Friday, June 25, 2010

يوم الحداد على روح الشهيد خالد

لا لعنف الشرطة ضد اي مواطن مصري
******************************
احزان القرد ..احزانا كلنا
اغنيه احزان القرد للعظيمان فؤاد قاعود والشيخ امام عيسى رحمهما الله وادخلهما فسيح جناته ..لم اجد خيرا منها لتعبر عن حالة البوست وحالة الوطن ولكن روادنى سؤالا منذ ان سمعتها هل هذه الاغنية حقا مؤلفة منذ اكثر من 40 عاما ام انها بنت هذه اللحظة؟

video

Friday, June 18, 2010

الوحش الاحمر ..اسكتش كوميدي

المكان - امام مدخل العمارة

يدخل استاذ عربي وهو مدرس لغة عربية في منتصف العمر

- يحمل طلبات المنزل في شنط

- يجلس امام البوابة (عويس) البواب

- هو شاب (صعيدي متفرنج)في منتصف العشرينات يرتدي بنطلون جينزوكوتشي على الصديري الفلاحي ويربط العمة ويرتدي سلسلة وحظاظة ويمضغ لبانة

يجلس امام اللابتوب

عربي:سلام عليكم يا عويس

عويس: (أوه مستر عربي يو كان تيل مي أوسة)

عربي: وما الذي أوسك يا فتى؟

عويس: ده النيك نيم بتاعي على الفيس بوك

عربي: حتى انت يا بن ابن بهانة اصبح لك اكونت على كتاب الوجوه؟

عويس: اوفكورس مستر عربي الواحد لازم يعمل اب ديت للنسخة وإلا يسقط

عربي: آهٍ لو كنت عندي في المدرسة لعملتلك فورمات في طابور الصباح ولأضحكت عليك كل الطلاب

عويس: الحمد لله ان انا مش عندك في الشبكة

عربي:طب يلا شيل معايا الطلبات دي ياحسن الماستر بتاعي تعملى اجنور

عويس: سوري مستر عربي انا بلعب دلوقتى لكن انت ممكن تشوفلك فاعل غيري يشيل معاك الطلبات

عربي (غاضبا): اتوكنسلنى توكنتنيو في الجيميز والله لرفعك من العمارة دي خالص

عويس: ماتقدرش انا متصطب هنا وواخد وضعي

-يدخل الكابتن ابو كورشية وهو مدرب كرة قدم

- يرتدي الترينج وكاب ويضع سفارة في رقبته

ابو كوريشة : في ايه خير يا مستر عربي

عربي: يرضيك كده يا كابتن ابوكوريشة اقول للوغد دة (يشر نحو عويس) يشيل معايا الطلبات يقولى بلعب جيميز

(يصفر بالصفارة)

ابوكوريشة : لا يا اوسة انت كده عملت فاول جامد قوي تستحق عليه الكارت الاصفر

عربي : لا.. لابد من الأحمر

ابوكوريشة : معلش يا مستر عربي خلى قلبك ابيض

عربي: ابيض ايه يا كابتن ده بيخسر دايما

ابوكوريشة : لا ماهو اخد كورس العلاج الاحمر وبدأ يستعيد نشاطه

- ينظر عويس نحو اللاب ويبدو عليه الضيق

عويس(غاضبا): عاجبكم كدة اهو الماتش خلص

ابوكوريشة : وعملت ايه

عويس:خسرت 3

تدخل( نانسي) هى شابة جميلة ترتدي فستان احمر وتحمل في يدها حقائب بها طلبات

- ينظر الجميع نحوها بأعجاب

- عربي يهمس لأبوكوريشة

عربي : مين الوحش الاحمر ده

ابوكوريشة : دي نانسي اللي ساكنة في السابع

عربي : هذه موزة جامدة طحن

ابوكوريشة : انها قذيفة عابرة للقارت

- تقنرب نانسي منهم

نانسي : هاي يا جماعه

ابوكوريشة : هاي عليكي يا نانسي

عربي : هاي ونص

نانسي:عويس ممكن تساعدنى وتشيلى الطلبات دي ياحسن تقيلة قوي

عويس : عينيى اشيل واطبطب وادلع كمان

يحمل عويس الطلبات في سرور

- تشير نانسي لهم بيدها وتمشي

نانسي : باي

ابوكوريشة: عاش يا وحش

ويسيرعويس خلفها

- ينظر عربي وابوكوريشة نحوهما

عربي: انت مش بتقول انها ساكنه في السابع

ابوكوريشة:آه

عربي: ورغم كده الندل شال لها الطلبات وماقالش حاجة

ابوكوريشة:مش بقولك الوحش الاحمر دايما يكسب

عربي: شاطر شاطر

Friday, June 11, 2010

لأنى دلعتك ..مقطوعة زجلية

(1)

لبست القميص الوردي وروحت لأجل اقابلك

واخدت الورد في ايدي وقلت ده يلبقلِك*

وجاية متأخرة ربع ساعة بحالها

لاء مش موضوع المترو انا اللي دلعتِك

(2)

لو كنت قاسي معاكِ وبشكمك من الأول

والكلمة بقولها واحدة ومافيش مجال تتأول

ماكانش قلبك يجرؤ يفكر في التأخير

لكن مافيش مشكلة نبدأ تانى من الأول

(3)

وبس امنعي الدموع أنا مش هصدق دمعك

حتى الكلام ممنوع مش عايز اسمع غير صمتك

أنا بس اللي اتكلم وعليكي تقولي حاضر

واشاور تكوني جنبي مش لازم حتى اندهلِك

(4)

ومافيش درش ودرشاوي ولا روح قلبك ولا صافتِك

تقولي استاذ مصطفى دي اللي اسمعها منِك

راح زمن الرحرحة والجاي عهد جديد

شوفي الوش التاني ..شوفي فضاحة فعلِك

(5)

وأنا مش ظالم ليكي دة العدل والقسطاس

لو كنت غلطت معاكِ إنى ماحطتش اساس

قلت عليكي عاقلة واكيد هتصوني النعمة

لكني كنت واهم ومافيش في القلوب احساس

___________

*يلبقلك: يليق عليكي او يليق بيكي بالشامي ووضعت هنا للتسهيل ولزوم القافية

Saturday, June 5, 2010

امورة من لبنان*



اهداء

إلى الاسكندرية الجميلةالتى شهد طريقها كتابةهذاالزجل

(1)

امورة من لبنان كانت جاية كايرو


تسأل على كاتب شاب في مجلتها تحاوره


وقالولها في كاتب جامد كتاباته والله جنان


قالت طب اسمه إيه؟ قالوا مصطفى ريان


(2)

وانا كنت قاعد يومها مخنوق والدنيا ضلام


رن جرس تليفونى قالو لي تعال قوام


روحت لاقيت سنيورة فشر جمال الحور


قالتلي عيونك مالك .. قلت انا مبهور


(3)

وفضلنا نحكي ونتكلم اكتر من 5 ساعات


دقيقتين عن الكتاب والباقي ضحك وحكايات


وفي اخر الليل قالتلى يادرش انا لازم امشي


قلت رحيلك على عينى بس الأول تتعشي


(4)

ماعرفتش انام ليلتها وفضل بالى مشغول


عمال بفكر فيها وعقلى يقول ويقول


وفضلت ماسك تليفونى مستنى اول نور


قلتلها انا جايلك قالت هحضر احلى فطور

(5)

اخدت الورد في إيدي ولبست احلى ما عندي

قلتلها تتجوزينى قالتلي دخيلك دة يوم سعدي

قلتلها قولى لبايك من بكرة عليه راح افوت

هنقيم ليل الافراح من مصرإلى بيروت


__________


*:هذه هي التجربة الاولى لي في كتابة الزجل احببت ان اطلعكم عليها وارجو أن تنال اعجابكم