Sunday, December 21, 2008

منتظر الزيدي شعرا عند البسطاء

تحديث مهم جدا

انا ياجماعة مسحت بوست الهجرة

مسحته بمزاجي وكامل ارادتي الحرة ومن غير اي ضغط من حد

مسحتها لأن صاحبها مسح المدونة كلها ولاني دلوقتي ببدأ صفحةجديدة من حياتي ومش عايزالماضي يأثر علي المستقبل اللي فارد ايده ليا

ياريت يا جماعة محدش يكلمني عنها تاني لأنها خلاص صفحة وانطوت للأبد

......................

يارب يا جماعة تكونو بخير وصحة وسعادة



البوست دة يمكن يكون اسرع بوست نزلته من اول انشاء المدونة



وانا بقلب في النت لاقيت علي موقع محيط



http://moheet.com/show_news.aspx?nid=201228&pg=1 خبران شعبان عبد الرحيم بيجهز للأغنية جديدة عن ضرب البطل منتظر الزيادي لبوش بالجزمة


ولما قرأت الكلمات عجبتني جدا وحبيت اشركم معايا فيها انا لستمن محبي شعبان ولكن كلمات اسلام شدتني قوي فتحية له:



خلاص مالكش لازمة .. يا بوش يا بن اللذينه
تستاهل ألف جزمة على اللي انت عملته فينا
والله وجه اليوم يا واطي ووشك إتفضح
وشافوك الناس مطاطي من جزمتين شبح
الجزمة كانت مفاجئة .. تمام زي الزيارة
والدنيا بحالها فرحت والناس فضلت سهارى
يا قلوب كتير حزينة قومي ياللا اتبسمي
شوفي بوش وهو خايف والجزمة بتترمي
بصراحة ما قدرش أغشك وأقول زعلت عليك
ياريتها جت في وشك وخزقت عينيك
صدام اللي دبحته في أول يوم العيد
أهو ربك خد بتاره وفي نفس المواعيد
تحية عشان منتظر وتحية لجزمته
فرحنا في بوش أخيراً على آخر خدمته



بجزمتين في وشك هتسيب أمريكا على نارك
ويا عيني مش هتلحق يا بوش تاخد بتارك
في ناس كتير بسببك في الدنيا متبهدلة
بتقول يا ريتها كانت صاروخ أو قنبلة
العالم ده كله شافك وبالسعادة حس
والجزمة زي الكورة وداخلة في المقص
مليون شهيد وأكتر في الجنة فرحانين
ربك كبير وقادر يهد المتفرعنين
ضيعت شعوب كتيرة من هنا ومن هنا
بصراحة مش خسارة فيك جزمة معفنة



*****************



هتلاحظو يا جماعة ان رغم بساطة الكلمات( لتناسب ذوق مستمعي شعبان) إلا انها صادقة وخارجة من القلب ودي اكتر حاجة عجبتني فيها



كمان عجبني قوي في التعليقات رقم 33للأخ منالسعودية قال فيه



(وتلك الايام نداولها بين الناس تمثال صدام انضرب بالجدمه بس بوش هو اللى اترمي بالجذمه حد قدر يرمي صدام وهو عايش بالجذمه مااات اسد)



نختلف او نتفق على صدام ولكنه في الحقيقة مات وهومتماسك جدا حتي في لحظة الشنق



**************



كان فيه في التعليقات بردو قصيدة حلوة قوي للأخ اسمهmohamed55يبدوانه مصري يعيش في السعودية كان قايل فيها كلام جميل قوي .



يازايدي قلت لا



بسم الله الرحمن الرحيم



اهداء الى الشعب العربي الحر,وتحية لشرفاء الشعب العراقي,وتحية خاصة للبطل الشجاع "منتظر الزايدي" 15/12/2008



*********



يا زايدي قلت لأه وصلت رأينا



مصري وعراقي سوري جمعت شملنا



الجزمة صوتها لسة بيرن فودننا



يا جزمة ليه بعدتي الوش من هنا



قرفانة تقربيله طب العلم هنا



تسلم ايدين لابسها ده دا اللي فنفسنا



بالجزمة مش رصاصة قتلت عدونا



قتلت كل حجة لخوفنا وضعفنا



عرفت كل ظالم دا سلاحنا فرجلنا



صحصحت فينا حاجة مدفونة فقلبنا



دي فرحة بعد عيدنا خلدتها لنا



دا رأي شاب عربي ورأينا كلنا



رسالة لكل حاكم الكيل طفح بنا



*********



في ناس بتقول ده همجي وانشق عننا



احنا العرب نسالم وبوش جاي عندنا



والجزمة مش طريقة ده سود وشنا



دا نقوله اللي زيك كثير قوي عندنا



مليون شهيد عراقي ضحايا لسلمنا



ابو غريب ده صوره مالية النت عندنا



روح شوف شباب عراقي مقتول هنا وهنا



وان شاب متقتلشي بعاره عاش وسطنا



والست دي لو امي ده شرفنا وعرضنا



والطفل ده لو ابني ازاي هنعيش هنا



روح خش أي موقع معرفتش قولنا



السلم عند قوة دي وصايا نبينا



*********



يا بوش بوشت هيبتك بدخولك أرضنا



أخذت حق لينا قتلت شعبنا



ظلمت ناس كثيرة فعراقنا وقدسنا



الجزمة مش خسارة دي فمتحف عندنا



دي مكافأة مش كبيرة دي أقل ماعندنا



والله انت حقك كل الجزم هنا



تاخذ مكان في وشك ده ختم حبنا



الكلب مش شتيمة ده بيحمي أهلنا



ده الكلب لو سألته هيزعل مننا



هيقول دانا الشهامة أنا هاعترض هنا



لو كان الكلب بوش دي اهانة لكلبنا



واحنا اللي منوفقشي نهزأ كلبنا



وصلنالك رسالة يالا امشي من هنا



*********



هيعذبوك يازايدي ويهزو فرحنا



وتخش سجن عالي وضباط هنا وهنا



قلوب الناس معاك ومعانا ربنا



متخافش بس وادعي ده قدر مكتوب لنا



لازم شوية تصبر والناصر ربنا



ده الحق ثمنه غالي وانت المثل لنا



ربك قوي بجلاله هيجبر كسرنا



والظلم وقته ساعة ويهده ربنا



والنصر يبقى لينا



*********************



اكيد بعد الكلام دة اللي قال كل حاجة رغم بسطاته ووجود بعض الكسر في الوزن والأخطاء في الكتابة (والتي تعمدت ان انقلها كما هي ) ماينفعش حد يقول حاجة تانية



ربنا يقرب النصرويجعلنا اهل له



واخيرا دمتم بكل الخير والود


27 comments:

mostafa rayan said...

اعتذر لكم لو هناك مشاكل في التنسيق
بس الموقع مهنج معايا ومش عارف اظبطه

Ahmed Mohamed said...

انت عارف يا درش اه الواحد هلل كتير للموضوع ده وخايف انه يكون اداله اكتر من حقه بس دا بالنسبه للغرب
الرساله كانت موجهه للغرب المحتل
احنا فرحنا بحاجه مأثرتش فيهم
دول ناس بتفكر ازاي تنمو بدولها ناس بتحاول تخرج من كبوة الازمه الاقتصاديه
مش هيهمهم شبشب ولا جزمه
دا طبعا مينقص من شجاعة الصحفي الي انا بقدر جدا فعلته ولو كنت مكانه كنت هعمل كده
وربنا يعيني واستحمل الضرب

بالنسبه لشعبولا ربنا يخليه لجميع المناسبات
تعرف انه كان بيغني لمرشحي مجلس الشعب في دائرة من الدوائر

آه وكفى said...

لأ بس انا تفرجت على شعبان وهو بيغني الاغنية ومش حافظها اذايقت منه اوي اوي اوي هزق نفسه

Adem Salhi said...

أخي العزيز؛
اكرر شكري مرة أخرى و لو يسمح لي المدونون المصريون ان أتمنى عليهم ان يضعوا لوغو التدوينة البيضاء منذ الآن لأن ذلك سيكون بمثابة الاشهار للحملة وهو ما سيزيد من عدد المشاركين انشاء الله؛ كما ان كل تدوينة تدعو الى المشاركة سيكون مرحبا بها
تحياتي و شكرا لكم

Anonymous said...

اخي الكريم احمد علام
اهلا بيك يا نجم
بص انا شايف ان فرحة الناس بموضوع شبعان دة للأننا في حالة ضعف اصلا
لوكنا في بلد متقدم ماكانش حاجةزي كدة هتأثر فينا انا بس نشرت الاشعار دي اعجابا بالكلمات ولأنها بتمثل حالة من الغضب العام الناس عايشها
لكن طبعا انا لست من مستمعي شعبان ولا من المعجبين بفنه
ارجو يا اخي انك تكون متفهم لوجهة نظري
لك كل التحية والود

- اه وكفي
بكرة يحفظها وياخد عليها
والناس تقولها معاه
نورتيني ويارب دايما بالتوفيق

Anonymous said...

ادم الصالحي
انا اظنك احد مدوني تونس
انا معك يااخي في هذه الحملة وسأشاركم يوم 25ان شاء الله
دمت بكل الخير يا اخي

تايه في وسط البلد said...

ابو دروييييييييييييش
حبيب قلبي
الظاهر ان الوقعة اثرت فيك كتير
عموما الزيدي بشجاعة ومن وجهة نظره عبر عن نفسه وعقبالنا
سلام

حاجات جوايا said...

كلمات رائعة بجد

ربنا يقرب النصر
ويجعلنا اهل له

تقبل مرورى وتحيتى
سالى

صفــــاء said...

.
والله باين علينا بقينا شعوب عبيطه والا ايه
واحد يقتل كام مليون وكل اللى فى أيدينا اننا نفرح عشان جوز جزم اتخبطو فوق راسه
للدرجه دى وصلنا للمستوى دة من قله الحيله ؟
معلش والله مش قصدى افسد فرحه الناس بس يعنى تكون فرحه على اتنصار مدوى

دعواتك معايا والنبى يا مصطفى النهاردة
.

KHALED said...

أنا ماعجبنيش الموضوع و شايفة سخيف جدا و بيضعف موقف العرب أكتر .. لإن كل إللى قدرنا نعملة إننا هللنا لواحد كان حينفجر من الغيظ فرماة بالجذمة ... دة ماينفيش طبعا إنها رسالة أكتر من كونها رد فعل للصحفى

بس ياترى هوا دة كل إللى نقدر نعملة
هيا دى الكارثة

سلوى said...

لا شك إنه حدث غير :)

نفس عننا

أنا شفت شعبان في التليفزيون وهو بيقولها

بقى اسمه شعبان الوطنى

ربنا يوفقك مصطفي ويحفظك أخي
دمت بكل الخير:)

Anonymous said...

اولا يامصطفى انا سعيدة مرتين أولا لتشريفك ليا في الدونة المتواضعة ، ثانيا لاني لقيتك مهتم قوي بالموقع الي بشتغل فيه ولاقته محل ثقة ليك بالنسبة لشعر البسطاء انا شايفة ان الناس البسطاء دول لما بيغنوا بيقولوا الي جواهم بصرف النظر عن الوزن والقافية والامور الاملائية تحياتي ليك ودايما منورني

حروف said...

انا زعلانة منك جدا يا مصطفي والله عشان بقاللك كتير مجتش عندي

Unknown said...

اغنية شعبان عجبتني جدآ مع اني مش من مستمعي شعبان
الحدث اثر في العرب جدى و صحي فيهم روح كانت غايبه من فتره طويله جدآ

بوست جميل

تحياتي

Anonymous said...

تايه في وسط البلد
منور يا صاحبي
طبعا فرحان قوي بزيارتك دي
وهكون فرحان اكتر لما تقرا القصة اللي فاتت وتقولي رأيك عنها
دمت بكل الخير يا اخي

-حاجات جوايا
ادعو مك نفس الدعاء
دمت بكل الخير والود ايتها الأخت الكريمة

- صفاء جلال
انا متفق مع رأيك ودة اللي قولته للأحمد علام لوكنا في وضع تاني ماكانش ده هيكون رد فعلنا ولا فعل منتظر
ربنا يوفقك ويكرمك يا صفاء يا جميلة

- خالد
طبعا متفق معاك انها كارثة
بس هو استخدم اللي عنده حكام العرب عملو ايه ولاحاجة يا صاحبي ودي الكارثةالأكبر
نورتني يا جميل وياريت لوتقرا القصة اللي فاتت وتقولي رأيك

- سلوي
بجد انتي انسانة جميلة قوي
ربنا يوفقك ويحفظك ويقدرلك كل الخير

- قلبي ينبض بالحب
نورتيني واسعدتيني جدا
بصي انا مش فاهم (ثانيا)
لكن طبعا متفق معاك ان مشاعر البسطاء اهم بكتير منالوزن والصصرف والأخطاء الأملائية
دمت بكل الخير والود

- حروف (دلو مرة ثانية وجرح ثاني
سابقا
يا ستي انا ماقدرش ابداعلى زعلك وانا روحت وزورتك وسيبت تعليقين كمان
هو بس انا اليومين دول مششغول بكذا حاجة ربنا يوفقني فيهم علشان كدة بتأخر شوية في الزيارة لكن موجود
وربنا مايحرمناش من تبادل الزيارات ابدا

- EmY
رايك هونفس رأيي بالظبط
دمت بكل الخير والود

حروف said...

ميرسي يا مصطفي ربنا يخليك زعلي من عشمي والله بس يارب تكون اللي في بالي الحاجات اللي شغلاك واقوللك مبروك عن قريب علي العموم في كل الاحوال ربنا يوفقك ويكرمك ويفرحك ويفرحنا بيك يا اخي العزيز مصطفي وبلنسبة للفصحي والعامية دية خاطرة واحساس كان متملكني وانا سبتة يكتب منورني يا مصطفي ومتخلنيش ازعل منك تاني

Anonymous said...

قلب ينبض بالحب
*************
اسفة اني مش موضحة كلامي انا كنت بقولك اني سعيدة ان موقع محيط من المواقع الي بتهتم تدخل عليها لانه من المواقع المفضلة لديا انا كمان علاوة على عملي به والسلام ختام

Anonymous said...

- حروف (دلو مرة ثانية وجرح ثاني سابقا

ياتري ايه الحاجات اللي في بالك دي
؟
قولي وانااقولك صح ولا غلط
نورتيي يا قمرة وان شاء الله مافيشس زعل تاني


- قلب ينبض بالحب
مافيش اسف ولا حاجة
وانتي منوراني دايما
دمت بكل الخير والود

Zika said...

أزيك يا مصطفي ايه الاخبار
فعلا انا حسيت رغم زي مانت قلت بساطة الكلمات لكن بصراحه عجبتني ودمها خفيف جدا
في جمله عجبتني اوي في البوست عندك
واحد علق عندك تقريبا
بيقول
" محدش قدر يضرب صدام بالجزمه وهو حي "
فعلا صدام مات اسد

سارة نجاتى said...

هاى يا مصطفى
بص ,أنا مش ضد اللى عمله منتظر , بس مش شايف أن مبالغ فيه شوية كم الحفاوة التى تم استقبال بها هذا التصرف , و كأنه انتصار أو حتى رد لاعتبار العراقيين ؟؟, و هو و لا كده و لا كده , و لا يستاهل شعر و نثر صراحة , ده أن يعكس شىء يعكس ضعفنا الشديد الذى وصل لمرحلة اعتبار يوم قذف منتظر لحذاءه عيد قومى , ده أنا سمعت أن الناس أرسلت للشركة التركية المنتجة للحذاء طلبيات لتصنيع نماذج مماثلة له تماما ,أى نوع من العبث هذا؟؟؟
معلش بقول رأيي بصراحة , و لا أنت مش ديموقراطى ؟؟ ههههه

تحياتى ليم و لمدونتك المتميزة

بسبوسة said...

للاسف..هو ضيع نفسة مع حد ميستهلش

Gannah said...

اتمنى انك تكون مسحت تدوينة الهجرة عن اقتناع مش بسبب ضغط الاخرين
انا من اشد معارضين البوست على فكرة
لكن الانسحاب مش الحل
واتمنى ان صاحب البوست نفسه يكون اعاد التفكير فيه
لك وله منى خالص التحية
وجعله الله فى ميزان حسناتك
تحياتى

mostafa rayan said...

- زيكا
صدام فعلا مات اسد ودة اللي انا قلته
لك كل التحية والتقدير يااخي

- سارة نجاتي
انا ديمقراطي جدا واهلا بكل رأي مخالف رأيي
زي ماقولت لوكنا في موقف اخر مش ضعف زي اللي احنا فيه دلوقتي ماكانش ده هيكون رد فعل منتظر ولا رد فعلنا احنا
لك كل التحية والتقدير يا سارة
( على فكرة بنت خالتي اسمها سارة بردو )

- بسبوسة
اهلا بيكي يا قمرة
هو استخدم اللي في ايده
عمل بينما نحن اكتفينا بالكلام
لك كل التحية والتقدير

- جنة
اهلا بيكي بعد غياب
كنت اتمنى انك تعلقي على البوست دة وتنسي بقي قصة الهجرة اللي اخدت اكتر مما تستحق دي
على فكرةانا مسحتها بعد نور الدين ماغير كلامه وشال الشتيمة اللي قالها عني وانا كنت بفكر في كدة من زمان من بعد ادم ماقفل المدونة
انا مش منحل ولا وحش كدة لكن ماحبش حد يجبرني على شيئ او يلوي دراعي على حاجة
- انا رديت عند نور الدين بس هو عامل ميودريشن والتعليق لسة ماظهرش
ارجو بقي اننا مانتكلمش عنها تاني لأني بجد مش حابب افتح سيرة فيها
خصوصا انها الأن مش موجودة لا على مدونتي ولا حتى على جهازي الشخصي

Anonymous said...

اعذرنى لكن انا معرفش ان حد بيشتم
وانا ضد الحوار اللى فيه اى جرح لاى حد
وطبعا انا بكتب من غير اى خلفية عن اللى بيحصل ولا اعرف حتى مين نور الدين
تحياتى

mostafa rayan said...

gannah
زي ماقولتلك بجد الموضوع انتهى وانا مش عايز اتكلم تانى عنه
لك كل التحية والود

Ahmed Hishmat said...

أنا لم أعجب بما فعله منتظر الزايدي
ولا بعتبره عيد بالنسبالي
وإن كان بوش شخصية لا تستحق الاحترام
هوه كل اللي في إيدينا جزمه نضرب بيها
فين المقاومة الأقوى
ولو ده كان تعبير فردي من منظر
إلا إنني أتوقع من إن كل العرب لو كانوا في موقفه هيعملوا زيه
وده للأسف
مش استرداد كرامة أو حميه أو نخوه
لإن كل المصطلحات دي ضاعت من عندنا خالص
مبقاش فيه منه إلا عند العطار
............
تحياتي
ومتنساش تزورني
عندي أسأله مهم إنك تجاوبني
عليها

اسماء عوني said...

انا متفقه معاك في كل حاجه
الا في حكاية صدام دي
صدام عاش ديكتاتور ومات ديكتاتور
بغض النظر عن طريقة موته وان فيها اهانه لينا كعرب

بس دلوقت انا عايزه اسالك سؤال
لو حسني مبارك مات
هتقول عليه بطل؟
ليه بنعتبر كل حد يموت بطل
ماهو كده كده رئيس جمهوريه " صدام " يعني عنده من الكبرياء اللي يخليه يستحمل كل ده في سبيل ان بعد ما عاش مكروه ومنبوذ من شعبه ومن جيرانه انه يلعب علي نقطه انه يموت شهيد
فيه تناقضات غريبه في موضوع صدام ده
عشان المفروض ان الناس كانت بتتمني موته
ليه لما يموت الناس تعتبره بطل
وبالذات المصريين