكة 13 عام وفي المدينة 10 اعوام لم يرفع فيها سلاحا في وجه العدو إلاى في موقعة بدر في السنة الثالثة من الهجرة ظل صلى الله عليه وسلم 16 عام من 23عام هي عمر دعوته يربي المسلمين ويجهزهم لحمل الأمانة ولذلك عندما خاض المسلمون الحرب انتصرو ... وحتي في عهدنا الحديث بعد نكسة 67ظللنا ست سنوات كاملة نعيد بناء الجيش ونهيئ الجنود للحرب من كافة النواحي ولذلك حققنا النصر

نحن نريد ان نربي انفسنا على تحقيق النصر.. بالله عليكم هل الشباب الذي يسهر امام المقاهي يدخن شيشة ويشرب بانجو وحشيش ويعاكس هذه وهذه او ينزل في الليل شارع جامعة الدول ليصطاد العاهرات او يسهر امام القنوات والمواقع الجنسية هل هذا الشباب بحالته هذه يمكن ان يجاهد ويحمل السلاح ... الجهاد جهاد النفس اولا فكيف نجاهد عدونا ونحن لا نستطيع ان نجاهد انفسنا على صلاة الفجر واخراج الصدقة والعفو عن من ظلمنا وعدم الخوض في اعراض الغير .. كيف ننتصر وقد اصبحت الهوايه المفضلة للكثير منا الغيبة والنميمة واصبحنا نسمع جملا مثل ( يلا ننم ) او ( كنا قاعدين بنم شوية ) وكأنها شيء عادي وليست ذنبا سيحاسبنا الله عليه ... اخواني قال الله تعالى : ( وكان حقا علينا نصر المؤمنين ) وللأسف فإن ايمان الكثير منا الأن اصبح ناقصا واصبح الدين عندنا مجرد شكليات تتمثل في لحية وحجاب وسواك - وياليتنا نفعلها كما امرت الشريعة - وهي مظاهر ولا شك مهمة ولكن نسينا ان الدين المعاملة وان الإسلام عبادات ومعاملات فأصبحنا - إلا من رحم الله - مسلمين بلا اسلام وجسد بلا روح

اننا يجب ان نعلم ان بداية النصر ان نحافظ على نظافة الشارع ولا نلقي بحقائب القمامة على الأرصفة فإن ديننا علمنا ان النظافة من الأيمان

لن ننتصر إلا عندما نكف عن الغش في الاسواق وفي البيع والشراء لإن (من غشنا فليس منا )

يجب ان نعلم ان بداية النصر هي ان نطبق الإسلام على انفسنا وفي تعاملتنا فنعفو عن من ظلمنا ويسامح كل منا الآخر ولانكذب ولانغش ولا نخدع

هذه الأشياء لو طبقها كل منا على نفسه فالنعلم ان النصر قاب قوسين او ادني منا

فقط لوجعلنا ديننا واقع عملي بيننا ولنتذكر دوما أن الرسول الكريم صلى الله عليه وسلم وهو قدوتنا ومعلمنا كان قرآنا يمشي على الأرض

نصر الله غزة ورفع عنها البلاء ونصرنا واقر اعيننا بنصرة الإسلام وعز المسلمين

______________

ملحوظة ليست خارج السياق

إذا كان الحديث ان النصر يبدأ بتطبيق احكام الدين على انفسنا فاريد ان اقول ان ماحدث من جماهير الأسماعيلي في المبارة الأخيرة وقبلها في اليابان ليست من الدين

شتيمة الناس وسبهم ورميهم بالطوب وبقطع الكراسي وتخريب الأماكن العامة وزرع روح الكراهية بين الناس تنافي تعاليم الدين وتشجيع المنافس الذي يلعب ضد ابن بلدك ليس من الدين فالأهلي في اليابان يمثل مصر وليس الأهلي ... على الأقل لعيبة الأهلي مسلمين ويشهدو أن لا إله إلا الله محمد رسول الله على الأقل انصر اخوك المسلم و شجعه

الإسلام دين التسامح وليس التعصب والهمجية فهذه افعال ترفضها شريعة الإسلام السمحة

واخيرا دمتم بكل الخير

قصيدة إليها .. انتي فين

انتي فين
كل ما اروح المكان اياه
بدور عليكي مش بلاقيكي
انتي فين
ياللي في لحظة واحدة سكنتي القلب
وشغلتي البال
وحلمت بيكي العين
انتي فين
انا شاب زي الفل والله
مش حمل بهدلة
ولما شوفتك ماعرفش ايه اللي جري لي
نسيت مين انا
ارحميني
ارحمي شاب كل مشكلته في الحياه عشقه للجمال
لما يشوف ضحكة حلوة ينبهر
يروح في الف احتمال
وانتي مش بس احلي ضحكة
دة انتي احلى نسمة
دة انتي القمر بذاته
والقمر جنبك يطلع ايه
دة عيل صغير يشوفك يستخبى ويقف انتباه
خليني اشوفك حتى من بعيد لبعيد
خلي العين تسلم وبلاش سلام بالإيد
شوفتي عملتي فيا ايه
رجعتيني خمسين سنة لورا
ايام احمد ومني
وانا شاب عصر الديجتال
وفل وقشطة واوك يا مان
خلتيني مش عارف اقولك ايه
انا اللي شاعر وظيفته الكلام
مش عارف اقولك ايه
وكل الكلام يا حبيبتي معاد
واكيد انتي سمعتيه
اناعايز اشوفك
عايز اسلم عليكي واكلمك
لاء مش سلام بالعين
سلام بالقلب وسلام بالأيد
مش هضعف زي المرة اللي فاتت
واسيبك تفلتي مني
وكل الناس تعرف مشاعري ناحيتك إلا انتي
انا عارف انك حقيقة مش اوهام
وان دة مش خيال شعراء ولا احلام
واني شوفت القمر بعنيا
ولولا اني خجول شوية
كان ممكن يبقي بينا احلي كلام
خليني اشوفك بس مرة تانية
واوعدك مش هضعف ولا هتردد
هتقدم واقولك على اللي بيا
انك احلى بنات الدنيا
واني من ساعة ماشوفتك بفكر فيكي ومش عارف انام
بس اعرف انتي فين وانا اروحلك
وحتى لو في القمر هطلعلك
صدقيني دة كلام حقيقة مش بكذب
هأجر سفينة واوصلك
بس اعرف انتي فين
انا مستنيكي ماتتأخريش
وبنادي عليكي ماتبعديش
مستني مطر هواكي يروي عطش قلبي
مستني حنان حنينك ينور ضلام عمري
كل الحاجات الحلوة اللي جوايا مستنياكي
زهرة شبابي وحنان قبلي واشتياقي ليكي ولهفتي
وحضني اللي بيحلم بيوم تسكنيه
حتى الشاعر اللي جوايا مستنيكي
ومحضرلك احلى كلام .. لاء مش كلام
احلى مشاعر ممكن يقولها حبيب لحبيبته في يوم
مستنيكي ..
وحرام عليكي تعملي فيا كدة
وفين تلاقي حد يحبك كدة
وتعالي بقي
لانك وحشتيني
ولأني بحبك
بحبك ومش هقولك كلمة تانية

يوم التدوينة البيضاء

تضامنا مع مدوني تونس .. لا لكبت الحريات في تونس وفي اي مكان

منتظر الزيدي شعرا عند البسطاء

تحديث مهم جدا

انا ياجماعة مسحت بوست الهجرة

مسحته بمزاجي وكامل ارادتي الحرة ومن غير اي ضغط من حد

مسحتها لأن صاحبها مسح المدونة كلها ولاني دلوقتي ببدأ صفحةجديدة من حياتي ومش عايزالماضي يأثر علي المستقبل اللي فارد ايده ليا

ياريت يا جماعة محدش يكلمني عنها تاني لأنها خلاص صفحة وانطوت للأبد

......................

يارب يا جماعة تكونو بخير وصحة وسعادة

البوست دة يمكن يكون اسرع بوست نزلته من اول انشاء المدونة

وانا بقلب في النت لاقيت علي موقع محيط

http://moheet.com/show_news.aspx?nid=201228&pg=1 خبران شعبان عبد الرحيم بيجهز للأغنية جديدة عن ضرب البطل منتظر الزيادي لبوش بالجزمة

ولما قرأت الكلمات عجبتني جدا وحبيت اشركم معايا فيها انا لستمن محبي شعبان ولكن كلمات اسلام شدتني قوي فتحية له:

خلاص مالكش لازمة .. يا بوش يا بن اللذينه
تستاهل ألف جزمة على اللي انت عملته فينا
والله وجه اليوم يا واطي ووشك إتفضح
وشافوك الناس مطاطي من جزمتين شبح
الجزمة كانت مفاجئة .. تمام زي الزيارة
والدنيا بحالها فرحت والناس فضلت سهارى
يا قلوب كتير حزينة قومي ياللا اتبسمي
شوفي بوش وهو خايف والجزمة بتترمي
بصراحة ما قدرش أغشك وأقول زعلت عليك
ياريتها جت في وشك وخزقت عينيك
صدام اللي دبحته في أول يوم العيد
أهو ربك خد بتاره وفي نفس المواعيد
تحية عشان منتظر وتحية لجزمته
فرحنا في بوش أخيراً على آخر خدمته

بجزمتين في وشك هتسيب أمريكا على نارك
ويا عيني مش هتلحق يا بوش تاخد بتارك
في ناس كتير بسببك في الدنيا متبهدلة
بتقول يا ريتها كانت صاروخ أو قنبلة
العالم ده كله شافك وبالسعادة حس
والجزمة زي الكورة وداخلة في المقص
مليون شهيد وأكتر في الجنة فرحانين
ربك كبير وقادر يهد المتفرعنين
ضيعت شعوب كتيرة من هنا ومن هنا
بصراحة مش خسارة فيك جزمة معفنة

*****************

هتلاحظو يا جماعة ان رغم بساطة الكلمات( لتناسب ذوق مستمعي شعبان) إلا انها صادقة وخارجة من القلب ودي اكتر حاجة عجبتني فيها

كمان عجبني قوي في التعليقات رقم 33للأخ منالسعودية قال فيه

(وتلك الايام نداولها بين الناس تمثال صدام انضرب بالجدمه بس بوش هو اللى اترمي بالجذمه حد قدر يرمي صدام وهو عايش بالجذمه مااات اسد)

نختلف او نتفق على صدام ولكنه في الحقيقة مات وهومتماسك جدا حتي في لحظة الشنق

**************

كان فيه في التعليقات بردو قصيدة حلوة قوي للأخ اسمهmohamed55يبدوانه مصري يعيش في السعودية كان قايل فيها كلام جميل قوي .

يازايدي قلت لا

بسم الله الرحمن الرحيم

اهداء الى الشعب العربي الحر,وتحية لشرفاء الشعب العراقي,وتحية خاصة للبطل الشجاع "منتظر الزايدي" 15/12/2008

*********

يا زايدي قلت لأه وصلت رأينا

مصري وعراقي سوري جمعت شملنا

الجزمة صوتها لسة بيرن فودننا

يا جزمة ليه بعدتي الوش من هنا

قرفانة تقربيله طب العلم هنا

تسلم ايدين لابسها ده دا اللي فنفسنا

بالجزمة مش رصاصة قتلت عدونا

قتلت كل حجة لخوفنا وضعفنا

عرفت كل ظالم دا سلاحنا فرجلنا

صحصحت فينا حاجة مدفونة فقلبنا

دي فرحة بعد عيدنا خلدتها لنا

دا رأي شاب عربي ورأينا كلنا

رسالة لكل حاكم الكيل طفح بنا

*********

في ناس بتقول ده همجي وانشق عننا

احنا العرب نسالم وبوش جاي عندنا

والجزمة مش طريقة ده سود وشنا

دا نقوله اللي زيك كثير قوي عندنا

مليون شهيد عراقي ضحايا لسلمنا

ابو غريب ده صوره مالية النت عندنا

روح شوف شباب عراقي مقتول هنا وهنا

وان شاب متقتلشي بعاره عاش وسطنا

والست دي لو امي ده شرفنا وعرضنا

والطفل ده لو ابني ازاي هنعيش هنا

روح خش أي موقع معرفتش قولنا

السلم عند قوة دي وصايا نبينا

*********

يا بوش بوشت هيبتك بدخولك أرضنا

أخذت حق لينا قتلت شعبنا

ظلمت ناس كثيرة فعراقنا وقدسنا

الجزمة مش خسارة دي فمتحف عندنا

دي مكافأة مش كبيرة دي أقل ماعندنا

والله انت حقك كل الجزم هنا

تاخذ مكان في وشك ده ختم حبنا

الكلب مش شتيمة ده بيحمي أهلنا

ده الكلب لو سألته هيزعل مننا

هيقول دانا الشهامة أنا هاعترض هنا

لو كان الكلب بوش دي اهانة لكلبنا

واحنا اللي منوفقشي نهزأ كلبنا

وصلنالك رسالة يالا امشي من هنا

*********

هيعذبوك يازايدي ويهزو فرحنا

وتخش سجن عالي وضباط هنا وهنا

قلوب الناس معاك ومعانا ربنا

متخافش بس وادعي ده قدر مكتوب لنا

لازم شوية تصبر والناصر ربنا

ده الحق ثمنه غالي وانت المثل لنا

ربك قوي بجلاله هيجبر كسرنا

والظلم وقته ساعة ويهده ربنا

والنصر يبقى لينا

*********************

اكيد بعد الكلام دة اللي قال كل حاجة رغم بسطاته ووجود بعض الكسر في الوزن والأخطاء في الكتابة (والتي تعمدت ان انقلها كما هي ) ماينفعش حد يقول حاجة تانية

ربنا يقرب النصرويجعلنا اهل له

واخيرا دمتم بكل الخير والود