Thursday, August 27, 2009

رساله إلى يوسف ادريس

ازيك يا عم يوسف يا ادريس .. كل سنه وانت طيب .. رمضان كريم
ايه اخبارك .. واخبار الحياه معاك ..
انا عارف انك دلوقتى فى مكان جميل قوي قاعد بتابع بكل فرحه حركه الكتابه الجديده وانك واقف مع العيال الجديده اللي بتحفر فى الصخر علشان تكون لها اسم فى مجال الكتابه .. انت عارف كل ظروفهم وانهم لوحدهم وان كل الكبار راحوا وماحدش واقف جنبهم .. هما بس اللي واقفين جنب بعض بياخدو بإيد بعض ..
انا عارف انك بتشجعهم وبتتدعيلهم .. ولأنى كاتب جديد زي مانت عارف فانت كان لك عندي كلمتين احب تقرأهم .. قايلهملك فى القصيده دي انت عارف بقى محسوبك شاعر كمان .. ياريت تقرأهم كويس لأنهم مهمين قوي

يا ايها الرجل الساكن بداخلى
والمسمى يوسف ادريس : من فضلك اخرج
ماينفعش كل ماجي اكتب قصه ألاقيك طالعلى
ماينفعش كل ما اجي امسك فكره ألاقيك فى وشي
انا عايز اكتب قصصى بنفسي
عايز افرض اسلوبي على شغلي
عايز ابقى انا
واظن ده من حقي
وانت من قلب الورق بلاقيك بتخرجلي
واكم من فكره عبقريه سيبتها
لأنى لاقيتك انت اللى كتبتها
صحيح انا ماعرفكش من زمان
وانشغلت قبلك بالسحار وبطه
واحمد عبد الحليم عبد الله وبمحفوظ وباحسان
لكن انت اول ماشوفتك جننتنى
سكنت قلبى وخطفت عقلى
وعلشان كده بطلب منك انك تسيبنى
خلتنى حتى مش عارف اقرأ لولاد جيلى
وادفع دم قلبى فى كتب وتتركن على الرف
وانت وحدك اللي تبات فى حضن سريري
وانشغل بيك فى النهار
واسهر معاك طول ليلي
ومش سر اقولك ان انا مبهور
ببيت من لحم وبقصه لي لي
وان كنت سيبتك تترك بصمتك
على مجموعتى الاولى
فانا مش هسيبك طول الوقت
انا عايز اكتب روايه يا عم الحاج
وعايز احس ن انا اللى كاتبها مش انت
فبعد اذنك ابعد شويه
خلى الغرام مابينا دلوقتي من بعيد لبعيد
اعمل نفسك مش عارفنى وانا كمان هعمل عبيط
واوعدك اني اول ماخلص هبعتهالك على البيت ..
هبعتهالك على الميل ...
هجيلك الاهرام واشرب معاك الشاي
وهنقعد نتناقش فيها وقت طويل
بس سيبنى انتهي منها
سيبنى احس ان انا اللي كاتبها
ابسط حقوقي اني احس انها بطريقتي
وان انا اللي كاتبها
عاجبك كده ؟ خلتنى اقول نفس الكلام مرتين
وانت عارف ياعم الحاج إنه خطأ شعري كبير
واه من عنيك اللي بتقول كلام كبير
اللي فيها شقاوة الاطفال
وحكمه السنين
اه من نظرتك اللي بتوحي بألف فكره
وبتنور مليون قنديل
وشعرك المسبسب كما الواد حسين فهمي
وزوزو بتغني له يا واد يا تقيل
واه يا كبير
بعترفلك انك شاعر القصه القصيره
واني طفل صغير
بس من حق الصغير يكبر
من حقه يطير بعيد ويفرد الجناحين
وانا نفسي اطير
من غير مساعده منك ولا ملاحيظ
نفسي اغلط واتعلم من اخطائي
وان شالله حتى اقع على جدور رقبتي
وتتكسر الجناحين
بس يبقي اسمي حاولت
ومره وراء التانيه هعرف الغلط
واعرف طريق الصح منين
طولت عليك انا عارف .. بس ايه يعني
مانت ياما اخدت كتير من وقتي
فايه يعنى لما اقولك على طلبي
في صفحتين تلاته ولا حتى كانو عشرين
دي نقطه مبدأ
مسأله حياه او موت
ده الامر بجد خطير
بس تعرف .. انا مش عارف
انا ايه اللي خلانى احبك انت من دون التانين
وتبقى عندي حاجه كبيره
وابنيلك جوايا تمثال عظيم
لو كنت تعرف لو سمحت تقولي
وتبقى عملت فيا جميله .. وريحتلي قلبي
لا لا ماتقولش دلوقتي
خلى الرد ده لبعدين
ومن النهارده لو لاقتنى سيبنى
لو لاقيت ايدي بتتمدلك
وشوفتك فى المكتبه وضحكتلك وبميل عليك
اصرخ في وشي : لاء ماتشترنيش
اقرأ لولاد جيلك وماتقرأنيش
لو كنت بتحبنى اعمل حاجه لاجل تخرج منى
ضحي شويه علشان خاطري
شوفت بقى ؟ بقالى ساعتين بكتبلك لاجل بس تخرج مني
علشان تعرف قرايتك بتاخد قد ايه من وقتى
ابعد عنى بليز
ولو انى عارف ان ده كله كلام فى كلام
وانى متيم بيك
وانك لو على البعد هتقدر
فانا مش هقدر على بعدك عنى

Wednesday, August 19, 2009

عدنا

يا ..بقالى كتير ماكتبتش هنا .. تلاقيكو نسيتونى ونسيتو المدونه
لكن صحيح هو ايه اللي خلانى ابعد طول الفتره دي؟ . مش عارف يمكن بعد مانزلت الكتاب حسيت انى ماعدش عندي جديد اقوله السبب اللي عملت المدونه علشانه خلاص اتحقق .. يمكن بدات اهتم اكتر بالفيس بوك لأنه كان جديد عليا فى استخدامه وكمان علشان اخبار الكتاب توصل لعدد اكبرمن الناس .. اويمكن لأنى فى الفتره الاخيره
جالى حاله ضيق وغضب من المدونات والتدوين كله لأنى لاقيت ان فى ناس كتيره بتألف وبتفتى وبتقول حاجات اقل مايقال عنها انها مصيبه سودا
اويمكن انا عندي شويه مشاكل شخصيه مأثره عليا والحياه مش وردي وردي معايا زي ماناس كتيرللاسف فاكره او يمكن كل الاسباب دي او يمكن حاجات تانيه .. مش عارف
بس كل اللي عايز اقوله كل سنه وانتو طيبين بمناسبه رمضان وبمناسبه العوده للتدوين