حكاية توفيق الذي....شخبطة قصصية جدبدة

لا اعرف سر تلك الرغبة العاتية التى تعتريني الأن كي احكي عن توفيق .. نعم انه توفيق ..إنه توفيق الذي....

يقول سيد فيلد* لا تبدا حكايتك قبل ان تعرف نهايتها.......

ما اغبي منظري الكتابه هؤلاء .. لو كان الانسان يعرف نهايته هل كان تعذب في الدنيا كل هذا العذاب؟؟!!.........

عرفت توفيق منذ أن كان...

يقول سيد فيلد لا تبدأ حكايتك قبل ان تعرف تيمتها...

ههههه الامريكان قوم منغلقون فلو ان هذا الاحمق قرأ صلاح جاهين ما قال مثل هذا الهراء.........

حسنا حسنا الان نعود إلي توفيق....

يقول سيد فيلد انك يجب عليك ان تدخل في الموضوع مباشرة لا تضيع وقتك بالثرثره .............

ايها الامريكي المعتوه  من اعطاك الحق اظننت نفسك إلها على هذه الارض كي تحرمنا من اكثر متع الحياة بهجة بعد ال ...............

-  سيدتي هل تسمحين لي بهذه الرقصة؟

- لم لا J

- هذا الاحمر الناري يكاد ان يطير عقلي بك ..سيدتي هل انتي من اهل الارض ام حوريه هربت من اسوار الجنة؟

- اوه، كف عن ذلك لا استطيع مجاراة مغازلة الشعراء

-  سيدتي يقف الشعر تلميذا خائبا على باب حسنك.. اتسمحين لي بان نستكمل رقصتنا في جنتي الصغيرة ..انها على بعد دقائق من هنا

-  - - -- - - - -

سيدفيلد ايها المعتوه الاحمق ها انا كتبت نصي ضاربا بكل نصائحك الخرقاء بنعل حذائي ولتذهب انت وهي الي غياهب الجحيم

لا تضجرو مني سأكمل الان حكايه توفيق.. توفيق مدير الادارة في الشركة الكبيرة والذي كان حديث الناس بعد ان ظبط زوجته متلبسه بالخيانه مع (ابن عمها /صديقه) الذي عاد بعد 20 عاما من بلاد النفط

"لم تكن هند مجرد ابنة عم لي ..كانت شمس حياتي ..كنت اعشقها واعرف تفاصيلها اكثر مما اعرف تفاصيل جسدي.. كان كل من حولنا يعرف ان كل منا خلق للآخر"

"انا لم اتخلى عن هند..لم اتركها واهرب.. كانت نيران هوانا مشتعلة وكان لابد ان نطفئها ..هذا كل ما حدث"

"لم اغضب من فارس ابدا .ولم اندم على ماكان بيننا ذات يوم.. فقط انا نادمه على عمري وجسدي وصحتي واعصابي الذين اعطيتهم بكامل ارادتي لهذا الشيء البشع الذي قالو انه زوجي..ترى هل كان حقا بكامل ارادتي؟"

"انا لم اخن توفيق كان يجب ان نصلح الخطأ ولو بعضا من الوقت.. كان يجب ان نستمتع بذلك"

الغريب ان توفيق لم يذبح هند ولم يشق بطن ابن عمها رغم ما عرف عنه من غيرته الشديده........

(الانسان مجموعه تناقضات تمشي على قدمين)..هذه لم يقولها سيدفيلد ربما قالها دوايت سوين** او روبرت مكي*** ..فليبحث سيد فيلد عن قائلها ان اراد........

في صباح ذلك اليوم المشهود استيقظ اهل الحي على صرخه ملتاعه تأتي من شقة الاستاذ توفيق.. كان في حجره مكتبه معلقا بحبل من رقبته يسبح في الهواء عاريا كيوم ولدته امه..  ابيض اللحم يغوي الناظرات

الغريب انه كان فرحانا يضحك كطفل صغير يقبل ابنه الجيران وهم يلعبون عريس وعروسه هناك تحت الأريكة الكبيرة في البيت القديم

بعد تيترات النهاية

هاهو توفيق قد اصبح من اكبر عتاه الرأس ماليه ..تخلى عن بدلته السوداء الاسموكن ورباطة عنقه الزرقاء الشهيرة وحذائه الاسود ذو الكعب العريض الذي كان يلمع دائماويصنع صوتا معروفا طالما ازعج كل من كان حوله.. وارتدي بنطلون جينز وقميص كاروهات وسليبر بدون جورب غير مهتم بربط (ابزينه) يمتلك سيارة ميكروباص 14 راكب يعمل عليها خط (اول مكرم/ الف مسكن) يشغل دائما شرائط اوكا واروتيجا والست لما وامير الغناء العربي محمود الليثى

وسيد فيلد يرتدي بنطلون الترينج الاسود ذو الخط الابيض الرفيع على الجانبين على تيشيرت الاسماعيلي عليهم (شبشب له صباع) يعمل تباعا معه، يشكي دوما من سوء معاملة الاسطي توفيق الذي يلعن (سلسافينه) دائما لانه كما يراه عيل (بايظ) وكسلي ومش بتاع شغل

يركن توفيق على جنب وينزل يأكل الواد سوكا- اسم سيد فيلد الجديد- جوزين اقلام على  وشه لانه احتك (بالموزة) التى تجلس في الكنبه الاماميه وكان نتيجة ذلك انها غضبت وزعقت وقالت بضيق"ماينفعش قلة الادب بتاعه الناس بتوعك دول يا اسطى)

بعدها يطلب توفيق من (الشحط) الذي يجلس بجواره ان يبدل الاماكن مع الموزة

يزوم سيدفيلد بعدها وهو يلمحهم ضاحكين يتبادلون ارقام الموبايلات على انغام عدويه(ياختي سملتين سملتين يا اختي)

إلا ان الاسطى توفيق يجعله يفوق إلي نفسه مرة اخرى:

-  ايه ياض يا سوكا في حاجة؟

-  لاء مافيش يا اسطي

-  طب بص قدامك يا ابن الكلب 

                           (تمت)

سيدفيلد: كاتب السيناريو والمحاضر الشهير وصاحب الكتاب الاشهر (فن كتابة السيناريو) والذي يعد مرجعا اساسيا لكل كتاب السيناريو سواء كانومخضرمين اومازالو في بداية طريقهم..جدير بالذكر ان نسخة الكتاب المترجمة تابع لدى مكتبة مدبولي ويوجد منها نسخ كثيرة على الانترنت

**دوايت سوين: صاحب كتاب (كتابة السيناريو للسنيما) وهو مرجع مهم لكتاب السيناريو لانه لا يكتفي فقط بشرح السيناريو الروائي ولكن يمتد حديثه للافلام التسجيليه والدعائية

***روبرت مكي: صاحب كتاب (فن كتابة القصة) وهو كتاب مهم لكل المهتمين بكتابة القصة والروايه والسيناريو والعملية الابداعية بشكل عام، هو ايضا محاضر شهير في كتابه السيناريو وله مقاطع عديده على الانترنت يشرح فيها كتابة السيناريو وجدير بالذكر ان المركز القومي للترجمة قام اخيرا بترجمة الكتاب ليكون متوافر لكل من يرغب في مزيد من الفهم والتحليل لعملية الابداع.  

شحات الانسانيه ..قصة قصيرة جديده

- انت إيه اللي بتدهولي ده جنيه! انت اعمي .. انا عايز اقل حاجة 5 جنيه.

- 5جنيه ليه؟ تكونش على ذمتى وانا مش داري.

- ايه ..انت فاكر ان انا بشحت منك.

- لاء العفو..انت بتديني من خزاينك يا مولاي.

- انا مش باخد الفلوس دي علشاني ياغبي .. انا باخدها علشان المستقبل.. علشان الانسانيه.

- كده.. طب هات بقي ..وابقي خالي طنط انسانيه تديلك يا كوكو.

- انا غلطان ان انا بتكلم مع واحد صفيق ومتخلف زيك.

- وبتشتم كمان .. طب خد.

- انت بتمد إيدك عليا يا حيوان .. طب خد.

بعدها ونحن في المقهي ظلت احاول تهدئته وانا اعطيه كوب المياه الذي اصر أن تكون معدنية...   

لا اعرف ما الذي جذبني إليه، ولكن منذ ان صعد إلي المترو وتلاقت الاعين وشيء اكبر مني بداخلي اخبرني اننا سنقترب كثيرا ..  كشهاب خاطف جعل اعيننا جميعا تتسمر عليه .. هو الشاب الثلاثيني بقوامه الممشوق وبدلته الكاملة التى تتألق شياكتها كقمر ساطع برغم من (بهدلتها) وجرافتته الحمراء التى تزينها كعقد التاج على وجه أمير يطل كفرس جامح لايثنيه اعياءه عن التمرد والانطلاق ، وشعره المصفف بعنايه محروس بالجل يلمع كقائد مظفر بين جنوده ..

للحظات تملكتنا دهشة موجعه كأن يضربك احدهم بالفأس على رأسك فتلتفت لا تجد احدا ..ونحن نراه يمشي بيننا مادا يده طالبا المعونة .. ولكن سرعان ما كسرت حالة الصمت المدويه وبدأ التندر والسخريه.. حتى قرر احدهم أن يلقي حجرا في البحيره الراكده فانطلقت بركانا يغلي ...
- تصور يا استاذ ..إلا قولي انت اسمك إيه ولا بتشتغل إيه؟ - لم ينتظر ردا مني إذ اكمل كشلال هادر- واحد زيي معاه ماجستير في علوم الفضاء وبيحضر للدكتوراه مرتبه كام من اكاديميه البحث العملي ؟500 جنيه .. تقدر تقولي اصرف بيهم ازاي على نفسي وعلى ابحاثي وكتبي والدكتوراه.. عارف الدكتواره بتاعتي عن إيه؟عن التنميه في كوكب المريخ ..عارف لو المشروع ده تم ازاي ممكن نحل كل مشاكل الناس اللي على كوكب الارض.. انا مش بشحت ولا بمد إيدي ليا .. انا اقدر اعيش باقل من 500 جنيه دول.. انا بعمل كده علشان البحث.. بمد إيدي علشان اصنع المستقبل ..علشان الانسانية  

حاولت ان اهدئه فقلت مداعبا:

- طب ماتشوف لنا بحث على كوكب الأرض حتى لما نشوفله سبونسرتبقى سهلة. 

كآدم الذي ارتكب الخطئيه انفجر في:

- ماحنا طول ما بنفكر بالطريقه دي هنفضل بالحال ده ..لازم نبص لبكره .. بكره يا استاذ.

بعدها لم تمضي سوى لحظات قليلة حتى هبت الموجة الثانية من البركان عندما جائه القهوجي بكوب الليمون:

- إيه ده يا حيوان جايب الكوباية مش نضيفة وبقايا التفل فوق الوش .. لحد امتى هنفضل كده بنكسل نشتغل ولما بنشتغل بنستتقل نتقن شغلنا.

 وكأي صاحب جلد سميك رد القهوجي في غضب:

- إيه ياعم انت في إيه.. ماتحترم ذاتك.

لحظتها ابى جارنا إلا ان يضع بصمته فصاح غاضبا:

- ايه عم انت ماتعملك قفلة .. من الصبح عمال تزعق وماحدش عاجبك.

- وانت مالك انت يا غبي بتتدخل ليه؟!

في تلك اللحظة بذلت اقصى جهدي أن ابعده عن تلك الدائرة السوداء التى بدأت تتجمع عليه إلا أنه كجذر عنيد يضرب طوله في اقصى اعماق محيط الأرض رفض أن يتزحزح أو حتى أن يستمع لي .

بعدها لم استطع أن امنع تلك الدموع التى صرخت على وجهي وأنا ابتعد وأراه يزآر من  وجع اللكمات التى كانت تنهال عليه ، ورغم وحشيه بطشها لم تستطع أن توقف زئير كلماته..

شلال من الاسئله انفجر بداخلي وقتها ولكني للاسف لم استطع أن أجد أي اجابة..............

  

ياترى ايه؟

يا ترى الناس هنا  لسة فاكرني ولا خلاص انا بقيت في سحابة النسيان ..وضعت مع اللي ضاعو؟!

شاهد عيان على دناءه وحقاره وخيانة الاخوان .. عن احداث محمد محمود الثانية اتحدث

هذه المقاله هي شهاده عيان على احداث يوم الجمعه الحزين 12-10-2102 الذي كنت احد المشاركين فيه والذي اردت ان اسجله هنا للتاريخ وحتى لا ننسى كما هي عادتنا ولكن قبل ان اكتب احب ان اوضح شيئا مهما انني لست عضوا في اي حزب سياسي وليس لي اي طموح سياسي فكل طموحي -كما هو معروف عني - في مجال الكتابه ولذلك ليس لي اي مصلحه في  افتعال الاكاذيب ....
ثانيا : ان كل ما ساحكيه هنا رايته بعيني وحتى لا يسال اي احد فين دليلك او فين الفيديوهات ؟احب ان اوضح ان الموبايل بتاعي اتكسر - ايوة سيادتك الميكروباص داس عليه والتاتش بتاعه باظ وانا رايح بعد الصلاه - كمان ماكنتش في وموقف يسمح بالتصوير فلو حضرتك مش مصدق كلامي وشايف ان انا مش اهل ثقة فياريت تريحني  وتريح نفسك وماتقرأش لاني تعبان ومجهد بما فيه الكفايه وليس عندي اي طاقه لاي جدال عقيم مع اي احد ...  بدأ اليوم بعد صلاه الجمعه عندما وصلت للميدان كانت حوالي الساعه 2 كان كل من فيه جماعه الاخوان وبعض السلفيين  كان المنظر اشبه بجمعه قندهار  .. كل الهتافات لصالح مرسي فقط هناك مجموعه بسيطه تهتف بالهتافات المدنية سرعان ما ترفكشت بعد انقضاض الاخوان عليهم .. بعدها ظللت انا ابحث عن اي وجود للاحزاب المدنيه فلم اجد حتى اصابني اليأس وكدت ارحل .. كان في شارع محمد  محمود بعض الاشتباكات ناس بتحدف طوب على ناس وماحدش عارف مين بيشتبك مع مين .,,, بعدها قرب حوالي الساعه الثالثه وصلت مسيره التيار الشعبي والقوى المدنية قادمه من عند كوبري  قصر النيل  وانا تنفست الصعداء وقتها ..لكن في اللحظة اللي مسيره التيار الشعبي كانت بتتقدم نحو الميدان الاخوان بدأو يضربو طوب علينا ,,, الاخوان كانو كتير جدا ومعظمهم جاي بالاتوبيسات من المحافظات وطبعا كالعاده كلهم حافظين مش فاهمين اول ماقالو الله اكبر حي على الجهاد فاصل ضرب الطوب اشتغل .. التيار الشعبي تراجع شويه لكنا قدرنا نجمع نفسنا وتقدمنا نحو الميدان وبدأت الاشتباكات وموجه الكر والفر... بعدها احنا قدرنا نجمع نفسنا تاني وتقدمنا نحو الميدان والاخوان تراجعو ناحية المتحف المصري ..بعدها الامور هديت لمده بسيطه احنا فيها كنا بنهتف هتافتنا المدنيه وكنا بنطالب بسقوط التأسيسية ..بعدها بصينا لاقينا بركان من ضرب الطوب انفتح علينا من كل ناحيه احنا اتراجعنا ناحيه محمد محمود والشارع الموازي له - شارع التحرير - والقليل منا ذهب الي الصينية اللي في وسط الميدان لكن حتى دي كمان كانت كلها اخوان وحصل بعض الاشتباكات الفرديه بينا وبينهم .. كان معظم الاشتباكات دي مع البنات والاخوان كانو بيتعاملو معاهم عادي جدا كانها راجل زيها زيهم ولولا  اننا بعدنا البنات عنهم كان ممكن اشتباكهم معانا يوصل لمد الايد كنا كل ما نهتف بسقوط المرشد يتجمعو حولينا ويعلو صوتهم اكتر بهتافات مؤيده لمرسي .. كانت نظراتهم وكلامهم وتعاملهم معانا  مش تعامل اختلاف في وجهات النظر تعامل حد بينقض على خصمه كان في عينيهم نظره من التكبر والغرور  والازدراء لكل من هو  مختلف معهم  وكنت كل ما اكلم مع حد واساله انت جاي هنا ليه النهارده يقول جاي لنفس السبب اللي انت جاي علشانه اقوله انا جاي علشان تأسيسية الدستور اللي انت مستحوذ عليها انت يعني جاي تتظاهر ضد نفسك يتوه الكلام ويقول هو الميدان ده بتاعكوانتو بس اقوله بس انتو عارفين اننا جايين اسبوعين انتو جايين ليه وفين بقي خبره ال 80 سنة سياسه اللي انتو واجعين دماغنا بيها دي  ..يقولي اه احنا نازلين النهارده واللي عندكو اعملوه .. بعدها روحت في الجانب الاخر من الميدان مع القوة المدنيه ... بعدها الاخوان بدأو يضربوعلينا طوب تاني وزنقونا في شارع محمد محمود وشارع التحرير  وطول الوقت كان في محاولات للكر والفر .. اللي عايز اقوله هنا ان الاخوان كانو بيتعمدو ينشو في المناطق الحساسه في العين والوجه والقلب,,  انا شخصيا  انضربت مرتين في قلبي وجاتلي طوبه في ركبتي من وراء ( لا بقيت عارف اخد نفسي ولا عارف حتى امشي)... بعدها كنا كل ما نحاول نخرج للميدان ونهتف سلمية سلمية يضربو علينا طوب ويرجعونا ورا تاني .. بعدها وقرب المغرب بدأ الطوب يتحول طلقات خرطوش وغاز ومفرقعات,,,  وتاني  وماحدش يتفذلك ويقولي فين الفيديوهات لان زي ماقلت موبايلي انكسر واظن كمان في وسط الحاله المنيله دي ماكانش في اي امكانية للتصوير .. واللي مش مصدق يقدر بسهوله يسأل اي حد من صحابه نزل  النهارده وهيأكدله كلامي .. فضل الموضوع ده مستمر لحد بعد المغرب احنا مزنوقين في شارع التحرير ومش عارفين نخرج  وبينضرب علينا كل انواع الضرب اللي كنا بنشوفه في كل المواقع اللي حدثت قبل مرسي ما يمسك لكن الفرق ان الاخوان هما اللي كانو بيضربوبدل الداخليه,, اللي عايز اسجله هنا كمان ان وقت اذان المغرب واثناء اداء الصلاه كانو الاخوان بيضربونا عادي مافيش اي حرمة للصلاه خالص ,,, بعدها انا كنت تعبت جدا ومش قادر فقررت اني امشي ,,وحسيت ان الموضوع اشبه بمشهد عبثي مصريين بيضربو بعض وافتكرت وقتها عمنا جلال عامر ,,, بعدها عرفت انه حصل اشتباكات عند المتحف المصري قبل مالاخوان ينقولو تواجدهم عند دار القضاء العالي ... عايز اقول اني اتأكدت النهارده ان القوى المدنية مهياش ضعيفه ولا قليلة احنا كتير قوي واقويا قوي ...بس ناقصنا التجمع والتوحد ..بدليل اننا لما اتجمعنا الاخوان جريو قدامنا لحد ما وصلو    للمتحف المصري

عايز اقول كمان اني  دايما كنت بسمع عن وجود ما يسمى بعقلاء الاخوان لكني النهارده اتأكدت ان هؤلاء العقلاء زي مشروع النهضه ليس لهم وجود لوكان لهم وجود ماكانوش سمحولهم اصلا بالنزول النهارده حقنا للدماء وكان هيبقي كارت عالي يكسبو بيه  بنط بالمجان ...

كمان الناس اللي بتقول اش عرفكو ان اللي ضرب دول تبع الاخوان مش جايز تبع التيار الشعبي بالعقل كده هما التيار الشعبي هيجيبو ناس بفلوسهم يضربوهم ؟ كمان اللي بيقولو الاخوان كانو نازلين علشان حق الشهدا وتطهير القضاء هو اللي نازل علشان الشهدا يبقي كل هتفاته مرسي مرسي .. وبنحبك يا مرسي بنحبك يا مرسي .. واذا كان الامر كده ليه ماخلوش المظاهرة تبقي عند دار القضاء العالي من الاول وكانو سابو الميدان واللي فيه للقوى المدنية وكان اليوم يعدي من غير اشتباكات ... الاخوان كانو نازلين من الاصل علشان يبوظو اليوم بدليل  ان اول حاجة عملوها تكسير منصه التيار الشعبي.. فياريت الناس تاخد بالها ومايضحكش عليها بالحاجات دي

عايز اقول حاجة كمان ان دي فرصة كبرة قدامنا نكسب بيها بونط عالي في الشارع ولازم نستغلها ومانسبهاش تفوت علينا

كلمة اخيره عايز اقولها للاخوان والمتأخونين ولجانهم الالكترونيه قال الله تعالى

 ( وتلك الأيام نداولها بين الناس)

صدق الله العظيم

قصتي وصورتي نوروا الاهرام يا جدعان

اصدقائي الغاليين جدا يوم السبت الماضي نشرت جريده الاهرام قصتي (ناقصني إني اقدر اطير) في باب كتابه.. انا فرحان جدا ... شيء جميل قوي انك تفتح جرنال الاهرام بحاله فتلاقي قصتك وصورتك محتلين نص المساحه .. فرحان لاني قدرت انشر في نفس المكان اللي نشرفيه اعمامنا نجيب محفوظ ويوسف ادريس وسعد الدين وهبه وتوفيق الحكيم وصلاح جاهين وابراهيم اصلان وخيري شلبي واسامه انور عكاشه.. فرحان لانه اخيرا شيء من الحاجات الحلوة اتحقق..بدعوكم لقراءه القصه هنا.. وهنا في موقع جريده الاهرام وان شاء الله بإذنك يارب ماتكونش اخر مره وتكون بدايه لنشركتيييييييييييييررررررررررررررر قوييييييييييييييي في الاهرام وفي كل الجرايد الكبيره فيكي يا مصر,,, واخيرا شكرا  لاستاذ ابراهيم داوود محرر باب كتابه(الذي لا اعرفه ولا يعرفني اي معرفه شخصيه) اللي نشرلي القصه وادخل على قلبي فرحه وبهجه كنت ومازلت احتاج اليها http://www.ahram.org.eg/Culture-world/News/169813.aspx

غلطه الحمار الكبير (جريمه على باب الحياة).. قصه قصيره جديده

 غلطه الحمار الكبير

(جريمه على باب الحياه)

لا يعرف حتى الان كيف حدث كل ماحدث.. هل اصلا ما حدث حدث؟!

كشمس الصباح مازال يذكر كيف تعرف على ايهاب ناجي... ففي مساء تلك الليله وجد يدا تصفق له بشدة, التفت فوجدا شابا خمريا ...طويلا جذاب الطلة في الخامسه أو السادسه والثلاثين, يكبره بحوالي خمسه أو ست سنوات:

-         حلوه قوي القصيده اللي انت قلتها دي يا مان.

-         متشكر جدا,, لكن انا اول مره اشوفك هنا في القهوه.

-         آه اصل انا مابسهرش في وسط البلد كتير.. بس حظي حلو إني اتعرفت عليك النهارده,,على فكره انا فنان زيك بردو.

-         فنان في إيه؟

-         فن الحياه.

 وبالفعل فتح له ايهاب بابا سحريا على الحياه وجد نفسه منجذبا إليه نداهة يوسف ادريس.. فمعه 

عرف سهرات ( سنجريلا ) و(موندك) وشارع الهرم..وأن هناك فرق كبير بين البيرة الحقيقيه وبين ما كان يتعاطاه خلسه في مقهى (الحرية ) .. معه عرف أن في هذه الحياه هناك شيء بهي .. ندي .. لذيذ .. يسمى حريم .. هو بالتأكيد ابعد ما يكون عن هذه المسماه القديسه عبير.. التى تتعامله  دوما على إنها إلهة لا يجوز الاقتراب منها.. ودوما دوما ما يذكره (لوية بوزها ) بأخر الشهر.

إلا ان السؤال الذي كان دائما ما يدق ابواب ذهنه وغز الشياطين ولا يجد له اجابه لماذا يقدم له ايهاب كل ذلك؟.. مازال يذكر عندما ضاق بعمله كموظف علاقات عامه:

-         مابقتش طايق اروح وال800 جنيه مابيكملووش معايا اسبوع.

فضحك واخبره أنه حتى لو اصبح مرتبه 5000 جنيه فلن يكملو الاسبوع وسيظل يشكو,, وبالفعل لم يمضي اسبوعا حتى كان قد وفر له وظيفه في بنك استثماري كبير بمرتب 5000 جنيه, ورغم أنه لم يكن يحلم حتى بنصف هذا المبلغ إلا انه لم يكن يمضى اسبوع حتى يجدهم طارو كزئبق بجناحين يعود بعدها للشكوى.. فهل كان هذا الايهاب يقرأ الطالع؟!

حتى عندما رأي صديقته نرمين وقرأ في عينيه نظرات التشهي نيران متأججة لم يعقب, بعدها ورغم تأكده من تأكده أن هناك امرا ما بات يجري في الكواليس لم يلمح  بأي شيئ فقط ثمة  نظرات كان يطلقها من حين للأخر تنهش قلبه بنصل سكين بارد .. نار الجحيم ذاته أهون منه .. وعندما ضج من لظى ذاك 

السعير المستطر  سأله عن رغبته فيها لتفكيره في خطبتها رفض بشده واخبره بنصيحه تعلقت بذهنه تعلق الجندي بسلاحه في حمى المعركه (جوافايه بتاعتك انت بس احسن مليون مرة من منجاية كل الشعب فعص فيها) .

حتى جاء ذلك اليوم الذي شعر فيه أنه ورقه شجر تائهة في مهب ريح شديده في يوم عاصف . لا سند له ولا ظهر, ولاحت عبير في الافق كبئر ماء سماوى لتائه في الصحراء اوشك أن يهلكه العطش .. لا يذكر كيف تعرف ايهاب عليها ولكنه مازل يذكر جيدا كلماته عنها( هي دي الوتد اللي تشد عليه مركبك في بحر الحياه وانت مطمئن يا صاحبي  .. مش تقولي نرمين اللي من اول موجه تاخدك وتغرق) .. بعدها لم تمضى سوى ايام قلائل ونعق البوم في رأسه نعيقا اتعبه واطار النوم من عينيه .. فعبير التى كانت دوما تتهمه بعدم اخذ الامور بجديه هي الان التي ترواغ وتتملعن .. الوقت يمر ونيران الشك بركان هادر لا يهدأ ,, حتى جاء ذلك اليوم الذي زأر فيه يوم القيامه - ماكان يتصور ابدا ان يأتى بهذا الشكل-  ذهب إلي (جرسونيره) ايهاب هناك في الرحاب .. فتح بنسخه مفتاحه.. ليجده معها ينهل من خيراتها .. سابح يسبح عاريا مستمتعا وحيدا بين ضفاف نهرها .. ذلك النهر المقدس الذي طالما رفضت حتى ان يلمس شطأه ولو من بعيد .. وجدها هي عاريه مستسلمه له استسلام الرضيع لامه .. فما احقر هذه الدنيا , وما اضيقها , وما اكثر من يرتدون الاقنعة.. الغريب أن ايهاب لم يحرك ساكنا كأن شيئا لم يحدث .. بالعكس زادت كلماته الساخره من نيران بركانه:

-         ازيك يا صاحبي .. مش كنت تقول إنك جاي كنت عرفت استقبلك بدل مانا كده ههههه لا مؤاخذه يعني ,, ولا احنا صحاب بقي وما فيش مابينا الحساسيات دي.

لدغ العقرب وغزته كلماته فانقض عليه:                                                                                      

-         انت بتعمل ايه هنا يا وغد يا جبان؟

-         ههههههه وغد! يا.. ده انت قديم قوي ... انت اللي بتعمل ايه هنا؟ انت ناسي ان دي(موكنتي) ولا ايه؟ وبعدين اللي بعمله ده انت سبق وعملته هنا كتير مع نرمين وعلى نفس السرير ده ..فاكر ولا لاء يا صاحبي؟.

-         ايوه بس دي عبير الجوافايه المقدسه مش ده كلامك؟

-         ههههههههههههه مقدسه! يا... بقالي كتير ماضحكتش كده ..فاكر لما كنت دايما بتٍسألني انا ليه بعمل معاك كل ده ؟ ليه بساعدك وبهتم بيك اكتر من عائلتك ومن نفسك حتى؟ .. دلوقتي بس هقولك.. علشان كنت بشوف فيك نفسي قبل الدنيا ما تغيرني .. لكنك اول مافتحتلك باب للحياه اتغيرت.. بقيت زيي.. مافيش شيئ يهمك غير انك تشبع شهواتك ولذاتك وبس .. وكل ماتشبع واحده تطمع في تانيه وعاشره ومليون .. حتى القديسه عبير اول ما واربتلها باب للحياه خانتك , وباعت نفسها في لحظه .. كنت بساعدك علشان اثبت لنفسي اننا كلنا شهوانيين وعاهرين وخونه .. كلنا وسخين يا صاحبي .. سامعني كلنا وسخين.

-         يا .. وانا اللي كنت فاكر إنك بتعمل كده علشان الصداقة .. ده انت كنت مغفل كبير قوي وانا مش عارف

-         ههههههههه مغفل إيه.. ده انت كنت حمار.. حماركبير قوي يا صاحبي.

-         صح عندك حق .. بس الحمار ده ممكن يصلح غلطته

-         ايه هتقتلني يعني؟ انت فاكر لو عملت كده هترتاح؟ بالعكس انت عمرك ماهترتاح ..  بس حتى دي مش هتقدر تعملها لانك اتفه واحقر واجبن من انك تعمل كده.

-         انا هوريك الجبان ده هيعمل ايه

وانقض عليه عاصرا رقبته .. الغريب أن ايهاب لم يقاوم .. ظل يطلق ضحكته الهازئه التى كانت تزيد من نيرانه حتى لفظ انفاسه الاخيره وهي مازلت عالقه بشفتيه,, لحظتها اطلقت عبير صرخه

ملتاعه ... فانقض عليها وكتم انفاسها حتى فارقت الحياه ... إلا انه لم يكتف بذلك التقط السكين واخذ يطلقه في انحاء جسدها المقدس حتى سالت دماؤه انهارا تجري.. بعدها لم يدري ماحدث إذ ضجت الحجره في لحظات بإناس كثيرون منهم رجال تعلو اكتافهم دبابير ونسور اقتادوه معهم ولم يحرك هو اي ساكن إذ كان في عالم آخر.. يعصف بذهنه شلال من الاسئله يكاد ان يفتك به.. هل هل هل هل ... هل اصلا كل ما حدث حدث؟!
                               
                                    (تمت)

ناقصني إني اقدر اطير..قصة قصيرة جديدة

لم يكن بلتاجي او (بلتا) بالنسبة لنا شخصا عاديا كان حالة استثنائية ..وربما كان ذلك سر تجمعنا حوله...
اما عن ذلك العكاز الذي يتوكأ عليه فلم يكن بالنسبة له مصدر ضعف ..بل كان طوال الوقت مصدر قوة..كنا عندما نُجري تقسيمة كرة كان يغزل به ويحرز اهدافا غير عابئ بالاصابات التى طالما طالت وجوهنا منه، ولذلك كان دوما محل اعتراض على الفريق الذي يضمه "ابن الكلب ابو راسين ده مايتحسبش بواحد .. دة بتلاته يا عم انت وهو" حتى عندما كنا نقسم الأرض بحبل الغسيل مقررين أن نحولها لملعب كره طائرة كان بلتا يتألق ويحرز به نقاطا كثيرة..حتى فى تلك الليالي التى نعبر فيها نحو الجانب الآخر ساهرين عند النهر كان بلتاجي يستخدمه كمجداف "عدوا الجمايل بقي عدوا.. خيري عليكو ارض وبحر"

ومثله كان بلتاجي بالنسبة لنا شلالا يعم بالخيرات، فكثيرا ما يحدثنا عن بلاد لا نعرف عنها سوى الاسم, وعندما يحدث لأحدنا مشكلة مع من يحب يأتي إليه فيبتسم"يا سيدي بسيطة حلها كذا وكذا"فما يلبث أن يعود فرحانا حاملا معه زجاجات البيرة وتكون ليلة من ليالي العيد نقضيها فوق سطح بيته, فبعد أن (نضرب) كيلو المشكل الوصاية من عند (عنتر الحاتي)

 و(نحبس) بالحشيش الذي يجيد بلتاجي لفه كأمهر ابناء الكار يكون قد وصل لحظتها لاعلى درجات الانسجام فيترك البيرة ويمسك جيتاره ويعزف الحانا عزبة نتراقص على انغامها وعلى كلمات اغانيها التى تكون من تأليفه ايضا, ثم يعلو الانسجام  أكثر وأكثر فيغني عبد الوهاب (رجب حوش صاحبك عني) وتغني هيفاء (الاطلال) ويغني فريد الاطرش(ياطبطب وادلع) وتغنى ام كلثوم (شخبط شخابيط) ونظل هكذا حتى تطلع الشمس فيصيح فينا(يلا بقي روحوا يا ولاد الكلب انتو مالكوش بيوت تلمكو ولا ايه).. مرة وحيده فقط رأيته فيها ضعيفا .. يوم زفاف (ريهام) الوحيدة التى احب.. في تلك الليلة ارتدي بلتا بدلة كاملة كأجمل ما يكون وذهب وغنى وتراقص كل من في الحي على انغامه, ثم طلب مني أن نذهب عند النهر"عايز اشم هوا شويه" وهناك ارتمى على كتفي وبكى بكاء مريرا:

 - وليه ماصارحتهاش بحبك؟

فأشار إلي قدميه:

- ومين دي اللي ترضى تضيع عمرها مع واحد بعاهة.

كانت هذه المرة  الوحيدة التي أراه فيها ضائقا بعاهته أو اصلا شاعرا بها ..إلا أنه لم تمضي سوى اياما قلائل وتأكدت من نسيانه لها  عندما حدثتني (مدام هدى) المطلقة اللعوب جارتنا"ابن الكلب ابو عاهة طول الليل يفتت عضمي واصحي الصبح ألاقيه سايبلي 50 جنيه رغم ان الاتفاق كان 100 وساعتين بس .. عمل فيا ايه؟ ولا البيرة اللي شربهالي دي كان فيها ايه؟ ماعرفش" ورغم ذلك لم تقطع علاقتها به فكثيرا ما كنت اشم برفانها يصدع من ملابسه كشمس الضحى فابتسم ويضحك هو لابتسامتي و(يخبط) بذراعيه كتفي مشيرا بأصبعه شكل (الجوان) :
 - بقولك إيه ماعكش حاجه حلوة؟

ومضت السفينة تشق وجه النهر في هدوء حتى جاء ذلك اليوم الذي زأرت الرياح فيه بوق العاصفة
مازلت اذكر تفاصيله جيدا...  

  كنت اجلس انا وهو على المقهى عصر ذلك اليوم لا اعرف ما الذي جعلني اسأله:
- قولي يا بلتا لو لاقيت خاتم سليمان تطلب ايه من الجني؟

ترك الليِِِ ونظر إلي وكأن السؤال مس وترا حساسا بداخله ..ثم نظر إلى ذلك الصقر المحلق في السماء:
- هطلب منه الشيء الوحيد اللي ناقصني.
رددت مستغربا:
إيه؟
- ناقصني اني اقدر اطير.

 الجمني الرد كأنه القي بي فجأة إلي  قاع قاع البحر بغير قارب نجاة فقلت محاولا الخروج:
- لكن انت فعلا طيرت قبل كده لما سافرت العمرة مع الحاج.

 ولكنه اسكتني بسكينه الحاد:
- لما تفرد جناحك في السما وتطير غير لما تركب حديدة بتطير.

في تلك اللحظه شق اذاننا صوت دراجة بخارية منطلق بها شاب لم يكمل عامه الثامن عشر, عندما مر امامنا ارتفع بها حتى وقفت على عجلتها الخلفية وانطلق بها كرمح المعركة....
لحظتها لا اعرف كيف قام بلتا بحركة واحدة وقفز نحو الموتسيكل وظل ينظر نحوي ويزأر
- اهو انا نفسي ابقي زي الواد ده يا رضا .. نفسي اطير زيه.
تغير بلتا بعدها,, بات يجلس في بيته اياما طويلة , لا نراه إلا دقائق معدودة يظل يحدثنا فيها عن الموتسيكلات وانواعها واسعارها ومسابقتها العالمية وابطالها .. وعندما ازوره في بيته اجد في لوحات رسمه صورا له وهو يطير بالموتسيكل كصبي المقهي , وصورا له وهو فارد جناحيه طائرا في السماء, وصورا اخرى لصقر محلق رأسه هو ..ولا اعرف لماذا ولد بداخلي لحظتها احساسا كئيبا حاولت طرده بغير ذي فائدة.

حتى جاء ذلك اليوم الذي ذهبت إليه أنه اوحش الرفاق وأنهم يريدون عودة ليلة من ليالينا القديمة .. حاول التهرب ولكني صممت:
-  الناس جهزت الحاجة ماتبقاش رخم بقى.    

جاء على مضض وبعد وقت قليل وجدته يهمس في اذني:
 - يلا نروح نبارك للواد عصام ... النهاردة افتتاح محل العجل والموتسيكلات بتاعه.
- عجل ايه اللي عايزنا نسيب الناس علشانه دة؟
فرد في حسم:
هتيجي معايا ولا اروح لوحدي؟
في تلك اللحظة عاودني نفس الشعور الكئيب وفشلت ثانيا في محاولة طرده.
بعد أن بارك وجلس بعض الوقت قام يتفقد المحل , وقف أمام احد الموتسيكلات وظل يتفحصها كجوارهرجي حفيص يقلب قطعة ماس اصلية:
- بقولك ايه يا عصام انا هجرب الحتة دي.
رد مستغربا:
- ايه؟
بقولك هجربها اعتبرني زبون يا اخي.
- ايوة  يا بلتاجي بس ماتأخذنيش يعني انت ..
قاطعه هادئا:
- قصدك يعني علشان العكاز اطمن يا سيدي ماهو رضا هيكون معايا وبعدين مش جايز اشتريه منك.
كمن القوا عليه فجأة شلال ماء مثلج رددت:
اطمن يا عصام على مسؤليتي.
وما أن ابتعدنا حتى وجدته يخبط على كتفي:
- بقولك إيه ماتنزل وتخليني انا اللي اسوق.
رددت بحسم حاجبا عنه شمس الامل:
- بقولك إيه بلتا انت صحيح صاحب عمري لكن دي امانة.

بعدها رن جرس تليفوني ( (marym calling
- مش هترد عليها؟

- لاء لما نوصل هكلمها
- يا ابني البت بتحبك اركن ورد عليها.
وما أن ادرت ظهري حتى وجدت صوتا يصعق اذني:
ماتزعلش منى يا صاحبي لكن ده حلم عمري.
التفت فوجدته  منطلقا بالموتسيكل كصقر يسبح في السماء الرحبة , انطلقت ورأه مناديا ولكنه لم يلتفت ..
لحظتها توقفت الأرض عن الدوران, تضائلت على وسعها وانكمشت لتصبح مسرحا بلتا هو بطله الأوحد .. هو المؤلف والمخرج  والممثل هو كل عناصره , وهو الجمهور ايضا....
اوقف الموتسيكل على عجلته الخلفية وانطلق به ثم اصبح يدور ويدور كراقص التنورة ذروة لحظات التوهج والتوحد والاندماج ..ثم انطلق نحو الجانب الآخر, حاول التوقف لكن غواية النهر كانت اسرع من استوب المخرج .
طوال الليل والغواصون يبحثون عنه لم يجدوه إلا مع شروق شمس اليوم التالي ....
بعدها ظل اهالي الحي يعتبون علي لأني انا صديقه الاقرب لم احضر عزائه .. ولكن كيف احضر وبلتا كان سهرانا معي فوق سطح  بيته طوال الليل, شابا وسيما منطلقا كأجمل ما يكون ... (ضربنا) كيلو المشكل الوصاية من عند عنتر الحاتي ثم (حبسنا) بالبيرة والحشيش .....

بعدها كان بلتا كان وصل لاقصى درجات الصهللة و الاندماج فقال شعرا عذبا , ثم امسك جيتاره وغنينا ورقصنا, وغنت ام كلثوم (بوس الواوا ) وغنت هيفاء وهبي (الاطلال) وغنى عبد الوهاب (آه هي دي) وغنى سعد الصغير (يا وابور قولي رايح على فين) ، بعدها تركني بلتا وفرد جناحيه في السماء:

- انا أهو قدرت اطير يا رضا ,,, قدرت احقق حلمي واطير.
                                                   

                                             (تمت)